LUHU 20

Da Hakambulu Uku

(Bel. 5:1-21)

1Ka panii-nanyaka i Ala, yiada-ha da paniina, 2“Nyungga MIRI-ka Alami na mangàndi-kai paluhu welingu la Mehiru, la ngia pa-paata-kai.

3Àmbu marubuku-nja da marapu hawiangu. Marubuku-ngga Nyungga-a.

4Àmbu wuludu kahala hada, na mahama-nya jàka nggàraya na maninya la awangu, la tana jàka ndia la wai la unu tana. 5Àmbu marubuku-dunya na kahala hada tungu nu, nadu ba Nyungga MIRI Alamu, dàngu nda ku-mbuhangu-a ka pahama-ngga la ngga - nggàra. Na tau na ma-paumbi-ngga, kuhuku-nya lundu wàla wuana tailu ndalihu patu ndalihu. 6Na nyuna ku-paita-nya naaï namu-nggunya jiapa nda pira riu rataya na wàla wuana na tau na ma-mbuhangga dàngu na ma-karadaku la pareta-nggu.

7Àmbu tiki walawai-nya na tamunggu, nadu Nyungga MIRI, Alamu ba kuhuku-nya jiapa nda nggamuya na matiki walawai-nya na tamunggu.

8Mbabunya na lodu Hangahu dàngu tembiya-ya na lodu nuna ba lodu matua-ya. 9Nyimi kuwua-nggai nomu mbua lodu kai ràma wàngu, 10tàka na lodu papihu wàna lodu hangahu-ya na pa-pahinggilu ndumanggu Nyungga. La lodu nuna àmbu ningudu haàtu maràma, nyimi wiki, hamanai da anami, da atami, da bandami jàka ndia na tau tàka na ma-ngiangu la paraingu-mi. 11Nomu mbua lodunggu, Nyungga, MIRI, ba ku-padika-nya na tana, na awangu, na tehiku, dàngu mbuu ndàbana na ihina na maninya daa, tàka la lodu papihu wàna hangahu-nggunyaka. Nuna-duyaka na pakiri-na, Nyungga, MIRI, hi ku-pakanyuru-ya na lodu Hangahu dàngu hi kuleha-ya nduma wikinggu.

12Tembiha da inami da amami, ka peku mànjaku-mi dàngu ka peku malaina na lurimi la tana na pawua-nggunggai napa.

13Àmbu ningu pa-pameti-mi.

14Àmbu pa-kajari-ya na lalei na mangomami.

15Àmbu manganga.

16Àmbu hakahii kambàliku rukuna na tau hawiangu.

17Àmbu mataru-nya na mangu tau hawiangu: umana, papaha-na, atana, bandana, kalandai-na dàngu jiapa nda nggàraya na manguna,” wàna.

Na tau Ihirailu na mangàdatu

(Bel. 5:22-33)

18Na tau ba narongu-ka lingu kanduruku dàngu lingu taropitu, dàngu ba daita-yaka na kabilaku dàngu na palindi na ma-kutungu, nda - ndàndada paraï pa-mangàdatu, hi da-ndolaku mara - rau. 19Dapanii lai Muha, “Nyumu bia bàdi mapanii dànggama nyuma, mapatinginguma duma; tàka àmbu Nyuna wikidu i Ala na mapanii danggama nyuma, napa mameti-du,” wàda.

20Nahema i Muha, “Àmbi mangàdatu. I Ala hi namai kama-ananggai, ka na-padaingu wàngu na-karadaku-minya dàngu ka àmbi wunda manjala,” wànanja. 21Na nyuna nuda da tau jiapa-maha na-ndolaku mara - rauda, jiaya i Muha-a duna na malihi-nya na karumangu kapàtangu na ngia paninya i Ala.

Na kalaratu rukuna na ngia pawotu maraku

22I MIRI nawua-nya pareta i Muha, la papanii-nya na banjaru Ihirailu, “Nyimi mbàda ita-minyaka jàka nggiki hamana Nyungga, MIRI, ba kupanii dànggau nyumu welingu la awangu. 23Àmbu pandoi-du ndumamu kahala hada àmahu mabara jàka ndia marara, ka talumu-nya ba wàmi, hinggilu-nggu Nyungga. 24Pandoi-ngga ndumanggu hau ngia pawotu maraku welingu la tana, hàla kai wotungga kameti maraku lai nu mbimbimi dàngu hapimi tu kameti maraku patunu dàngu kameti maraku pa-papeku wàngu. La hau pangia - hau pangia na pa-paita-nggunggau ba pangia ngia palumu-mingga, napa kumai lai nu dàngu ku-pakanyuru-makai. 25Jàka mi-pandoi-ngga hau ngia pawotu maraku welingu la watu, àmbi pandoi-du welingu la watu pa-kahebi, nadu jàka miwàngu-ka pabola bai beraya na watu, na ngia pawotu maraku nuna nda uku-apa pawotu-ngga maraku lai nu. 26Àmbi wuludu ngia pawotu maraku majangga hi lupa wàngu panongu-maipa bai heinya, ka àmbu itaha da ràka panda ita la ihimu,” wàmunja wànanya.

Currently Selected:

LUHU 20: KAM

Highlight

Compare

Copy