NA RUKUDA DA PA-PAHURUNGU 27
27
I Paulu ba na-palirungu la Roma
1Ba hàlaka pabota-ya ba lupangu malaku-maka bàdi nyuma la Italia pakata-danjaka, i Paulu dàngu ba mapira-ha da angu tahangu-na hawiangu lai Yuliuhu, na parawira pamba tanatara Roma, “Kalibaru Hanganji Bokulu,” ba wàdanja. 2Ka hei-manyaka la kapalu na ma-pawelingu la Àndaramatiumu, tunaka nu hadangu wàmanya-ka na kapalu nuna, ba mbàda rimangu-naka pa-palirungu hanggangu la ngia pa-palabungu la hau parai - hau paraingu la porupenihu Ahia. I Aritàruku tau Makandonia, na ma-pamaingu welingu la Tehalunika angu pa-lirungu-mbuma. 3Hadangu harii tàka-manyaka la Hindungu. I Paulu nangguma pahàmu-manya paraïna i Yuliuhu. Na-pahia-manya nyuna palua pa-tadalu-ha da anguna, ka pekuna ba dawua-nya ngga - nggàra na pa-kalana-na. 4Welingu lai nu paliru pangalangu-manyaka. Ba na-hanobaku ngilu pa-ndebukungu na kapalu, paliru pipitu pangalangu-manyaka la halinggi nuha Hipuru na ma-pakambelingu welingu la ngilu. 5Tunaka nu pàlaku-manyaka na tehiku na matuba-nya la Kilikia dàngu Papilia, hàla tàka-manyaka la Mira la tana Likia. 6Lai nu na parawira natoma-nya na kapalu na ma-pawelingu la Alikuhandaria na ma-paliru hanggangu la Italia. Ka paleli-na-nggama-ka la kapalu lai nu.
7Nda pira mbua lodu biama ba mangeri pa-lirungu ba dira endapu-kama, dàngu dira matiki-dupa hi mangu patàka hama tuna la parai Kanindu. Tunaka nu ba ndedi na hàmu-mapa na ngilu, nda peku paliru pangalangu-amapa la tuba ngia pahanggangu-ma làti. Ka pa-lirungu-manyaka la luru nuha Kareta làpahu-nya la Ngunju Hàlamoni, ka peku pa-hapindingu-ma lai nu welingu la ngilu. 8Dira matiki ba ma-paliru pipitu-ya na hingi nuha, lundu tàka-manyaka la hau pangia, la Pahiwi Manandangu wàdanya tamuna, nda nggi tuana marauna welingu la parai Lahia.
9La rehi nu làpahu-nanyaka na Lodu Remi Papeku#na Lodu Remi Papeku; na lodu nuna pa-mbabungu-ya la mareni njàpuna na wulangu hiwa jàka ndia la pakiringu-na na wulangu hakambulu, nu la rehi nda hàmuna na ngilu hi pa-hanggàmaru wànguya jàka pa-lirungu. tau Yahundi. Pawàngu-mayaka na rehi pawàru-ma, hi lupa nda rehi-anapa la pa-paliru dàngu hàmungu. Jia-duyaka hi na-panamu hahanja nyuda paraïna i Paulu, 10“Angu dedi, tundunya na pa-kanandi-nggu nyungga, lalu pamburi wànguya jàka ta-paliru pangalangu. Nadangu-ma napa na rungginda, nda mbulungu biada da ngàndinda dàngu na kapalu-nda, tàka na lurinda nyutambu tau ta-yàmihu-ya,” wàna. 11Tàka na parawira nawai niyapa na njurumudi dàngu na nakonda kapalu welingu la paniina i Paulu. 12Na pahiwi lai nu nda nahàmu-ma jàka da-paengangu lai nu da kapalu la wula maringu. Jia ba tuna nuduka hi dadangu da tau la kapalu da ma-orangu la pa-paliru pangalangu ka dunjaku-nya na pahiwi nuna nadu ka pamukarungu lundu tàka la Peniku ka ndàdiku lai nu ba talànga wula maringu-ya wàda. La Peniku jia-duyaka na pahiwi la Kareta na ma-hanobaku-ya la patama lodu mbara luru dàngu la patama lodu mbara dia.#la patama lodu mbara luru dàngu la patama lodu mbara dia; jàka ndia: la pahunga lodu mbara dia dàngu la pahunga lodu mbara luru.
Na làpuru la tehiku
13La rehi nu tungu-nanyaka na ngilu mandangu weli lurungu. Da tau kapalu ba dareki-ya peku-naka ka hili pa-lirungu wàda. Ka wotu-danyaka watu labu hàla pa-lirungu-danyaka ba tundu pipitu-ya na nuha Kareta. 14Ndedi nggi mandaina tungu-nanyaka na ngilu làpuru – na Ngilu Timiru mbara dia ba wàdanya – na matungu welingu la mara, 15hi na-làndahu-ya na kapalu-ma. Ba nda peku paliru pangalangu-na na kapalu pa-hanobaku ngilu, jia-duyaka hi mapuli-maanya na kapalu ba namili ngàndiya ngilu. 16Ma-harangu pa-hapindingu hawutu ba ma-làpahu-nya la luru nuha Kaunda na makudu. Lai nu lundu dira-kama hi mamangu pamàka-nya na hakuhi kapalu-ma. 17Ba hàlaka pawotu-ya na hakuhi la kapalu, nuna na kapalu pa-kapingatu wànya kalorungu ba wàngu pawenda winggiru-nya. Paraï pa-mangàdatu pa-hanggetu la kabundu wara Hiriti na ma-kàrahu, da papuru-nja da liru hi puli-maanya na kapalu ba na-katundungu ngilu. 18Tungu pangalangu-mananya na ngilu, hi lupa hadangu harii pakiringu-danyaka pawàru-nja la tehiku da ngàndi kapalu. 19Hilu hadangu harii wàngu lima wikida nyudama da tau kapalu ba dawàru hàlanja la tehiku da pakaka - pakakahu la kapalu. 20Pira mbua lo - lodu biama ba nda ma-itangu ndoku mata lodu dàngu kandunu, tàka na ngilu pa-nuangu-mananya pa-làndahungu. La malamiri nda ningu-apa monungu-ma la pamara.
21Pira mandai bia-naka da tau ba nda dangangu. Ka hadangu-nanyaka i Paulu hi na-ndolaku la padua-da, hi napanii, “Angu dedi! Làti jàka mitundu pàkunya na paniinggu ka àmbu ta-palirungu welingu la Kareta, nda tahunggu-a làti maruha dàngu mamburi tungu yia. 22Tàka nàhu nyuna kukarai langatàka-kai ka peku pa-bokulu-minja da etimi. Nda ningua haàtu welingu lai nyimi Angu dedi majia meti, jiaya na kapalu jua-anda yiana na ma-wàrungu. 23Nadu kamodu na papalewa welingu lai Ala na pa-maraku-nggu, nu i Ala na mamangu-ngga nyungga, namai lai nyungga. 24Na papalewa napanii, ‘Àmbu mangàdatu-du Paulu! Nadu nyumu ba lupangu-ma bàdi mu-hurungu la Hanganji Bokulu. Dàngu paraï ruku hàmu etina i Ala lai nyumu, mbuu ndàbada da tau da ma-paliru karia-nggau napa damara hàla lumumu nyumu,’ wànangga. 25Jiaya nu angu dedi, màtawa ka da-bokulu da etimi! Nadu nyungga ba kuwaiya i Ala, nuka mbuu ndàbana napa na-pajàngapungu hama tuna ba wànangga nyungga. 26Na nyuna nyuta napa na-ndaiha-ta ngalingu la hingi tehiku hau nuha,” hi wàna.
27Nu la rudungu pa-hakambulu patu wàna ba dàngu halindingu-ma la Tehiku Àndaria, ràkangu mandalora-yaka da tau kapalu dapàda-nya na kapalu ba lihingu-nanyaka mamara. 28Jia hi da-dulurungu liku ningu watungu ba da-hukutu-ya na manjolungu-na na tehiku. Pi-danyaka lai nu na manjolungu-na ba mareni patu kambulu metiru-na. Tiangu-ki hakudu hilu hukutu-danyai, hàla pi-danyaka manjolungu-na lai nu ba mareni tailu kambulu metiru-na. 29Da-mangàdatu, napa na kapalu hi na-hanggetu bia la watu mbuli wàda, jia hi da-papuru-nja ba patu mbuada da watu labu la kajia kapalu, hi da-monungu ka nalu mbaru àru wàda. 30Dawàngu pa-kangunguhu da tau kapalu ba da-patikingu papalai welingu la kapalu. Da-papuru-nya na hakuhi beri papurungu-danya watu labu la hangga kapalu. 31Tàka i Paulu hi napanii-nya na parawira dàngu da panjuri la kapalu, “Yiada da tau kapalu jàka nda da-ndàdiku la kapalu, nyimi mbuu ndàbami angu dedi ndai mara-a,” wànanja. 32Jia-duyaka da panjuri hi da-kàtahu-maaha da liku hakuhi, ka mili-nanyaka na hakuhi.
33La rehi ba ndedi na-pabarahu, i Paulu nawànda-ha mbuu ndàbada la pangangu. Napanii i Paulu, “Mbàda hakambulu patu mbua lodu-mika angu dedi bai nedi - nedingu bia la dalu handuka ba nda nggàra pangami. 34Nàhu nyungga ku-wànda-kai nu la pangangu hawutu, ka peku halangatu-kimi. Nadu nyimi Angu dedi mbuu ndàbami napa mimara dàngu nda nggàra ehimi,” wànanja. 35Hàla papanii tuna nu i Paulu piti-nanyaka roti hi na-pamalangu-nya i Miri la hanggada nyuda mbuu ndàbada. Tunaka nu pabe - beri-nanjaka roti, hi nangangu. 36Nyuda mbuu ndàbada da-màndungu beli da etida, hi dangangu-mbui duda. 37Mbuu ndàbada da maninja la kapalu, ningu tau dua ngahu pihu kambulu nomuya#dua ngahu pihu kambulu nomuya; da pa-haleli ndai da manda pirada: dua ngahu pihu kambulu limaya; ningumbu ràkangu pihu kambulu nomuya. nggubulu-na. 38Ba dahàla ndàbaka pangaa pa-mbihungu, wàru-danjaka da uhu nggàndumu ngàndi kapalu la tehiku ka peku halela-na na kapalu ba wàda.
Ba na-hanggetu na kapalu
39Ba naharii-ka, ita-danyaka tau kapalu na mara, jia ba nda dapinya jàka nggàra tanaya. Daita-ya na hau njobu wai dàngu bulu warana. Jia hi da-patikingu pa-pahiwi-nya na kapalu lai nu, jàka pekuna. 40Ka rata-danjaka da liku watu labu hi dapuli-nja pa-tandaningu la tehiku. Hili hama-manai nuna ba dangguli-ha da liku pahondu wànja da kamudi. Tunaka nu pahei-danjaka da liru ngora kapalu, ka peku hapuputu-nanya ngilu na kapalu ka hanàhu-na la hingi wara. 41Ba tuna na kapalu na-tumburu-ya na kabundu wara, ka pa-hinggatungu-nanyaka na ngorana na kapalu nda nahilu nggàduku, tàka la kamuri-na làjaru-nanyaka ba na-làndahu-nya ngali mbangatu.
42Da panjuri la kapalu da-patikingu pa-pameti-ha da tau pa-tahangu, nadu ba da-mangàdatu napa hi ningu bia mangeni la mara hi dapalai wàda. 43Tàka na parawira nabaka-ha da pawuku-da, nadu ka peku marana i Paulu ba wàna. Na-paràha hàlanja da tau da mapingu pangeni ka da-kamburu mbehangu mangilu dàngu ka dangeni la mara; 44hawiangu màta ka da-pandutungu dàngu yàpada kapambalu dàngu kambera kapalu. Wàngu patuna nuduka hi mamara hàla tàka la mara.
Currently Selected:
NA RUKUDA DA PA-PAHURUNGU 27: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
