HOHIA 11

I MIRI nambuha-nya na banjaru-na na ma-katadaku

1Napanii i MIRI,

“Kumbuha-nya na Ihirailu piti welingu ba anakeda-mayapa,

kupaau-nya nuna na ananggu paluhu welingu la Mehiru.

2Na nyuna ba hama huka paau-nggunya nuna na ananggu

hama huka halairi-nangga Nyungga.

Nangàndi kameti maraku dàngu na tunu dupa

nduma Mbaàlu dàngu da marapu hawiangu.

3Tàka ba Nyungga pàku làti ma-papeka-nya papangga na Ihirailu,

dàngu marohu-ya wàngu mbuha namu-nggunya.

Nyunggama ma-kabida-nya nyuna

tàka nyuna nda napajia-aya.

4Wàngu mbuu ndàba na mbuha namu-nggunya,

ku-padoputu-nya lai Nyungga.

Mbuu ndàbada da mayila-na ku-pahalela-ha,

dàngu wàngu màjangu eti ba kuwua-nya pangangu.#Mbuu ndàbada ... kuwua-nya pangangu; jàka ndia: Hama tuna na ana ma-ana rara-iyapa, kulunggu-ya hi ku-puduku-ya; ku-karuduku-nya ka pahoba-nya.

5Nuda da tau Ihirailu nda dabihu-a pabeli lai Nyungga, jia ba tuna lupangu da-belika bàdi la Mehiru, dàngu ka na-pareta-ha banjaru Ahuru. 6Lundu la parai - paraingu-da ba na-kanggihaku napa-hànjalungu, napa pa-weharu-ha da pindu bokulu, hi pa-tàlaru-ya na banjaru-nggu. Nu hi natumbu, rukuda ba da-kikungu pambuha wikida, 7dàngu ba da-patidungu pa-dunjaku-ngga Nyungga. Napa pa-kapidihu-ha, tàka nda ningua ma-pahàla-ha jiapa-kai da-kaladaku pakarai pandulangu,” wàna.

8Napanii i MIRI, “Ha Ihirailu, nda jia màta-anggunggau jàka ndia nda jia dunjaku-anggunggau. Jia pamolu-nggunggauka hama tuna la Àtama? Jàka ndia ku-palua-nggau lima hama tuna la Hamboingu?#Àtama dàngu Hamboingu; Da paraingu yiada pa-pambulungu-ha dàngu na Hondumu dàngu Nggomora. Tàngaru-ya la De. 14:2 dàngu 14:8.

Nda na-torungu-a na etinggu pawunda-ya nuna, ba lalu tanjiku-mana na mbuhanggunggau nyumu! 9Nda kuhuku-anggau nyumu la hàngganggu; nda ku-pakabu-akaupa. Nadu ba Alaka, nda tau-aka Nyungga. Nyungga, na Ma-matua, ma-karia mànunggau, dàngu nda kuhàngga-anggaupa,” wàna.

10Napanii i MIRI, “Napa na kikungga na banjaru-nggu jàka ku-kangaüku hama tuna hinga dàngu jàka ku-pa-kandàndaku-ha da muhuda nyuda. Na banjaru-nggu na-manyamalu pamai lai Nyungga welingu la patama lodu la pa-marubuku-ngga nyungga. 11Welingu la Mehiru da mai pa-renggangu hama tuna ma-hawurungu, dàngu welingu la Ahuru hama tuna kabàba kulundiha. Hàla hi kukaria belinja la umada. Nyungga yia, MIRI, mapanii,” wàna.

Currently Selected:

HOHIA 11: KAM

Highlight

Copy

Compare