DEDI 42

Da ayana i Yuhupu ba dalua la Mehiru pakei uhu nggàndumu

1Ba narongu-ka i Yakupu ba ningu uhu nggàndumu la Mehiru, panii-nanjaka da anana, “Nggikina nyimi hi ngudu bia-minya? 2Kurongu-ka ba ningu uhu nggàndumu la Mehiru; lua lai nàhu dàngu kai kei uhu nggàndumu ka àmbu ta meti rimbangu,” wàna. 3Ka laku-danyaka da ayana i Yuhupu ba tau hakambulu-ha pakei uhu nggàndumu la Mehiru. 4Tàka i Yakupu nda napuli-nya i Mbanyamingu, na eri angu dedina i Yuhupu, palua karia-nja nyuda, nadu ba na-mangàdatu napa hi ningu ngia pa-hanggàmaru wàna na ananggu wàna.

5Paraï pa-rimbangu la tana Kanaàngu, lua-danyaka da anana i Yakupu hamanai nadangu-mbu na tau hawiangu pakei uhu nggàndumu la Mehiru. 6Na ma-danggangu uhu nggàndumu la ta - tauka welingu la pa-nggubulu awangu nyuna-duka i Yuhupu, ba nggumbunuru-duya la Mehiru. Jia-duyaka da ayana i Yuhupu hi damai dàngu hi da-marubuku la hanggana. 7Ba naita-haka da ayana i Yuhupu, na tanda-maha nyuda, na nyuna na-harawuku hama tuna ba nda natanda-ha. Na wàngu pa-hanggàritu ba na-paàra-nja, “Nggàra tau kai?” wànanja.

“Nyuma tau Kanaàngu kàma. Mai mapakei pangangu,” wàda.

8Jiapa ka natanda-ha da ayana nyuna i Yuhupu, nyuda duda nda datanda-aya nyuna. 9Ka namu-nanyaka na manggadipangu-na na ngerada nyuda. Ka panii-nanyaka, “Nyimi yia tau ma-butingu-kai; mai-minyaka pa-hamata-ya yiana na tanama jàka nggiya na manda kapingatu,” wànanja.

10“Ndia-a duma Tamu Umbu,” wàda. “Nyuma yia atamu maima la pakei panganguma-a. 11Nyuma yia tau ma-paangu paluhu-kama, Tamu Umbu. Nyuma duma tau hàmu-makama, nda tau ma-butingu-akama,” wàda. 12Napanii i Yuhupu lai nyuda, “Panii anga-minya! Nyimi hi mai, mai minya pa-hamata-ya yiana na tana jàka nggiya na manda kapingatu,” wànanja.

13Dahema nyuda, “Nyuma yia tau hakambulu madua-kàma, Tamu Umbu, nyuma ana haàtu ama-akama la tana Kanaàngu. Na haàtu na metika, tàka na ma-maeri hupu nàhu ninya anguna na amana,” wàda.

14“Deningu-mana hama tuna ba wànggu,” wàna i Yuhupu. “Nyimi na ba tau ma-butingu-kai. 15Napa nyungga ka kukaka-kai: Ku-harangu nyungga parongu-na na ndewana na hanganji, ba nda jia dunjaku-aminya yiana na tana jàka ndedi-madu namai yiahu na eri hupumi. 16Na haàtu welingu lai nyimi nabeli bàdi papiti-ya. Hawiangu napa papàtu-ha lupa ningu mbutina na paniimi. Jàka ndia, parongu-na na ndewana na hanganji, nyimi yia ba tau tanggu butingu welingu la muhukai!” wànanja. 17Tunaka nu ka patama-nanjaka la uma kapàtangu tailu mbua lodu mandaina.

18La lodu pa-tailu wàna, panii-nanyaka i Yuhupu lai nyuda, “Nyungga duku tau ma-mangàdatu dàngu tau ma-manundu lai Ala-maka. Nyimi napa ku-pamara-kai na nyuna hangia-na nahondu-na. 19Ka ningu mbutina bai patutungu, na haàtu welingu lai nyimi napa papàtu-ya la uma kapàtangu; hawiangu ka dabeli, kai ngàndiha da uhu nggàndumu pakeimi ndumada da tau kuru umami, da ma-rimbangu. 20Hàlaka nu lupangu mi-karia-manya bàdi na eri hupumi lai nyungga. Nuna-duyaka na mbutina napa ba ma-deningu-ya na papanii-mi; jia-duyaka hi nda kuhuku pameti-kai,” wànanja.

Ka patunju-danyaka na botangu-na na Nggumbunuru. 21Ka panii-danyaka dàngga anguda, “Na, nàhu pa-hukungu-taka ruku njalanda hanggangu la erinda àmangu; ba nakarai pa-ndulangu ba nda ta-wàrihu-ya, jiapa ka taita-yakadu ba dira mayila-ya. Nuna-duyaka na ma-pawitingu hi kiri pàda-ndanya nàhu na mayila,” wàda.

22Napaya i Rumbingu, “Màla nda wànggu-anggai àmangu àmbi nggi - nggiki diminya nana na anakeda nda wànggunggai. Tàka nyimi ndai pa-tingingu. Nàhu duna na metina pa-pahimbalungu-yaka lai nyuta,” wàna.

23I Yuhupu napinya na hiluda nyuda, tàka nyuda duda nda dapi-anya nuna, nadu ba dapanii dànya i Yuhupu ba da wàngu papala-nya la njurumbaha-dupa. 24I Yuhupu na-dunjaku-nja nyuda, hi nahii. Ba napeku belika la papanii, beli-nanyaka lai nyuda, hàla napiti-ya i Hamiungu, hi na-paràhangu pahondu-ya la hangga mbuu ndàbada da anguna paluhu.

Da ayana i Yuhupu ba dabeli la Kanaàngu

25Na-wuangu pareta i Yuhupu la pa-paihi-nja uhu nggàndumu da karungu pangàndi-da tàka da àmahu-da haàtu - haàtu tuu beliha daa la karungu-da. Dàngumbu ka tunja bàlangu-da nyuda la ànda. Na pareta-na da nunju-maya. 26Hàlaka nu pabuku-danjaka la kalandai da uhu nggàndumu pakeida nu da ayana i Yuhupu, ka hadangu laku-danyaka welingu lai nu. 27La ngia patodu-da, na haàtu welingu lai nyuda na-bunggahu-ya na karungu uhu nggàndumu-na, ka kutunya na kalandai wàna. Ka hunggu-nanjaka da àmahu la pinu uhu. 28“Da àmahu-nggu da pabeli-nja,” wànanja da anguna paluhu. “Tàngaru, ninja daa la karungu!” wàna. Da-yudutu wànya da etida, pa-kariangu mangàdatu-da ba da-kawàra paàrangu dàngga anguda, “Nggàra-yaka ihu na pawunda-na i Ala lai nyuta yia?” wàda.

29Ba datàka-ka la Kanaàngu, peka hàla-danyaka na amada mbuu ndàbana jàka nggàraya na pambàda hungguda nàmu. Dapanii, 30“Na nggumbunuru Mehiru na-hanggàritu mànu ba napanii dànggama, na-panjala-kama nyuma ba buti-manya na tanana. 31Hi mahema-ya, ‘Nyuma tau hàmu-makama, nda tau ma-butingu-akama nyuma tau patutungu-kama. 32Nyuma mbuu ndàbama tau hakambulu madua-kama, ana haàtu ama-a-kama, na haàtu na metika, tàka na eri hupuma ninya angunai ama la Kanaàngu,’ wàmanya. 33Napeka-nggama na Nggumbunuru, ‘Màla ka kukaka wànggai ka kupinggai jàka tuba tau patutungu langatàka-kai: Màta na haàtu welingu lai nyimi ka na-ndàdiku; hawiangu beli bia kai ngàndinja uhu nggàndumu da tau la umami, da marimbangu. 34Bai belika bai karia-nyaka na eri hupumi, pi-dunggu-nyaka nyimi ba nda tau ma-butingu-akai, tàka ba tau patutungu-kai. Na angumi paluhu na pataha-nggu napa ku-pabeli-nya lai nyimi dàngu peku-naka nyimi pa-ndàdiku la tana yiana dàngu ka wàngu eti biami pakei pa-danggangu,’ wàna-nggama,” wàda.

35Ba da-katàndaku-njaka da ihi karungu-da, hunggu-danjaka da halopa kanai àmahu-da dàngu da àmahu-da haàtu - haàtu; lalu mbana mangàdatu-ha, na ama-mbuda. 36Ka panii-nanyaka na amada, “Nyimi yia pawiti-minyaka ka da-mbulangu hàla da ananggu. I Yuhupu nda ni-anyapa; i Hamiungu nda ni-anyapa; tàka nàhu hili pitiya i Mbanyamingu hili wàmimai. Manda najaru ailulu-ya na-papada-nggu nyungga!” wàna.

37Ka panii-nanyaka i Rumbingu la amana, “Puli-ngganya lai nyungga i Mbanyamingu dumu ama; napa ku-karia beli-manya duku, jàka ndia, pameti biaha da ananggu mini madua dumu ama,” wàna.

38Tàka napaya na Yakupu, “Ndia-a! I Mbanyamingu nda peku-ana bai karia-nya; na ayana na metika tàka ana didi-maki-yaka na maninya. Nda tapi-pinya jàka era hanggà-maruna nàhu la ànda. Nyungga kaweda-nggunyaka na handuka na pa-patàka-mingga napa kumeti wa-manyaka duku,” wàna.

Currently Selected:

DEDI 42: KAM

Highlight

Copy