Zakharia 10
10
At Allah en nak o moru wogentasu wene
1O moru loksogo wemagoluk, oluk, at Allah en o hena odoksogo pasulat, is aphwami hundomok enebaget moru lok a’ge wogentasulat, moru wogentasu ano pam di a’ge yu a’ge yogo a’ge ebano obab pasulat, tagoma re, di a’ge yu a’ge aganuk wil lasu ano pam moru wemagoluk, Allah ’gonu mo’gulogu lemis o.
2 #
Mat. 9:36; Mrk. 6:34 Enasua en mo’gulontogwi ano re, demat mo’gulontogwi erlak eniak esei a’ge ’beli’gogo mo’gulontogulat, ap hin wok a’ge en eniak ogwi a’ge ano, wiagat agalat, is ap enabi ’gela’ge pam enil hogwi a’ge mo’gulontogwi a’ge ano, dagan eselat, tagoma re, ai a’ge wene ogwi ai, enede ago woru puk a’ge paget we almasogoat mo’gulontogwi o. Ap domba degelenebiso a’ge ebe erlak en, domba enabel uak derak pasu ’gela’ge, is aphwami ai asogoat mesik o’gwe oluk hogulat no’gwi o.
Ap mu a’ge ene’gikmu en delogo onobo wene
3At Allah en eselat, “Nanni modok welago a’ge an Allah en no domba is Yehuda pam en weiyelak a’ge ebano pobi tagalat, weim togulat, kuda ogorlok om erlakma en nosokhwe, eige nogorlok e! ogwi ’gela’ge takpasulat, tikmu re, is ap domba degelonobogwi a’ge ’gela’ge neiyagai ’gwelagentarok welagai a’ge ai, nolot het modok enebam pasulat, is aphwami onuelak ai, wiak o’go enebam pasulat, tik o.
4Asogo takpaikmu, is Yehuda a’ge enebam helep obule pogwi ’gela’ge lau wagalat, o sabo dum’balago ’gela’ge ’bal lau wagalat, weim obogwi a’ge segen ’gela’ge wagalat, wene mo’gulontogwi a’ge ebano ’berlegat hebarligen lau agalat, tua o.
5Is la’buksogo weim haro-haro obogwi ai ’gela’ge til lagalat, aphwami onoyuk ebela pam lagalat seberlep ’balo’go ’bo pogwi ’gela’ge, aphwami asogoat tagenebil lagalat, an Allah nemin oruakma re, is weim til lagalat, is ap weim selei a’ge kuda pam hurotluk no’gwi a’ge ai, sebelogo enebi lagalat, togu lema o.
6Is Yehuda pam en weiyelak a’ge ebano enanniap pasulat, is ap Yusuf pam en weiyelak a’ge enagap delogo pasulat, asogo tagenebasu leiktik, enebe nede en wogonoboluk pobuk togolik onowi pam onobou weik o. Onobou weiktik, an enaik Allah anat eiktik, weleik o. Ye, an enebe ugenebegi a’geat de, ugonobo erlak a’ge ’gela’ge tagenebaikmu re, is en ’gonu mo’gulnogwiam e, eniak holiseleigat o.
7Is Efraim a’ge ap weim enanni wiak a’ge ’gela’ge-lau agalat, anggur a’bosu noluk onogola-enagai hogwi ai ’gela’ge, onogola enagai hogulat, togwi a’ge ebano enemalik en enil yerontogu lemarik, is ogo enagai hogulat, At Allah en takpesi ai nogorlok e, oluk, enagai en weni orlo’buk lagalat, togu lema o, ogulat
8An demat delogo henebaik o. Delogo honoboluk, wemagoluk ne’gik map hentasulat, odoksogo enebasulat, tagoam, is naduk welegesa ’gela’ge, enebe modogat a’bik ema o.
9An en is enebe wokho di aphwami yu aphwami ene’gerlakma perak enebaikmu, o walekma eba welat, an nebe ebet nobogu lema ani o. Is enemalik enemin enebe obat welemarik, pobuk, togolik onowi pam wema o.
10O Mesir en togolik wogonoboluk wagalat, o Asyur en odoksogo onobou wagalat, asogo taga leiktik, o Gilead emin, o Libanon emin, eba enebil laikmu re, is o eba wolom a’ge selak mesik erlak modogat ’bete ua o.
11Ik lok ye’gelak laut a’ge houwalogo hwikho hasulat tagoam, Libom a’ge onogorlok hogwi ai ’gela’ge, enede e’gin welagai a’ge holuk, an en enede seap pasulat, ik nil deng osoam, enede se agalat libagai ai ’gela’ge, takpasulat, tik o. Is Asyur a’ge en, nis elit o, oluk, enede en logo pil no’gulat togwi a’ge ano, an en sebelogo pasulat, ye, is Mesir a’ge wa’gun ene’gikmu pangsogo welat, eneragam poluk welagaimu ebano anni erlagapsogo pasulat, tik o.
12Henaik Allah anatma re, an neiyagai enanniap, pasuam e, an nonuk ’balholuk, enagai pam til laga lema o,” oluk, at Allah enat egei o.
Currently Selected:
Zakharia 10: Wul
Highlight
Copy
Compare
Share
Want to have your highlights saved across all your devices? Sign up or sign in
