Roma 11
11
Allah ebabut op en aphwami Israel a’ge ado nak delonobua wene
1 #
Fil. 3:5
An en wene mesik hin wokhentaigat o. At Allah en eiyagai Israel a’ge ai modok ugenebesi epegep? Modok erlak o. An nebe re, Israel a’ge Abraham en dogo’gwe a’ge na’gul onuk Benyamin a’ge welegi o. 2Allah en eiyagai page enat poligenebesi a’ge ai ugenebesi erlak o. Wene at Elia en tegei wene pelal wogo oruak ano heneperlak no? At en e, Allah en is wene enebam pasu lemagoluk, disogo ese laga,
3 #
1Raj. 19:10,14 “Allah ’gain Honuk Logo a’ge naik o. Ap hat hiak mo’gulentil no’gwi a’ge ebano, waronobogulat,
hat huam domba wam e delak a’ge pam wusogo hobogwi a’ge ano moluktogulat tigisarik e,
an nematek nak uknebegesarik, pobuk watnobuogoluk heranebil no’gwiat o,”
oluk mo’gulesimu, 4#1Raj. 19:18at Allah en e, Elia o’go no’gosogo mo’gulesi no. Disogo mo’gulesi epegi,
“Ap enebe 7.000 Baal asua eragam ’goluk erliktogwi erlak a’ge an nebaget poligenebegimu oruak o,”
oluk mo’gulesi. 5Ai ’gela’ge re, Allah ebabut op en, poligenebesi a’ge o yogodak ya enebe ado weiyat logon oruagat o. 6Is aphwami en logon op tigisa ano pam, Allah en enebabut ’balogo poligenebelepmu re, at ebabut op en poligenebesi oluk u puk ai en e, is en logon op tigisa pam Allah en enebabut ’balogo poligenebesi puk. We, at ebabut op en poligenebesi ai o.
7Holuk e, nis en wene no’gosogo ul? Is aphwami Israel a’ge op a’ge eiye omogoluk ningsogo togu legesa a’geat de, ebe eiye om erlak. We, is muon enebe weiyat Allah en poligenebesi a’ge op a’ge eiye agaihweat de, enebe lok akhit enede erigaptegei. 8#Ula. 29:4; Yes. 29:10Asogo a’ge paget Allah en e, disogo egei,
“Enil hogulat, enesa’go hologulat, tuano oluk,
enebabut wongtak pegimu, yogodak asogoat oruak o,”
oluk egeimu pelal wokho pegesa. 9#Mzm. 69:22-23Wene ai hegitsogo, at Daud en disogo egei,
“Aphwami en sue emin, ’baik emin, herle pogwiam ’gotnok oso ’gela’ge,
is ai seni lok sorogwi ai pam onu’gwarek enebe ’gotnok horlouwak o.
Enebe nalagalat, dungsogo ’bule ’bogulat, tuak o.
10Enil houwano oluk e, hik uak o.
E’gin a’ge ondogun pam modok welemak o,”
oluk Daud en egei.
Allah en aphwami o’borl o’gwe a’ge
delenebegei wene
11An en hin mesik wokhentaigat. Aphwami ebela lagaimu onoyuk a’gul dungsogo wathorlogwi ’gela’ge, is aphwami Israel a’ge wiak tigisa ai, modok-modogat alemat egesa no? Modok erlak o. We, is wiak tigisa ai paget, Allah en is aphwami o’borl o’gwe a’ge delenebegei ai o. Asogo delenebisoam e, is Israel a’ge en,
“Nis delnonobu a’ge,” oluk enebam ’bou togulat enebabut heberlemagoluk tegei ai o. 12Is aphwami Israel a’ge wiak tigisa ai en, di aphwami yu aphwami ’berlegat eba Allah en obabenebegei. Is nalegesa ai en, aphwami o’borl o’gwe a’ge ai logat sabuthwerlegesa. Holuk e, pobuk is Israel a’ge enebe ’berlegat Allah en obabenebiselat, di aphwami yu aphwami o’borl o’gwe a’ge eba loksogo obabonobua erlak no? Obabonobua o.
13Wene yu his aphwami o’borl o’gwe a’ge mo’gulhentaik. Allah en e, an yo’go noboluk his o’borl o’gwe a’ge hene’bek peraknobou wagama wegirik taga legi ai en, logo modok o, oluk erliktaga legi o. 14An narilak norokhwi nena’gul onuk mesigat a’ge, Allah en pema akhit delonobuagoluk, an en asogo taga legi ai pam, onolot het otluk ’bou tuagoluk taga legi o. 15Allah en, is aphwami Israel a’ge enebe ugenebesi ai pam, di aphwami yu aphwami ’berlek eba Allah emin la’bulik enebesi ai o. Pobuk is enebe wogenebisokhwe no’got ema. Aphwami werak a’ge enelalugabonobu ’gela’ge wogonobua ai o. 16So’boru roti naduk a’ge Allah akhit pouwa holuk e, ebe ’berlek e, Allah en a’geat o. Ye, e edip Allah akhit pouwa holuk e, e’gik ede’bi at en a’geat o.
17E zaitun edip op a’ge oruakma re, e’gik mesik ’balogo hwikholuk e, ebalema e zaitun e’gelema a’ge e’gik deksogo hwederik pou womma re, edip hwedik welat a’bosu wolom ’gela’ge, his ai re, henebe o’borl o’gwe a’ge Allah en is Yahudi a’ge ebano enemin hwedik takhenebesimu op welegep o. 18Asogo welat, his en e, is enebe e’gik dektak a’ge ’gela’ge ai paget e,
“Is wiak. Nis op o,” oluk erliktogu lorogup o. E edip en e, e’gik ede’bi ’geraptago ai o. Ye, e’gik ede’bi en e, edip ’geraptago erlak ai ’gela’ge, is edip a’ge en e, his e’gik ede’bi a’ge ’geraphenebiso yo. 19A’ge re, his en e,
“Allah en e, nis e edip pam hwedik taknonobou weigoluk e, is deksogo hwigentesi ai o,” oluk ogu legep ai. 20Asogo hegirat opogu legep a’geat de, henede eberit o. Is enede Allah pam he’berik po erlak en deksogo hwigentesi. A’ge re, his nak e, henede Allah pam he’berik pegep ai en wokhenebegeimu welegep ai o. Holuk e, honu’gwarek en erliktu erlakma en e, honogorloksogoat wolomup o. 21Is e, e e’gik edip ebe pam hwedik a’ge edeabonobu erlakma en deksogo hwigentesi ai. Holuk e, his edeaphonoboluk ukhonobo no? Erlak o.
22Allah ebabut e, op emin, wiak emin, welago ai yethemit! Is alemat egesa a’ge enebaget e, ebabut wiak ai o. Ye, his at ebabut op a’ge emin hwedik wolorogup holuk e, ebabut op ai o. A’ge re, asogo hwedik wolorogup erlak holuk e, his asogoat deksogo hwikhontouwa o. 23Is e, enede Allah pam he’berik po erlak oruak ai, pobuk he’berik pouwa holuk e, at Allah en hwedik tagonobo elirat welago ai en e, pobuk hwedik tagonobou wemayat o. 24E zaitun e’gelema a’ge e’gik deksogo re, e o pam a’ge pam hwederu mia a’geat de, hwedesuom ’gela’ge, his e, hwederik honobou wagama welegep ai o. Ye, e zaitun e’gik ebe pam hwedik a’ge deksogo hwikholuk, pobuk ebale’gwe hwederik pou wom ’gela’ge, is e, hwederik onobou womma re, elirat o.
Allah en aphwami Israel a’ge pobuk
obabonobua wene
25Narilak norokhwi. Wene Allah ogola sebelak a’ge wene yu heneperlak wolom ai, an nebit. His honu’gwarek en e,
“Nis wene nenaluk o,” oluk erlikhorlogumu no oluk e, wene yu mo’gulhentaik. Is aphwami Israel a’ge logon ena’gul erik ai re, we, loduat pagerat oruak o. Ye, pobuk is aphwami o’borl o’gwe a’ge ’guma a’ge hwerli elirat ’gu agai holuk e, 26#Yes. 59:20-21Allah en aphwami Israel a’ge ’berlegat obabonobua o. Wene asogo oluk e, at Allah en disogo egeimu iak pam pelal wogo oruak,
“Delenebiso a’ge ebe re, o Sion en wema o.
Wemarik e, is Yakub en dogo’gwe a’ge en an nebe onogorlok erlak welat wiak togwi a’ge
no’gorlogo wokhaik o.
27 #
Yer. 31:33-34
Ye, wiak togwi a’ge ai erlagapsogo ukpasulat e,
wene disogo wusogo wogenebik o,”
oluk egeimu re, pelal wokho pegesa. 28Is Israel a’ge op wene wo enebit en Allah emin wiak egesa ai, his o’borl o’gwe a’ge obaphonobuagoluk emin wiak egesa. A’ge re, Allah en poligenebesimu no oluk e, ene’balak Allah emin hwedik ai en enebe ede o. 29At Allah ebabut op en di a’ge yu a’ge woknentasulat, nenebe poliknenebasulat, toluk en e, pobuk iak muat mesik oso erlak o.
30His naduk Allah iak hologo togwi erlak welegep. A’geat de, yogodak is Israel a’ge Allah iak hologo togwi erlak pam e, his henebe edeaphenebegei ai o. 31Asogo a’geat de, yogodak is eneminat edeaphonobuagoluk, his henebe edeaphenebegei ai pam e, yogodak is Allah iak hologo togwi erlak welagai ai o. 32At Allah enat, aphwami wiak togwiam ene’gik herle pobuk hebiluogoluk herle wusogo onobogwi ai ’gela’ge, aphwami enebe ’berlegat edeabenebigoluk e, enebe ’berlegat at en at iak hologo togwi erlak en ho’gorlakma leget wokho enebesi ai.
At Paulus en Allah erliktegei wene
33 #
Yes. 55:8
At Allah en a’ge loksogo woknentasulat, ede modok ’gagalak welat, wene modok aluk welat, tago ai nogorlok o. At en wene ologun weriso a’ge, nis aphwami nenaluk om no? At en di a’ge yu a’ge tiso a’ge, nis en pobitu no?
34 #
Yes. 40:13
Wene ai paget e, pelal disogo wokho pegesema oruak,
“Nenaik ’gain Onuk Logo a’ge ogola eberiso ai, sa ’gela’ge aluk.
At e, sa ’gela’ge en esa’go woru no.
35 #
Ayu. 41:11
Ye, sa en di a’ge yu a’ge at wogotluk,
O’go woknemin, oluk mo’gulom no,”
oluk egesema pelal wogo oruak ai o. 36#1Kor. 8:6Edipmu, di a’ge yu a’ge ’berlek e, at Allah enat walhesimu, at e’gikmu welago yo. Welemarik e, ologun pam, at enat tua o. Holuk, at nak erliktogwi modok wolomok o, oluk egi ai, demat emak u ’gela’ge,
“Amin,” egi ai o.
Currently Selected:
Roma 11: Wul
Highlight
Copy
Compare
Share
Want to have your highlights saved across all your devices? Sign up or sign in
