Bilangan 14
14
Aphwami Israel a’ge Musa Harun emin enebam ’bousogo mo’gulentigisa wene
1Is ap o Kanaan enilen wogu legesa a’ge en aphwami Israel a’ge ’berlegat enede ’gagaligisema, enesa’go hweligisarik e,
“No’gosogo tul logwe,” oluk o hup en ’bekhit eniak logat nge togwi modok mo egesa. 2Asogo ogu legesarik, Musa Harun emin enebam ’bou togulat disogo mo’gulentigisa,
“Nis nenebe o Mesir eba de a? O leimu aphwami erlakma yema de a, waroloma re, op a’ge o. Nis nenebe waromma re, op modok o. 3Is aphwami eba en nis nenebe watnonoboluk, nonugwami emin, neneiyagai emin, herle wusogo onobuagoluk nonue ’gain Onuk Logo a’ge en o eba woknonoboluk louwagoluk waga ai nopaget. Togolik o Mesir loma re, mia no? Elit loat,” oluk mo’gulentigisa. 4Asogo mo’gulentigisarik, is-is logon en logon mo’gulontogulat e, disogo egesa,
“Nis togolik o Mesir woknonoboluk louwagoluk e, nonue ’gain mesik pulogo edikpouwok o,” oluk egesa.
5Asogo mo’gulentigisema, is Musa Harun emin is aphwami ebano ’berlegat enilem ondogorlu pam huregesa. 6Asogo tigisema, is aphwami enilen wil legesa ebano a’ge enebe ’biren, ap Nun omlogo Yosua emin, Yefune omlogo Kaleb emin, is aphwami en e,
“Onogola wiak egesarik en tigisa,” oluk pobiruagoluk onosum ’buktak a’ge derlepsogo hwikhegesa. 7Asogo hwikhegesarik, is aphwami ebano ’berlegat disogo mo’gulentigisa,
“O nis nenilen wai legerik, o nenil pobirak poluk wegema eba re, op modok o. 8A’ge re, nenaik ’gain Onuk Logo a’ge en nis nenebe ebam lo’buk uarik e, at en o eba woknonoboluk loluk, ’gwiang modok moli di a’ge yu a’ge a’bikmu eba nis woknontouwa o. 9Nis en is aphwami eba a’ge elirat mabenap onobul ai en e, his en nenaik ’gain Onuk Logo a’ge emin hwerli togulat,
Aphwami o eba welagai a’ge nonogorlok, oluk ogulat, togup no yo. Is senentarok welagai a’ge is ugonoboluk libegesa a’geat de, nis nenaik ’gain Onuk Logo a’ge nak e, sennentarok nenemin modok oruak ai en e, honogorlok hagup o,” oluk mo’gulentigisa.#Ibr. 3:16 10Asogo mo’gulentigisema, is aphwami ebano onolot het otluk, helep pam dungsogo enebe ’be’gi waronobuogoluk tigisa. Asogo tigisa a’geat de, erianoat nenaik ’gain Onuk Logo a’ge en amolit erliktogwi a’ge o at owi sum a’ge werikmu dum pam nam agarik yogo pesimu, is aphwami ebano enil yethegesarik e, mo egesa.
Allah en aphwami Israel a’ge delonobuagoluk at Musa en se’ban egei wene
11Asogo enam agarik, nenaik ’gain Onuk Logo a’ge en e, Musa disogo mo’gulesi,
“Aphwami eba en an nemin agauwa meren ’gela’ge hwerlirak ’gela’ge welema no yo. An en is pobi tuagoluk ene’gerlakma en tu puk a’ge elalin a’bigat tisokhwe a’geat de, hwerli ’ga hwerli pam en enede an nebam he’berik po a’ge enebit aga lema no. 12An en, is enebe modok erlagap paigoluk, ou hegilogo akhen enebam perakpou weik. Asogo a’geat de, hat nak e, ha’gul onuk mesik is ’gela’ge erlak, we, modok lok hanni a’bik a’ge takhebaik o,” oluk mo’gulesi. 13Asogo mo’gulesimu, at Musa en nenaik ’gain Onuk Logo a’ge disogo mo’gulesi,
“Naik o. Hat hanni pam nis o Mesir en woknonoboluk liplau wegentik wegen a’geat de, hat en nis asogo taknenebagun ai, aphwami Mesir a’ge en enesa’go holua o. 14Enesa’go holholuk e, is en aphwami o yema a’ge mo’gulontouwa o. Nadugat, is aphwami logon en e,
Aphwami Israel a’ge enaik ’gain Onuk Logo a’ge en tenentarok modok oruak o. Allah ebe erlige holuk, o hena pam inagalat, ye, hup holuk, o hena odouk magale a’ge pam inagalat, aphwami Israel a’ge onorogolema wagalat, onorogolema inago, oluk ogwiam, is aphwami o yema a’ge enesa’go hweligisa a’geat de, pobuk hat en asogo taknenebagun holuk e, is aphwami Mesir a’ge en is aphwami yema a’ge mo’gulontouwa o. 15Hat en heiyagai ai enebe ’berlegat waronobogun holuk e, aphwami ena’gul onuk lo’bok logon en hat hobok o di owi yu owi lasumu enesa’go hweligisa a’ge eba en e,
16At Allah en eiyagai o is wogentaigoluk wene weragenebesimu ebano wogonoboluk lo a’ge anni erlak en e, o leimu aphwami erlakma eba warenebegei o, oluk is logon mo’gulontouwayat o. 17Asogo mo’gulontouwa ai en e, hat hanni onuknontoluk,
Disogo takhenebaik, oluk wene weraknenebegen ai ’gela’geat tinogoluk ’gonu mo’gulhegis o, naik. Hat en e, disogo mo’gulnentigen epegi,
18An henaik ’gain Nonuk Logo a’ge nebabut e, perleneat nolot het otluk wene yagentasu erlak o. Ye, loksogoat nedeap onoboluk, ugonobo erlakma en tenentarok modok welat, aphwami wiak togwi a’ge emin, selei a’ge ’gela’ge taknobogwi a’ge emin, erlagapsogo ukpasulat, tago yo. Is asogo togukhweat de, is wiak togu lema ai pam, o’go re, is en dogo’gwe a’ge naduk dagagalat, e’berlik dagagalat, pobuk logon dagagalat, hwerli ugan pam dagema a’ge eminat enebam paik o, oluk egen ebano re.#Kel. 20:5-6; 34:6-7; Ula. 5:9-10; 7:9-10 19Holuk e, hat en loksogo hedeap enebiselat,
Asogo takhenebaik, oluk wene weraknenebegen hegitsogoat taknenebasulat, taga legen ai en, yogodak is aphwami Israel a’ge o Mesir ukpoluk liplaumagoluk wiak togu legesa a’ge erlagapsogo ukpasu legen ai ’gela’ge, yogodak is wiak tigisa a’ge ai erlagapsogo ukpanogoluk mo’gulhegis o, naik,” oluk mo’gulesi.
20Asogo mo’gulesimu, at nenaik ’gain Onuk Logo a’ge en e, disogo mo’gulesi,
“Obat o. An hat en ’gonu mo’gulnigen ano hegitsogoat is wiak tigisa a’ge ai erlagapsogo ukpaik o.#Ula. 1:34-40 21Asogo a’geat de, an notok modok welat, aphwami ’gwiangma yema welagai a’ge eiye welegi a’ge ano nu’gwarek nonuk ho’buk ’balogo wene yu werakhenebaik o.#Ibr. 3:18 22An ne’bak-’bage modok yogo pasu a’ge ai pam, is en pobi tuagoluk, elalin a’ge o Mesir en tagokhwe enil hogulat, o leimu aphwami erlakma en tagokhwe enil hogulat, togwi a’geat de, an niak hologo tu modok enebit welat, is en e,
Anni oruak a? Erlak a, oluk nebabut ’baluogoluk lalnobogwi modok oruak ai en, aphwami is eba a’ge logon ebe elaluk mesik eminsogo wolomtik, an en, o is ene’balak wogentaigoluk wene weragenebegimu eba louwa modok erlak o. 23Is o eba modok louwa erlak o. Aphwami is a’ge logon an nemin hwerlirak ’gela’ge taknobogwi a’ge logon o eba oyuk tepnik pouwa modok erlak o. 24-25#Yos. 14:9-12 Asogo a’geat de, an neragam a’ge Kaleb, an nebaget ebabut modok he’bisogo tago a’ge ai ematek nak e, an en at naduk lagarik wagama ebano woluk laik o. O eba re, ’gwiang modok op lobuk-lebaktakma yogodak aphwami ena’gul onuk Amalek a’ge emin, Kanaan a’ge emin, welagai o. Asogo a’geat de, pobuk o eba neragam a’ge Kaleb en dogo’gwe a’ge eiye ema o. Holuk e, o loruk his togolik o leimu aphwami erlakma ik Akaba ye’gelak hegit eba lit o,” oluk mo’gulentesi.
Aphwami Israel a’ge en, “Degenikmu yema nenebit e,” oluk mo’gulogu legesa ai en, wene enebam pesi wene
26At nenaik ’gain Onuk Logo a’ge en asogo mo’gulentesirik, wene mesik Musa Harun emin disogo mo’gulentesi,
27“Aphwami enebabut modok wiak togwi a’ge o eba en an nolot het emagoluk,
Degenikmu yema nenebit e, oluk agauwa merenam mo’gulnogu lema no yo. Is en,
Nenebit e, oluk eniak disogo yusogo mo’gulnogwi a’ge ai an arat nesa’go hwelegis o. 28Holuk e, is asogo mo’gulnogwi holuk, his en e, nenaik ’gain Onuk Logo a’ge en disogo egei o, oluk mo’gulontomup,
An en e, his en mo’gulnogu legep ai hegitsogoat takhenebaigoluk, an nu’gwarek nebe notok modok welago a’ge nonuk ho’buk ’balogo mo’gulhentegis o, oluk, an henaik Nonuk Logo a’ge en arat mo’gulhentegis o. 29-30#Ibr. 3:17 His en an nolot het emagoluk,
Degenikmu yema nenebit e, oluk arat mo’gulnigep o. Asogo mo’gulnigep ai en, his henebe modok waretil-waretil, werak o leimu aphwami erlakma yema dalin-yalin ukhenebaik o. O an his wokhentaigoluk wene wathentegismu eba henebe umur 20 hwerli o’borl akhit a’ge mesigat nak holuk mesik louwa modok erlak o. We, is Kaleb Yosua emin nak louwa o. 31His en ogulat e,
Aphwami en, nis nenebe watnonobogulat e, neneiyagai herle wusogo onobou ano, oluk egep a’geat de, an en his o ukpegepma eba wogonoboluk lasuam e, o eba is eiye emarik, enebe dagegesema ’gela’geat onowirak a’ge ’gela’geat ema o. 32Asogo a’geat de, his nak e, henebe o leimu aphwami erlakma yema en warorogup o. 33#Per. 7:36His henede he’berik welat, an niak hwelak poluk togup modok erlak ai en e, wene henebam emarik, heneiyagai o leimu aphwami erlakma yema 40 tahun pam modok wiak hogulat o da werik lagalat denaga lorogup o. Asogo denaga lemarik, hwerli his henebe logon arat ’berleksogo waragaiam en op ema o. 34His o eba henilen wogulat, agauwa 40 pam welegeptik wegep a’ge ai, wiak togu legep ano pam, wene 40 tahun pam welat wiak modogat hogu lorogup o. Agauwa welegep ai a’ge, we, mesik erlige welegep paget, tahun mesigat a’ge emin hegit aga o, oluk wenarul o. His en an uknoboluk nemin il ’belak ’gela’ge welegep ai en, wene hisat henebam agoam henaluk ema o. 35His ’berlegat wiak tigeptik en an nemin il ’balogu legep a’ge ’berlegat henebe o leimu aphwami erlakma yema warorogup en takhenebaigoluk henaik ’gain Nonuk Logo a’ge nu’gwarek nonuk ho’buk ’balogo mo’gulhentegis o, oluk egei oluk mo’gulontomup o,” oluk mo’gulentesi.
36-37Ap o eba enilen wai louwagoluk at Musa en peragenebesi a’ge ebano o eba arat enilen wai legesarik togolik wegesarik,
“O eba disogo holuk wege,” oluk eniak eseiyat aphwami Israel a’ge mo’gulentau wegesa ai pam, is ’berlegat en e, Allah olot het emagoluk,
“Degenikmu yema nenebit o,” oluk Allah mo’guligisa ai en e, at nenaik ’gain Onuk Logo a’ge en, is o enil wai legesa a’ge ebano ou enebam pesimu enebe waregesa. 38Is ap enebe 12 en enilen wai legesa a’ge ai modok perlengsogo waregesema, we, Nun omlogo Yosua emin, Yefune omlogo Kaleb emin nak e, enelalugat ugenebesi.
Aphwami o eba a’ge mukho lebigonobuogoluk naduk naduk walhegesa wene
39 #
Ula. 1:41-44
At Musa en e,
“Nenaik ’gain Onuk Logo a’ge en disogo takhenebaik egei,” oluk aphwami Israel a’ge asogo mo’gulentesimu, enede wiak egesarik, la’bulogo ’gwigisarik nge togwi modok welegesa. 40Asogo welegesarik, o loruk ’gela’ge hubet sialogo re, dom a’gul duk ebe pam ligomogoluk di a’ge yu a’ge degelogo pegesarik, Musa disogo mo’guligisa,
“Nis wiak demat tigema o. Asogo a’geat de, nis yogodak nenaik ’gain Onuk Logo a’ge en o obok mo’gulnentesimu eba louwogoluk arat degelige o,” oluk mo’guligisa. 41Asogo mo’gulegisema, at Musa en is disogo mo’gulentesi,
“His yogodak e, nenaik ’gain Onuk Logo a’ge en,
His disogo tip oluk mo’gulhentesi a’ge ano nopaget iak sagalogo tuogoluk togu legep. His en epegep a’ge ai re, elit ema modok erlak o. 42Holuk e, his modok lagup erlak o. At nenaik ’gain Onuk Logo a’ge his henemin louwa modok erlak ai en e, his eba lagaimu heneselei a’ge en mi-miarak honoboluk wathonobua o. 43His henebe aphwami Amalek a’ge emin, Kanaan a’ge emin, onorogolema lai laguptik, henemin weim obugulat, his wathonobuema re, warorogubat o. His en nenaik ’gain Onuk Logo a’ge iak hwelak poluk tu henebit ai en e, at ebe henemin louwa modok erlak o,” oluk mo’gulentesi.
44Asogo mo’gulentesirik, at Musa ebe emin, peti nenaik ’gain Onuk Logo a’ge en wene wusogo woknenebegei o, oluk hele’gik welaga a’ge ano emin, o sum owi a’ge werikmu ebano ukpoluk liplau wom erlak oruakhweat de, is aphwami Israel a’ge ebano dom pam ligomogoluk modok ningsogoat egesa. 45Asogo egesarik ligagaimu en, aphwami Amalek a’ge emin, Kanaan a’ge emin, o eba welegesa a’ge en, is aphwami Israel a’ge ebano mi-miarak onoboluk warenebil enebil o onuk Horma eba onobou wegesa.
Currently Selected:
Bilangan 14: Wul
Highlight
Copy
Compare
Share
Want to have your highlights saved across all your devices? Sign up or sign in
