YAHAKIALU 38

I Nggòku jia na pa-hukungu wàngu welingu lai MIRI

1I MIRI napanii-ngga nyungga, 2“Ha dumu tau nda payatangu, ràtu-nyawa i Nggòku na maràmba bokulu welingu la ta - tana Mehiku dàngu Tumbàlu la tana Mangguku. 3Panii-nyawa nyuna ba muhu-nangga Nyungga, MIRI Hupu Majangga. 4Napa Nyungga ku-wikitu-nya nyuna, ka pakàna-nya katekaru la ngingina, hi hànditu paluhu-ya pa-kariangu pamba tanatara-na. Dira danguha da pamba tanatara-na mali la njara da mapaki ndihi. Nimbihu da panjuri da-maràngga ngàndi temingu dàngu hapanda. 5Da-karia-nya panjuri welingu la Perihia, la Hundangu dàngu la Limbia na maràmba, nimbihu-da da-maràngga ngàndi hapanda dàngu nggubi waja. 6Mbuu ndàba da mini mbeni hanggangu welingu la tana Nggomiru dàngu la Mbetunggàrama weli diangu dalaku hanggangu karia-nya, dadangumbu da banjaru hawiangu ma-kikungu. 7Paràha-nya nyuna ka na-ehingu padua dàngu pareta-ha nggubulu da tanatara ma-pambulungu lai nyuna ka da-ehingu padua panunju-ya na lii pa-irungu-na nyuna. 8Napa nda pira mbua ndaungu-kinaka ku-paràha-nya nyuna panjungunya na hau tana dàngu da mangia-nya da pambàda pa-uhingu pabeli welingu la honga banjaru dangu, hàlaka nu hi da-ngiangu dàngu mambiru-da la tana nuna. Napa i Nggòku namandapu-nja da palindi Ihirailu da mambàda mandai pa-malinggitu dàngu da ma-mbinungu tanyungguru watu, tàka nàhu nangia-nya rayatu maluri mambiru. 9Napa nyuna dàngu tanatara-na hamangui da banjaru dangu ma-karia-nya damai pa-kaluluku hama tuna làpuru hi da-panggàbalu-nya nggubulu-na na tana hama tuna karumangu,” wàna.

10I MIRI Hupu Majangga napanii-nya i Nggòku, “Napa la rehi nu uwukuya nyumu na pakakangu akatu. 11Ubotaya la panjungu-nya nuna na tana manda ningu ngia patorungu-na, ngia paluri mambiru hàmuna na mangia-nya la paraingu da manda ningu kangeli-na dàngu nda ningu pa-torungu wàda. 12Napa urambangu dàngu uwàhiha da malanja-na na mangia-nya na paraingu na mawatu tanyungguru-ya àmangu. Da mangianya da pa-pauhingu welingu la mà - màtu banjaru, nàhu danguka pawulu-da, dangu bandada dàngu da-ndàdiku-ha la kula pinu tana. 13Da ma-ngiangu la Heimba dàngu la Ndendàngu dàngu da ma-danggangu la parai - paraingu la tana Hapanyulu tuna yia ba da-paàra-nggau napa, ‘Hiu pamàtu-ha da tanatara-mu ka jiama-ayaka la pawàhi dàngu la pa-rambangu àmahu marara mabara, banda dàngu pawulu wàngu hiu ngàndi ndàbaha nuda?’ wàdanggau,” wànanya.

14Tuna nuduka hi na-palewa-ka nyungga i MIRI Hupu Majangga pa-patàka-nya yiana na lii langu lai Nggòku, “Ba jia pàkuya la rehi luri mambiru hàmuna na banjaru-nggu na Ihirailu kau mai panjungu-nja. 15Uhadangu#Na hau pa-haleli ndai: Uhadangu; Imbarani: pinya. weli diangu la pangia-mu, na madira marauya, na-karia-nggau tanatara bokulu mawirungu, mbuu ndàbada pamba mali la njaraha welingu la ma - màtu banjaru. 16Hàla kau kaluluku-nya na banjaru-nggu na Ihirailu hama tuna làpuru ma-nàhaku pinu tana. Jàka jia-yaka na rehina, ku pa-huhuku-nggau nyumu pa-mandapu-nya na tananggu Nyungga. Ba jiakau nyumu pa-paluangu wànggu lima ha Nggòku, napa dapingga paraï da banjaru jàka nggamuka Nyungga, nu ba Ala Ma-matua-ka. 17Ka nda jia-aya na rukumu nyumu àmangu na papanii wànggu la ngaruda da atanggu da wunangu Ihirailu? Mbàda nyura-mada-nyaka, napa la rehi na manàmu-nya ku-paràhangu haàtu pa-kaluluku-nya na Ihirailu. Nyungga yia, MIRI Hupu Majangga mambàda panii,” wàna.

Na hukungu welingu lai Ala lai Nggòku

18Napanii i MIRI Hupu Majangga, “Na nyuna ba nahàla-kika napa i Nggòku pa-kaluluku-nya na Ihirailu, panyara-nggunyaka Nyungga. 19Tàka wàngu mbumbaru-na na hàngganggu napa ku-pangàdungu, ba natungu na upungu nda najaru la lodu nuna la tana Ihirailu. 20Mbuu ndàba da iyangu dàngu da mahawurungu, mbuu ndàba da banda bokulu dàngu da banda kudu, dàngu mbuu ndàba na tau la pinu tana nda - ndàndada paraï pa-mangàdatu-ngga Nyungga. Napa da-tanyungguru da palindi, datanàba da ngamba tana dàngu mbuu ndàba da kangeli da-tanyungguru. 21Hi ku-pakatàtaku wànya ma - màtu tàparu#Na hau pa-haleli ndai: pa-katàtaku ... tàparu. i Nggòku. Nyungga yia, MIRI Hupu Majangga mambàda panii. Da tau la ngabana napa da-maràngga pakalulukungu wàngu hapanda-da. 22Napa kuhuku-nya nyuna wàngu kanyaki pa-nggàbalungu dàngu mbungu wai ria. Ura kawalu dàngu ura watu mboka, epi dàngu tana malira pahanubuku-nggunya napa nyuna dàngu da tanatara-na dàngu da banjaru dangu mambàda pa-mbulungu lai nyuna. 23Tuna nuduka ba ku-paloha-nya la mbuu ndàba na banjaru ba ku-bokulu dàngu ba ku-matua Nyungga. Ka pi-duda-nggaka ba MIRI-ka Nyungga,” wàna.

Currently Selected:

YAHAKIALU 38: KAM

Highlight

Copy

Compare