1 YUHANI 2
2
I Karitu na matula-nda
1Oi da ananggu duku! Yiana na huratu hi ku-tulihu-nggainya ka àmbu dawunda manjala wànggunggai. Tàka jàka ningukai mawunda manjala, ka ba ni-madunya lai nyuta na haàtu na matanggu kahiri-ta, nu i Yehu Karitu na mamola; Nyuna napa na ma-kamahingu la hanggana na Amana ndumanda nyuta. 2Wànya na li padua-na Nyuna-duka i Yehu Karitu hi jàmanja da njalanda. Dàngu nda mbulungu biada da njalanda nyuta, tàka da njalana mbuu ndàbana na tau la pinu tanambu.
3Jàka ta-karadaku la pareta - pareta-na i Ala, tandana ba tatanda-ya i Ala. 4Na tau na mapanii, “Kutanda-ya nyungga i Ala,” na mawàna, tàka nda na-karadaku la pareta - pareta-na, na tau nuna kambàliku-nanya, dàngu nda nianya i Ala daa la etina. 5Tàka na tau na ma-karadaku la puluna i Ala, na tau nuna nambuha lundunya i Ala. Nuna tandana ba luri pambulu dàndanya i Ala. 6Nggamu na mapanii ba luri pambulu dànanya i Ala, naliti-ya bàdi nyuna na rukuna i Karitu.
Na pareta bidi
7Angu dedi hapaela-mi pa-mbuhangu! Yiana yia na pa-tulihu-nggu nda pareta bidi-aya. Yiana pareta memangu-maya na pa-patàkangu-kai piti welingu ba hina mi-pakiringu papawai lai Karitu; nu na lii welingu lai Ala na pambàda rongumi ba ndedipa.
8Jiapakai ba tuna, yiana na pareta na pa-tulihu-nggu mabidi-mayai; nadu na pa-deningu-na ba peku ita-ndanya la wikina i Karitu dàngu la wikimi nyimi. Nadu na kapàtangu ba ngeri munangu-nanyaka tàka na harii na ma-deningu mbàda ngeri handaraku-naka.
9Na tau na mapanii ba ninya nyuna la harii, tàka na tau nuna na-paumbi-nya na angu dedina, na tau nuna ni-manyapa la kapàtangu lundu nàhu. 10Na tau na mambuhangu angu dedina, luri-nanya la harii hi lupa nda ningu ndoku ngga - nggàra lai nyuna na ma-pawiti-nya na tau hawiangu#tau hawiangu; jàka ndia: nyuna. hi na-kanabu la njala. 11Tàka na tau na ma-paumbingu angu dedina, daa-mayapa la kapàtangu. Nyuna laku-nanya daa la kapàtangu dàngu nda napi-anya jàka nggiya na ngia pa-hanggangu-na, nadu nuna na kapàtangu na-pakapàta-nya hi nda peku ngitana.
12Nyungga ku-tulihu-nggai ananggu hapaela-mi, nadu da njalami ba pa-jàmangu-haka rukuna i Karitu. 13Ku-tulihu-nggai nyungga ama hapaela-mi, nadu bai tandaya Nyuna na mambàda ninya weli mula weli tanangu. Ku-tulihu-nggai nyimi bidi tau hapaela-mi, nadu bai talu-duyaka i Ma-akatu.
14Ku-tulihu-nggai nyimi ananggu hapaela-mi, nadu bai tanda-duya i Ala Ama. Ku-tulihu-nggai nyimi ama hapaela-mi, nadu bai tanda-duya na Pulungu na mambàda ninya weli mula weli tanangu. Ku-tulihu-nggai nyimi bidi tau hapaela-mi, nadu nyimi bai kapàru. Na Puluna i Ala ninya daa la etimi, dàngu nyimi mitalu-yaka i Ma-akatu.
15Àmbi mataru-dunya na pinu tana yiana, jàka ndia nggàra bia na maninya la pinu tana yiana. Jàka mi-mataru-nya na pinu tana yiana, nda mbuha-aminya i Ama. 16Mbuu ndàba-daka da maninja la pinu tana yiana – da pa-mangànjilu-na na huri tau na manjala, na paita hi manyamalu mangànjilu-nya dàngu hi hamemu wànya – mbuu ndàbada nuda manda pa-welingu lai Amaha, tàka ma-pawelingu la pinu tanaha. 17Na pinu tana dàngu mbuu ndàbada da maninja daa da pa-mangànjilu-na na tau lua-nanyaka la molungu. Tàka na tau na matundu-nya na pambuha-na i Ala, pa-daingu lurina lundu nu - nu.
Na muhuna i Karitu
18Dou da ananggu duku hapaela-mi, na hupu njàpu rehi mareni-ama-naka! Mbàda pa-paniingu-makaika welingu la wungana, ba nàmunya napa na Muhuna i Karitu; tàka nàhu nadangu-maka na tau na mamuhu-nya i Karitu. Nuna tandana ba mareni-nanyaka na hupu njàpu rehi. 19Da muhuna i Karitu jia-duhaka da tau da mambàda dunjaku-nda nyuta, nadu làti ba nda angu mema-mandanja. Jàka angunda nyutaha làti, ka da-padaingu-maka ba angu-ndanja. Tàka nyuda da-dunjaku-ndaka, hi peku lohangu-na ba nda haàtu ndoku welingu lai nyuda da matama la kaloka-nda nyuta.
20Tàka nyimi dimi mbàda ngala-minyaka na Ngahuna i Ala na pa-huburu-na i Yehu Karitu, jia-duyaka hi mitanda-ya na lii pa-ajaru na ma-deningu. 21Tàka hi ku-tulihu-ya yiana lai nyimi nda jia-aya ba ndai tandaya na lii pa-ajaru na ma-deningu, tàka jia-mayaka ba mbàda tanda-minya, dàngu bai pimanya nyimi ba nda ningu ma-kambàliku la lii pa-ajaru na ma-deningu.
22Na ma-kambàliku jiaya na mapanii ba nda Hanganji Pa-mànangu paràndi-na i Ala-aya i Yehu. Na tau nuna Muhuna i Karitu-ya; nyuna nda na-pajia-aha i Ama dàngu i Ana. 23Na tau na manda pajia i Ana, tandana ba nda kataku-nanya i Amambu. Dàngu na tau na ma-kataku-ya i Ana, tandana ba kataku-nanya i Amambu.
24Jia-duya nu na lii na pambàda rongumi welingu la kawunga pawaimi, màtawa kai mangga pahàmu-nya la etimi. Jàka mi-tanara pahàmu-nya na lii nuna, pa-daingu-minyaka napa la paluri pambulu dànya i Ana dàngu i Ama. 25Dàngu yiana-duyaka na paràndi-na i Karitu wiki lai nyuta: na luri na ma-langatàka dàngu na ma-palupangu.
26Ku-tulihu-ya yiana lai nyimi jiaha da rukuda da tau da ma-patikingu la pa-panyonga-kai nyimi. 27Tàka jàka jiakai nyimi wiki, i Karitu mbàda buri-nanyaka na Ngahuna lai nyimi. Tàka ba dàngu ninya padua na Ngahuna lai nyimi, nda ningua linguna ba ningu tau hawiangu ma-ajaru-kai nyimi. Nadu ba na Ngahu-mana na ma-ajaru-kai duna rukuna mbuu ndàba-naka; dàngu jàka nggàraya na pa-ajaru-na na-deningu-ma, nda kambàliku-aya. Jia ba tuna, màtawa nyimi kai karadaku la pa-ajaru-na i Ngahu jàka nggàra wàna, dàngu màtawa kai pa-daingu la paluri pa-mbulungu dàngu i Karitu.
28Ba tuna, dou da ananggu hapaela-mi, pa-daingu-wa la paluri pambulu dànya i Karitu, ka pekuna napa jàka natàka, ka ta-hurungu lai Nyuna ba dàngu toru mbeninda, dàngu ba nda ta-kapàndi paraï pa-makia. 29Mbàda pi-mami-nyaka nyimi i Karitu ba naluri tundunya na pambuha-na i Ala. Jia ba tuna nu, màta kai pimbunya nimbihu-na na tau na maluri tundunya na pambuha-na i Ala, ba ana Alaha nyuda.
Currently Selected:
1 YUHANI 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
