IMBARANI 7
7
I Ratu Melikuhendiku
1Nyuna i Melikuhendiku hanganji la Halimu-ya, ratuna i Ala Mahupu-jangga. Ba nabeli-ka pabera-ha da hanganji paraïna i Ambarahàmu, lua-nanyaka pa-tàbuku-ya paraïna i Melikuhendiku hi na-pakanyuru-ya. 2Ka wotu-nanyaka i Ambarahàmu lai Melikuhendiku hangia la hakambulu welingu la mbuu ndàbada da pariba-na. (Nyuna i Melikuhendiku, jàka haleli-ya na ngarana, “Hanganji Mamola,” wàna duna, tàka ba hanganji Halimu-ya, jàka haleli-ya, “Hanganji Peku,” wàna.) 3Rukuna yiana i Melikuhendiku nda ninguma lii kaloka ba ningu amana jàka ndia inana jàka ndiakai boku la mangilu-na, nda ningumbu kaloka dedina, jàka ndiakai kaloka metina. Nyuna pa-pahamangu-ya la Ana Ala; nyuna ratu ma-palupangu-ya.
4Nu, ita-ndanyaka ba dira bokulu-ya i Melikuhendiku; bokulu tuna numaka hi lupa nawotu-nya pa-hakambulu wàda welingu la mbuu ndàbada da pangala-naka la pa-hànjalungu nyuna i Ambarahàmu, na boku la mangilu-da da banjaru-nda. 5Ninya la uku anggama Yahundi ba lupangu-ma da ratu da ana umbuku-na i Lewi ba da-ngalangu hangia la hakambulu welingu la ihi paraïda da banjaru Ihirailu, nu da angu dedi wikida, jiapa-kai ba jia ndàbaha ba ana umbuku-na i Ambarahàmu-ha. 6Nyuna duna i Melikuhendiku nda ana umbuku-na i Lewi-aya na nyuna na-ngalangu-mbu hangia la hakambulu welingu la mbuu ndàbada da pariba-naka i Ambarahàmu, hi na-pakanyuru-mbuyaipa i Ambarahàmu, làti wàmu na mambàda ngalanja da panjanji-na i Ala. 7Langatàka nda jia ningua mapanda-ya, ba nangia wawamapa duna na tau na pa-pakanyurungu welingu la ma-pakanyuru-nya. 8Da ratu ma-ngalangu hangia la hakambulu, tau mangalangu pameti-ha. Tàka na maninya la Huratu Matua, i Melikuhendiku duna na mangalangu hangia la hakambulu, tau maluri pa-ngalangu-ya. 9Ta-ngalangu-mbu patàpu-ya, nyuna i Lewi – na maana umbuku-nja da ma-ngalangu hangia la hakambulu welingu la tau Ihirailu – mbàda wotu-mbuda-haka nuda ba jiaya nawotu-naha i Ambarahàmu lai Melikuhendiku. 10Jiapa-kai ka ndedi nadedi i Lewi ta-ngalangu-mbu patàpu-ya ba mbàda ninyaka daa la ihina i Ambarahàmu na boku la mangilu-na, nu ba jiaya na pa-tàbuku-da i Melikuhendiku dàngu i Ambarahàmu.
11Ba ngaru-dapa da ratu Lewi na uku anggama Yahundi pawua-ya la banjaru Ihirailu. Rukuna ba nda natoma luana ba da-palaku-ya na paràma-da da ratu Lewi la handàka-na, ningu-duka bàdi hili ratu haàtu mahama-nya i Ratu Melikuhendiku, dàngu àmbu welina la kaloka-na i Ratu Harungu-duya! 12Nu ba tuna, jàka na-haleli na mandapu-da da ratu, na-haleli-mbudu bàdi na uku anggama Yahundi. 13Nuna nu na palana jiaya na Mirinda: Nyuna welina la hau kabihu, dàngu ndedi haàtu-a angu kabihu-na ma-katangu paràma ratu. 14Mbuu ndàbana na tau napi-manya ba welina la kabihu Yahunda na Mirinda; tàka nda natiki-maya duna na kabihu nuna paraïna i Muha ba napanii-ya rukuda da ratu.
Na hili haàtu ratu hamana i Melikuhendiku
15Na papanii-nda yiana narihi lohangu-pa ba jiaya na-kawundaku-na na hili haàtu ratu na mahama-nya i Melikuhendiku, 16hi wotuya Nyuna la paratu, nda pa-panamatu-nya na huri lawiti taua, taka pa-namatu-nya na lurina na maningu kuahangu dàngu na manda ningu njàpungu. 17Nadu ba napanii na Huratu Matua, “Nyumu ratukau lundu nu - nu hama tuna i Melikuhendiku,” ba wàna. 18Jia ba tuna, nàhu na uku ndai papahinggilu-yaka, ba nda na-undungu-apa dàngu ba nda ningu-apa linguna. 19Na uku anggama Yahundi nda ana ningua pa-pahàra-na manda ningu nyurangu. Tuna nuduka nyuta nàhu hi pa-wuangu-ta hau monungu marihi hàmu; hi peku hangiri-ndanya i Ala.
20Hinggilu-nai, nuna mbuu ndàbana wàngu pa-karia-nya harangu welingu lai Ala. Nda ningua harangu tungu nu ba wotuha paratu hawiangu. 21Tàka ba wotuya la paratu i Yehu pawàngu harangu-maya, ba napanii-nya paraïna i Ala,
“I Miri mbàda harangu-naka,
dàngu nda na-haleli-aya napa na pawuku-na,
‘Nyumu ratukau lundu nu - nu,’ ” ba wàna.
22Nu ba tuna, kawuku njanji marihi hàmu-yaka i Yehu.
23Hili ni-manyaipa na habata: dadangu-ma da ratu hawiangu, rukuna na metida hi nda na-padaingu na payàpa-da. 24Tàka i Yehu duna naluri lundu nu - nu, jia ba tuna na wai ngaba ratuna nda napala-a la tau haàtu. 25Jiambu-duyaka hi namàka pa-pamàna hàlanja da tau lundu nu - nu, da ma-ngarangia-nya Nyuna la pa-hangiri-ya i Ala, nadu ba naluri lundu nu - nu la pa-kamahi-nja ndumada lai Ala.
26Jia ba tuna i Yehu jia-yaka na Ratu Bokulu pa-kalana-nda. Nyuna na-matua; nda ana nggàra-a pahili-na jàka ndia panjala-nakai. Nyuna pa-pahinggilu-ya welingu la tau njala dàngu pa-pajangga pa-hipungu-ya welingu la awangu-ka. 27Nyuna duna nda hama-ada da ratu bokulu hawiangu, da mangàndi mànu-mapa maraku nimbihu lodu ruku njala wikina, hi mangupa rukuda da njalana na banjaru-ka. I Yehu na-handàkangu-ma-a duna pa-mangejingu wikina lundu nu - nu, ba na-mangejingu wikina ba kameti maraku-ya. 28Na uku anggama Yahundi nawotu bia tau ningu nyurangu la paratu bokulu. Tàka na ma-malamiri-nya na uku nuna, na-panjanji wàngu harangu i Ala ba nawotu-ya pa-Ratu Bokulu, na Anana na pambàda tuna Ma-pamànangu manda ningu nyurangu lundu nu - nu.
Currently Selected:
IMBARANI 7: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
