Roma 5
5
“At Allah en pobuk emin togolik hwedik taknenebesimu welege o,”
oluk mo’gulentesi wene
1Yogodak e, nis nenede Allah ebam he’berik pege ai en, wene nenebam a’ge no’gorlogo wokholuk emin togolik hwedik taknenebesimu, nonue ’gain Onuk Logo a’ge Yesus Kristus tegei ai pam Allah emin la’bulik welege. 2Nis nenede Yesus ebam he’berik pege ai pamat, at en Allah ebabut op ano en obapnenebiso ai eragam nenebesi ai en nenede eberak poluk welege. Welat, Allah erliktogwi modok welagai ai ’gela’ge, nis asogoat erliknonobua o, oluk nonogola nenagai hogu lege. 3Ai paget nak nonogola nenagai hogu lege puk. Di obotut yu obotut hogu lege ai pam, nenede hurle ago ai en e, asogo wiagapnonobogukhwe, nonogola nenagai hogu legeat o. 4Nenede hurle agalat ologun pam e, Allah en nenebabut ’balogo re, op oso. Asogo oso ano pam, pobuk demat op ema o, oluk nonogola nenagai opogu lege. 5Op ema oluk nonogola nenagai opogu lege ai pam, Allah en Arogun woknentesimu nonogola welat, ik na’gogwi ’gela’ge, Allah en edeapnenebiso a’ge ai nonogola loksogo nenebasu ai pam nonogorlok erlaksogo welege o.
6Nis e, Allah ebe ukpoluk walek lai legerik, nenebe miayat oruakma, at Allah en e,
“Is asogo oruak ai paget, Kristus ai erlige waremak o,” oluk epesi ano pamat, ebe werigisema waraga ai o. 7Ap mesik en e,
“An nebe at ebabut hegit a’ge ai paget, ebalema wareik,” oluk u re, e’ginat o. E’ginat a’geat de, ap mesik ogorlok erlak a’ge en e,
“An nebe ap ebabut op a’ge ai paget ebalema wareik o,” oluk opoat hwi a. 8Asogo a’geat de, at Allah nenebe ede en tago ai enagat emagoluk, nis wiak togwi oruakma, Kristus ebe woknentesimu nenebalema waraga ai o.
9At Kristus mep enamogo waraga ai pam, wene nenebam a’ge no’gorlogo wokholuk Allah emin pobuk togolik hwedik taknenebesirikmu no oluk e, pobuk Allah olot het nenebam pasuam delnonobua erlak no? Delnonobuayat o. 10Nis naduk e, Allah emin hwerlirak oruakma re, pobuk at omlogo waragalat, Allah nenemin la’bulogo nenebesimu welege o. Asogo oruakma, at ebe elaluk welat e, delnonobua erlak no? Naduk delnonobu erlakma delnenebegeitik e, yogodak nenemin hwedik welat delnonobuayat o. 11A’ge re, ai nak puk. Nonue ’gain Onuk Logo a’ge Yesus Kristus tegei ai pam, Allah emin pobuk togolik hwedik taknenebesimu emin op welege ai en e, nonogola nenagai hogu lege o.
Adam en wiak tegeimu re, Kristus en
op tegei wene
12 #
Kej. 3:6
Wene ai re, disogo ’gela’ge. Ap mesigat a’ge wiak tegeimu re, wiak edip at ebam en aphwami ’berlegat wiak nenebam aga. Asogo nenebam agama re, nenebe ’berlegat wiak til wagaimu, ologun pam e, nenebe ’berlegat waretil waga lege ai o. 13Wene Allah en nenesa’go weregei wene ano owan nenesa’go werak erlak oruakhwe re, aphwami wiak togu legesa. A’ge re, enesa’go owan werak erlakma re, Allah en,
“Is wiak tigisa o,” oluk wene enebam ogo po erlagat welaga. 14Wene enebam po erlak a’geat de, ap Adam welaga hwerli en, ’bekhit Musa welaga eria hwerli re, waragai edip aphwami ’berlek enebam anniat agarik e, waretil wegesa ai. Aphwami logon en, at Adam Allah en esa’go weregei wene sagalogo wiak tegei ’gela’ge, asogo tu erlakmayat de, waragai edip ai enebam agama re, waretil wegesayat o. Ye, at Adam tegei ai, at pobuk waga a’ge ai wemarik e, ebe tua a’ge paget elitsogo ’gela’ge tegei.
15Asogo a’geat de, e’birek enebabut mesigat puk. Ebe re, Allah ebabut op en weat woknentesi a’ge ai modok lokma re, at Adam Allah iak sagalogo wiak tegei ai e’birek walhoma re, e’birek hegit erlak o. At mesigat a’ge en wiak tegeimu, ologun pam e, enebe a’bigat waretil wagai o. A’geat de, Allah ebabut op en Yesus Kristus weat woknentesimu, ap ebe mesigat a’ge en op tegei pam, op edip aphwami a’bigat nenebam wiyalagama welege. 16Ap mesigat en Allah iak sagalogo wiak tegei pam, Allah en e, wene ebam poluk wiagap pesi ai o. Asogo wiagap pesimu re, pobuk aphwami wiak modok til wegesa a’geat de, at Allah ebabut op en weat o’go erlak mo’gulnentasulat e,
“Wene henebam erlak o,” oluk no’gorlogo wokhesi. 17Ap mesigat en Allah iak sagalogo wiak tegeitik, waragama re, waragai edip at ebam en anni agarik e, wiyalaga ai. Asogo a’geat de, Allah ebabut op en, Yesus Kristus weat woknentesimu, at ebe mesigat a’ge en, op tegei ai nak e, lok logo modogat o. Asogo tagalat, wene nenebam a’ge weat no’gorlogo wokholuk Allah emin togolik hwedik taknenebesimu, at emin hwedik nenelaluk welat nenannisogoat op wolomul o.
18Wene egi ai re, disogo egi epegi. Ap mesik en Allah iak sagalogo wiak mesik erligeat tegei ano, ologun pam e, aphwami ’berlegat wene enebam poluk wiagabenebegei ai ’gela’ge, ap mesik en Allah iak hwelak poluk hegitsogo mesik erlige tegei ano pam, wene aphwami ’berlegat enebam a’ge no’gorlogo wokhasulat, enelalugap enebasulat, tegei. 19Ap mesigat en Allah iak hwelak poluk tu erlakma en wiak tegei ai pam e, aphwami enebe a’bigat wiak til wagai ai ’gela’ge, ap mesigat en, Allah iak hwelak poluk tegei ai pam e, aphwami nenebe a’bigat wene nenebam a’ge no’gorlogo wokhesimu Allah ogola agai a’ge ’bekhit togu lema ai o.
20A’ge re, at mesik wiak tegeitikmu Allah iak sagalogo wiak togwi a’ge e’gin emagoluk, Allah en wene nenesa’go weregei wene pobuk woknentesi. Wiak togwi ai wiyalagarik lasukhwe re, Allah ebabut op en edeapnenebiso ai, di a’ge yu a’ge ebam en hialogo no’gwi ’gela’ge, edeapnenebisoam loksogo wiyalagarik lasu ai o. 21Wiak toluk waragai ai pam, wiak togwi a’ge anni aga ai ’gela’ge, nonue ’gain Onuk Logo a’ge en wene nenebam a’ge no’gorlogo wokholuk, Allah emin hwedik taknenebesi ai pam, Allah ebabut op en edeapnenebasu a’ge ai anni agama re, nenelaluk modok wolomul ai o.
Currently Selected:
Roma 5: Wul
Highlight
Copy
Compare
Share
Want to have your highlights saved across all your devices? Sign up or sign in
