DEDI 49
49
Na pamuwangu-na i Yakupu
1Tunaka nu i Yakupu hi napaau-nja da anana, “Pauhi-wa lai yiahu la lihinggu. Napa ka kupeka-nggai jàka nggàraya na pahunggu-mi ngeru la lodu malamiri:
2Pauhi-wa ha anana i Yakupu,
patingi-nyawa i Ihirailu, na amami.
3Oi Rumbingu kawunga ananggu,
nyumuma na kapàru-nggu,
na wua kawunga-na na àtalu-nggu.
Nyumu marihi àtalu dàngu kapàru
la honga mbuu ndàbada da ananggu.
4Nyumu namuda la pakoda-nggau hama tuna na wai,
jia-duya hi nda nyumu mangia ngaba;
nadu bau katuda dànya na kalawi-nggu,
bau pa-iraku-ya na ngia pa-katuda amamu.
5I Hamiungu dàngu i Lewi ma-paangu dediha;
da madàka-da jia na pambana eti wàda.
6Nyungga nda kutama-anya
na pa-hamangu-da,
dàngu ndia mbu la pauhi-da.
Nadu ba da pameti tau wàngu karaü etida,
ba da-pakaliparu-ha da hapi mbàtingu pahàmu eti wàda.
7Pa-ràtungu-ya na hàngga da nyuda,
nadu ba lalu nda najaru-na.
Pa-ràtungu-ya na kàrangu etida,
nadu ba lalu làmburu-na.
Napa nyungga ku-paiha nggangganja
la nggubulu Ihirailu.
Napa nyungga ku-hàbaru jaranja,
la honga banjaru nggubulu-na.
8Oi Yahunda, napa nyumu mu-njakilu-ya
na kahuki papamu;
mbuu ndàbada da angumu paluhu dawotu-nggau
dàngu da-maràbaku la hanggamu.
9I Yahunda beri kamboka hingaya;
na-pameti-ya na payàpa-na,
hi nabeli la hibuna;
nyuna na kauli hi na tanggilungu,
dàngu nda haàtu-mbu matoru mbeni pa-kuhiku-ya.
10I Yahunda napa na-katangu tokungu pa-hanganji,
na wàla wuana napa na-pareta lundu nu - nu.
Da banjaru-ka napa dangàndi hilu katiku-da,#Da banjaru-ka ... katiku-da; talànga wanguna tuna nu, nu na ihina.
dàngu hi da-maràbaku ba danyàku la hanggana.
11Na ana kalandai-na nahondu-ya la pingi angguru,
na pingi angguru na mahàmu halawàla.
Nyuna na baha pakina wàngu angguru,
angguru ma-parara wai riangu.
12Darara da wua matana paraï pa-unungu angguru,
dabara da ngànduna paraï pa-unungu huhu.#Narara ... huhu; jàka ndia: darihi rara da matana welingu la angguru; darihi bara da ngànduna welingu la huhu.
13I Hembulungu napa na ngiangu la lihi tehiku;
da kapa - kapalu napa da-palabungu la pahiwi-na;
lupa la Hindungu-ya na padira tanana.
14I Ihakàru beringu kalandai halangatu-ya
nyuna na katuda la manggawa kanaingu ngàndina.
15Naitaya na pangia nuna lalu hàmuya
dàngu na-manandangu nda ukuya na tana nuna,
ka marubuku-nanyaka ba na-patiangu bukuna,
dahàni-ya paràma hama tuna ata.
16Nyumu dumu Ndàngu napa mu-patanda-nya ngera na banjaru-mu,
nyumu munjadi kabihu hama tuna na kabihu hawiangu la Ihirailu.
17Nyumu hama tuna kataru la hingi ànda kau,
kataru pa-upahungu la hingi kanjilitu,
na mawitu weli tandanya na njara
hi lupa na-kanabu tawàlahu na ma-kaliti-ya.
18Dou MIRI, na mànangu na pawua-mu,
jia-mayaka na panedi napanggu.
19Nggàtu, napa nyumu na-kaluluku-nggau ma-rambangu,
napa nyumu mu-punjilungu la paramba-nja nyuda.
20Oi Ahiaru, da pangamu da-bundungu da-mbokaru,
napa nyumu mu-payema-nja pangangu da hanganji.
21I Nàputali pangera ruha ma-pahàla-ya,
da anana#I Nàputali ... anana; jàka ndia: i Nàputali hama tuna pingi marumbingu-ya dàngu kahanga-na da ma-katombuhu. lalu mbana manandangu-ha.
22I Yuhupu beri kamboka kalandai-ya,
kamboka kalandai matàmba la lihi matawai,
napalai - lai la karaha palindi.#I Yuhupu ... karaha palindi; jàka ndia: i Yuhupu hama pingi aiya, pingi ai mawua ma-handera la kangeli.
23Nda na-najaru ba nahada ngàndiya papana,
da yaulu wànya pandi pana dàngu ana pana.
24Na nyuna ba tuna i Yuhupu pa-daingu kapàru-na na punguna,#Na nyuna ba tuna ... punguna; jàka ndia: tàka da panada nyuda dambata kaporaku da ihi punguda datamba - mbàriku.
pa-daingu mbangatu-na na panana
ruku mbihana i Ma-pawangu na Mahupu-kapàru,
na Alana i Yakupu, na Tindingu-na i Ihirailu.
25Na Alana na amamu napa na-ndulakau nyumu;
na Mahupu-mbiha na-pakanyuru-nggau nyumu,
wàngu urangu welingu la awangu
dàngu wai welingu la unu tana.
Wàngu ana dàngu hapi,
26uhu nggàndumu dàngu wàla ai.#Talànga wanguna na ndalaru yiana: uhu nggàndumu dàngu wàla ai wàna; Imbarani: da boku la mangilu-mu darihi kaborangu pa-welingu.
Na kanyuru-na na Ala amamu narihi-nja
da pawulu-da da palindi ndai weli nungu.#Na pa-haleli weli ndaingu: palindi ndai weli nungu; Imbarani: na boku la mangilu-nggu lai.
Màla àruwa ka dapuru hàla da kanyuru
la pinu katiku-na i Yuhupu,
la pinu kaba matana,
nyuna na marihi ndudu
la honga anguna paluhu-ka.
27I Mbanyamingu jiaya na ahu rumba mbeni.
La mbaru nyuna na njàkapu-ya na payàpa-na.
La rudungu nyuna na-paberi - beringu,” wàna.
28Nuda-haka da hakambulu dua kabihu Ihirailu, dàngu da pulungu papeka-na i Yakupu na amada ba na-pamuwa-nja da anana nimbihu-da.
I Yakupu ba nameti dàngu ba taninya
29-30Tunaka nu i Yakupu hi na-ràndiha da anana, “Tiangu-kika talurungu-nggunyaka-duku hama tuda da boku la mangilu-nggu. Tani-manggai duku napa la karaha-da nyuda daa la liangu la Màkapela, la pahunga loduna la Màmurei la tana Kanaàngu. I Ambarahàmu mbàda kei-mana-nyaka na liangu dàngu na woka la winggiru-na welingu lai Epurungu tau Heti ka tuya reti ba wàna. 31Lai nuduka ba tani ninya i Ambarahàmu dàngu i Hara, i Ihàku dàngu i Ripuka; dàngu lai numbu nyungga ba kutani ninya i Lia. 32Na woka dàngu na liangu da maninja lai nu pakei-mahaka welingu la tau Heti. Tani ni-mangga nyungga lai nu,” wàna. 33Ba nahàla-ka i Yakupu pa-pamuwa tunanja nu da anana, tanggilungu-nanyaka, ka meti-nanyaka.
Currently Selected:
DEDI 49: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
