2 KORINITU 11
11
Na rukuna i Paulu dàngu da pa-pahurungu kabàli
1Pahia àrungga nyungga ka ku-pahada ma-ndubangu hawutu. Pekuna wàngguka? 2Nyungga kurinju-nggai nyimi, hama tuna i Ala wikimbu ba narinju-nggai nyimi. Nyimi ngera hama tuna na bidi kawini ba dàngu yahangu-napa, na pambàda ràndinggu la pa-papohu-nja dàngu leina, nu i Karitu. 3Tàka na-kadiku na etinggu nyungga napa hi ningu bia ma-panyonga-ya na kanandingu-mu la panda hili tuturu lai Karitu, hama tuna àmangu i Hawa ba panyonga-ya paraï ruku màhina i Ularu. 4Nadu ba kureki-ya mi-mbuhangu nyimi panggepi-ya na tau na matàka-nggai dàngu na ma-ajaru-nggai rukuna na Yehu haàtu – nda jiaya i Yehu na papeka-manggai nyimi. Dàngu minggepi-mbuya na ngahu dàngu na “lii mànangu” na mahau ailulu-ya welingu la Ngahuna i Ala dàngu na Lii Mànangu na pambàda kataku-mi welingu lai nyuma.
5Nyungga duku nda ana pàdangu-manggu wikinggu ba kurihi ngia wawa welingu lai nyuda da “pa-pahurungu” nu da manda ningu hamangu! 6Talànga wanguna nda kutika papingu pa-kareuku ihu nyungga, tàka jàka jiaya na ngera pingu, nda tau nduba-aka duku. Nuna mbàda paita-mamanggai mbuti la hangia - hangia lai nyimi.
7Ba jia na-bobaru-nggunya lai nyimi na Lii Mànangu welingu lai Ala, nda ana karai-anggunggai kai tanggunya na luringgu; dàngu ba tunggu nu pa-wawangu-nggunya wiki-dungguka. Hi tunggu nu màta ka dajangga nyuda wànggunggai. Màla njala-nggunyaka nu hanggangu lai nyimi? 8Ba jiaya na lumu-nggunggai nyimi, da kabungguru hawiangu da matanggu-nya na luringgu nyungga. Hi ku-parunggi-ha nuda da kabungguru, ka peku ndula-nggunja nyuda, wànggunggai ngalangu pawànda. 9La rehi nu jàka ningu manjaka-ngga, nda ku-handàkangu-a pa-pahanduka haàtu welingu lai nyimi. Mbuu ndàbada da pa-kalana-nggu, da angu dedi welingu la Makandonia-a duda da ma-payema-ngga. Kumangga pahàmu-manya duku ka àmbu ku-pahanduka-ha nyuda la ngga - nggàra bia ba wànggu, dàngu napa kumangga mànu-manya duku ka na-padaingu ba tuna nu. 10Na hamemu-nggu yiana nda peku-ana la pa-podahu-ya jiapa ka la nggi - ngginimbu la nggubulu tana Akaya, nadu na pa-ajaru-na i Karitu na ma-deningu ba ninya lai nyungga. 11Nggikina hi kupanii tunggu nu? Màla jia-yaka nu ba nda kumbuha-nggai nyimi? Napi-mangga i Ala ba kumbuha-nggai!
12Nggàraya na pa-palaku-nggu nàhu, napa palaku pangala-manggu-nyapa duku ka àmbu peku ningu latana “da pa-pahurungu” hawiangu la pa-pabokulu wikida dàngu la papanii, ba hama tuna nyumama na ràmada nyuda. 13Da tau tungu nu jiaha da pa-pahurungu kabàli. Jia-mahaka nyuda da tau maràma da ma-pakambura-nya na tau ba dawàngu panjàda, ba hama tuna pa-pahurungu-na i Karitu-haika nyuda. 14Nda pa-hangàtarungu-aha ba tuda nu nyuda, nadu i Kambàliku-mbu ba nakàli njàda-madui duna ba hama tuna maranongu hariiya! 15Jia-duya nda hina wàngua jàka danjàda da malumu-nya i Kambàliku ba hama tuna na tau na malumu-nya na pawuku-na i Alaha. La malamiri napa dahunggu-maya duda na tuda himbalu-na mbuu ndàbada da paruku-daka.
Na papàda-na i Paulu ba pa-pahurungu-ya
16Màta ka kuhili beli-kinya handàkangu: Àmbu jia ningudu makaka-ka ba tau ndubaka nyungga. Tàka nyimi jàka timi nukai bai kakaka, pahia àrungga nyungga yia manduba ka ku-hamemui duku hawutu. 17Tiangu màta ka kuwunda-ha da pa-hamemu wànggu, na nyuna nda i Miria na ma-paràha-ngga papeka-ha nuda. La ngerana yiana langatàka panii tau ma-ndubangu-nggunya. 18Tubangu-ma ba nadangu na tau na ma-hamemu wàngu ngga - nggàra la ngera pinu tana, ba tuna ka ku-hamemui duku hi wànggu. 19Nadu ba dàngu hàmu eti bidua-mi bai patoru-nja da tau manduba, nadu lalu pingu-kama nyuma ba wàmidu. 20Nyimi dimi mi-pahia bianya na tau la pa-atanggai nyimi, ba na-kapidihu-kai dàngu ba na-ohurungu utuna welingu lai nyimi, jàka ndia ba nakaka wikina ba nangia dita welingu lai nyimi, dàngu ba natoru mbenimbu patàba-kai. 21Ku-makia wa-inya la papeka-ya nyuma yia ba lalu malijangu-kama nyuma la patuma nu.
Tàka jàka nggàraya na patoru mbeni wàna pa-hamemu na tau hawiangu, kutoru mbenimbui duku nyungga! (Nu pa-kareuku tau ndubangu-dunggunya.) 22Tau Imbarani-ha nu nyuda? Nyunggambu tau Imbarani-ka. Tau Ihirailu-ha nu nyuda? Nyunggambu tau Ihirailu-ka. Wàlana i Ambarahamu-ha nu nyuda? Tuna numbu duku nyungga! 23Ma-lumungu lai Karitu-ha nu nyuda? Ba ronguya hama tuna ma-mbulangu kandingu-ka yia nyungga, na nyuna ma-lumungu marihi hàmu-maka duku welingu lai nyuda mbuu ndàbada! Kurihi mbangatu-mapa duku paràma, dàngu kurihi la pakàli patama-ngga la uma kapàtangu, kurihi la pakàli pa-mayila-ka dàngu la pakàli tika pameti. 24Mbàda palima wundangu-ka ba na-pamayila-ka tau Yahundi, ba palu wàngga ràmbahu patailu kambulu hiwa wundangu. 25Pandailu wundangu ba da-ràmbahu-ka tau Roma; handàkangu ba pinjalu-ngga watu. Pandailu wundangu pa-tambulu-ngga kapalu la tehiku, dàngu ku-handàkangu pa-halindingu la tehiku ba dua kambulu patu mbua njàmunggu. 26Dangu kàli ngia palaku maraunggu na ma-hanggàri: na hanggàri la iwa, na hanggàri la ma-rambangu, na hanggàri welingu la tau Yahundi dàngu la nda Yahundi, na hanggàri la kuru paraingu, na hanggàri la hambeli paraingu, na hanggàri la tehiku dàngu na hanggàri welingu la tau da ma-pangia ngaba wikida ba angu dedi Karitu-ha tàka hi ndia paduai. 27Kuràma dira matiki lundu diraka ba ya - yàhunggu: naingu-mana ba nda ku-mahuru, ba nda kungangu, ba nda ku-ngunungu, nda ku-pambirangu bia pa-tawàlahu la pa-rimbangu, la pa-maringu ba nanjaka-ngga pakinggu dàngu ba nda ningu ngia pa-ngiangu-nggu. 28Hinggilu-da nuda mbuu ndàbada, nimbihu lodu ba ku-kadiku-nja da ngerada da kabungguru mbuu ndàbada. 29Jàka ningu ma-lamanga, ku-lamanga karia-mbunja. Jàka ningu ma-kanabu la manjala, na-làjaru na etinggu.
30Jia-duya keha ka ninguma bàdi pa-hamemu wàngu jàka wànggu, jiaha jàka nggàraha da ma-pawuwa-ya na lamanga-nggu da pa-hamemu wànggu. 31I Ala, Amana i Miri Yehu napi-mangga nyungga ba nda ku-kambàliku. Pa-wotungu-ya na tamuna lundu nu - nu. 32Ba jia na ningga la Ndamàhiku, na nggumbunuru na ma-kuaha lai nu la lumbu pareta-na i Hanganji Aretàhu, na-paràha-nja da tanatara padaiya na pindu bokulu, la payàpa-ka nyungga. 33Tàka da-duluru wàngga hau katanga hu wawa welingu la katonga kangeli. Tuna nuduka hi ku-tamàhiku welingu la limana nuna na nggumbunuru.
Currently Selected:
2 KORINITU 11: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
