Bilangan 24
24
1Is asogo togu legesarik, at Bileam ede en e,
I, at Allah en aphwami Israel a’ge obap enebigoluk, epasu hegi o, oluk pobi tegei. Asogo pobi tegeirik mu no oluk e, pobuk om a’ge paget naduk asua a’ge hin wasu laga ’gela’ge ene’bek lo erlak. We, eba welat aphwami erlakma o lei hegitsogo il yethesi ’gal e, 2aphwami Israel a’ge onowi sum owi a’ge onowi seli ena’gul onuk hegitsogoat werik oruakma yerentesi. Asogo yerentasuam e, Allah Arogun ebam louk u agama re, 3wene pobuk om a’ge disogo egei,
“An Bileam Beor omlogo nabi ’gela’ge pam,
di a’ge yu a’ge e’gatsogo yethasu legi a’ge yu en wene ik o.
4Allah en iak mo’gulnosokhwe nesa’go hweliso a’ge o.
At di a’ge yu a’ge tu a’ge nil houwagoluk onukniasu a’ge o.
Asogo onukniasuam,
nil dektak welat erle’galogo lasu legi a’ge o.
5Yakub o, hat howi orabo sum owi a’ge re,
modok op werik o.
Israel o, o hat welagoma eba op modok o.
6O eba enil yethogwiam e,
o do’go modok lok a’ge hwi a,
at e, yabuk ik esa’goma welago a’ge de a, oruak o.
E’gela onuk gaharu Nenaik ’gain Onuk Logo a’ge en,
yeregei a’ge hwi a, at e, e wa’bumu ’gela’ge,
ik esa’go’gwe welago a’ge hwi a, oruak o.
7Asogo oruakma re,
is onowi moru a’bik loksogo nasuam,
’gwiangma di a’ge yu a’ge owi yogo a’ge,
mukmu obat ’baktago yo.
Is onue ’gain onuk logo a’ge,
anniat ’gain onuk Agag anni ’gela’ge erlak.
We, anni modok a’bik otluk,
at abel likho ’gela’geat welat,
tenentarok oruakhwe erliktogu lomul o.
8Allah en is o Mesir en wogonoboluk liplau wagarik
at ebabut sapi ierak maro a’ge,
ebabut wiak a’ge ’gela’ge welat,
is oruak o’gwe otluk onoweim ebiso yo.
Asogo ebiselat, so’boru haumsogo no’gwi ’gela’ge,
aphwami at eselei a’ge modok erlagap pasu lema o.
Erlagap pasulat, is onuak damuk-demaksogo porloliselat,
ye, enesegen porlok-perlaksogo hwikhasulat, tua o.
9 #
Kej. 12:3; 49:9 Is aphwami ena’gul onuk ai a’ge enebe re,
mene orlomene onuk singa ierak a’ge ’gela’ge emin,
holou a’ge ’gela’ge emin, oruak o.
Ai ’gela’ge welat, onorogole sogup erasogo oruakma,
sa en ogorlok erlaksogo enelalugap po epegep.
Is aphwami mu a’ge en obap onobua holuk,
Allah en is aphwami ai ogo obap onobuayat o.
Ye, is logon en hweim onobua holuk e,
Allah en is aphwami ai ogo hweim onobuayat o,”
oluk egei.
10Asogo egeimu, at Balak olot het egeitik e, e’gik e’gerlik poluk tigene ’bal hasulat e, Bileam disogo mo’gulesi,
“Hat en is hweim enebanogoluk worlhiegimu wegen a’geat de, is Allah en obap onobuagoluk, he’gik henaganam mo’guleigen eba re! 11Yogodak hat hebe howi pam togolik ’bok lak o. Asogo lasukhwe, an en hoyuk o’go mesik wokheik oluk obok mo’gulhegis a’geat de, at Allah en, Hoyuk o’go wokhum erlak, oluk epasu ai en mia o,” oluk mo’gulesi.
12Asogo mo’gulesimu re, at Bileam en e, disogo mo’gulesi,
“An en e, ap an yo’go louwagoluk peragenebegen a’ge ai mo’gulentasulat e,
13Honue en a’ge perak emin, emas emin, owi pam welago a’ge eba ’berlegat woknoummu, an naik ’gain Onuk Logo a’ge en,
Disogo tip, asogo tip, oluk mo’gulnesi a’ge ai sagalogo ukpoluk an nede opoluk waik modok erlak o, oluk arat mo’gulentegis erlak no? An en e, at naik ’gain Onuk Logo a’ge en wene mo’gulnema a’ge nak ik o, oluk demat mo’gulentigisaat o,” oluk mo’gulesi.
Ap Bileam en wene pobuk om wene mo’gulese lagarik ologun pam mo’gulesi wene
14At Bileam en at Balak asogo mo’gulesirik mesik disogo mo’gulesi,
“An yogodak aphwami an na’gul a’ge ene’bek togolik laik o. Asogo owan lo erlak welat, aphwami ena’gul onuk Israel a’ge en aphwami ena’gul onuk hat a’ge pobuk tagonobo a’ge paget mo’gulheik o,” oluk mo’gulesirik, 15wene ebe pobuk om a’ge disogo mo’gulesi,
“An Bileam Beor omlogo nabi ’gela’ge pam,
nil domok yethasu a’ge ano en ik o.
16Allah en iak mo’gulnosokhwe
nesa’go hwelise legi a’ge o.
At ebe abel likho welago a’ge ano,
elirat nil hasu legi a’ge o.
At di a’ge yu a’ge tu nak a’ge ano en,
an nil yethuagoluk onukniasu o.
Asogo onukniasuam, nil dektak welarat de,
erle’galogo lasu legi a’ge o.
17An at ebe nil hegi a’geat de,
o yogodak paget hegi erlak o.
An at ebe nil yethegi a’geat de,
pobuk a’ge paget de yethegi o.
At ap ebe ’gain onuk logo a’ge mesik Israel a’ge,
ebe hwesagal e’bak-’bage a’ge ’gela’ge pobuk wema o.
Wemarik e, aphwami Moab a’ge onuelak,
modok wollo’gen dagalogo warenebiselat,
aphwami ena’gul onuk Set a’ge,
wollo’gen dagalogo modok erlagap pasulat, tua o.
18Aphwami Edom a’ge onowi is eneselei a’ge en,
sebelak poluk welema o.
Asogo a’geat de, is aphwami Israel a’ge en,
enebam harowiak welat togu lema o.
19Ap mesik a’gul Yakub a’ge nam otluk,
anni modok a’bik agalat,
aphwami at eselei a’ge ado elaluk welema a’ge,
enebe modok erlagap pouwa o,”
oluk egei.
20At Bileam abi ’gela’ge pam asogo yethasulat, aphwami Amalek a’ge ogo il entesiat. Asogo yerentesirik, wene is enebaget pobuk om a’ge disogo egei,
“Aphwami ena’gul onuk lo’bok ’berlegat,
’gwiangma welagai a’ge wei mia ’gela’ge,
a’geat de, Amalek a’ge nak e, enanni a’bik oruak o.
Asogo a’geat de, aphwami ena’gul ai a’ge wolomtik en,
pobuk ologun pam e,
enebe modok-modok erlak ema o,”
oluk egei.
21Ap Bileam abi ’gela’ge pam asogo yethasulat, aphwami ap onuk Keni a’ge ogo il yerentesiat. Asogo yerentesirik, wene is enebaget om a’ge disogo egei,
“O his welegepma eba op o’borlogouk modok erlak,
ha’buktak tue owi dom helep ilmu werik welago ’gela’ge,
welegep a’ge o.
22Asogo a’geat de, his ap Keni a’ge nak e,
aphwami en modok erlagap honobua o.
Agauwa wolom erlakma en aphwami Asyur a’ge en,
hene’gik herle wusogo wokhonoboluk louwa o,”
oluk egei.
23At Bileam abi ’gela’ge pam asogo yethasulat, wene is enebaget pobuk om a’ge mesik disogoat egei,
“Allah en asogo tiso holuk,
is aphwami sa ’gela’ge en elaluk wolom no.
Erlak o. Eige, nede o.
24Asogo a’geat de,
aphwami o Siprus en esan logolak mesik,
so weim obogwi a’ge pam wema o.
Wemarik, aphwami Asyur a’ge emin,
Heber a’ge emin, eneragam onobouma o.
Asogo a’geat de,
aphwami esan mesigat logolak ai,
enebe modok erlak ema o,”
oluk egei.
25Asogo oluk, at Bileam owi ebe welagoma ebano togolik laigoluk tagokhwe re, at Balak ano ogo laga.
Currently Selected:
Bilangan 24: Wul
Highlight
Copy
Compare
Share
Want to have your highlights saved across all your devices? Sign up or sign in
