1 PETURU 3
3
Mini lei dàngu papaha
1Jia-mayai dimi papaha, itangara-ma bàdi la mini leimi, jàka ningu la hongada manda waiya na puluna i Ala, ka peku pawaida rukuna ba daita-ya na hurimi. Dàngu ndai jàra-a papanii ngga - nggàra lai nyuda, 2nadu ba daita-ya na huri hàmumi na ma-yahangu. 3Na manandangu-mi àmbu jia biaya na manandangu pangita, bai pa-mananda-nja da lunggimi, bai wotu ngaü jàka ndia paki mbana wili. 4Tàka màtawa na manandangu-mi ka welina la eti dalu, nahuri ma-malijangu na ma-mandangu; nudaha duda da manandangu palupangu da ma-pawilingu langatàka la hanggana i Ala. 5Ba tuna nukadu àmangu da kawini da maningu anggama-da da mamonu-nya i Ala ba da-pamanandangu wikida, wàngu tangara-da la leida. 6Tuna numbu i Hara, ba na-tangara lai Ambarahàmu, umbu ba wànanya. Nyimi nàhu jiakai anana i Hara, jàkai tu mahàmu dàngu nda mangàdatu-minya jiapa ka nggàra-yakai.
7Dàngu nyimimbu dimi lei, dàngu pingumi bàdi bai luri dànja da papaha-mi, dàngu pàda-minya ba la kaloka tau ma-maluputu-ha nyuda. Itembi-maha bàdi, ba angu-ma-diminja la panduma-nya na pa-namungu-na i Ala, nu na luri langatàka welingu lai Ala. Wunda-yawa yiana, ka àmbu ningudu ma-paratahu-nya na hamayangu-mi.
Na mayila ba wunda mahàmu
8Na mbulungu-na yiana-ya: màtawa kai kahau etingu angu dedi dàngu kahaungu papàda etimi. Màtawa kai pa-manàwarungu hama tuna tau ma-paangu dedi. Dàngu màtawa kai pa-milangu eti dàngu kai karàda eti. 9Àmbi palimba wànya ma-akatu na ma-akatu, jàka ndia na tolangu wàngu tolangu; tàka màtawa kai pa-himbalu-nya wàngu kamahi-minya kanyuru welingu lai Ala. Nadu hi kiri paau-nanggai i Ala jia-duya ka peku ngalangu-mi kanyuru welingu lai Nyuna. 10Daa la Huratu Matua tuna yia na pa-tulihu,
“Na tau na ma-patikingu pambuha-nya na luri
dàngu la pa-deninja da lodu hàmu,
namangga-manya bàdi na ngaruna ka àmbu napanii wànja da ma-akatu
dàngu nda tikina ngga - nggàra ma-kambàliku.
11Namarau-manya bàdi na ma-akatu, ka nawunda-ya na mahàmu;
nahimbu langatàka-maya bàdi na papeku ka lupa nangala-nya.
12Nadu i Miri ba hamata mànu-manaha da tau da mawunda-ya na pambuha-na,
dàngu na-tanaü mànu-maha i Miri da hamayangu-da;
tàka na-ndubaku-ha da tau da mawunda ma-akatu,” wàna.
13Jia nggamu-yakaka na matunggai ma-akatu jàkai rinjungu pawunda mahàmu? 14Tàka jiapa kai pàdangu-kadu mayila rukuna bai wunda mahàmu, utu-maminya! Àmbi mangàdatu-dunya nggamu biaya, dàngu àmbi kadiku-dunya. 15Tàka màtawa kai tembi pa-ihiku-nya i Karitu-ma-a la eti dalumi na ma-patangangu la mandapu-na ba Miri-duya. Dàngu màtawa kai rimangu mànu la pahema la tau na ma-paàra-nya rukuna na monungu na pamangu-mi. 16Tàka iwànyawa nuna wàngu malijangu dàngu huri lii patembi. Dàngu màtawa na wini etimi ka nahàmu-ma, jàka napulu-nggai tau rukuna na luri hàmumi ba makiku-nya i Karitu-kai, ka da-makia wiki nu da tau mapulu-nggai. 17Narihi-pa pahàmu bai pàdangu mayila rukuna bai tu mahàmu – jiaya jàka wàna i Ala – welingu bai pàdangu mayila rukuna bai tu ma-akatu. 18Nadu i Karitu ba na-handàkangu-a pameti#pameti; dadangu da lawiti ndai: pa-mayila. nduma lundu nu - nu lumuda da njala tau – na haàtu tau nda njala, nameti lumu tau njala. Hi natuya nuna i Karitu ka peku ngàndi-nanggai lai Ala. Na pa-pameti jiaya na toluna, tàka hi paluri beliya la luri pangahu. 19Daa la ngahu laku-nanyaka pa-bobaru-ya na puluna i Ala la hamangu tau meti da ma-ngiangu la oka: 20nu da hamangu tau meti da manda tuturu lai Ala àmangu la rehina i Nuhu. La rehi nu na-patiangu wàngu lerangu etina i Ala ba talànga pandoi-na kapalu i Nuhu. Didi-aha da tau da ma-ngiangu la kapalu-ma-a – ba tau mawalu-ha nggubulu-da – da pa-pamara wàngu iwa obungu. 21Màla, ngerana nuna-duyaka na pa-pamaü-na na pa-runungu nàhu na ma-pamara-kai. Yiana na pa-runungu nda hau lii pawunda-aya la pa-paili-ya na tolu welingu la ma-iraku, na nyuna panjanji weli etingu-minya lai Ala. Nuna na pa-runungu na-pamara-kai rukuna ba mbàda hadangu beli-naka i Yehu Karitu welingu la meti, 22hi nahei-ya la awangu. Nàhu yàpa dàna-nyaka kuaha i Ala hi na-pareta-ha mbutada da papalewa, mbutada da ma-kuaha, dàngu mbutada da ma-kapingatu-ka.
Currently Selected:
1 PETURU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
