NA RUKUDA DA PA-PAHURUNGU 20
20
I Paulu ba nalua la Makandonia dàngu la Yunani
1Ba nahàla-ka pa-kamàndalu beli la Epihu, i Paulu na-pauhi-nya na kabungguru hi na-titiru-ha la pa-pamàndu-nya na pawaida. Tunaka nu pabeli-nanjaka langu hàla pangala-nanyaka na lakuna la Makandonia. 2Tadalu-nanya la hau pangia - hau pangia la Makandonia hi napanau padanja da tau da mapawai lai Yehu lai nu ba na pa-kapànduku-ha. Tunaka nu lua-nanyaka la Yunani. 3Tailu mbua wulana ba na-engangu lai nu. Ba talànga kanoma-naka pa-palirungu la Hiria, narongu lii da tau Yahundi pa-hamangu-danya la pa-pameti-ya. Jia-duyaka hi nabota-ya la pabeli li ningu la Makandonia. 4I Hopatiru anana i Piruhu na ma-welingu la Mbaria malaku karia-nya nyuna, hamanai i Aritàruku dàngu i Hakundu tau Tehalunika, dàngu i Nggayuhu tau Ndembiru. Màlambu i Timutiu, i Tihiku dàngu i Torupimu, da tau welingu la porupinihu Ahia. 5Nyuda dalaku mangilu-nggama nyuma hi da-patia-nggama la Tarua. 6Ba hàlaka paremi-nya na Pamangu Roti Nda Patai wolungu, pa-lirungu-manyaka ba ma-dunjaku-nya la Pilipi. Palàngangu lima mbua lodu pauhi beli hàla-manyaka dàngu nyuda la Tarua. Hau mingguma ba ndàdiku lai nu.
Na tadalu pajiaka wàna i Paulu la Tarua
7La rudungu ba lodu minggu#rudungu ba lodu minggu; jàka ndia: la lodu minggu la rudungu. -yaka haromu pauhi-manyaka la panga pa-matarungu ma-paangu dedingu. I Paulu na-pabanjaru dànja da tau, nadu haromu ba laku wànaka. Lundu mandalora-ya i Paulu ba napanii pangalangu. 8La kuru mangia dita, na ngia pa-pauhi-ma dangu epi palita. 9Na haàtu na bidi mini na ma-tamungu Eutiku, mandapu-nanya padua la katonga. Rukuna ba nda na pànjangu ndoku pa-kareuku i Paulu ka toma-nanyaka puri mata dira matiki nu na bidi mini la katonga, hi lupa na-kanabu huwawa ba tailu ndàdiku-na. Ba dadanda-nya mbàda meti-naka. 10Tàka i Paulu hi napuru tomaya nu wawa, hi na-panggubu-nya na bidi mini hi narohu-ya. Napanii i Paulu, “Àmbi kadiku-dunya, naluri-pa!” hi wàna. 11Tunaka nu i Paulu hi nahei beli hu dita, hàla hi na paberi - beringu roti, hi maràngga ngangu. Ba namandai-ka i Paulu papanii dànja da tau lundu harii la mbaru, ka laku-nanyaka i Paulu. 12Da tau dangàndi beliya nuna na bidi mini la umana dàngu lurina. Dambaha da etida dàngu nggaüru nda ukuha.
Welingu la Tarua laku la Miletu
13Laku-manyaka la kapalu hi ma-paliru mangilungu la Ahuhu la papiti-ya i Paulu pahei la kapalu lai nu. Nadu ba mbàda wuku-mana-nyaka ba nalaku lai nàhu nawàngu pali la mara. 14Ba ma-patomangu-ka la Ahuhu, hei parenggangu-nanyaka i Paulu la kapalu, ka pa-lirungu-manyaka la Mitileni. 15Welingu lai nu hilu pa-lirungu-manyai, hadangu harii tàka-manyaka la hau pangia na matuba-nya la Kiyuhu. Hama tuna dua modungu tàka-manyaka la Hamuhu, tàka hilu hau lodu tàka-madua-manyaka la Miletu. 16I Paulu na-patiki-manyaka la panda laku li la Epihu, ka àmbu nadangu na rehi na pa-wàrungu la Ahia wàna. Keha ka talu tàka àru la Yeruhali la lodu remi Petakota wàna.
I Paulu ba na-pabeli-nja langu da tau mapawai la Epihu
17Welingu la Miletu i Paulu na-pangàndi-manjaka langu da amabokulu kabungguru la Epihu ka damai pa-pahàmburu dànya nyuna. 18Ba datàka-ka panii dàna-njaka paraïna i Paulu, “Angu dedi, mipi-manyaka jàka nggikina na luringgu lundu nàhu la hongami nyimi piti welingu na lodu kawunga tàkanggu la Ahia. 19Ba kuwàngu pa-pawawangu wikinggu dàngu ba lundu wai matanggu ba ku-paloku-ya na paràma-na i Miri la padua mayila na pa-hambeta-nggu ruku pa-kakangu-da ma-akatu da tau Yahundi. 20Angu dedi, nyimi mipi-manya ba nda ku-kutuhu-anggai la pa-wàlahu hàlaya na malingu lai nyimi. Ba ku-ajaru-kai la pauhi mbabu dàngu la uma - uma. 21Ka tau Yahundi-yakai, ka tau hau banjaru-yakai, naingu-mana duku ba kupeka hahanja ka da-pambelingu welingu la nja - njalada dàngu ka da-hurungu lai Ala, dàngu ka dawaiya i Miri Yehu. 22Tàka nàhu keha ka-nunjuya na pareta-na na Ngahuna i Ala, laku-nggunyaka duku la Yeruhali. Nda kupi-anya jàka nggàra manggàna-ka tàka lai nàhu. 23Na papingu jia-aya tàka la hau parai - hau paraingu mbàda pa-ihiku-mana-nggaka ba napeka-ngga na Ngahuna i Ala, napa ba tama-nggunyaka la uma kapàtangu dàngu ba pàdangu-nggunyaka mayila. 24Tàka nyungga duku nda kuhindi-aya yiana na luringgu, mili ka ku-palundu-nya na wai ngeranggu na pa-patanggu-nangga nyungga i Miri Yehu dàngu mili ku-tuturu lundu njàpuna na luringgu la pa-bobaru-ya na Lii Mànangu rukuna na màja etina i Ala.
25Nyungga duku ku-tadalu hàla-makaika Angu dedi dàngu ku-wàlahu-manggai-nyaka jàka nggikina i Ala ba na-pareta ba Hanganji-ya. Nàhu duku kupàda-manya ba nda kuhili pa-hàmburu da-anggaipa Angu dedi. 26Jia-duya nu nyungga pa-ailulu-maanggu-nyaka ba kupanii-nggai la lodu nàhu, jàka era ningu napa angumi nyimi ma-yàmihu nda panjala-nggu nyungga-ayapa duku. 27Nda ku-handàkangu-ma duku papalai welingu la wai ngeranggu la pa-palara-nggainya mbuu ndàbana na pa-pakaka-na i Ala. 28Màtawa kai manggangu wikimi dàngu kai mangganya nggubulu-na na kabungguru na pambàda pakata-nanggai paraïna na Ngahuna i Ala lai nyimi la pamangga-nya; nadu ba nyimika pawotu la papawa-nya na kabungguru. Màtawa kai njangaya na kabungguru-na i Ala hama tuna na ma-pawangu ba nanjanga-ha da mbimbina, nadu i Ala#i Ala; da lawiti ndai da manda pirada: i Miri. natuya-ka mangu wikina na kabungguru paraï ruku metina na Ana wikina.#metina na Ana wikina: jàka ndia: metina na wikina. 29La taliu-nggu nyungga nàmu-manjaka duda da ahu rumba la padua-mi nyimi. Dàngu da tau da panjanga-mi uhu-mada-njaka duda paraï da ahu rumba. 30Màlai welingu lai nyimi wikimbu angu dedi napa ningu mangàndi lii manda pa-deningu. Nu hi tuda nu ka pekuna da tau da mambàda pawai lai Ala ka da-njàrangu dàngu ka dakiku-nja nyuda. 31Jiaya nu mangga rimangu! Namuya ba tailu mbua ndaunggu ba lundu wai matanggu rudungu lodu ba nda ku-pànjangu ndoku pa-ajaru-kai nyimi nimbihu màra haàtu-nggai.
32Nàhu pakata-nggunggaika nyimi lai Ala màta ka Nyuna na ma-kabubulu-kai dàngu nyimi kai pamàndu-nya na lii pa-namungu-na i Ala. Ninguma duna kuaha-na i Ala la pa-kapànduku-kai dàngu la pawua-nggainja da kanyuru da pambàda payema-nanya mbuu ndàbana na kabungguru-na. 33Ndedi ku-handàkangu-ma duku pa-matarungu àmahu jàka ndia paki welingu la haàtu. 34Ba pi-madu-minya Angu dedi, ba ana màka wiki-manggu duku la paràma ba ku-patoma-ya na pakalana-nggu dàngu da angunggu da ma-karia-ngga. 35La hangia - hangia ku-paita-manggaika ngerangu, ba taràma pa-mbangatungu tungu nu lupangu-ma tandula-ya na angunda na manda màka. Nadu ta-kanandi-nya bàdi na papeka wiki-nanda i Miri Yehu, ‘Narihi pa-ohangu-pa la pa-wuangu welingu la pakei,’ ba wànanda,” hi wàna.
36Ba nahàla-ka papanii i Paulu, patika dàna-njaka nyuda mbuu ndàbada hi da-hamayangu. 37Hii ndàba-danyaka ba darohu-ya i Paulu dàngu ba da-kamahingu lii malangu-da la lakuna. 38Nu hi da-hawina nadu ba napanii i Paulu ndai hili ita-akapa ba wànanja. Ka laku karia-danyaka lundu tàka la kapalu.
Currently Selected:
NA RUKUDA DA PA-PAHURUNGU 20: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
