Roma 13
13
Is ’gain pemerintah a’ge eniak hwelak poluk togulom wene
1Honuelak ’gain pemerintah a’ge ai, edip we a’ge puk o. Edip e, at Allah at o. At enat edigenebesimu ’gain welagai ai en e, his henebe lo’bok is eniak hologo wolomup o. 2Ai enat, sa en is ’gain pemerintah a’ge ai eniak hwelak erlak togwi holuk e, at Allah en edigenebesi a’ge aiat iak hwelak erlak tago yo. Holuk e, is aphwami asogo togwi a’ge ai re, onu’gwarek en wene enebam pagathorlouwa o. 3Is aphwami logon op togulat e, ’gain pemerintah a’ge ai, onogorlok erlaksogo welagai. A’ge re, is pema wiak togulat e, onogorloksogoat welagai o. His en is pemerintah a’ge honogorlok erlaksogoat wolomogoluk e, henebabut opsogo togu lomup o. Asogo togu lorogup holuk e, is en erlikhonobuayat o. 4Is pemerintah re, Allah en edigenebesimu, at eragam a’ge welat, his opsogo welemagoluk togwi o. A’ge re, wiak togup holuk e, honogorloksogo wolomup o. Is segen woluk no’gwi ai, ’burlat woluk no’gwi puk. We, aphwami wiak togwiam e, Allah en olot het emarik wene enebam po ’gela’ge, is edigenebesimu re, is en wene enebam pogwi o. 5Holuk e, is eniak hwelak poluk tu o. Mo u mia o. Allah olot het ema no oluk, eniak hwelak poluk tuat a’ge re, ai pam nak eniak hwelak poluk tu puk o. Henede e’gin erlak se wolomogoluk, is eniak hwelak poluk tuat o.
6 #
Mat. 22:21; Mrk. 12:17; Luk. 20:25 Ai enat, uang pemerintah paget ’gonu ogwiam wogontogu legep ai o. Is e, Allah eragam welat, at ebaget asogo ningsogo togwi o. 7Holuk e, is wogonto a’geat wogontogu lomup o. Uang pemerintah en di paget yu paget ’gonu ogwiam wogonto hegitsogoat wogontogulat, is enebe honogorloksogo wolom hegitsogoat honogorloksogo welat, heniak hau do’goksogo waronobu hegitsogoat do’goksogo waronobogulat, togu lomup o.
“Henarilak honorokhwi enemin nede-hedesogo henede hwedik wolom o,” oluk mo’gulentesi wene
8His e, aphwami pema en a’ge ’belak a’ge woluk wolorogup no. We, henebam ’belak a’ge wolom ’gela’ge re, his-his nede-hedesogo henede hwedik wolom aiat o. Wene Allah en nenesa’go weregei wene ano ’berlegat hegitsogo tu ’gela’ge re, enebe nede-hedesogo enede hwedik wolom aiat o. 9#Kel. 20:13-15,17; Ima. 19:18; Ula. 5:17-19,21Wene ai nenesa’go weriselat e, disogo egei,
“’Babi tenontogulat, tenontouwagoluk togulat, togup o.
Aphwami enebe waronobogup o.
Yogorlia wagup o.
Is logon ena’ge-a’ge honogola en e,
Nagai e, oluk epagup o,”
oluk wene nenesa’go weregei ai emin, logon nenesa’go weregei a’ge eminat e, mesigat la’buksogo wene logo ’gela’ge re, disogo egei,
“His e, honu’gwarek henebe henede hwedik welegep ai ’gela’ge,
is aphwami muon henemin welegep a’ge ai, henede hwedik wolomup o,”
oluk egei ai. 10Aphwami logon enebe enede hwedik welat e, enebe wiagabonobogwi erlak. Wene Allah en nenesa’go weregei wene ano ’berlek hegitsogo tu ’gela’ge re, aphwami logon emin nede-hedesogo enede hwedik wolom aiat o.
“At Kristus wema erlige horok lau waga,”
oluk mo’gulentesi wene
11Asogo togulom ai re, nopaget togulom no. Ai re, nis naduk-naduk nenede Allah pam he’berik pege eria erlige re, o delnonobua erlige walegat welaga. A’ge re, yogodak e, horogat lau waga ai en e, his nogo ogu legep ai, henelaluk om hegit aga ai, pobi togu legebat o. 12O hup welegerik dakha iogoluk horogat aga. Aphwami o hiktakma welat togwi a’ge ai ukpouwok o. We, segen wa’gun wik-wok enebabut heberlogo welagai ’gela’ge, nis o dakharak a’ge wik-wok e, nenebabut heberlogoat wolomok o. 13O dakharakma welat togwi ’gela’ge, nenebabut hegitsogo togu lomok o. Seni noluk wiak togulat, ik ’gela’ge noluk honuk-honuk togulat, togwi ai ’gela’ge togup o. Hwami yogunat tenontogulat, ene’gerli erlak a’ge togulat, togwi ai ’gela’ge togubat o. Wene ’balogulat, ’bou togulat, togwi ai ’gela’ge togubat o. 14His henebabut e, aphwami enebabut onotogat welat,
Di wele, yu wele, oluk ogwi ai ’gela’ge honogola ’gagalu erlakma en e, we, segen wa’gun wogwi ’gela’ge, nonue ’gain Onuk Logo a’ge Yesus Kristus ebabut aiat womup o.
Currently Selected:
Roma 13: Wul
Highlight
Copy
Compare
Share
Want to have your highlights saved across all your devices? Sign up or sign in
