NA RUKUDA DA PA-PAHURUNGU 18
18
La Korinitu
1Hàlaka patuna nu i Paulu dunjaku-nanyaka la Atena hi nalaku la Korinitu. 2Lai nu na-tàbuku-ya na haàtu na tau Yahundi, ma-tamungu Àkuwila, paweli-na la Potuhu. I Àkuwila bidi tàka-ana welingu la Italia, dàngu i Perikila na papaha-na. Hi da-pamaingu nyuda la Korinitu nadu i Hanganji Bokulu Kalaundiu ba na-paràha-dunyaka mbuu ndàbana na tau Yahundi paluhu welingu la Roma. I Paulu nalua pa-tadalu-ha nyuda, 3ka ndàdiku dàna-njaka lai nu dàngu naràma pambapa dànja nyuda, nadu ba na-pahama na paràma-da dàngu i Paulu la ngera himbu luri, nu la pawulu uma tera. 4Tàka la nimbihu lodu Hangahu, nalua la uma bungguru i Paulu pa-pabanjaru dànja da tau Yahundi ka pekuna da tau Yahundi hamanai da tau Yunani ka dawaiya i Yehu ba wàna.
5Ba datàka-ka i Hila dàngu i Timutiu welingu la Makandonia, nda ningu-apa pànjangu-na i Paulu pa-bobaru-ya na lii welingu lai Ala la tau Yahundi, ba jia-yaka na Hanganji Pa-mànangu i Yehu na paràndi-na i Ala. 6Tàka ba naingu biana na-rawaku-danya dàngu na-paaka-danya i Paulu, ka kàmbahu-nanjaka da aü la pakina, ba hau tandaya pa-panamu wànanja da njalada nyuda. Napanii, “Jàka mi-hanggàmaru dimi, panjala wiki-maminya! Nyungga duku pahàlangu-nggunyaka limanggu! Piti welingu nàhu laku-nggunyaka duku la tau nda Yahundi,” wàna. 7Hàla dunjaku-nanjaka nyuda paraïna i Paulu hi nalaku pa-ndàdiku la papa uma bungguru. Na uma nuna uma haàtu tau nda Yahundi-ya, tàka nalumu-nya i Ala. Na tamuna na tau nuna Titiu Yutuhu-ya. 8Ba tuna i Karipu, na kapala uma bungguru dàngu nggubulu-da da kalembi-na dapawai lai Miri Yehu. Dàngu nadangu-mbu na tau hawiangu la Korinitu na ma-patingi-nya na lii pa-patàka-na i Paulu, dàngu hi dawaiya i Yehu hi parunu-nja.
9La hau rudungu la hau harii mata, i Miri napanii-nya i Paulu, “Àmbu mangàdatu! Kareuku pangalangu bia dàngu àmbu kandii. 10Nadu Nyungga ba ndutu-manggunggau. Nda ningua haàtu mapeku pawulu akatu lai nyumu, nadu ba nadangu na tau la paraingu yiana na taunggu Nyungga,” wànanya. 11Jia-duyaka ba tuna nu i Paulu hi na-paengangu la Korinitu, hau ndau ha-kawita-na, hi na-ajaru-nja puluna i Ala lai nyuda.
12Ba nggumbunuru-ya i Nggaliu la Akaya, da tau Yahundi da-pahamangu la pa-papanya i Paulu hi dangàndi-ya la rapatu. 13Da-jakaru-nya na pakàla wàdanya, “Na tau yiana na-titiru-ya na tau dangu la palumu-nya i Ala wànya na huri na ma-pandubakungu dàngu na ukuna i Muha!” wàda.
14Ka kuhema ba wànaka làti i Paulu, panii-ma-ananya i Nggaliu la tau Yahundi, “Ha nyimi tau Yahundi! Na pa-pakàla wàmi jàka era ningu papangga-na jàka ndia pa-akatu-na, ràkana jàka ku-patoru-nya la pa-patingi-nggai bai pakàla. 15Tàka yiana jia biaya bai palumu-nja da panii, da tamu dàngu da uku wikimi! Jia ba tuna mi-panjàpu wiki biaya dimi! Nambotu na etinggu nyungga la patimba-nja da ngga - nggàra da matuda nu!” wàna. 16Ka wàngga-nanjaka paluhu paraïna i Nggaliu. 17Ka yàpa-danyaka i Hohuteni, na kapala uma bungguru hi dapalu-ya la hangga menja rapatu. Tàka nyuna i Nggaliu nda nangguma-mbuanya na matuna nu.
I Paulu ba nabeli la Atiokia
18Hàlaka patuna nu namandai-mapa i Paulu ba na-engangu la Korinitu. Tunaka nu pabeli-nanjaka langu da tau da mapawai lai nu, hàla pa-lirungu-danyaka anguda i Perikila dàngu i Àkuwila la Hiria. La Kengikaria, na lunggina i Paulu na pambàda pulina pamalai nangguti-nya, nadu ba ningu panjanji-na lai Miri.#panjanji-na lai Miri; Pa-namatu-nya na pakàli wàda da tau Yahundi, ba kikiru lunggi jiaya na tanda ba mbàda pa-pahàrangu-yaka na pambàda njanji. 19Ba datàka-ka la Epihu, dunjaku-nanjaka i Perikila dàngu i Àkuwila, hi natama la uma bungguru, hi da-panjonjangu kanandingu dàngu da tau Yahundi lai nu. 20Dakarai-ya ka na-ndàdiku mandai dakinja nyuda, tàka nyuna nda nabihu. 21Na nyuna ba tuna, la rehi lakuwa ba wànaka, panii-nanyaka, “Jàka napuli-dungga i Ala, jiangu-madu napa ba kuhili beli lai yiahu,” wànanja. Nahàla-ka papanii tuna nu, laku-nanyaka welingu la Epihu.
22Ba napuruka la Kaiharia, nalua-pa la Yeruhali la pa-patàka-nya lii malangu na kabungguru lai nu, hàla pangalangu-nanyaka la Atiokia. 23Ba namandai-kika pa-ngiangu lai nu, hilu laku-nanyaka pa-tadalu-ya la ngaba Nggalatia dàngu Paringgia la pa-pamàndu-nja da pawaida da tau mapawai lai nu.
I Apolu la Epihu dàngu la Korinitu
24Ba talànga tunaka nu tàka-nanyaka la Epihu na haàtu na tau Yahundi na madedi la Alikuhandaria, na ma-tamungu Apolu. Nyuna namàhi pa-kareuku dàngu na-manyàmu-nya na ihi Huratu Matua, 25dàngu pa-pandàmangu-mayaka la papinya na pa-ajaru rukuna i Yehu. Wàngu mbumbaru-na na patikingu-na lalu ma-nihiku-ya ba na-ajaru tau na rukuna i Yehu, jiapa ka jia-ayapa na pa-runungu-na i Yuhani na papina. 26Lalu toru mbeniya i Apolu ba na-kareuku la uma bungguru, dàngu ba darongu-yaka na pa-ajaru-na paraïda i Perikila dàngu i Àkuwila, karia-danyaka nyuna la uma. Lai nu da-palara padeni-nya na rukuna na pa-pakaka-na i Ala la pa-pamàna-nya na tau rukuna i Yehu. 27Tunaka nu pa-tikingu-nanyaka i Apolu palua la Akaya. Da tau da mapawai lai Yehu la Epihu da-tulihu-nja huratu da angu dedi da mapawai la Akaya ka danggepi-ya i Apolu. Dàngu ba na-tàkaka i Apolu la Akaya, na palingu langatàka na pa-ndulangu-na lai nyuda da tau da mbàda pawai lai Yehu paraï ruku mila etina i Ala. 28Ba wàngu pa-mahumbarungu-ya i Apolu, na-pa-kamàndalu-ha da tau Yahundi da ma-patayaku dànya la hangga madangu. Dàngu na-paloha-nja da mbuti la nda - ndalaru la Huratu Matua ba jiaya i Yehu na Hanganji Pa-mànangu na paràndi.
Currently Selected:
NA RUKUDA DA PA-PAHURUNGU 18: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
