LUHU 10
10
Na tunguda da kabala
1I MIRI napanii-nya i Muha, “Luawa kau hurungu la hanganji. Nyungga mbàda pawiti-nggunyaka nyuna dàngu da maningu wai ngabada lai nyuna ka da-malihu katiku-da; ka peku patumbu-nggunja da pa-hangàtarungu la padua da nyuda, 2dàngu ka peku peka-munja da ana umbuku-mu jàka nggikina ba ku-pajulu wànya na banjaru Mehiru ba ku-patumbu-ha da pa-hangàtarungu. Jia-duyaka nyimi mbuu ndàbami hii pingga Nyungga ba MIRI-ka,” wàna.
3Ka lua-danyaka i Muha dàngu i Harungu pa-hurungu la hanganji, hi dapanii-nya, “I MIRI, na Ala banjaru Imbarani, napanii, ‘Lundu pirangu-mapa nu ba ndau bihu pa-marubuku lai Nyungga? Pulinya na banjaru-nggu ka dalaku, ka peku lumu-dangga Nyungga. 4Jàka jiapa-maipa bau tebuku-ya, haromu patàka-nggunjaka da kabala la tanamu. 5Nggubulu-na na tana na-panggàbalu-nya kabala ma-kanjupu danguha. Mbuu ndàbada da pa-pamula hamanai da pingi ai da pahili ura watu mboka, napa na-pambuta hàlaha kabala. 6Na umamu, da umada da maningu wai ngabada dàngu da uma rayatu napa dambinu-nja kabala. Na ura pàda yiana na liru lànganya na pambàda erada da boku la mangilu-mi,’ ” wàna. Hàlaka nu beli-nanyaka i Muha.
7Ka panii-danyaka da maningu wai ngabada la hanganji, “Lundu pirangu-mapa ba na-paharui-ta na tau nuna? Puli bia-njawa ka dalaku duda palumu-nya na MIRI-da na Alada. Tàngaru-yawa na tananda làjaru-nanyaka!” wàdanya.
8Ka paau beli-danjaka i Muha dàngu i Harungu, pa-hurungu la hanggana na hanganji, hi napanii-nja, “Lakuwa kai lumunya i MIRI, Alami. Ngga - nggamu-haka nu da malaku?” wàna.
9Nahema i Muha, “Laku hàlama wàma, mini kawini, anakeda ma-matua. Mangàndi-mbuha mbuu ndàbada da anama, mbuu ndàbada da hapi, da mbimbi, da kamàmbi-ma, ba remi pa-bokulungu-mamanya la patembi wànya i MIRI,” wàna.
10Napaya na hanganji, “Nda hidama ka kupuli-nggai pa-karia-nja da kawini dàngu da anami! Nuna na pakarai-mi hama biana ba karai-mingga ka kumahi-nya i MIRI ka na-pakanyuru-nggai. Lohangu-mana-nyaka duku lai nyungga ba na-akatu na pawuku-mi. 11Ndia-a! Mbulungu tau minia malaku palumu-nya i MIRI, jàka mbuhungu-minya palumu pa-tànjingu-ma-a!” wànanya. Wànya na kareuku nuna wàngga-nahaka Muha dàngu i Harungu welingu la uma hanganji.
12Tàka i MIRI hi napanii-nya i Muha, “Jakaru-nya na limamu hu dita la pinu tana Mehiru. Napa damai da kabala hi dangaa hàlanja mbuu ndàbada da ihi woka da mani-injapa ba hàla paura watu mboka,” wànanya. 13Ka jakaru-madua-nanyaka i Muha na tokungu-na, tàka i MIRI hi na-pahapuputu-ya na ngilu timiru la tana nuna piti weli mbarungu lundu rudungu lundu waihangu. La marai romu tàka ngàndi-nahaka da kabala nuna na ngilu 14da manda ningu hama danguda hi nambinu nggubulu-na na tana nuna. Ndedima na-handàkangu na tau pa-itangu kabala matuna nu na danguda dàngu la hambeli-na nuna nda hili wàngu-anapa.
15Nggubulu-na na tana na-panggàbalu-nya kabala hi lupa na-mitingu ba itaya. Dangaa hàlanya nggàra biaya da pahili ura watu mboka, hamanai da wua ai da maninja la pingi. La nggubulu-na na tana Mehiru nda ana ningu-apa mamuru marihi la pingi - pingi ai jàka ndia la ihi woka.
16Ka paau parengga-nanjaka i Muha dàngu i Harungu nyuna na hanganji hi napanii, “Njala-manggu-nyaka lai MIRI, na Alami dàngu hanggangu lai nyimimbu. 17Jàma àrunja da njalanggu la handàka-na nàhua, dàngu kai hamayangu àru lai MIRI, na Alami, ka na-pamarau àruya yiana na ura pàda pameti wàngu welingu lai nyungga,” wàna. 18Ka luhu-nanyaka i Muha hi na-dunjaku-nya na hanganji, hi na-hamayangu lai MIRI. 19Tàka i MIRI hi na-panjànga-nya na ngilu, ka tungu-nanyaka na ngilu waratu na ma-mbangatu. Nuda da kabala na-hapuputu ngàndiha ngilu la Tehiku Tibuhala,#Tehiku Tibuhala; Talànga wanguna yiana la-mbunanja: 1. Da tàma dàngu da ramuku da mapali - lihi la henaku-na na Njobu wai Huwihu dàngu na Tehiku Padua. Lai nu dadangu da rumba da makàli tumbu la wai. Nakaka ndàbama-ya tau ba jiaya lai nu na ngia patumbu-da da pa-jakaru-na na kawudu 13. 2. Na Njobu wai Huwihu 3. Na Njobu wai Akamba 4. Na Tehiku Rara pawingungu. nda hili ningu ndoku heu ma-ndàdiku la nggubulu tana Mehiru. 20Ba tuna nyuna i MIRI pa-tongguru-mananya na etina na hanganji, hi lupa nda napuli-nja da tau Ihirailu palaku.
Na tunguna na kapàta yuruyila
21I MIRI napanii-nya i Muha, “Jakaru-nya na limamu la awangu, ka na-panggàbalu-nya kapàta yuruyila na tana Mehiru,” wàna. 22Ka jakaru-nanyaka na limana i Muha la awangu, ka tungu-madua-nanyaka na kapàta yuruyila la nggubulu tana Mehiru, tailu mbua loduna, mandaina.
23Nda nggàra-apa paita-na na tau Mehiru dàngu la ngala mandai tuna nu nda haàtu-a maningu ngia palua-na. Tàka la umada da tau Ihirailu pa-daingu hambila-na.
24Hàla nyuna na hanganji napaau-nya i Muha hi napanii, “Ilakuwa kai lumunya na MIRI-mi. Da tau kawini dàngu da anakeda peku-mbuda kai karia-nja. Na nyuna àmbi ngàndi-duha da hapi da mbimbi dàngu da kamàmbi-mi,” wàna.
25Tàka nahema i Muha, “Jàka tuna muwua-nggamaka bàdi Miri banda pawotu-ma dàngu kameti maraku patunu ndumana i MIRI, na Alama. 26Da bandama mangàndi-maha bàdi; nda ana heumbu pamàta-ma. Welingu la banda nuda ba mapindi jàka ngginiya napa na pawotu lai MIRI na Alama. Hina-dupa lai nu napa hi mapinya jàka nggi bandaya na pawotu-ma,” wàna.
27I MIRI na-pamalihu-ya na hanganji, hi nda nabihu papuli-nya na banjaru Ihirailu palaku. 28Na hanganji napanii-nya i Muha, “Payilangu-wa welingu la hangganggu! Àmbu kuhili ita-duyapa na matamu! Jàka kuita-yaipa na matamu, meti-munyaka!” wànanya.
29“Hama tuna ba wàmu Miri,” wàna i Muha. “Langatàka ndau hili ita-akapa,” wànanya.
Currently Selected:
LUHU 10: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
