Roma 6
6
At Kristus emin waregerik eminat nenelaluk wolomul wene
1Ai holuk e, nis en no’gosogo ul. Allah ebabut op ai en, loksogo edeapnenebise lemagoluk e, nis en wiak togwi modok wolom no? 2Modok mia o. Nis wiak togu lege ai paget e, arat waregerik e, pobuk wiak togulom no? Mia o. 3Nis Kristus Yesus emin hwedik tuogoluk ik olomu ’bige a’ge yu re, at ebe waraga ’gela’geat, ik olomu ’belapnonobogwiam e, emin hwedigat welege, ai heneperlak no? 4#Kol. 2:12Ik olomu ’belapnonobogulat e, at ebe werak sebeligisa ’gela’ge, nis at emin hwedigat oruakma wusogo nenebegesa o. Ye, at Kristus waragarikmu en, aik anni a’bik erliktogwi a’ge ano en elalugaptegei ’gela’ge, nis yogodak nenelalugapnenebesimu nenebabut muat ’get togu lomok o.
5At waraga ’gela’ge, nis emin hwedigat welat warege holuk e, at elaluk aga ’gela’ge, nis asogoat nenelaluk wolomul o. 6Nis nenebabut nonotogat welat wiak togu lege a’ge ai mabenap pou wagoluk e, Yesus e pam edikpoluk eminat watnenebigisa ai en, nis nenebabut naduk a’ge ai eragam a’ge wolom mia o, oluk nenaluk. 7Aphwami wiak togulomtik waragaiam e, wene enebam a’ge erlak ago.
8“Nis e, Kristus emin hwedigat warege holuk, emin hwedigat nenelaluk wolomul ani o,” oluk nenede at ebam he’berik welege. 9At Kristus arat waragarikmu re, Allah en elalugaptegeimu no oluk e, pobuk warema erlak ani, oluk e, nenalugat o. Holuk e, waragai edip ai re, pobuk at eragam Yesus ebe po modok mia o. 10At Kristus waraga ai re, wiak togwi ai paget mesik erligeat waraga ai arat o. Pobuk elaluk agarik elaluk welago ai, Allah pagerat elaluk welago yo.
11Ai ’gela’ge re, his henede en e,
“Wiak togulom a’ge paget weragat welat, Kristus Yesus emin hwedik welat e, Allah pagerat nenelaluk wolomul o,” oluk henede opogu lomup o. 12Nenebe waraga lege a’ge yu oruakma, wiak togwi a’ge ai anni ema no oluk e, eragam ’gugulat wolorogup o. Wiak tuagoluk honogola ’gagalu ago holuk e, wiak a’ge ai iak henesa’go hologup o. 13Hene’gik honoyuk henebe pam welago a’ge logon emin ’berlek e, wiak a’ge esegen uwa’gun ’gela’ge agalat e, wiak togu lemagoluk, at wogogu lorogup no yo. Henebe werak ’gela’ge oruakma Allah en henelalugaphenebegeimu henelaluk welat tu hegitsogoat, henebe ebesigat Allah wogemis o. Hene’gik honoyuk henebe pam welago a’ge emin logon ’berlek e, at esegen uwa’gun ’gela’ge agalat e, hegitsogo togu lemagoluk Allah wogemis o. 14His e, wene Allah en nenesa’go weregei wene ano pam he’berik welegep erlak. We, Allah ebabut op en edeapnenebiso ai pam he’berik welegep ai en e, wiak a’ge eragam wolom mia o.
Allah eragam ’goluk welagai wene
15Holuk e, wene ai ologun pam e, no’gosogo u no? Nis nenebe wene Allah en nenesa’go weregei wene ano pam he’berik welege erlak. We, Allah ebabut op en edeapnenebiso ai pam he’berik welege ai en e, wiak togulom no? Modok erlak o. 16His e, ap mesik eragam a’ge agalat e, iak hwelak wolomogoluk, eragam ’goluk welat, at iak hologu legep holuk e, at eragam a’geat welege o, oluk heneperlak no? Wiak togwi a’ge ai eragam ’goluk e, ologun pam e, waragai ai o. A’geat de, at Allah iak hologo welat e, at eragam ’golukmu re, ologun pam at en wene nenebam a’ge no’gorlogo wokholuk pobuk at emin togolik hwedik taknenebasu ai o. 17His naduk e, wiak togwi a’ge ai eragam ’goluk oruakma, pobuk, wene mo’gulhontogwiam, wene ai henedemu wegep ai en e, Allah hau woruok o. 18His e, wiak togwi a’ge ai en tenhentarok oruakma, Allah en herle hebilogo honoboluk, at ebaget hegitsogo togu lemagoluk, eragam henebesimu welegep o.
19His henebabut e, wene mo’gulhentegis ai pobitu mia ’gela’ge en, pobi togup en e, aphwami eneragam a’ge welat togwi a’ge enebam elitsogo mo’gulhentasu legi ai o. His naduk e, hene’gik honoyuk henebe pam welago a’ge logon emin ’berlek e, wiak a’ge eragam a’ge ’gela’ge wogotluk, yogunat togulat, henesa’go werak erlakma en di wiak yu wiak togulat, togu legep ai o. Ai ’gela’ge re, yogodak his hene’gik honoyuk henebe pam welago a’ge logon emin ’berlek e, Allah u’gwarek paget poluk hegitsogo togu lomogoluk, at wogogu lemis o. 20His naduk e, wiak tugu legep a’ge eragam welat e. Allah ogola agai epasu a’ge hegitsogo tu mia welegep o. 21A’ge re, asogo togu legep ai paget, no’gwe a’ge saburigep no. Naduk togu legep a’ge ai paget, yogodak hene’gerli ago ai o. Asogo togu loroguptik e, ologun pam e, enebe modok waragai aiat o. 22A’ge re, his wiak togukhwe, wiak a’ge en tenhentarok oruakma, Allah en herle hebilogo lebikhenebesimu re, yogodak ya re, at eragam ’goluk welegep ai o. Welat e, henebe at ebaget poluk welegep ai en, saburigep o. Asogo woloroguptik e, ologun pam henelaluk modok wolorogubat o. 23Wiak togwi ai o’go re, waragaiat o. Ye, nonue ’gain Onuk Logo a’ge Yesus Kristus emin hwedik oruakma re, Allah ebabut op en o’go erlagat nenelaluk modok welemagoluk taknenebasu ai o.
Currently Selected:
Roma 6: Wul
Highlight
Copy
Compare
Share
Want to have your highlights saved across all your devices? Sign up or sign in
