LUHU 4

I Ala ba nawua-nya mbiha i Muha la pa-patumbu pa-hangàtaru wàngu

1Ka hema-nanyaka i Muha lai MIRI, “Tàka nggiki wànggu-aka jàka era nda dawàiya dàngu nda da-wàrihu-ya na papanii-nggu paraï tau Ihirailu? Nggiki wànggu-aka bàdi era ningu mapanii ba ndau pa-itangu wikimu MIRI lai nyungga?” wàna.

2I MIRI na-paàra-nya i Muha, “Nggàraya na la limamu?” wànanya. Nahema i Muha, “Tokungu-ya,” hi wàna.

3Napaya i MIRI, “Wàrunya la tana,” wànanya. I Muha nawàru-nya, ka pambeli-nanyaka ularu na tokungu, ka palai-nanyaka i Muha pamarau-nya. 4I MIRI hi napanii-nya i Muha, “Lihinya na ularu kau yàpaya na kikuna,” wànanya. I Muha nalihi-nya hi nayàpa-ya na ularu na manda mbàdiku-na tokungu beli-madua-yaka la limana i Muha. 5Tàka i MIRI, “Tumu nu kau wàngu, ka peku wàidanggau da tau Ihirailu ba Nyungga, MIRI Alada da boku la mangilu-da, Alada i Ambarahàmu, i Ihàku dàngu i Yakupu, ba tuba pa-itangu-mangguka wikinggu lai nyumu,” wànanya.

6I MIRI nahili paniinya i Muha, “Puhiya na limamu la kalembi-mu,” wànanya. Na-tundungu i Muha, tàka ba na-paluhu beli-yaka na limana, bara wakatu-nanyaka ka ba nggàna-nanyaka hidu manula pa-mayitangu. 7Hàla hi napanii i MIRI, “Puhi beliya na limamu la kalembi-mu,” wànanya. I Muha nawànya nuna, tàka ba na-paluhu beli-yaka, lànga beli-nanyaka na limana. 8Napanii i MIRI, “Jàka nda dawaikau nyumu jàka ndia jàka nda da-ihili-nya na pa-hangàtaru wàngu na ma-wungangu, napa na pa-hangàtarungu yiana dawai-makau duna. 9Jàka jia mayaipa ba nda dawaikau jiapa ka daita-ha kadu nuda da tanda pa-hangàtarungu ba dàmbuda, dàngu ba nda da-wàrihu-ya na panii-muka, piti wai hawutu la Luku Nilu kau buriya la tana, napa nuna na wai na-pambeli-ya wai ria,” wànanya.

10Tàka napanii i Muha, “Dou MIRI, nyungga nda tau pingu pa-kareuku-ka, ka àmangu-kai lupa nàhumbu, bau hàla papanii dàngga. Nyungga tau mbotu làmaka, ku-kamendaku dàngu nda kurengga ngarunggu,” wàna.

11Nanapa-ya i MIRI, “Nggamu mawua-nya ngaru na tau? Nggamu rukuna hi nakambiu jàka ndia hi na-kawanga? Nggamu rukuna hi naita jàka ndia hi napoki? Nda Nyungga yia, na MIRI? 12Nàhu lakuwa nyuna, Nyungga duku mandula-kau la papanii dàngu ma-papeka-nggau jàka nggàraka bàdi patiki-mu,” wànanya.

13Tàka nahema i Muha, “MIRI ku-kamahi-nggau àmbu palewa àruka nyungga, palewa bia tau hawiangu,” wàna.

14Ka hàngga wàngu-nanyaka i MIRI lai Muha, “Màla i Harungu nda angumu paluhu-ya? Kupi-manya nyuna ba tau pingu pa-kareuku-ya. Langatàka, nàmu-manyaka nàmu lai yiahu, napa nahàmu-ma na etina ba na-pahàmburu dànggau nyumu. 15Panii dànya nyuna dàngu peka-manya jàka nggàraka bàdi papanii wàna. Nyungga duku napa kundula-kai nyimi tau madua dàngu ma-papeka-nggai jàka nggàra bàdi papanii-mi dàngu pawunda-mi. 16Màta nyuna ka napanii hurumu nyumu la hangga rayatu. Nyuna ka nangaru-nya na ngarumu, tàka nyumu ka beringu Alakau ma-paihi-nya kareuku papanii wàna. 17Ngàndiya nana na tokungu, napa nyumu kau patumbu wànya màtu - màtu tanda pa-hangàtarungu,” wànanya.

I Muha ba nabeli la Mehiru

18Hàlaka patuna nu beli-nanyaka i Muha la umana i Yituru, ama yerana, dàngu hi napeka-nya, “Pulingga kàdi ka kubeli la Mehiru pa-tadalu-ha da nua da kalembi-nggu, ka kuita-ha jàka luri-duda-nyapa,” wàna. Nanapa-ya i Yituru, “Laku mambiru-wa,” hi wànanya.

19La rehi ba la tana Mindiangu-yapa i Muha, i MIRI napanii-nya i Muha, “Beliwa la Mehiru. Mbuu ndàbada da tau ka pameti-ya na mawàda-nggau dameti-kaduda,” wànanya. 20I Muha na-karia-nya na papaha-na dàngu da anana, nawotu-ha la kalandai, ka laku-danyaka la Mehiru. Nunjuya na pareta-na i MIRI, i Muha nangàndi-maya na tokungu-na.

21I MIRI napanii-nya i Muha, “Nyungga kuwua-nggau pambiha wàngu la pa-patumbu-ha da pa-hangàtarungu. Jia-duya napa jàka ubelika la Mehiru, patumbu hàlaha da pa-hangàtarungu la hanggana na hanganji Mehiru. Na nyuna napa ku-patongguru-ya na etina, hi nda nabihu papuli-nya na banjaru palaku. 22Hàla kau paniinya nuna na hanganji ba tuna yia na kareuku-nggu Nyungga na MIRI, ‘Na Ihirailu ana ma-maaya dehi-nggunya, 23tàka nyumu ku-pareta-makauka la papuli-nya na ananggu palaku, ka peku lumu-dangga, tàka nyumu mu-tebuku-ya. Kau napa nàhu ka ku-pameti-ya na ana ma-maaya dehimu, wàna wàmunya,’ ” wàna.

24La hau pangia ngia pamaü-da nàhu ba dalaku, mai-nanyaka i MIRI lai Muha ka pameti-ya wàna. 25Tàka i Hipora, papaha-na hi naluma jàmbaya na kahidi watu hi nakàri-ya na anana, tàka na hupu manula-na hi na pa-jonggaru-nya na wihina#wihi; ningu hawiangu ma-katutu-ya “wihi” ba wàna nu jiaya na pa-makia wàngu na palangu. i Muha. Napanii i Hipora, “Nyumu lei ria-nggunggau,” wànanya i Muha. 26Nu hi wàna, jiaya na rukuna na kalaratu kàri-duka. Jia-duyaka hi nda natàka-nya la pa-pameti-ya i Muha paraïna i MIRI.

27Ba talànga tunaka nu i MIRI napanii-nya i Harungu, “Luawa la maràda telangu kau pa-hàmburu dànya i Muha,” wànanya. Ka lua-nanyaka i Harungu hi da-pahàmburu dàngu erina la palindi matua, hi na-puduku-ya. 28I Muha napeka hàlanya i Harungu mbuu ndàbada da papanii-na i MIRI lai nyuna, ba jiaya na paràha-nanya pabeli la Mehiru dàngumbu rukuda da tanda pa-hangàtarungu da pa-patumbu-na napa. 29Tunaka nu ka laku-danyaka i Muha dàngu i Harungu la Mehiru, hi da-pauhi hàlanja da ma-pairungu la Ihirailu. 30I Harungu na-patàka-nja Nyuda mbuu ndàbada da papanii na i MIRI lai Muha, tàka i Muha hi na-patumbu-ha mbuu ndàbada da pa-hangàtarungu la hanggada da tau lai nu. 31Ka wai-danjaka, ba darongu-yaka i MIRI ba mbàda hamata-nanyaka na banjaru Ihirailu paraïna i MIRI dàngu ba naita hàla-mahaka da pa-mayila wàda, ka patika marubuku-danyaka.

Currently Selected:

LUHU 4: KAM

Highlight

Compare

Copy