Zakharia 9
9
Israel a’ge enemin weim hwerlitak a’ge wiak o’go tagonobouwa wene
1 #
Yes. 17:1-3; Yer. 49:23-27; Amo. 1:3-5 #
Yes. 23:1-18; Yeh. 26:1–28:26; Yoe. 3:4-8; Amo. 1:9,10; Mat. 11:21,22; Luk. 10:13,14 At Allah en abi ’gela’ge pam mo’gulesi ano yu at o.
O kota-kota Aram emin, Israel ena’gul onuk lo’bok emin, ai re Allah ematek en a’geatma re, is ai ugenebasulat, o Hadrakh wiagap enebil-enebil ’bekhit, o Damsyik at mo lai louwa o.
2O Hadrakh hwerli pam o Hamat oruak a’ge ebano emin, o Tirus Sidon emin en enede modok oruak a’geat oruakhweat de, is eneminat, enebam pouwa o.
3O Tirus ai, helep pak annisogo modok werik pagathwerlasulat, perak ai ollong ik ’berlik ’gela’ge seberlep ’gela’ge ’gelilogo pil lasulat, emas ai, ebela pam lagalat, seberlep la’gum sogo pil lagai ai ’gela’ge odoksogo-odoksogo pasulat, tegei a’geat de,
4at Allah en at e’gik erlagapsogo poluk, ik laut eiye welat, onuk logo welago a’ge ano erlagapsogo pasulat o kota ai, odouk en nil lasu lemagoluk, takpasulat, tua o.
5 #
Yes. 14:29-31; Yer. 47:1-7; Yeh. 25:15-17; Yoe. 3:4-8; Amo. 1:6-8; Zef. 2:4-7 Asogo tiso ano, o Askelon en il yethasulat, ogorlok agalat, o Gaza ai, obotut en nonouk yel weriselat, ye Ekron ogore, at ede hwedik welago a’ge ano erlak ago holuk e, at asogoat nonouk yel weriselat, tua o. Is Gaza a’ge ’gain Onuk Logo a’ge welaga a’ge ano erlak agalat, o Askelon ebano aphwami erlakma en o wogogwi agalat, tua o. Is Gaza a’ge onue onuk logo a’ge ano erlak agalat, o Askelon ebano aphwami o wokho erlak alat, tua o.
6Ye, aphwami ena’gul onuk ne’garlok-he’garlok dogo a’ge ebano, o Asdod eiyetak pagathorloluk welema o. Is aphwami Filistin a’ge enede en logo pagathorlogwi a’ge ai, erlagap pasulat,
7Wam emep ’berelogo enemde pam egelogwi a’ge ano erlagap pasulat, so’boru enemde ugwelak a’ge welarat de no’gwi ano pam eniak aik ’balenebiselat tiso a’ge ano wokho hwikhasulat tua o. Asogo tagenebil lasulat, pema ugenebaik a’ge ebano re, nenaik Allah en a’geat takpaikmu re, is aphwami Yehuda en dogoma a’ge en welagai ’gela’geat agalat, ye, is Ekron a’ge ai, is aphwami Yebus a’ge welagai ’gela’ge agalat, tua o.
8Asogo a’geat de, at Allah en eselat, “Is ap weim togwi a’ge en o yu, ’gu agalat, libagalat, asogo togulat, an nowi werik wiagapsogo pogumu no oluk, nowi werik ai ’gwelabogo weleik o. ’Gwelabogo welat, nil oruakma en, is sebelogo onobogwi a’ge mesik en an neiyagai sebelogo onobo’gogu lema erlak o,” oluk egei o.
Nonue ’gain Onuk Logo a’ge pobuk wema wene
9 #
Mat. 21:5; Yoh. 12:15 Yethemit, honue ’gain Onuk Logo a’ge tenhentarok welat, delhenebise lema a’ge anni agarik waga ai en e, his aphwami o Sion welegep a’ge yu, honogola henagai hemit o. His aphwami o Yerusalem welegep a’ge yu, heniak amitmit supsogo weni werit o. At asogo wagalat, ebe wam keledai owan a’ge pam ligotluk ebabut enago welat wema o.
10 #
Mzm. 72:8
Nenaik ’gain Onuk Logo a’ge en disogo egei,
An en his aphwami Efraim a’ge ’gwiangso weim obogu legep a’ge ai erlagap pasulat, his aphwami o Yerusalem a’ge honuam kuda pam ligotluk weim obogu legep a’ge ’berlegat erlagap pasulat, his en a’ge henesegen honua’gun ’berlegat modok porloksogo wiagap pasulat, tik o. Honue ’gain Onuk Logo a’ge en e,
“Aphwami ena’gul onuk lo’bok henemin la’buksogo op welema, oluk wene edip lebikpouwa ani o. Ik Efrat hwerli en ’bekhit ’bogorl ’gwiang edipmu hwerli, ik laut ye’gelak agaikhenma en agaikhenma hwerli ’berlegat, aphwami at e’gik pam welema o,” oluk egei.
Allah en e, “Neiyagai pobuk togolik obap enebik o,” oluk egei wene
11 #
Kel. 24:8
Nenaik ’gain Onuk Logo a’ge en eiyagai enebaget disogo egei,
“An en e,
Pobuk disogo takhenebaik, oluk mep wusogo wene werakhenebegi hegitsogoat, aphwami his a’ge herle werak wogonoboluk legesema aphwami pema en is logon ’gwiang ele delakma ik dengtakma onoboluk oruakma herle hebilonobogwi ai ’gela’ge, is di obotut yu obotut hogwi a’ge delenebik ai o. 12Holuk e, his aphwami hene’gik herle wusogo wokhonoboluk legesema honogola en e,
Delnonobua, oluk opogu legep a’ge ai yogodak delhonobu a’ge oruak o. Holuk e, honowi kota ningsogo werikmu wom ’gela’ge, an neragam togolik manis o. Wagaiam e, an en obaphenebiso modok weleik o. Henesa’go hwelit,
His di obotut yu obotut a’bigat hegep ai en e, di a’ge yu a’ge ebam louksogo wogontogwi ai ’gela’ge, pobuk-naduk obaphenebiso modok weleik o. 13Aphwami Yehuda a’ge enebe ap tentara enebam harowiak a’ge enesegen ’gela’ge takhenebasulat, aphwami Israel a’ge enebe dok ’besingsogo ’bo pei louwogoluk segen e’gale pam ’gulogo welagai ’gela’ge tagenebasulat, tik o. Ye, aphwami o Sion welagai a’ge enebe an en ’garok wo ’gela’ge wogenebiselat, ’garok ai pam aphwami o Yunani a’ge enebe warenebigat o,” oluk egei.
14Obinal yebekhasu ai ’gela’ge, nenaik ’gain Onuk Logo di a’ge yu a’ge tu nak a’ge ano en ebe eiyagai onlogotma inotluk ogodok ’besingsogo pei lasulat, weim obua a’ge enede we’gerlemagoluk, ’bi’gong lok a’ge iak inghasulat, o hwerli ik o’but akhit en wagai ai ’gela’ge wema o. 15Asogo wagalat, eiyagai eragam enebasuam, is en eneselei a’ge ’berlegat mabenap onobua o. Asogo mabenap onobogwiam, ap ik anggur a’bosu a’bigat noluk eniak ’gwe ogwi ai ’gela’ge, is weim obogulat, eniak asogo ua o. Wam di a’ge yu a’ge an nebaget wusogo narlnogulat, wam emep di a’ge yu a’ge narlnogwi a’ge ano o’gut pam ’belabu ’gela’ge, is en eneselei a’ge enemep enamogo waronobua o. 16O ai arat dakha oso holuk e, ap uam domba wiak oruakma delenebiso ai ’gela’ge, Nenaik ’gain Onuk Logo a’ge en, eiyagai delonobua o. Asogo delenebisoam, enebe Nenaik ’gain Onuk Logo a’ge owi pam eba enebe helebe’gen o’go a’bik a’ge ap ononuk logo a’ge ene’gare-’gare pam hwenakho pogwiam amolit deleng hasulat welago ai ’gela’ge welema o.
17Asogo tak wolomul ano re, modok op e’belagatma re, nogorlok o! Gandum no’gwi ai pam enemalik logomalik perleneat souwe agalat, anggur a’bosu ’get ne’gak a’ge no’gwi ai pam enemalik hwelani enagap un seksogo dogum agalat, tua o.
Currently Selected:
Zakharia 9: Wul
Highlight
Copy
Compare
Share
Want to have your highlights saved across all your devices? Sign up or sign in
