Bilangan 3
3
Is ap Lewi a’ge enebaget wene
1At Musa o leimu dom Sinai pam oruakma, At Allah en Musa Harun emin is pam en weiyelak o’gwe en togulom a’ge paget mo’gulentesi ano re yuat o.
2 #
Bil. 26:60
At Harun eiyagai dagenebegei a’ge ebano ononuk e, naduk Nadab. Nadab e’berlik Abihu, Abihu e’berlik Eleazar, ye, Eleazar e’berlik Itamar. 3At Harun eiyagai yu en Allah eiye welat, togu lemagoluk, a’bosu ena’gul pam herlilogo ena’gul sebelegei. 4#Ima. 10:1,2; Bil. 26:61Asogo a’geat de, is Nadab Abihu emin eriano en o leimu dom Sinai pam eba at Allah paget odouk narlogulat, Allah o’goduk ano pam e erlak we odouk a’ge wokho mu’gwa legisema, at Allah il pam are emin erianoat waregesa. Ye are emin eneiyagai dak onobogwi erlagat enie erlau ene enaik Harun ano owan warom erlak-hwe elaluk oruakhweat, at eiyagai Eleazar Itamar emin nak Allah eiye welat, yabuk togu legesa.
Ap Lewi a’ge at Allah eiye welemagoluk, pulogo enebesi wene
5At Allah en Musa mo’guleselat, 6“Is ap ena’gul onuk Lewi a’ge en an nebe eiye a’ge Harun lethogu lomok oluk, e’bek wemagoluk mo’gulentemin o. 7Is en Harun lethogulat, onowi werikmu nemin hwedik togumu eba is aphwami Israel a’ge ’berlegat enebaget togulat togu lemak oluk, edigonobogwi holuk, is eniabuk e aiat togu lemak o. 8An nemin hwedik togumu nowi werikmu en di a’ge yu a’ge togwi a’ge eiye welat, ye, aphwami Israel a’ge enebaget togulat, togu lemagoluk, edigonobo a’ge ano enat togu lemak o. 9Harun eiyagai enemin lerontogu lemagoluk, Is ena’gul onuk Lewi a’ge nak Israel a’ge ene’gerlakma en pulogo Harun wok emin o. 10Ye, at Harun eiyagai enemin en nak an nebe eiye welat, eniabuk togu lemagoluk, eiye tagenebemin o. Eiye tagenebagunmu togukhwe aphwami we yogunat a’ge en wagai holuk, enebe modogat wusogo enebasu lomup o,” oluk, mo’gulesi.
11Mo’gulesirik, at Allah en Musa mesik emin mo’guleselat, 12-13#Kel. 13:2Naduk-naduk dak agai holuk e an eiye atma re, hwami Israel a’ge en enemalik naduk ap dogo a’ge tu ’gela’ge enebalema is Lewi a’ge en an nebaget togu lemagoluk, is Israel a’ge ene’gerlakma en pulogo enebegimu re, ena’gul onuk Lewi a’ge ai, an eiyeat o. An en is Mesir a’ge enemalik naduk dogo a’ge warenebiselat, is Israel a’ge enemalik naduk dogo a’ge emin, onuam naduk dogo a’ge emin, waronobu erlakma en erlele wokho nebaget pulogo pagathwerlegimu re, enemalik naduk dogo a’ge emin, onuam, naduk dogo a’ge emin, ai anat eiye welemak o, “oluk, an Allah enat egi o,” oluk, mo’gulesi.
Lewi a’ge ononuk balegisa wene
14Mo’gulesirik, Musa ano o leimu dom Sinai pam oruakma, at Allah en at mo’guleselat, 15“Is ap ena’gul onuk Lewi a’ge delna tak ebano emin, enebe dogo polik a’ge emin dogo oruakhwe, dugwi mesigat pelelegei a’ge hwerli en lagalomtik pobuk pelelilo hwerli ’berlegat ap nak ononuk ’balip o.” 16Mo’gulesimu, at Musa ano at Allah en mo’gulesi a’ge ano hegitsogoat ononuk balegei.
17At Lewi eiyagai dogenebegei a’ge ononuk e, Gerson, Kehat, Merari aiat o. 18Ye, at Gerson en eiyagai e Libni o Simei o emin dagenebegei. 19Al Kehat en eiyagai Amram, Yizhar, Hebron, Uziel dagenebiselat, 20Ye, at Merari en eiyagai Mahli o Musi o dagenebiselat, til wagalat, a’gul onuk Lewi a’ge a’bik weiyal egesa ano dogo ’gwe a’ge enebe lo’bok ononuk e aiat o.
21Al Gerson pam en ap Libni a’ge weiyelak pasulat, ap Simei a’ge weiyelak pasulat, tegeimu re, ap Gerson pam en weiyelak e is aiat o. 22Is ai dogo oruakhwe, dugwi mesik pelelak a’ge hwerli en ’bekhit, legeik pelelil laga a’ge hwerli ’berlegat ap nak enebe wonogo re, 7.500 at o. 23Is ap Gerson pam en weiyelak e, pulogo enebesi a’ge hegitsogo, Allah owi werik a’ge o’borl akhit o mo obuk ilasu akhit o’gwe onowi sabo werik pagathorloluk, wolomtik, waga legesa. 24Ye, is ap Gerson pam en weiyelak a’ge onue re, ap Lael omlogo Elyasaf aiat o.
25Is Gerson a’ge en Allah emin hwedik togumu owi sabo werik a’ge degelogulom a’ge paget eiye tagenebegesa ai, o sabo werik emin, o ou’gwa o e’berli sebelogo salogulat agap sainsogo salogwi a’ge ano emin, Allah emin hwedik togumu owi sabo werik a’ge ’goduk ’gogumu sum ebak salogwi a’ge emin, 26odip weling-waling sum erla’gulil lagai a’ge emin, owi werik odipmu ’goduk gogumu sum erla’gulik emin, Allah ebaget wusogo wogogumu emin, herle ’berlegat emin, Allah emin hwedik togumu owi sabo werikmu en togwi a’ge di a’ge yu a’ge ’berlegat ebano eiye welegesa.
27Al Kehat en ap Amram a’ge emin, ap Yizhar a’ge emin, ap Hebron a’ge emin, ap Uziel a’ge emin, weiyelak enebesimu re, Kehat pam en weiyelak ebano re is aiat o. 28Is dogo oruakhwe dugwi mesigat pelelak a’ge hwerli en ’bekhit, legeik pelelil laga hwerli ’berlegat ap nak enebe wonogo re, 8.600 aiat o. Is ap Kehat pam en weiyelak e, o werik ogorli asuama degelogulom a’ge paget eiyetak enebegesa. 29Ap Kehat a’ge pam en weiyelak e, poligenebesi a’ge hegitsogoat Allah owi werik o abel akhit o’gwe onowi sabo werik pagathorloluk, wolomtik, wogalegesa.
30Ye, is ap Kehat pam en weiyelak a’ge onue re, ap Uziel omlogo Elisafan aiat o. 31Is en degelogulom a’ge eiyetak enebesi ano re, Allah owene ’belak yagarak a’ge emin, roti pogumu e delak emin, esaga heberlogo pogwi a’ge ebale emin, Allah ebaget wusogo wogogumu emin, asuama aphwami enebaget togulat, togumu di a’ge yu a’ge emin, sum ’burl sebelogumu emin, asua takma welat, togwi a’ge di a’ge yu a’ge ’berlegat is en eiye welegesa o.
32Ye, ap Lewi a’ge ’gwelagentarok wolom a’ge onue lok logo modok a’ge re, ap Allah eiye a’ge Harun omlogo onuk Eleazar aiatma re, is Allah owi werikmu op a’ge welagoma degelogulom a’ge paget eiye welago ebe re, opsogo togwi a, erlak a? oluk pobi taga laga.
33At Merari en ap Mahli a’ge weiyelak enebasulat, tegeimu re, ap Merari pam en weiyelak a’ge ebano, re is aiat o. 34Is ai dogo oruakhwe, dugwi mesigat pelelak hwerli en ’bekhit, legeik pelelil laga hwerli ’berlegat ap nak enebe wonogo re, 6.200 aiat o. 35Is ap Merari pam en weiyelak a’ge onue re, Ap Abihail omlogo Zuriel aiat o. Ye, yabuk poligenebesi a’ge hegitsogo Allah owi werik o abel akhit o’gwe onowi sabo werik pagathorloluk, wolomtik, waga legesa. 36Is Merari a’ge en Allah owi worogulat, togulom a’ge eiye tagenebegesa ano re, o hebat emin, e no’gorlik po a’ge emin, o uak dain tu a’ge emin, uak dain tu a’ge oyuk emin, o sabo worogulat togwi a’ge ’berlegat eiye welat, 37Ye, o dum uak dain til lagalat, o uak dain tu a’ge emin, o uak dain tu a’ge oyuk emin, herle het til lo a’ge e emin, herle emin, ’berlegat eiye welat, togu legesa.
38Allah emin hwedik togumu o werik opma o mo orlu ago hegit eba pulogo pesi a’ge hegitsogoat Musa Harun eneiyagai enemin en onowi sabo werik pagathorloluk, wolomtik, wogalegesa. Is en Israel a’ge enebaget togulat o asua wolomma eba en togulom a’ge eiye togenebegesama re, aphwami yogunat a’ge en o asuama eba horoksogo lagai holuk e, wusogo onobo yo oluk ogu legesa.
39Al Allah en Musa Harun emin mo’gulentesi a’ge hegitsogo is ap Lewi a’ge dogo oruakhwe, dugwi mesigat pelelak a’ge hwerli en ’bekhit, legeik pelelil laga hwerli ’berlegat ena’gul motluk ap nak enebe wenakho enebegesa ano re, 22.000 aiat o.
40Al Allah en Musa mo’guleselat, “Aphwami Israel a’ge ap naduk a’ge dogo oruakhwe dugwi mesigat pelelak a’ge hwerli pam en ’bekhit legeik pelelil laga a’ge hwerli ’berlegat enebe wonogo poluk, ononuk ’balogo pomup o. 41Ye an ai re, an Allah atma re, is Israel a’ge eneiyagai ap naduk dogo enebalema is ap Lewi a’ge wogenebiselat, ye, is ap Israel a’ge onuam naduk dogo a’ge ebalema is ap Lewi a’ge onuam wasulat, tip o,” oluk, mo’gulesi.
42Asogo mo’gulesimu at Allah en mo’gulesi a’ge ano hegitsogo at Musa en ap Israel a’ge naduk dogo a’ge ’berlegat ononuk ’balogo pesimu re, 43Ap naduk dogo a’ge aruakhwe dugwi mesigat a’ge pelelak hwerli en ’bekhit, legeik pelelil laga hwerli ’berlegat ap nak ononuk ’balogo pesi a’ge enebe lobolik e, 22.273 aiat o.
44Al Allah en Musa mo’guleselat, 45“Is Israel a’ge ap naduk dogo a’ge ’berlegat enebalema Is ap Lewi a’ge wogenebiselat, is Israel a’ge onuam naduk dogo a’ge enebalema is Lewi a’ge onuam wasulat, tip o. Ye, an e, an Allah atma re, is ap Lewi a’ge ai re, an neiyagai an nebaget togwi a’geat o. 46Is Lewi a’ge emin, is Israel a’ge ap naduk dogo a’ge emin, enebe werakho welat hogulat, is Lewi a’ge enemin hegit om erlakma en Israel a’ge nak enebe a’bigat 273 agoma re, 47Allah owi sobo werikmu syikal mesik nak o’go po wene tak a’ge hegitsogo e’gin walhogulat, uang gera atma re, enebe 273 at a’bik agama ebalema hun-hundomok uang syikal 5 pamat wosu lomup o. 48Wasu loroguntik, is Israel a’ge ap naduk dogo a’ge enebe a’bik etil lagai holuk e, enebalema uang aiat pogulomma re, pogwi a’ge ano ap Harun eiyagai enemin wogontomup o,” oluk, mo’gulentesi.
49Mo’gulesimu, is aphwami Lewi a’ge enebalema Israel a’ge ap naduk dogo enebe o’bik aga a’ge enebalema uang pegesa a’ge ano at Musa enat wesi o. 50Allah owi sabo werikmu 1.365 syikal mesigat nak o’go po wene tak a’ge motluk Israel naduk dogo a’ge enebalema ono uang pegesa re, uang perak e’gin is a’geat aga o. 51Al Allah en Musa mo’gulesi ano hegitsogo at Musa en aphwami enebalema uang wesi a’ge ano, at Harun eiyagai enemin wogentesi o.
Currently Selected:
Bilangan 3: Wul
Highlight
Copy
Compare
Share
Want to have your highlights saved across all your devices? Sign up or sign in
