Bilangan 6
6
Allah ebaget degelagat welemagoluk enasu ’belak erlakma en ukpogu legesa wene
1At Allah en Musa mo’guleselat,
2“Is aphwami Israel a’ge wene mo’gulonto ano re yuat o. Ap mesik en, An at Allah ebaget at degelak weleik o, oluk ho’buk ’baliso ai ’gela’ge, aphwami Israel a’ge ap de a, hwami a, enelaluk welat, an at Allah pagerat degelak weleik o, oluk, ho’buk ’baliselat holuk e, 3-4#Luk. 1:15Anggur a’bosu emin, a’bosu enede ’balagai a’ge emin, ai a’ge pam lo’boksogo akhen a’ge hele’gik a’ge emin, anggur e’gen daganogo ’berelogo poluk egeik ne’gak a’ge emin, anggur e’gen op a’ge emin, anggur e’gen ere’gik a’ge emin, di a’ge yu a’ge e anggur ebe pam emin, e’gen pam emin, ai a’ge pam hele’gik a’ge ’berlegat at en ho’buk ’baliso a’ge ai hwerli en ’bekhit, ’bekhit pei lasu a’ge ano hwerli, pam ene nasulom modok miayat o.
5Ye, at en, an Allah ebaget degelagat weleik o, oluk, ho’buk balua hwerli en ’bekhit hwerli pei louwa ano pam enasu ’baliselat, emde asu ’baliselat, tu modok miayat o. At e, an Allah ebaget modok degelagat weleik o, oluk ua a’ge ano hwerli owan lai lo erlakhwe, an Allah nebaget degelagat welat, asu emin, emde asu emin, ’belak erlakma-enat welemak o. 6At en, an Allah ebagerat degelak weleik o, oluk, ho’buk ’balua a’ge ano hwerli en ’bekhit pei louwa hwerli pam en at aphwami warotluk oruakma horoksogo lo modok mia o. 7At asu ai re, an Allah nebaget degelak a’geat oruakhwe enagat hogu lemagoluk tak oruakma re, at ia warema a’ge a, aik warema a’ge a, at e, are hwe a’ge a, ap a, mesik warema a’ge a, horoksogo lasu holuk mukat lisogo pagathorlogwi ’gela’ge ebe wiagap pagathwerlasumu no oluk, il ’gwelak hailo modok mia o. 8Allah ebaget degelak wolom a’ge paget ho’buk ’balua a’ge ano hwerli owan lai lo erlak oruakhwe an Allah nebagerat degelak welemak o.
9Ye, ap mesik en, an nebe ai re, Allah ebagerat degelakma re, nasu ’balik erlak o, oluk, ho’buk ’balua a’ge ano oruakhwe, il pam ap mu a’ge mesik wik-wiaksogo waragalat, e’benap ano asu pam egil ema a’ge ano oruakhwe modok nogo 6 nogoluk, en op neselemak-oluk hubet o’gwe asu emin, emde asu emin, ’balogo hwikhouwak o. 10Ye, nogo agauwa 7 nogoluk, loruk o’gwe tue ’berl ’biren a, tue yelemai ’biren a, woluk an nemin hwedik togumu nowi sabo werikmu ap an nebe eiye a’ge oruakma eba poumak o. 11Asogo pou wagoam e, is an nebe eiye a’ge ebano en tue mesik ebano a’ge werak poluk ap ano o wiak erlagap paik oluk, neselat, welat, ye, tue mesik ano ap warago a’ge e’ben asu pam e’gerlik a’ge ano wiagat agoma re, erlagapsogo poluk, nemin hwedik tuogoluk asua? uam worogwi ’gela’ge, wusogo e narliselat, takpoluk, agauwa ai erligeat asu ano ebalema op a’ge lebemak oluk, an nebaget degelogoat pasu lemak o. 12Ye, at en e, an at Allah ebaget degelagat oruakhwe agauwa ai hwerliat lai louwak o, oluk, ho’buk ’balua a’ge ano pam hegitsogo hegit lai lo erlakhwe wiak tua a’ge ano eberak nagat oruak holuk e, erlagapsogo paik en e, domba emalik dogo oruakhwe tahun mesigat tak a’ge holuk, woluk an nebaget wusogo odouk narlik poluk, agauwa mesik eminsogo ebe an Allah nebaget degelogo pagat-horlouwak.
13 #
Per. 21:23,24 Ap mesik en, An at Allah ebaget modogat degelak weleik o, oluk, ho’buk ’balua a’ge ano hwerli pam arat lail lasu holuk e, at en tagalom a’ge wene lekelogo mo’gulom ano re, yuat o. At en ho’buk ’balua a’ge ano hwerli arat lail-lasu holuk e, at ap ai, woluk an nemin hwedik togumu nowi sabo werik a’ge godouk mu poumak o.
14Asogo pou wagaiam e, at ap ano en domba ierak a’ge dogo oruakhwe tahun mesik tak a’ge aik ’belak erlak a’ge op a’ge holuk wusogo e narlu a’ge paget wasulat, domba holou a’ge dogo oruakhwe tahun mesik nak tak a’ge aik ’belak erlak a’ge op a’ge holuk, o wiak erlagapsogo paik en mesik wasulat, ye, domba ierak a’ge mesik dogo oruakhwe tahun mesik tak a’ge aik ’belak erlak a’ge op a’ge holuk, nemin hwedik welemagoluk, wasulat, 15Roti ragi po erlak a’ge, gandum ebe e’gen wogo a’ge a’bosu emin ne’garlok-he’garloktak a’ge orlogomtak poluk worogo a’ge emin, kue ragi po erlak a’ge ebak a’ge a’bosu ebetne egelik poluk worogo a’ge emin, mul egeik a’ge ogola yagarak a’ge wasulat, di a’ge yu a’ge e’gen wokho nebaget e narlogulat togwi a’ge ebano a’ge wasulat, a’bosu nebaget herlelil lo a’ge ebano wasulat, taga lemarik, ’berlegat la’bulogo an Allah nebaget pouwagoluk, ap an nebe eiye a’ge ano wogemak o.
16Ye, wogosoam e, at ap an nebe eiye a’ge ano en wolomtik an ne’bek wemarik, an Allah nil pam ap ano o wiak erlagapsogo paik en e, domba holou a’ge ano nebaget pasulat, ye, domba ierak a’ge ano wusogo nebaget e narliselat, tuak o. 17Asogo takpoluk, domba ierak a’ge an nemin hwedik tuogoluk e narlogwi ano ’gela’ge wusogo an Allah nebaget e narliselat, roti ragi ’gwelebak erlak a’ge worogo a’ge mul egeik a’ge ogola a’ge ebano, yu hat Allah hebaget a’ge o, oluk, nebaget pasulat, gandum e’gen wokho nebaget pasulat, a’bosu no’gwi a’ge nebaget herlelik pasulat, tuak o.
18An at Allah ebagerat degelak weleik o, oluk, oso a’ge ai enagat houwak oluk asu ’belak erlakma en ukpouwa a’ge ano nemin hwedik togumu nowi werik a’ge ’godukmu eria enasu ano ’balogo poluk, nemin hwedik weleik en e, nebaget a’ge werak odouk nasumu eba ’gwelabuak o.
19An Allah nebaget degelak a’ge enagat houwak oluk, asu ’balu erlakma en welema a’ge ano enasu ’balogo ’gwelabiso holuk e, ap an nebe eiye a’ge en domba sogo a’ge e’gik sarak ano wasulat, roti duk a’ge emin, kue ebak a’ge emin, roti ragipo erlak a’ge worogo mul sum ogola yagarak a’ge mesik wasulat, takpoluk, ap-ap asu ’balu a’ge ano e’gikmu poluk. 20Yu Allah ebagerat o, oluk, nonuk ’balogwi a’ge ebano, yu hat Allah en a’ge o, oluk, nonuk ’balogo woknotluk, awe emin, amua’go odogun uak emin, woknogwi a’ge ebano a’ge ’berlegat emin omu degelak a’ge ap an nebe eiye a’ge enebageratma re, wogontogu lemak o. Ai a’ge arat togwi holuk e, ap, an Allah ebaget degelak a’geat weleik o, oluk ho’buk ’balua a’ge ano, anggur a’bosu nasulom ai obat o.
21Ap mesik en, an Allah ebaget degelak disogo weleik o, oluk, ho’buk ’balua a’ge ano, owan lai lo erlakhwe, wiak tua a’ge ano o’go an Allah en egi a’ge oruakhweat de mesik emin ebam louksogo pou wom a’ge epasulat holuk e, ai obat a’geat de, an Allah en egi a’ge o’go pou wagalat, tagalom wene ’belak en tak a’ge re aiat o. At en ho’buk ’balilelat disogo taga leik o, oluk, ua a’ge anoat hegitsogo taga lemak, egei oluk mo’gulentemin o,” oluk, mo’gulentesi.
“Is ap Allah eiye a’ge en e, aphwami Israel a’ge obap onobuagoluk yo’go no’bogulom,” oluk mo’gulesi wene
22Nenaik ’gain Onuk Logo a’ge en e, Musa disogo mo’gulesi:
23“Hat en Harun eiyagai enemin en aphwami Israel a’ge Allah en obap onobuagoluk wene disogo mo’gulentasu lomup:
24Nenaik ’gain Onuk Logo a’ge en obat tenhentarok welat, obaphenebise lemak o.
25Nenaik ’gain Onuk Logo a’ge orogole re, henebam hiane emarik edeap henebise lemak o.
26Nenaik ’gain Onuk Logo a’ge en olukhwe wokhontouwarik henede ha’bugap taga lemak o, oluk mo’gulentasu lomup o,” oluk mo’gulontuagoluk mo’gulesi. 27Asogo mo’gulesirik mesik disogo mo’gulesi,
“An en aphwami Israel a’ge obap onobuagoluk nonuk ’balogo mo’gulontogwiam e, an en obap enebigat o,” oluk mo’gulesi.
Currently Selected:
Bilangan 6: Wul
Highlight
Copy
Compare
Share
Want to have your highlights saved across all your devices? Sign up or sign in
