Bilangan 22
22
Ap ’gain Moab a’ge onue ’gain onuk logo a’ge en ap Bileam yogo pesi wene
1Is aphwami Israel a’ge ebano laga legesarik, o kota Yerikho horoksogo ik Yordan ’balogo libagaimu ebano ’gwiang o do’go leimu aphwami ena’gul onuk Moab a’ge welagaimu ebano onowi sum owi a’ge wesi legesa.
2-3Asogo wesi legesarik oruakma, aphwami logon en e,
“Aphwami Israel a’ge enebe modok a’bik wagalat, aphwami Amori a’ge wiagap onoboluk wegesa o,” oluk egesema, at ap ’gain aphwami Moab a’ge onue onuk Balak ap Zipor omlogo ai esa’go hwelegeirik e, at ebe emin, aphwami at osi ’berlegat emin, enarogun a’bigat laga. 4Enarogun asogo lagama, is aphwami Moab a’ge en e, aphwami Midian a’ge onuelak disogo mo’gulentigisa,
“Agauwa wolom erlakma en, aphwami enebabut wam sapi en e’gela o lei ’berleksogo nil lasu ai ’gela’ge, nis nonowi yema di a’ge yu a’ge erlagap til wema o,” oluk mo’gulentigisa. Asogo mo’gulentegisema, at ’gain Balak en e, 5#Bil. 31:8; 2Pet. 2:15,16; Yud. 1:11osi logon yo’go enebesirik e, ap Beor omlogo onuk Bileam ebe o Amau ik Efrat horoksogo kota onuk Petor eba oruakma yo’go louwagoluk peragenebesi. Peragenebasulat, wene Bileam mo’gulesi louwagoluk disogo mo’gulentesi,
“Aphwami ena’gul onuk mesik mu a’ge o Mesir en liplau wegesarik o di owi yu owi modok denagalat, nis muknontouwogoluk modok wagai en e, haluk emagoluk mo’gulhegis o. 6Is ai nis nenanni ’gela’ge erlak. We, is enanni modok a’bik a’ge o. Hat en aphwami obap enebisoam e, op agai. Ye hweim enebasuam e, wiak agai ai en e, hat hebe woroguntik e, an nebaget is hweim enebanogoluk yo’go hebegi o. Hweim asogo enebagun holuk, nis en is mabenap onoboluk, o yema en mukho lebigonobul opogu lege o. Holuk e, perlene werinogoluk yo’go hebegi o, oluk mo’gulhemagoluk peraknonobou wagama wege o, oluk mo’gulomup o,” oluk peragenebesi.
7Asogo peragenebesimu, is aphwami Moab a’ge emin, Midian a’ge emin, onuelak ebano ap Bileam o’go wogosokhwe aphwami Israel a’ge hweim onobua a’ge paget o’go woluk legesa. Arat legesarik e, wene ’gain Balak en Bileam mo’gulesi louwagoluk wene wusogo peragenebesi a’ge ano mo’gulesi legesa. 8Mo’gulegisema, at Bileam en is disogo mo’gulentesi,
“His henebe yema nogouwok. Hubet en de, an naik Onuk Logo a’ge en mo’gulnema a’ge ai his mo’gulhentaik o,” oluk mo’gulentesimu, is aphwami Moab a’ge onuelak ebano Bileam oruakma eba mo egesa.
9Asogo oruakhwe, at Allah en Bileam e’bek wagarik disogo mo’gulesi,
“Bileam, hat welegenma eba aphwami ’geba a’ge enemin welegep,” oluk hin wokhesi. 10-11Asogo hin wokhesimu, at Bileam en e,
“Is ai re, Zipor omlogo ap ’gain Balak, aphwami Moab a’ge onue ’gain onuk logo a’ge ai en, aphwami ena’gul onuk mu a’ge o Mesir en liplau wegesarik, o di owi yu owi denagai a’ge wegesarik en, an en at ebaget is hweim onoboma, at en is ai mabenap onoboluk mukho lebigonobuagoluk mo’gulnomogoluk wegesarik en welege o,” oluk mo’gulesi. 12Asogo mo’gulesimu, at Allah en Bileam disogo mo’gulesi,
“Is ai an en obap enebegis ai en e, hat hebe is ap ai enemin laguptik, aphwami is ena’gul onuk ai a’ge hweim enebagun no yo,” oluk mo’gulesi. 13Asogo mo’gulesimu, o loruk ’gela’ge, at Bileam en e, ap ’gain Balak en peragenebesi a’ge ebano disogo mo’gulentesi,
“An e, Nenaik ’gain Onuk Logo a’ge en e,
Op o, enemin lit o, oluk mo’gulnum erlak o. Holuk e, his nak honowi pam lit o,” oluk mo’gulentesi. 14Asogo mo’gulentesimu, is ebano togolik ’gain Balak e’bek wegesarik, disogo mo’guligisa,
“Bileam nis nenemin wom ebit en e, mo egeimu wege o,” oluk mo’gulosu egesa.
15Asogo mo’gulosu egesema, at Balak en e, naduk yo’go enebesirik peragenebesi ai ononuk weiyat mia ’gela’ge a’ge re, pobuk nak e, enebe a’bik ononuk oruak a’ge nak yo’go enebesirigat peragenebesi. 16Asogo peragenebesimu legesarik, wene Balak en e, disogo egeimu Bileam mo’gulesi legesa,
“Hat hebe mo ogun modok erlak o. Modogat werinogoluk mo’gulhegis o. 17Hat en is an nebaget hweim enebasuam e, an en o’go modok a’bik wokheselat, hat en e, we, no’gwe ’gonu ogun a’ge ai takhebasulat, tik o,” oluk egeimu mo’gulesi legesa. 18Asogo mo’guligisa a’geat de, at Bileam en e,
“At ’gain Balak owi pam perak emin, emas emin, ’berlek welago a’ge ebano o’go an woknema a’ge ogo re, an naik ’gain Onuk Logo a’ge Allah an en erliktaga legi a’ge ai iak mo’gulnema a’ge mesik tagalogo tik modok erlak o. Wene wei a’ge ogo at iak sagalogo tik erlak o. 19Asogo a’geat de, an naik ’gain Onuk Logo a’ge en wene mesik mo’gulnum a’ge oruak a? Erlak a. Is naduk yo’go wegesarik yema nogogisa ’gela’geat nogwip o,” oluk mo’gulentesi.
20Asogo mo’gulentesimu oruakhwe, o hup ai erlige at Allah Bileam e’bek wagarik e, disogo mo’gulesi,
“Aphwami eba, is hat hemin louwogoluk wegesa ai re, enemin lagup en e, di a’ge yu a’ge degelip o. Asogo enemin lagup a’geat de, wene an en,
Disogo tip, oluk mo’gulheik a’ge ai nak hologo tip o,” oluk esa’go weregei. 21Asogo esa’go wusogo mo’gulesimu, o loruk o’gwe wam keledai o’borl pam hweriogo welat lo a’ge ’ge’bi erlilogo pesirik e, aphwami o Moab a’ge onuelak ’gain ebano enemin wegesa.
Ap Bileam wam keledai emin en tigisa wene
22At Bileam Allah en asogo mo’gulesimu waga a’geat de, Allah olot het a’bik aga. Olot asogo het a’bik agarik, at Bileam wam keledai o’borl pam ligagarik, at eragam a’ge enebe ’biren enemin wagaimu, Nenaik ’gain Onuk Logo a’ge malaikat mesik Bileam e’gebela ’baligoluk ebela pam inaga. 23Asogo edik oruakma, at wam keledai ano en malaikat ano ’garok lisogo wesirik tenakho oruakma il yethesirik e, ebela di-dagan a’ge yabukmu ’gwi laga. Asogo tegeimu, at Bileam en e, wam keledai ano ’go’bu wusogo re, ebela pam woluk liplau waga. 24Asogo woluk liplau weigoluk wagoma, Nenaik ’gain Onuk Logo a’ge malaikat ano yabuk anggur yabuk leget helep leget pema-pema wogoma modok ’beterakma ebano inaga. 25Asogo oruakma, at wam keledai ano il Nenaik ’gain Onuk Logo a’ge malaikat ano il hesirik e, leget lolu’gwe laga ’gal e, Bileam oyuk leget en saga’besingsogo weregeimu, at en keledai ano ’go’bu pobuk weregeiat.
26Pobuk at Nenaik ’gain Onuk Logo a’ge malaikat ano onorogole ’bali lagarik, ebela modok ’beterak en, ’gwi-’gwani o’borl o’gwe wagalat, ’belak akhit o’gwe wagalat, tu modok miama eba inaga. 27Asogo edik oruakma, at wam keledai ano il Nenaik ’gain Onuk Logo a’ge malaikat ano en il yethau wagarik e, ebe ’gwiangma sakhun egeimu, at Bileam ano olot het agarik wam keledai ano ’bouwa’gun pam weregei. 28Asogo weregeimu, pobuk, at Nenaik ’gain Onuk Logo a’ge en at wam keledai ano weneane elirat uagoluk takpesimu, at Bileam disogo mo’gulesi,
“Nue. An en hat no’gosogo takhebasu legi en ’go’bu henaganam watnebigen?” oluk mo’gulesi.
29Asogo mo’gulesimu, at Bileam en e,
“An modok lal nebise legen ai en wathebise legi o. An ’garok woluk wolomma hat hebe modok ’be’giat wathebeli o,” oluk mo’gulesi. 30Asogo mo’gulesimu, at wam keledai ano en e,
“An yu re, nue, hat huam keledai o page enat no’borl pam hweriogo welat denaga legen ano erlak no? An en nue hat hiak hwelak erlakma en taga legi a’ge no?” oluk mo’gulesimu, at Bileam en e,
“Erlak o,” oluk mo’gulesi. 31Asogo mo’gulesimu, pobuk at Nenaik ’gain Onuk Logo a’ge en Bileam il hiktak a’ge ’gela’ge welaga a’ge degotluk, Nenaik ’gain Onuk Logo a’ge malaikat ’garok lit-lat woluk edik welaga a’ge ano elirat il yethuagoluk obaptegeimu il hesirik e, ebe perleneat ’gwiangma ’bu agarik odogorlu pam hurotluk erliktegei. 32Asogo tegeimu, at Nenaik ’gain Onuk Logo a’ge malaikat ano en e,
“Hat en huam keledai ai ’go’bu henaganam werigen ai nopaget,” oluk hin wokhesirik, disogo mo’gulesi,
“An en e, hat lagun erlak oluk epegirik en, hat he’gebela ’balegis o. 33Hat huam keledai ai an nebe il niesirik en e’gik henaganam ebela di-dagan a’ge mu ’gwe laga o. Asogo lelep erlakma, an en hat huam ai nak ukpasulat hebe wathebeli o,” oluk mo’gulesi. 34Asogo mo’gulesimu, at Bileam en e,
“Nue. Hat en an ne’gebela’gwe ’baligoluk ’balisokhweat de, an neperlakma re, wiagat tegis o, nue. Yogodak hat en lagun erlagat oluk epagun holuk, an ebela ’bekhirat togolik nowi pam laik o,” oluk mo’gulesi. 35Asogo mo’gulesi a’geat de, at Nenaik ’gain Onuk Logo a’ge malaikat ano en e,
“Ap ai enemin lit o. Asogo enemin lagup a’geat de, wene an en,
In o, oluk mo’gulhoso holuk en de, ip o,” oluk mo’gulesi. Asogo mo’gulesimu, at Bileam ano is ap Balak en peragenebesi a’ge ebano enemin wegesa.
Ap Balak en Israel hweim onobo a’ge paget Bileam mo’gulesi wene
36Asogo wegesema, is aphwami logon en e,
“Bileam ano wago yo,” oluk egesema, at Balak Bileam ologotma o aphwami Moab a’ge onowi do’go ologun hwerli pam, ik Arnon ’bu agoma esa’goma re, o kota onuk Moab ai laga. 37Lagarik, emin sarlok tigisarik, Balak en Bileam disogo mo’gulesi,
“An en naduk worlhiegi ano pamat wom erlakma en mo e’gen ai nopaget. Hat hedemu en e,
Balak en o’go woknoum mia epegentik en tigen a?” oluk mo’gulesi. 38Asogo mo’gulesimu, at Bileam en e,
“Yogodak an arat wegi o. A’geat de, wene an nogola en ’gagalogo mesik ik modok erlak o. We, Allah en,
In o, oluk mo’gulnema a’ge nagat ik o,” oluk mo’gulesi. 39Asogo mo’gulesirik, at Bileam Balak emin o kota Huzot wegesa. 40Wegesarik, at Balak en seni wam sapi pema emin, domba pema emin, wusogo serigisarik, ’gwerik pema akhit Bileam emin, aphwami onuelak at Bileam emin wegesa a’ge ebano emin, wogentesi.
Ap Bileam en wene pobuk ema a’ge naduk mesik egei wene
41Ai a’ge wogentesimu, o loruk o’gwe re, at Balak en Bileam woluk e, dom onuk Bamot Baal ai pam ligagama, dom ai pam en at Bileam aphwami Israel a’ge enebe logon il elirat yerentesi.
Currently Selected:
Bilangan 22: Wul
Highlight
Copy
Compare
Share
Want to have your highlights saved across all your devices? Sign up or sign in
