LUHU 33

I MIRI na-paràha-nya na banjaru Ihirailu pa-dunjaku-nya na Palindi Hinai

1Ka panii-nanyaka i MIRI lai Muha, “Dunjaku-nyawa na pangia yiana dàngu laku karia-nya na banjaru na pairu ngàndimu welingu la Mehiru kai laku la tana na paràndi-nggunja i Ambarahàmu, i Ihàku dàngu i Yakupu papohu-nja da wàla wuada. 2Napa Nyungga ku-paràhangu haàtu papalewa pa-kapipi-kai nyimi. Napa Nyungga kunyara-ha da tau Kanaàngu, Amori, Heti, Perihu, Hewi, dàngu Yembuhu. 3Tàka na nyuna Nyungga wiki nda ku-karia-anggai, ka àmbu ku-pamolu-nggai nàhu la ànda, nadu ba banjaru ma-malihu katiku-kai nyimi,” wàna.

4-6Tunaka nu i MIRI na-paràha-nya i Muha papeka-nya na banjaru Ihirailu, “Nyimi banjaru ma-malihu katiku-kai. Jàka era laku karia-nggunggai jiapa ka nda pira mandai-ana jiangu-maka ba ku-pamolu ailulu-nggai. Pukalu hàlaha da ngaümi, napa Nyungga ku-kawuku-ya jàka nggàraya napa na pawunda-nggu lai nyimi,” wàna. Ba darongu-yaka nuna na kanyàngi-na i MIRI, ka dira hawina-ha hama tuna tau ma-punangu wai mata ma-hangginangu wai wiraha. Hàla pukalu-dahaka da ngaüda. Jia-duyaka la hambeli dunjaku-danya na Palindi Hinai, nda nahili tu-apa ngaüna na banjaru Ihirailu.

Na Maüna i MIRI

7Handàka - handàka, jàka na-pamaüngu-ka na banjaru Ihirailu, i Muha napiti-ya na Maü hi na-pahada-nya, na-harangu pamarau-ya hawutu welingu la ngia pa-pamaüngu-da. Na Maü nuna, Maüna i MIRI, wàdanya, dàngu jàka nggàmu ma-mbuhangu pakarai panaungu-na i MIRI, ka nalua lai nu. 8Jàka nalua kai Muha lai nu la Maü ndolaku-danyaka da tau Ihirailu la hangga pindu maüda, ba dapanau-ya i Muha hi lupa natama. 9Ba natama-ka i Muha, puru-nanyaka na tandai karumangu hi na-pànjangu la pindu Maüna i MIRI. Welingu lai nu la karumangu i MIRI napanii dànya i Muha. 10Ba daita-yaka tau Ihirailu na tandai karumangu la pindu Maüna i MIRI, hadangu hàla-danyaka hi da-patika la pindu maüda nimbihu-da. 11I MIRI ba na-pabanjaru dànya i Muha, patutu-madanya hama tuna na ma-pabanjaru dàngu anguna. Hàlaka nu beli-nanyaka i Muha la ngia pa-pamaüngu. Na nyuna i Yuhua anana i Nungu, na bidi mini na ma-karaha-ya i Muha, enga-manapa daa la Maü.

I MIRI na-pa-ràndingu la paopa-nya na banjaru-na

12La hau na lodu i Muha napanii lai MIRI, “MIRI, Nyumu muwua-ngga pareta la pa-kapipi-ya na banjaru yiana palaku la tana na paràndi-mu. Ba tuna Nyumu ndau panii-angga jàka nggamuya na papalewa-mu la patula-ngga nyungga. MIRI, kutanda-kau Nyumu wàmungga, dàngu kuora-nggau wàmungga. 13Jàka tuna nu, màla àruwa kau paniingga jàka nggàraya na pa-pakaka hahamu MIRI, màta ka peku lumu-nggunggau dàngu ka na-daingu ba nahàmu wànya na etimu. Namu-mbuya na banjaru yiana ba mbàda pindi-munyaka la pamangu-nya,” wàna.

14Napaya i MIRI, “Napa kuopa-nggai nyimi ka peku màngi-minya na tana na paràndi-nggu,” wàna.

15Nahema i Muha, “MIRI, jàka ndau karia-nggama nyuma, àmbu paràha-du-nggama pa-dunjaku-nya na pangia yiana. 16Nggiki hama pi-nanyaka tau bau orangga nyungga dàngu na banjaru yiana jàka ndau ndula-kama nyuma? Na ngera ninggau Nyumu MIRI la pahiku la hongama, jia-yaka napa na maheka-nggama nyuma welingu la ba - banjaru hawiangu la pinu tana,” wàna.

17Napanii i MIRI lai Muha, “Na pakarai-mu nyumu ku-pajia-ya, nadu ba kutanda-kau dàngu ba kumbuha-nggau nyumu,” wànanya.

18Hàla hi na-kamahingu i Muha, “MIRI, paita àru-ngganya na handaraku-mu ba ninggau Nyumu,” wàna.

19Nahema i MIRI, “Napa ka kulaku hanàhu-nggu la hanggamu dàngu mbuu ndàbana na bunjuku-nggu ba dàngu tiki-nggunya na tamunggu na ma-matua. Nyungga MIRI-ka, dàngu kumàja-nja eti dàngu kumila-nja eti da tau da papindi-nggu. 20Nda jia paita-anggunya na matanggu lai nyumu, nadu ba nda peku-ana paita-ka tau hi pa-daingu luri biana. 21La lihinggu yia ninya na kaba watu; peku ndolaku-mu lai nu. 22Ba nali ningu lai nu na handaraku-nggu ba ningga, nyumu kupuhi-kau la kubu watu dàngu hi ku-pandàbi wànya limanggu, hi lupa ku-làpahu. 23Hàla napa kuyila-ya na limanggu, hi peku ita weli kajia-mungga, tàka ndau ita-aya na matanggu,” wànanya.

Currently Selected:

LUHU 33: KAM

Highlight

Compare

Copy