MA-PABOBARUNGU 2
2
1Bota-manggu-nyaka la pambaha eti biawa, ka peku pinggunya na ihina na-paohangu. Tàka na ma-lohangu nuna nu jia-mbuya ba kahewa-ma-ana. 2Kupinya, na riki ba ndubaya dàngu na ma-pahàmu eti, ba nda ningua linguna. 3Mulana ba na-wàndaka rinjungu-nggu la pa-manggàna, kita-mananya na etinggu la pambaha eti wàngu unungu-nggu angguru dàngu la pambabu borakungu. Làbu nuna-yaka, wànggu bia na ànda na mahàmu halawàla la tau papàda hàmunya na lurina na ma-dànggitu la pinu tana yiana. 4-5Paràma mabo - bokulu-ka mbàda wunda-ngguka. Ku-pahada-nja da uma ndumanggu. Ku-pandoi woka ngia pambawa dàngu woka ngia pa-pamula-nggu pingi angguru dàngu mbuu ndàba da ngara pingi wua ai pangangu-ka. 6Kuàki-ha da karaba papali-nja wai da woka ngia pambawa dàngu nuda da woka. 7Dadangu da atanggu da pakeinggu, dàngu da madedi la umanggu. Da bandanggu kanjupu rihiha na danguda welingu la bandada mbuta-naka na mambàda ngiangu la Yeruhali. 8Ku-pauhingu àmahu bara àmahu rara da pangala-nggu welingu la hilu katiku hanganji - hanganji-da da tana la wawa pareta-nggu. Matanggu ludu mini kawini da pa-mànjaku-ya na etinggu wàngu lududa. Ningumbu kala wihinggu nda pira bia danguda pa-namatu-nya jàka pira pambuha-nggu.
9Langatàka, kurihi-mapa pa-bokulu welingu la mbutana na mambàda ngiangu la Yeruhali, dàngu na manggàna-nggu pa-daingu manyori-mana. 10Nggàra bia pambuha-nggu peku ngala-manggunya. Ndedima ku-roputu wikinggu la pa-pàdanya nggàra biaya na pahàmu eti wàngu. Na-bokulu na etinggu ba nda kahewa-na na jàranggu, tàka nuna-duyaka na wundanggu. 11Tàka la malamiri ku-manginjiru-ha mbuu ndàba da paràma-nggu, dàngu mbuu ndàbana na njilinggu ba ku-pahàra-nja da paràma, ka pidunggu-nyaka ba nda nggàra-a ihida, nuda mbuu ndàbada. Nu na-pamukarungu-nggu kahewa-ma-ana hama tuna ma-kehangu ngiluma-a. 12Jiapa-kai ka nggi - nggikina, na haàtu hanganji dirama-ana ba nawunda-ha da pawunda-da da hanganji - hanganji ma-mangilu-nya nyuna.
Ka-pakiringu-dunggu-nyaka pa-kanandi-nya: Nggàraya na ihina na manggàna jàka ndia na nduba jàka ndia na kambanga? 13Deningu-mana, kupi-manya
“Na manggàna na rihi hàmupa welingu la nduba,
hama tunambu na harii ba na rihi hàmupa welingu la kapàtangu.
14Na tau manggàna na-ngalangu paita-ya na ngia pa-hanggangu-na;
na tau nduba hama tuna laku pa-làdangu-nanya,” wànggu.
Tàka kupi-mbunya na-pahama na urada na manggàna-ha nyuda mbuu ndàbada. 15La kanandingu-nggu, ‘na urana na tau nduba napa kudeni-mbunya. Ba tuna, nggàraka linguna mbuu ndàba na manggàna-ngguka?’ Ka pa-mbulu-dunggu-nyaka, nuna na manggana, ba nda ningu ndokuma linguna. 16Napa na tau nduba parengga marombangu-ya, tàka na tau manggàna nda pahili pangàdangu-mbuyapa. Napa ngeru nyuta mbuu ndàbanda, nda pahili inga-atapa. Nyuta mbuu ndàbanda lupangu tameti, tau manggàna hamangui tau manduba. 17Ba tuna, ka nda ningu-apa ihina na luri lai nyungga, nda hili hau-aya. Mbuu ndàbana kahewa-ma-ana; ba keha-nggunyaka na ngilu.
18Mbuu ndàba da paraï paruku-nggu dàngu da pangala-nggu la kanandingu-nggu nda ningua linguda lai nyungga, nadu ba jiangu-ma ku-bànjalu-nyaha na mahilu-ka. 19Tàka nggamu na mapinya jàka tau manggàna-ya jàka ndia tau manduba-ya? Jiapa-kai ba tuna nyunaka mamangu-nja da paraï paruku-nggu da pangala-nggu, la ngala luringgu la pinu tana yiana mulana na njili dàngu na manggàna-nggu. Ba tuna nudambu kahewa-ma-ana. 20Nàhu kupeka hàlaera ba mbàda dira matiki-kaka paràma pa-mbangatungu. 21Nadu naràma pa-mbangatungu na tau wàngu buri ndàba-nanya na manggàna-na, na papina dàngu na hupu pinguna la pangala-nya jàka nggàraya. Tàka la hupu njàpuna lupangu-ma na màtanja mbuu ndàba da paraï paruku-na la tau na manda-ana mayila ndokuna, nduma da nuda. Ba tuna numbu kahewa-ma-ana, dàngu nda namola-mbu! 22La ngala lurina na tau naràma dira matiki dàngu dira pa-mukarungu-ya; tàka nggàra-yaka na wunda mayila-na pa-hamemu wàna? 23Nggàra biaya na pawunda-na la ngala lurina, pa-mayila dàngu pahidu eti wànanya. La rudungu-mbu nda nangudu-mbu na etina. Ba tuna, mbuu ndàbada nuda kahewa-ma-ana.
24Nda hili nggàra-a marihi hàmu ndumana na tau welingu ba nangangu, ba na-ngunungu dàngu ba napàda-nja da paràma-na dàngu da ihi paraïna. Kupinya nuda mbuu ndàbada ba pawua-na i Alaha. 25Nggamu mapeku pangangu dàngu mapeku pambaha eti jàka nda ninya i Ala? 26I Ala na-wuangu manggàna, papingu wàngu dàngu pa-ohangu la tau na ma-pahàmu etiya Nyuna. Tàka na tau njala na-paràha-nya paràma himbu luri dàngu pa-pauhingu ihi paraï-na nduma tau ma-pahàmu etiya i Ala. Ba tuna, nuda mbuu ndàbada kahewa-ma-ana hama tuna na pa-mukarungu pa-kehangu ngilu.
@LAI 1995 Indonesian Bible Society (Lembaga Alkitab Indonesia)