YAHAKIALU 21

Na hapanda-na i MIRI

1I MIRI napanii-ngga, 2“Ha dumu tau nda payatangu, ràtu-nyawa na Yeruhali. Ràtu-njawa da ngia pa-lumungu lai nu. Panamu-nyawa na tana Ihirailu, 3ba tuna yia na paniinggu Nyungga yia MIRI, ‘Nyungga yia muhu-mingga. Napa ku-binjiru hapanda-nggu hi ku-pameti ndàbakai nyimi, tau ma-akatu hamangui tau mahàmu. 4Wàngu hapanda-nggu ku-rawaku ndàbaya na tau weli diangu lundu hu luru. 5Ka pi-ndàba-nanggaka tau ba Nyungga MIRI, ma-binjiru hapanda-nggu dàngu ba nda jia patiku beli-anggunya, wàna wàmu,’ wànangga.

6Ha dumu tau nda payatangu, kaingu-wa dàngu padudurungu-wa la hangga tau Ihirailu beri hama tuna mambata eti dàngu mambota monungu-kau. 7Jàka da-paàrangu nggikina hiu padudurungu, panii-njawa ba hawina-munya rukuna na lii langu na manàmu-nya napa. Na lii langu nuna napa na-pakaduku-nja da etida, da-haluputu da limada, nda - ndàndada da kambàku-da, namàli na ringgitu-da. Langatàka jiayaka na rehina, dàngu napa danjadi mbuu ndàbada nuda. Nyungga yia MIRI Hupu Majangga mambàda panii,” wàna.

8I MIRI napanii-ngga, 9“Ha dumu tau nda payatangu, manyura-wa! Peka-njawa da tau ba tuna yia na paniinggu Nyungga, MIRI,

‘Ninya na hapungu hapanda,

hapanda pauda, dàngu pa-padàka.

10Pa-padàka-ya ka ràka pameti wànguya,

pa-pa-kamilihu-ya ka li - lilana.

Nduma banjaru-nggu nda ningu-apa hawola

ba nda da-kawela-nja mbuu ndàba ba panamu-nja dàngu ba hukunja.#Talànga wanguna na-njenjangu ningu-mapa: Nduma ... ba hukunja.

11Hi deliya na hapanda ka naehi mànungu padua la papaki-ya

hàla hi wuaya la haàtu matanggu hambàli.

12Padudurungu-wa, ha dumu tau nda payatangu, kaladaku-wa dàngu warawa!

Ba ehingu-nanya padua-ka na hapanda pa-rawaku-ya na banjaru-nggu.

Da liku uru Ihirailu dàngu nggubulu na banjaru

napa natanju-nja paraïna hapanda hi lupa da-tàlaru.

Tàmbungu-wa kurumu wàngu mila mumuhu-na na etimu,

13ba kaka-nggunya na banjaru-nggu,

jàka nda da-pahàmu-ya na huri lurida,

mbuu ndàbada nuda napa nanggàna-ha nyuda.’#Na ndalaru 13 nda na-lohangu-a jàka nggàra wàna na hilu Imbarani-na.

14Màla dumu, ha tau nda payatangu, manyura-wa. Kapokukungu limamu ka tandaya nduma na hapanda pa-pakiringu pa-hambàli. Kanjupu pa-mangàdatungu-ya nuna na hapanda.#Da pa-haleli ndai da manda pirada: pa-mangàdatungu-ya. 15Nyuna ma-pawiti-nya hi namàli na tarana na banjaru-nggu hi danjoru pa-nggubulungu. Ku-pangàdu-nya na paraingu-da wànya nuna na hapanda#Talànga wanguna na-njenjangu ningu-mapa ba tuna yia na ihina: Ku-pangàdu-nya ... na hapanda. ma-kajilaku ba hama kabilaku-ya, dàngu na ma-ehingu pa-pameti. 16Ha dumu hapanda dàka, tunguwa la kawana la kalai dàngu la nggi hanggangu bia kikungu pambuha-mu.#Na ndalaru 16 nda na-lohangu-a jàka nggàra wàna na hilu Imbarani-na. 17Napa ku-kapokukungu-mbu limanggu Nyungga hi na-wadaru na hàngganggu. Nyungga yia, MIRI mambàda panii,” wàna.

Na hapanda maràmba Mbambilu

18I MIRI napanii-ngga, 19-20“Ha dumu tau nda payatangu, nggàmbaru-wa dàmbu ànda peku li ninguna na maràmba Mbambilu na mangàndi hapanda-na. Nuda da ànda da madàmbu-da da-pakiringu welingu la hau paraingu-ma bàdi; na hau na ànda na hanggangu la Ramba, parai tau Amungu; tàka na hau na-hanggangu la Yeruhali, na paraingu maningu ngia pa-torungu-na la Yahunda. Tunya kapapa ai tanda ànda la ngia pa-pakiringu-na pa-kahanga nuna na ànda.#Tunya ... nuna na ànda; na hilu Imbarani-na nda na-lohangu-a jàka nggàra wàna. 21Na maràmba Mbambilu na-ndolaku la lihina nuna na kapapa ai tanda ànda. Keha ka pinya jàka nggi àndaya napali-na, na-paàra-nja da marapu-na na-kanjàku-nja da panana dàngu nakinju eti banda#na-kanjàku-nja da panana dàngu nakinju eti banda; Keha ka pinya jàka nggàraya na pawàngu talànga handàka-na na tau àmangu na-kanjàkungu kanai panana hàla hi àtalu pitina hapungu wua panana dàngu nda tàngaru-na, jàka ndia dakinju tanda la eti banda kameti maraku. pabidi marakungu. 22Ka lohangu-nanyaka ba ningu tanda Yeruhali-na na pana papiti wàna lima kawana-na! Nuna nu tanda-nanya ba lupangu bàdi na maràmba na-kaluluku-nya na Yeruhali, hi na-pawolakungu wara pa-kabungu màta da tanatara-na ka da-wandalu-ha da pa-njularu wàngu, patuba-nja nuda nu la pi - pindu bokulu Yeruhali, ka dawulu kabundu tana ka kangeli pa-nggupulu wànguha dàngu ka daàki londa. 23Da ma-mandapu la Yeruhali nda jia pajia-adanya ba pa-nggupulu-ha nyuda, ba mbàda tura-dudaka pa-njanjingu dàngu na Mbambilu. Tàka ba tuna nu na ngera nyuraya yiana jiaya na-papanamu hahanja napa ba payàpa-ha nyuda ruku njala-mada. 24Nyungga yia MIRI Hupu Majangga kupanii-nja nyuda, ‘Da njalami papingu-ha dàngu mbuu ndàba na tau napinya ba njala-minya. Na akatu-mi nandudu la pawu - wunda-mika. Nàhu toma-nanyaka na rehi kahuku-nggai dàngu wua-nggunggaika la muhumi.’

25Tàka kupanii-nya na maràmba Ihirailu, ‘Ha dumu maràmba ma-akatu dàngu ma-katadaku! Mareni-nanyaka na rehi hukungu-mu na ma-malamiri dehi. 26Nyungga yia MIRI Hupu Majangga mbàda panii-ngguka. Àli-nyawa na tubuku pareta-mu dàngu bunggahu-ya na teramu. Nàhu, pa-njilungu-nanyaka na ndaungu. Jijiku-nyawa na mandapu tau mila dàngu wua-njawa kawaha nyuda! Papuru-njawa da maningu kawahangu welingu la ngia pa-mandapu-da! 27Napa ku-pakabu ndàbaya yiana na paraingu, hi lupangu ningu tanyungguru watuna la nggi - nggini. Na nyuna nuna nu, natàka-mapa bàdi na tau papindi-nggu la pahuku-nya yiana na paraingu hi namangu panjadi. Nyuna-maka ngia pawua-nggunya napa yiana na paraingu,’ ” wàna.

Na hapanda dàngu na tau Amungu

28“Ha dumu tau nda payatangu, manyura-wa! Panii-nyawa na tau Amungu na mambàda pawawa-ya na tau Ihirailu, ba panii-nggunya Nyungga yia, MIRI Hupu Majangga, ‘Na hapungu hapanda ehingu-mana-nyaka pa-hambàli; nuna na hapanda padeli pa-kajilaku-mayaka hama tuna kabilaku, ka na-ehingu pa-pameti. 29Na harii mata paita-mi ma-kabàli-ya, tàka na manyura papeka-mi ma-kakòlulu dàngu ma-kambàliku-mbuya. Mi-akatu nyimi dàngu ikatadaku, tàka na rehi hukungu-mi na ma-malamiri dehi mareni-nanyaka. Nuna na hapanda napa na-kadipu-ha da nggorumi.

30Ha dimi tau Amungu, patiku belinya na hapanda-mi! Napa ku-patanda-nggai ngerami la ngia pawulu-kai dàngu la ngia padedi-mi. 31Napa ku-hanubuku-nggainya na hàngganggu na ma-mbàringu dàngu napa kuwua-kai la tau mbana eti da ma-manyàmungu pa-patàlaru. 32Napa imbuta ba nauhu-nggai epi. Da wai riami napa dambungu la tana wikimi, hi nda haàtu-mbupa manamu-kai. Nyungga yia MIRI mambàda panii,’ ” wàna.

Currently Selected:

YAHAKIALU 21: KAM

Highlight

Copy

Compare