Titus 2
2
Ap enarlue a’ge emin, souwe a’ge emin, eneragam a’ge emin, “Enebabut disogo togu lemagoluk, enesa’go werise lomup o,” oluk mo’gulesi wene
1Is asogo oruak a’geat de, hat e, wene obapnenebiso wene aiat mo’gulentasulom hegitsogo mo’gulentasu lomup o. 2Ap enarlue a’ge ai, wiak tuagoluk enede ’gagalu agaiam, dok wogo pogwi ’gela’ge wogo pogulat, enebabut e, enebam harosogo welat, enede sebelak welat, enede hurlesogo Allah pam he’berik pogulat, aphwami logon enedesogo welat, di paget yu paget enebam obotut hogulat, enepe mosogo welat, togu lemagoluk enesa’go werise lomup o.
3Ai ’gela’ge re, is hwami enarlue a’ge ai, aphwami Allah eragam welat, enebabut hegitsogo togwi ’gela’ge, togulat, aphwami logon onobok wiaksogo ’balu erlakma en, onuelak ’gain eneragam welagai ’gela’ge, ik anggur e’gen a’bosu enede ’balago a’ge enebam lasu erlak no’gwi ano ’gela’ge no’gwi erlak welat, is en is logon opsogo togulom a’ge paget, mo’gulontogu lemagoluk enesa’go werise lomubat o. 4-5Asogo mo’gulentasukhwe, is aphwami logon en, wene Allah en mo’gulnentesi wene ano obok wiak ogu lema no oluk, is en e, hwami dogum a’ge ai en onogunlak emin, enemalik emin, enedesogo welat, enede hweriogo, enil ha’buksogo welat, olema a’ge di a’ge yu a’ge hegitsogo degelogulat, onogunlak eniak hologo welat, togu lemagoluk, mo’gulontogu lemagoluk, enesa’go werise lomubat o.
6Ai ’gela’ge re, is ap souwe a’ge ai en, di paget yu paget enede uak ’gwelabogo welemagoluk enesa’go werise lomubat o. 7Asogo enesa’go werisoam, is en e, hat hebabut wouwagoluk, di bele yu bele tagalat, hebabut hegitsogo taga lomup o. Asogo tagalat,
“Wene yu logo a’ge o,” oluk, ’bekhitsogo mo’gulentasu lomup o. 8Asogo mo’gulentasuam, is logon wene ai enebit a’ge en,
“Is wiak tigisa o,” oluk, wene nis nenebam pukmuat ogwiam, ene’gerli emagoluk, dem weneat obapnenebiso wene, wiak u puk a’ge ano, mo’gulentasu lomup o.
9Is eneragam a’ge ai, onuelak ’gain en di paget yu paget ogwiam, enede opsogo, eniak o’go u erlakma en eniak hologoat welat, 10ena’ge-a’ge yogorlia wogulom mia o. We, enebabut enak a’geat pobi onobuagoluk, di a’ge yu a’ge paget opsogo hegitsogo togwiam, is aphwami logon en Allah delnenebiso a’ge ano obok ogulat,
“At iak mo’gulnontogwi ai op o,” oluk, ogu lemagoluk, enebabut asogo togulom o.
11Is ’berlek en asogo togulom ai re, Allah ebabut op en di aphwami yu aphwami ’berlegat delenebigoluk oso a’ge ai ebabut enagat selakma pesimu oruak ai enat o. 12Nis nenebabut naduk Allah ebe nenebakhenne ukpogulat e, nonogola en di a’ge yu a’ge ’gwiangma a’ge nenagai nak opogu lege a’ge ai ukpoluk e, yogodak ya nenebabut nenede uak ’gwelabogo welat Allah paget hegitsogo togu lemagoluk, at ebabut op a’ge ai pam mo’gulnentasu ai o. 13Nis yogodak e, Yesus Kristus ebe Allah ’gain Onuk Logo a’ge, delnenebegei a’ge ano aphwami en erliktogukhwe, selakmayat obapnonobuma ai paget, nonogola nenagai hogulat ebe yetharok welege o. 14#Kel. 19:5; Ula. 4:20; 7:6; 14:2; Mzm. 130:8; 1Pet. 2:9Nis naduk Allah iak ukpoluk di wiak yu wiak togu lege ai en nene’gik herle werak ’gela’ge tennentarok oruakma, at Yesus Kristus en e,
“Is enebe an nu’gwarek neiyagai emarik e, enebabut op a’ge a’goluksogo togu lemagoluk, enebe herle hebilogo ono’go ’baligoluk, an nebe wareik o,” oluk egei.
15Hat en wene aiat mo’gulentasuam, is logon onogola en mi-miarak hobouwano oluk, hiak ningsogoat enede ’gagalogo enesa’go werise lomup o.
Currently Selected:
Titus 2: Wul
Highlight
Copy
Compare
Share
Want to have your highlights saved across all your devices? Sign up or sign in
