KOLOHI 3
3
1Nyimi mbàda pa-paluri kariangu-kaika dàngu i Karitu. Jia-duya màtawa kai pamukarungu pangala-nja da maninja la awangu, la pangia-na i Karitu ba na-pareta dànya i Ala. 2Pahangga-nya na kanandingu-mu la maninja lai nu, màtanja da maninja la pinu tana. 3Nadu nyimi ba mbàda meti-mika, tàka na lurimi na-kawini karia-nya i Karitu daa lai Ala. 4Na, na paweli lurimi na ma-langatàka jiaya i Karitu dàngu jàka nawuwa ka Nyuna napa wuwa karia-minyaka la bunjuku-na!
Na luri memangu dàngu na luri bidi
5Jiaya nu, pameti-hawa da itirungu pinu tana, na ma-titiru-ya na wikimu la pa-njuraku, la pa-iraku, la pa-itirungu, la pa-matarungu ma-akatu, dàngu la pa-malumbangu (nadu na malumbangu hama-mana na ma-lumungu maràpu). 6Da hangia - hangia matungu nuduka da ma-pambumbaru-ya na hànggana i Ala la tau da manda karadaku-nya Nyuna.#La pa-haleli ndai da manda pirada nda ningua: la tau da manda karadaku-nya Nyuna. 7Nyimimbu àmangu mitundu-nja da pa-itirungu tungu nu, ba da-kuaha-kaipa.
8Tàka nàhu màtawa kai wàrunja da ma-akatu hangia - hangia welingu la wikimi: àmbi mbeni-dupa, àmbi hawuwatu-dupa, àmbi karaü-nya eti na tau hawiangu. Na kareuku tolangu dàngu na tola pa-irakungu àmbu jia luhu duna welingu la ngarumi. 9Àmbi maràngga panyonga dàngga angumi. Nadu na luri memangu-mi dàngu na hu - huri-naka ba mbàda pahàla-dimi-nyaka. 10Nyimi nàhu pa-wuangu-kaika luri bidi. Nyimi tau bidi-kaika, na pa-pabidi panga - ngalangu paraïna mawulu-kai nu i Ala, tundunya na hadana Nyuna. Na pawuku-na màta nyimi kai tanda hàmuya i Ala. 11Tàka na paruku-na nuna nu munangu hàla-danyaka na pa-hilitu-da da tau Yahundi dàngu da tau nda Yahundi, da tau da makàri dàngu da tau manda kàri; nda ningu-apa hekangu-da da tau hangàdangu dàngu da tau nda pingu huri, da tau ata dàngu da tau marandeka, nadu ba jia-ayaka i Karitu la mbuu ndàbana dàngu na-pambulu dànjaka nyuda mbuu ndàbada!
12Angu dedi, nyimi banjaru-na i Alakai. I Ala nambuha-nggai nyimi dàngu napindi-makai-ka nyimi hi mangu paleha-nanggai. Nuya na pakiri-na hi lupangu-ma bàdi mi-paloha-nya na mila etimi, na hàmu etimi, na karàda etimi, na malijangu etimi, dàngu na torungu-mi la mayila. 13Màta nyimi kai kawàra pa-norungu dàngga angumi, kai kawàra pa-jàmangu jàka ninya na matuu kiringu la anguna. Dàngu hàmu eti-mana duna i Miri ba najàma-nggai nyimi, jia-duya màtawa nyimimbu kai pa-jàmangu dàngga angumi. 14Tàka na marihi mbàtingu, jiaya: màtawa nyimi kai kawàra pa-mbuhangu, nadu na mbuhangu ba jiaya na ma-ohuru papohu-nggai nyimi mbuu ndàbami angu dedi hi lupa mi-malundungu. 15Màtawa da pabota - pabotami ka nauli-nya paraïna peku welingu lai Karitu na maninya la etimi. Nadu ba i Ala na mapaau-nggai nyimi pa-paangungu hi hama hatau-ami, ka peku lurimi la mànjaku na ma-pawelingu lai Karitu. Màtawa nyimi kai pa-malangungu. 16Màtawa da paaja - paajaru-na i Karitu da mambinu wàngu kanyuru ka na-tanjiku daa la etimi. Màtawa kai kawàra pa-ajaru dàngu kai kawàra panaungu wàngu manggàna-mi. Wundawa ludu pa-malangungu dàngu ludu wotungu hamanai da wili - wiliku pa-ngahu, wundawa ludu ndumana i Ala ba dàngu pamalangungu-mi daa la etimi. 17Nggàra biaya na papaloku-mi nyimi jàka ndia na papanii-mi, màtawa kai paloku dàngu kai panii la tamuna i Miri Yehu. Pa-malangungu-wa lai Ala Ama, rukuna na paràma-na i Yehu ndumami nyimi.
Na panuangu dàngga angu la luri bidi
18Angu dedi kawini papaha! Karadaku-wa la mini leimi, ka ba tuna nudu bàdi na hurimi ba ngaha patau Karitu-kai.
19Angu dedi mini lei! Mbuha-njawa da papaha-mi. Àmbi hanggàritu-dunja.
20Anakeda! Wai ngera-maminya dimi ba ngaha patau Karitu-kai la pa-manundu la ina amami, nadu ba nunaya na pahàmu eti wàna i Ala.
21Angu dedi nyimi manjadi ama! Àmbi pahidu-etiha da anami, hi lupa dambota monunguda.
22Angu dedi nyimi manjadi ata! Màtawa la mbuu ndàba-naka, kai karadaku la mirimi la pinu tana yiana. Àmbu mbulungu biana bai karadaku ba talànga hamata-danggai, nadu ka dawotu wànggama ba wàmi. Karadaku-wa lai nyuda dàngu eti tànjimi, nadu ba tembi-minya i Miri. 23Nggàra paràma biaya na pa-pahangga-danggai, màtawa kai ràma weli etingu, beri hama tuna i Miri na palumu-mi, nda mbulungu na tau bia. 24Namuya bai ngalangu wundami nyimi napa welingu lai Miri. Nggàraya na pa-payema-na i Miri ndumana na banjaru-na, jia-mahaka nuda napa da pa-wuana-nggai. Nadu na mangia dita langatàka nu na palumu-mi ba jiaya i Karitu wikima duna. 25Dàngu jàka nggamuya na matu manjala, napa patanggu-mananja duna da njala - njalaka, nadu i Miri ba nda na-tàngaru-a duna kaba mata tau.
Currently Selected:
KOLOHI 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
