Roma 3
3
1Asogo a’geat de, is aphwami logon en e,
“Is Yahudi a’ge op o,” oluk ogwi ai, nopaget ogwi epegep. Ye, enagap ene’gerlimu a’ge ai nopaget ’balogwi epegep. 2Ai re, di paget yu paget ’berlegat op nak. Wene ai ebe se’geksogo mo’gulhentaik. Mesik Allah en e,
“An niak is elirat tenak welema o,” oluk, isat mo’gulentasu laga. 3A’ge re, is aphwami Yahudi a’ge ado pema wene ai hologo welat enede he’bisogo togwi erlak ai en no’got ema epegep. Is enebabut Allah iak hologo welat enede he’bisogo wolom puk ai en e, Allah ede he’bisogo tago a’ge ai erlak emarik ebakhenne tua epegep? 4#Mzm. 51:4Modok erlak o. Aphwami enebe lo’bok eniak esei yenat lo’boksogo ogwi holuk e, Allah iak demat nak oso, oluk wene pelal wokho pogulat e, disogo egesa,
“Hat Allah hiak demat nak osoam demat nak ago.
Aphwami en mabenaphobouwogoluk togwiam e, hat e, maben ago erlak o.
Hanni nak welago yo,”
oluk pelal wokho pegesa ai.
5A’ge re, nis aphwami en e, nenebabut wiak togu lege ai pam en e, Allah ebabut hegitsogo tago oluk enagat ago holuk, no’gosogo u no. Aphwami en ogwi ’gela’ge ik o. At Allah olot het agalat wiagabenebiso ai wiak no? 6Modok erlak o. At Allah ebabut wiak wellepma re, di aphwami yu aphwami ’gwiangma a’ge yema, enebabut ’balogo wene enebam pasulat, no’gorliselat, no’gosogo telip o. 7A’ge re, hat mesik en eselat e,
“An niak eseiyat lo’bokholuk osoam e, Allah iak demat, oluk, modok enak ago ai o. Asogo enagat agoam e, is aphwami logon en Allah ebe erliktogwi ai. Holuk e, an nebabut ’balogo re, at Allah en,
At wiak tago, oluk wene nopaget nebam po yo,” oluk elirat u no? 8Is aphwami pema en e,
“Paulus lak en disogo ogwi,
Nis wiak togwiam ologun pam Allah erliktuagoluk, wiak togu lomul o,” oluk, eniak eseiyat lo’bokholuk nonobok ’balogwi ai o. Aphwami asogo ogwi a’ge ai re, Allah en wene enebam po hegitsogoat pouwa o.
Aphwami enebabut hegitsogo togwi erlak welat wiak nak togwi wene
9Holuk e, nis Yahudi a’ge nak e, op agaihwe re, is o’borl o’gwe a’ge nal agalat tu no? Modok erlak o. Aphwami Yahudi a’ge et, Yunani a’ge et, ’berlegat la’buksogo wiak a’ge eragam welat wiak togwi nak o, oluk naduk mo’gulhentegis ai o. 10#Mzm. 14:1-3; 53:1-3Allah en asogoat egeimu, pelal wokho pogulat e, disogo egesa,
“Aphwami enebabut hegitsogo togwi a’ge mesik e, erlak o.
Mesigat nak holuk ogo mesik erlagat o.
11Ye, aphwami wene pobi togwi a’ge mesik erlagat o.
An Allah nebe dokhumsogo enaluk omogoluk palo nobogwi a’ge mesik erlagat o.
12Enebe ’berlegat an ne’bek hegitsogo wagai erlakma en,
’gwi-’gwani lobotluk ebela arat nal agalat alemat egesa o.
Enebabut op togwi a’ge mesik erlagat.
Mesigat nak holuk ogo mesik erlak o.
13 #
Mzm. 5:9; 140:3 Aphwami enebe werak a’ge salonobogumu,
eba en e’ben libago ’gela’ge,
is eniak e’ben wiak a’ge libagalat,
enemage adugaltakma re, aphwami lalonobogulat,
’gosu iak en sarluktak enebasuam waragai ’gela’ge,
is enemdema en wiagabonobogulat, togwi ai o.
14 #
Mzm. 10:7
Eniak olotnu wiakma re, heman onobogwi a’ge onogola ’beterak welat en de, ogwi modok oruak.
15 #
Yes. 59:7-8
Aphwami enebe waronobuogoluk holuk e,
onoyuk elalue wiak lagai.
16Aphwami o di owi yu owi enebe wiagabonobogulat,
onolot herabonobogulat, til lagai ai o.
17Aphwami pema enemin opsogo la’bulogo wolom e, eneperlak o.
18 #
Mzm. 36:1
An Allah hau do’goksogo watnobogwi modok erlagat o,”
oluk egeimu wene pelal wokho pegesa. 19Wene Allah en nenesa’go weregei wene ai, is hwelak wolom a’ge nak mo’gulentesi, oluk nis nenaluk. Allah ematek en aphwami o di owi yu owi ’berlegat wene enebam pasulat, no’gorliselat, tisoma, at mesik en wene ebam no’gorlu mia emagoluk nenesa’go weregei ai. 20#Mzm. 143:2; Gal. 2:16Wene Allah en nenesa’go weregei wene ai pam en, nis aphwami wiak togu lege a’ge ’bagoso ai en, nis ’berlegat wene at en nenesa’go weregei wene ai hwelak welat, at ilem hegitsogo tu mia o. Hologo togulomma re, at en emin pobuk hwedik taknonobo a’geat de, miayat o.
Aphwami enede Yesus ebam he’berik pogwiam e, pobuk Allah emin hwedik tagenebasu wene
21-22 #
Gal. 2:16
Asogo a’geat de, yogodak Allah en, at emin hwedik taknonobo wene ano selakmayat pesimu oruak o. Ai re, nenesa’go weregei wene ai hwelak poluk hegitsogo togu lege ano en, pobuk hwedik taknenebaigoluk egei puk. At e, nis nenede Yesus Kristus ebam he’berik pogwiam hwedik taknenebaigoluk egei o. Asogo hwedik taknenebaigoluk, obok wene at en nenesa’go weregei wene ano pam eselat, at iak mo’gulontogu legesa a’ge en ogulat, egesa hegitsogoat hwedik takhenebaigoluk tegei ai o. Ai re, nis aphwami ’berlegat nenede Yesus ebam he’berik pogu lege a’ge hundomok erlak o. We, nenemin hegitsogo hwedik taknenebaigoluk tegei o. 23Nis aphwami ’berlek page enat wiak togu lege ai pam, Allah ebe erliktogwi modok welagai a’ge ai ukpoluk nenematekma walek lai legerik welege o. 24Asogo oruakma, at wiak a’ge en herle wusogo tennentarok oruakma, at Allah ebabut op en Kristus Yesus en we o’go erlak a’ge herle hebilogo delnonobuagoluk perakpou waga. Asogo delnenebiselat, wene nenebam a’ge no’gorlogo wokhesirik e, togolik Allah emin hwedik taknenebesi ai o. 25-26Nadugat, at Allah en e, nis aphwami wiak togukhwe, watnonobu erlakma en epe mosogo welagarik e, yogodak at ebabut hegitsogo tiso a’ge ano enagat emagoluk, Yesus perakpou waga o. Perakpou wagama ebe worogwiam emep ’begei ai pam, nis aphwami nenede at ebam he’berik pege a’ge, at emin togolik hwedik taknonobouwagoluk perakpou waga ai o. Allah en nis aphwami nenede Yesus ebam he’berik pege a’ge, wene nenebam a’ge no’gorlogo wokholuk at emin togolik hwedik taknenebasulat, at hegitsogoat tago oluk yogodak ebabut enagat aga ai o.
27Asogo taknenebasu holuk e, nonu’gwarek en erliktugulom no? Erliktugulom a’ge modogat erlak aga o. No’gosogo oluk erliktugulom a’ge erlak aga. Nis nonu’gwarek en wene Allah en nenesa’go weregei wene hegitsogo togu lege ano en togolik hwedik taknenebesi no? Erlak o. Nenede at ebam he’berik pogwiam e, at enat hwedik taknenebasu ai en, erliktu mia o. 28Wene ai paget nis pobitu re, disogo. Nis en wene Allah en nenesa’go weregei wene ano tenak welat hegitsogo togwiam, nis wiak togu lege a’ge erlagap poluk, at emin togolik hwedik taknenebasu puk. We, nenede at Yesus ebam he’berik pogwiam, emin hwedik taknenebasu o. 29At Allah re, nis aphwami Yahudi a’ge nak nenaik no? Is o’borl o’gwe a’ge eneminat nenaik erlak no? Demat aphwami o’borl o’gwe a’ge eneminat nenaik o. 30#Ula. 6:4; Gal. 3:20At Allah ebe mesigat ai en e, nis aphwami nenagap nene’gerlimu a’ge ’belak a’ge nenede at ebam he’berik pogwiam e, wene nenebam a’ge no’gorlogo wokholuk at emin togolik hwedik taknenebasulat, ye, is aphwami enagap ene’gerlimu a’ge asogo ’belak erlak a’ge enede at ebam he’berik pogwiam e, asogoat tagenebasulat, tago yo. 31Holuk e, nenede at ebam he’berik pogulat e, wene Allah en nenesa’go weregei wene ano sebelogu lege hwi a? Erlak o. At iak aiat anniap pogu lege.
Currently Selected:
Roma 3: Wul
Highlight
Copy
Compare
Share
Want to have your highlights saved across all your devices? Sign up or sign in
