IMBARANI 9
9
Na huri lumungu la pinu tana dàngu na huri lumungu la awangu
1Nu na pa-njanjingu na ma-mangilu ninguma huri lumungu-na dàngu ningumbu uma ngia pa-lumungu pawulu tau. 2Na rowana na mangia ngaba nu na uma tera pawulu-da Rowa Matua wàdanya na tamuna. Lai nu ningu tandai palita dàngu ningumbu menja ngia patuu roti pa-mangejingu lai Ala. 3La mbara dalui, nu la hambeli-na na dindi tera na padua mbàla wàda, ninya na rowa, Rowa Mahupu-matua wàdanya na tamuna. 4Lai nu ninya na ngia pawotu maraku papandoi welingu la àmahu rara na ngia patunu dupa, dàngu ningumbu Pàti Pa-njanjingu na pa-kadapu weli winggirungu àmahu rara. Daa la kuru Pàti ninya na kadihi marara na maningu mànangu, dàngu na tokuna i Harungu na mambàda kalunga, dàngu da dàmbu kapambalu watu ngia pa-tulihu-ha da hakambulu Ukuna i Ala. 5La pinu Pàti nuna hi ninjai da madua da patau awangu, da maningu ruu kàpangu da ma-paninu maünya na ninya i Ala. Da ruu kàpada nuda pa-kadua-da da-hanggubu-nya na ndàbi Pàti, nu da pa-jàmangu wàda da njala. Na nyuna na rukuda yiada nda peku panii mara hau-andanya nàhu.
6Tuna nuduka ba àhalu ndàbaha. Danimbihu lodu patama da ratu la rowa mangia ngabana na uma tera la pa-palaku-ya na wai ngerada. 7Na matama la rowa mbara daluna na uma tera nuna didiya na ratu bokulu-ma-a. Na-handàkangu-a hau ndaungu ba nawundaya nuna. Ba nawunda-ya nuna nangàndi wai ria pa-mangejingu lai Ala lumuna nyuna wiki dàngu lumuda da njala panda mbutina na banjaru. 8Ba tuna nu na pawàngu, pa-habola-duna-nyaka paraïna Ngahuna i Ala, ba ninyapa na rowa mangia ngaba nu la uma tera, ndedi nambowa-a na ngarangia ma-hanggangu la Rowa Mahupu-matua. 9Yiana pa-pangera wànguya na rehi nàhu; nu da pa-mangejingu dàngu da banda maraku pangàndi-da lai Ala ba nda damàka-a pa-palànyapu-nya na eti daluna na tau na mangàndi mangejingu. 10Nadu da lii nuda ba ruku pangangu dàngu pa-ngunungu lupa huri baha hangia - hangia-aha duda. Nudaka mbuu ndàbada ba kalaratu paita wàngu mata-aha duda da pa-namatu lundu tomaya na lodu pabidi-nanya i Ala.
11Tàka i Karitu duna mbàda mai-naka ba Ratu Bokulu-ya la ngara mahàmu-ka da mambàda ninja.#da mambàda ninja; la lawiti ndai da manda pirada: da manàmu-nja. Na Maü Terana i Miri na ngia pawunda-nanya na paràma-na ba Ratu Bokulu-ya jia-yaka na uma tera na marihi bokulu manda ningu nyurangu. Nu nda ruku lima tau-aya; nda paweli-na la pinu tana pa-padikangu-aya. 12Natama-nya na Rowa Mahupu-matua la uma tera nuna i Karitu, na-handàkangu-a nduma lundu nu - nu. La rehi nu nda nangàndi-a wai ria kamambi bumbu jàka ndia wai ria ana hapia ka mangejingu; nangàndi wai ria wikina, hi kiri pahàla-nanda lundu nu - nu. 13Na wai ria kamambi dàngu na wai ria mini romba hapi dàngu na-kalatu ana hapi, pa-paiharu-nja da tau iraku tundunya na uku anggama ka da-yahangu. 14Jia ba tuna, jàka na-payaha-nja da iraku-da da tau ruku wai ria dàngu nuna na kalatu, ka manaü-naipa duna na wai riana i Karitu! Rukuna i Ngahu ma-palupangu, na-mangejingu wikina i Karitu lai Ala ba maraku manda ningu nyurangu-ya. Na wai riana na-payaha-nja da eti dalunda welingu la lii anggama manda lingu, ka talumu-nya i Ala maluri.
15Tuna nuduka hi Mali Padua la papanjanjingu bidiya i Karitu ka peku ngaladanya na kanyuru pa-lupangu na pambàda ràndi-nanja paraïna i Ala da tau da pambàda paauna. Hi natumbu nuna mbuu ndàbana ba mbàda ningu-duka mameti, nu i Karitu; na metina nuna na-pahàla-ha da tau welingu la njala pawunda-da ba pawàngu-yapa na pa-njanjingu ndai.
16Nadu jàka ningu huratu njanji la ngera kangeha-nja da pa-bànjalu, ningu bàdi mbuti ba mbàda meti-naka na tau na manjanji-ya. 17Nadu na huratu njanji la ngera kangeha-nja da pa-bànjalu ndedi pawàngu-aya ba naluri-ipa na tau na maruku limanya. Hinapa duna jàka mbàda meti-naka. 18Tuna nuduka hi pamàndu wànya wai riamai bàdi nu na pa-njanjingu#na pa-njanjingu; na lawiti mahama-nya nuna la hilu Yunani pa-njanjingu wàna, jàka ndia: huratu kangeha wànakai. na ma-wungangu. 19La mangilu-na na-patàka ndàbanya na pareta rukuna na Ukuna i Ala la banjaru Ihirailu paraïna i Muha. Hàlaka nu hi napiti wai ria ana hapi i Muha dàngu wai ria kamambi bumbu, hi na-pakoru-nya wai, hi na-paiharu wànja karàngga hihupu dàngu wulu mbimbi rara atu na Huratu-da da Ukuna i Ala dàngu na banjaru Ihirailu-ka mbuu ndàbana. 20Ba talànga wundaya nuna napanii i Muha, “Yiana jia-yaka na wai ria na ma-pamàndu-nya na pa-panjanjingu-na i Ala na panunju-mami bàdi,” wàna. 21Tunaka nu hi na-paiharu-mbunyai wai ria na Maü Terana i Miri dàngu da kanaingu pa-lumungu wànguka paraïna i Muha. 22Tuna numa nunjuya na uku anggama Yahundi, tika pambuu ndàbada-ka-amangu ba payaha wànja wai ria; hi peku jàmangu-da da njala mbulungu-ana jàka ningu wai ria mambungu.
Ba kameti maraku-ya i Karitu, na podahu njala
23Tuna nuduka na pawàngu ba payaha-manja bàdi da mahama hadanja da maninja la awangu. Tàka ndumada da maninja la awangu-ma duda, kameti maraku marihi hàmuma bàdi pawàngu. 24Nadu i Karitu ba nda tamangu-nanya la Rowa Matua paruku lima taua, na maninu maünya na Rowa Matua na ma-langatàka. I Karitu tama-nanya la awangu-ma duna; lai nu nàhu hurungu-nanya la hanggana i Ala lumunda nyuta. 25Na Ratu Bokulu Yahundi natama nimbihu ndaungu la Rowa Mahupu-matua la Umana i Miri ba nangàndi wai ria heu banda. Tàka i Karitu duna ba natama nda jia-aya la pahau dangu pa-mangejingu wikina. 26Nadu jàka tu-manaka nu, mbàda pahau dangu-dunaka bàdi làti pa-pàdangu mayila weli mula weli tanangu. Tàka nàhu na paitanda la rehi malamiri, ba na-handàkangu-ma-a duna pamai la pinu tana la pa-podahu njala ruku mangejingu-na wikina. 27Mbàda hukutu-mana-nyaka paraïna i Ala ba na-handàkangu-a pameti na tau hàlaka hi mangu parata-nya wai ngerana. 28Tuna numbu i Karitu ba na-handàkangu-a pa-mangejingu wikina la paduku-ha da njalana na madangu. Napa taï nahili mai beliya la pa-nduangu wàna, nda jia-aya ka panjàpu-ha da ruku njala, tàka ka pamàna-nja da tau da manedinya na maina.
Currently Selected:
IMBARANI 9: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
