1 PETURU 1
1
1-2Angu dedi banjaru paleha-na i Ala, ma-tanyalangu la tana tau la ngabana la Potuhu, la Nggalatia, la Kapandokia, la Ahia dàngu la Mbitinia! Nyungga, Peturu, pa-pahuru-na i Yehu Karitu, ku-monungu màla àruki i Ala ka nawua-nggai mapeku mahàmu na mabundu làndangu.
Nyimi papindi-kai la panjadi banjaru-na i Ala nunjuya na pauna-na i Ala Ama. Dàngu na Ngahuna i Ala mbàda padedi-nanggaika banjaru matua-na, pa-patukingu tungguna i Ala, kai tuturu lai Yehu Karitu dàngu ka pa-matua-kai ruku wai riana.
Na monungu ma-undungu
3Màlawa ka ta-pamalangungu lai Ala, na Amana na Mirinda i Yehu Karitu! Nyuna lalu mila-nanda eti, jia ba tuna hi nawua-nda luri bidi, rukuna ba na-pahada belinya i Yehu Karitu welingu la meti. Nuna nu jiaya na mawua-nda monungu ma-undungu. 4Ta-monungu ka tamangu-nja da kanyuru da pa-paloku-nanya na banjaru-na paraïna i Ala, nu da kanyuru da pa-bànjalu la awangu, hi nda da-ngalangu paruha, jàka ndia hi nda da-muhungu, jàka ndiakai nda damiri. 5Nuda mbuu ndàbada tunggu-minja, maa bai pawaidu lai Ala. Napa na-katindi-kai na kuaha-na i Ala ka peku ngala-minya na pamara wàngu na pa-payemangu-kai napa la hupu njàpuna.
6Jia ba tuna màtawa kai mbaha eti, jiapa-kai la rehi nàhu na manda nggi tuna mandaina ba lupangu-ma ihawina ruku tàka-nanggai ma-pakamangu hangia - hangia. 7Na pawuku hi natàka-nggai ma-pakamangu jia-duya ka itanya mbutina jàka tuba pawai weli etingu-dimi lai Miri hi ndia. Da àmahu rara da ma-ngalangu paruha-mbu, pakama wànja epi. Màla na pawaimi darihi pa-wilingu-pa la àmahu rara, jia ba tuna hi kama-mbunya bàdi ka peku màndungu-na. Ba wàngu patuna nuduka hi peku wotunggai napa dàngu hi tembikai dàngu hi pa-bunjuku-kai la rehi mai belina i Yehu Karitu. 8Nyimi imbuhanya, jiapa-kai àmangu ba ndai ngitaya. Dàngu bai waiya Nyuna, jiapa-kai nàhu ba ndai ngitaya. Tuna nuduka hi ihawola, hi pàdanya na mbaha eti manda najaru na panda taü. 9Nadu ba ngala-minyaka na ngia pa-orangu-na na pawaimi, nu na marada da hamangu-mi.
10Jiaya na pamara wàngu yiana-duka na-pakanàndaru-da dàngu na-pamanginjiru-da da wunangu, dàngu hi danyura-ya na kanyuru na pa-panduma-nanggai i Ala. 11Da-kanàndaru-ya jàka nggikina dàngu pirangu-ka napa ba nanjadi nuna,#jàka nggikina dàngu pirangu-ka napa ba nanjadi nuna; jàka ndia: jàka nggamuya na tau nuna dàngu jàka pirangu-ka na rehi tàkana. nu na pawuku-na na Ngahuna i Karitu na maninya daa lai nyuda. La rehi nu nanyura-ya lai nyuda paraïna Ngahuna rukuna da mayila da matàka-nya i Karitu ngeru, dàngu na mangunju-na na ma-pandutungu la hambeli-na nuna. 12Na bowa-njaka da wunangu paraïna i Ala ba nda ndumada nyuda-a hi dawunda-ha nuda, na nyuna lumumi nyimi; nu da lii parongu lohami nàhu welingu la ma-bobaru Lii Mànangu rukuna i Yehu Karitu. Da-patàka-nggainja nuda da lii wànya na kuaha-na na Ngahuna i Ala na papalewa welingu la awangu. Jiapa da papalewa-mbu da-rinjungu-mbu papinya nu na lii langu pa-bobaru-da da ma-bobaru Lii Mànangu.
Na lii kamahingu ka luri matua
13Jia ba tuna nu, màtawa kai rimangu dàngu kai hawanjiru padua. Mangga rimangu-ma dàngu monu langatàka-manya na kanyuru na-pawuangu-kai napa la rehi mai belina i Yehu Karitu. 14Manundu-wa lai Ala, dàngu àmbi luri namatu-duya na pa-itirungu àmangu, ba ndedi-mapa itandaya i Ala. 15Tàka màtawa kai matua la pawunda-mika mbuu ndàbana, hama tuna i Ala na ma-paaunggai ba na-matua. 16La Huratu Matua pa-tulihu-ya, “Màtawa kai matua, ba ma-matua-ka Nyungga,” wàna.
17Nyimi Ama wàminya i Ala bai hamayangu lai Nyuna. Màla i Ala nuna-maka na ma-patanda-nya wai ngerana na tau nunjuya na paràma-na haàtu - haàtu ba dàngu nda pindina kaba mata tau. Jia ba tuna nu ba talànga ninggaipa la pinu tana yiana, màtawa kai pa-bunjuku-ya i Ala la luri-mika. 18Ba pi-diminya nggàraha da pa-palohu wàngukai ba pahàla-kai welingu la luri manda ningu lingungu da pa-pakangeha-danggai da boku la mangilu-mi. Na pa-palohu wàngukai nda jia-aha da banda da ma-molungu ka àmahu baraha jàka ndia ka àmahu rara-hakai, 19na nyuna ma-pawilingu halawàla-maya; jiaya na wikina i Karitu wiki, ba hama jiangu na mbimbi na pa-mangejingu lai Ala na manda ningu nyurangu, na manda ningu njalangu. 20I Ala napindi-ya i Karitu ba ndedi pa-padikangu-ya na pinu tana. Dàngu la lo - lodu mareni njàpuna yia na rehi, mai-nanyaka la pinu tana ka peku pamara-nanggai. 21Rukuna Nyunadu hi kiri pawaimi lai Ala na mambàda paluri beliya welingu la meti hi na-pabunjuku-ya. Jia ba tuna, jiaya i Alama na pawaimi dàngu lai Ala-mbuya na ngia pa-monungu-mi.
22Maa bai tuturu-du la lii papekangu-na i Ala, ka pa-yahangu-dimi-nyaka wikimi dàngu hi imbuha weli etinya na angumi patau pawai. Jia ba tuna nu, màtawa kai pambuha weli etingu#weli etingu; la pa-haleli ndai da manda pirada: wàngu eti yahangu. dàngga angumi. 23Nadu ba rukuna na puluna i Ala na maluri dàngu na ma-palupangu-du, tàka hi injadi tau bidi nu na manda welina la tau, na nyuna welina lai Ama na ma-palupangu duna. 24Daa la Huratu Matua tuna yia na pa-tulihu:
“Nggubulu-na na tau pinu tana beri hama rumbaya,
dàngu na mangarangu-naka mbutana hama wàla rumbaya.
Na rumba na-malaï, da wàla-mbuna damunju;
25tàka na puluna i Miri na-padaingu lundu nu - nuya,” wàna.
Na pulungu nuna jiaya na Lii Mànangu na pambàda bobarungu-kai.
Currently Selected:
1 PETURU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
