Titus 3
3
“Allah eiyagai enebabut hegitsogo togu lemagoluk, enesa’go werise lomup o,”
oluk mo’gulesi wene
1Allah eiyagai hat en tenentarok welegen a’ge eba en, onuelak pemerintah a’ge ’gain a’ge eneragam oruakma, is en di a’ge yu a’ge hegitsogo tuagoluk ogwiam,
“I o,” oluk eniak hologo togu lemagoluk enesa’go werise lomup. 2Is Allah eiyagai ai en e, aphwami logon onobok wiak ’balu erlagat, eniak hurle wiak wene yagonto erlagat, is logon enebabut enagat pobi onobuagoluk aphwami ’berlegat enebaget enebabut enago lioksogoat togu lemagoluk enesa’go werise lomubat o.
3Is asogo togulom ai re, nis naduk nenede erlak welat nenebabut uo a’ge enebabut ’gela’ge, nenesa’go werak erlagat, ing-dingsogo togulat e, aphwami onuelak ’gain eneragam welagai ’gela’ge, enebam aganhan agalat, onogola en di a’ge yu a’ge nagai opogulat, togwi ai a’ge eragam ’gela’ge welege. Asogo welat, is logon wiagabonobogulat, ’bou togulat, is logon nis de’gelak nonobogulat, nis en is de’gelak onobogulat, togu lege. 4Asogo togu lege a’geat de, at Allah nenebe delnenebiso a’ge ano ebabut op en, nis aphwami edeapnenebesi a’ge ai enagat selakma agama ebe pobi tige ai o. 5Asogo selakma agarik, Allah Arogun en nonogola emesogo nenebe ’get a’ge daknenebiselat, nenebabut muat taknenebasulat, tegei ai re, nis nonu’gwarek en nenebabut hegitsogo togu legema taknenebesi puk. We, nenebe at enat edeapnenebegeitik delnenebegei ai o. 6Allah en Arogun woknentesi ai ebe re, Yesus Kristus nenebe delnenebiso a’ge ano enat loksogo nenebam ’belakpou waga ai o. 7At Yesus ebabut op en wene nenebam a’ge no’gorlogo wokholuk, Allah emin togolik hwedik taknenebesimu, nis nonogola en e,
“Nenelaluk modok wolomul o,” oluk opogu lege ai hegitsogo eiyeat emagoluk Allah Arogun woknentesi oluk, 8egi ai demat o.
Hat en is logon enede Allah ebam he’berik oruak a’ge en, aphwami logon enebaget opsogo lerontogwi ai a’ge logo poluk a’goluksogo togulomma, aphwami ’berlegat enebaget op modok, oluk, asogo togu lemagoluk, enesa’go ningsogo werise lerinogoluk, an nede epegi a’ge mo’gulhegis aiat o. 9A’ge re, aphwami enede erlak a’ge en wene ’balogwi ai emin, enebe dagetil wegesa a’ge edipmu en ’belo’gogwi ai emin, Allah en nenesa’go weregei wene ano paget, wene ’balogulat aphwami enemin wiak ago ai emin, ’berlegat ai pam op ago erlakma re, we, ’burlat ogwi oluk, hat en ukpasu lomup o. 10Is logon en, Allah eiyagai a’ge is-is enemin wiak emagoluk, togwi a’ge ai, enesa’go naduk werak poluk e, pobuk weribat o. Asogo togun a’ge, enesa’go hologwi erlak holuk e, enemin hwedik wolorogup no yo. 11Is aphwami enebabut asogo togwi a’ge ai re, aphwami ebela nal agai ’gela’ge, nal agalat, enebabut wiak togwi ai pam, hat e,
“Onu’gwarek en wene enebam pagathorlogwi o,” oluk enebabut enagat ’balise legen ai o.
Wene ologun wusogo, “Disogo tip o,” oluk mo’gulentasulat, hau warenebiselat, tegei wene
12 #
Per. 20:4; Efe. 6:21,22; Kol. 4:7,8; 2Tim. 4:12 An o wiak oruakhwe, o Nikopolis eba weiktik weleigoluk, nede epegi ai en, at Artemas de a, Tikhikus de a, he’bek perakpou weik holuk, hat hebe perleneat ne’bek werinogoluk hannisogo walhasu lomup o. 13#Per. 18:24; 1Kor. 16:12Ye, at Zenas wene Allah en nenesa’go weregei wene ano modok aluk a’ge ano emin, Apolos emin, e’birek en di a’ge yu a’ge erlak ago erlakhwe elirat woluk louwagoluk, hat en logon lerentaguntik peragonobomup o. 14Aphwami nis Allah eiyagai a’ge logon, e e’gen op a’ge egesiso erlak welago ’gela’ge, is ai op a’ge eiye om erlakma en we ’burlat almasogo welema no oluk, is logon di a’ge yu a’ge erlak en nal emarik oruakma, is onu’gwarek op togulat lerontogu lomogoluk, ai a’ge logo poluk mo’gulogu lemak o.
15Is Allah eiyagai an nemin yema welege a’ge enebe ’berlek en hau wathebigisa o. Ye, hat en e, Allah eiyagai enede at ebam he’berik poluk, nenebe enede a’ge eba,
“Paulus en hau wathenebegei,” oluk, mo’gulontomubat o. Allah ebabut op ano en his ’berlegat tenhentarok welemak o.
Currently Selected:
Titus 3: Wul
Highlight
Copy
Compare
Share
Want to have your highlights saved across all your devices? Sign up or sign in
