Markus 7
7
“Hena’bu hene’balak til legesa hegitsogo til laga legep o,” oluk mo’gulentesi wene
(Matius 15:1-9)
1Pobuk e, is ap Farisi a’ge emin, is ap Allah iak pelal wogo eiye a’ge pema emin, o Yerusalem en Yesus e’bek odoktorlu egesa. 2Orlu egesarik welat, is Yesus osi iak wogu legesa a’ge ebano pema, aphwami ene’gik petne peik ’balogwi ai ’gela’ge horak erlakma en so’boru yogunat no’gukhwe, enil entigisa. 3Enil asogo entigisa ai re, aphwami Farisi a’ge emin, Yahudi a’ge logon emin, enebe ’berlegat, ena’bu ene’balak onowene tenak welat, ene’gik petne horak erlak so’boru yogunat nagup modok erlak oluk ogulat enil entigisa o. 4Wene asogo tenak welat, di a’ge yu a’ge o’go ’balogo woluk wagalat e, enebetne horak erlak so’boru no’gwi modok erlak. Ye, wene mesik e, wene page a’ge ai tenak welat e, ik e’be wei a’ge pam horugulat, lok a’ge pam horugulat, sogoluak petne horugulat, togwi ai o. 5Asogo togwi ai en e, is ap Farisi a’ge emin, Allah iak pelal wogo eiye a’ge emin, enemin en, Yesus disogo mo’gulegisa,
“Yesus. Is ap hat hosi hiak wogwi a’ge yema en, nena’bu nene’balak togu legesa hegitsogo togwi erlak yogunat tugulat ene’gik petne horak erlak so’boru yogunat no’gwi ai nopaget,” oluk mo’gulegisa. 6#Yes. 29:13Asogo mo’gulegisema, at en e, disogo mo’gulentesi,
“His henagap pam nak e, op ’gela’ge, ye, henede on e, ’biren welat togu legep ai paget e, at Yesaya en Allah iak mo’gulentasulat, wene disogo egei ai, his henebaget hegitsogoat egei hegi o,
Allah en e,
Is aphwami yema re, we, enemde pam en nak e, an erliknobugulat,
enede an nebam eberak erlak welat e, we momu ebesi lagai o.
7Wene aphwami eniak a’geat de, an en egi a’ge ’gela’ge mo’gulontogwi ai en e,
we ’burlat an erliknobogwi o,
oluk egeimu Yesaya en pelal wokho pesimu oruak ai, his henebagerat egei yo. 8Wene asogo egei ’gela’geat, wene Allah en nenesa’go weregei wene ano sagalogo ukpoluk e, aphwami onowene a’ge ningsogo tenak welegep o,” oluk egei. 9Asogo mo’gulontoluk, wene mesik disogo mo’gulentesi,
“His henede modok ’gagalak yu nogorlok o! Hena’bu hene’balak togu legesa a’ge ai ningsogo tenak wolomogoluk e, wene Allah en nenesa’go weregei a’ge ai sagalogo ukpogu legep ai op hegi,” oluk ene’gerli weregei. 10#Kel. 20:12; 21:17; Ima. 20:9; Ula. 5:16 Ene’gerli weregeirik e, wene mesik mo’gulentasulat e, disogo egei,
“At Musa en e,
Henaiklak henialak hau do’goksogo waronobogu lomup o,
oluk egeirik e, mesik disogo egei,
Ap sa en aik ia obok wiak ’baliso holuk e, at ebe ai modogat woru o,
oluk nenesa’go weregei a’geat de, 11his en disogo mo’gulontogu legep,
At ap mesik en aik de a, ia de a, mo’guleselat e,
An na’ge di a’ge yu a’ge hat wokhoum a’geat de, Allah akhit pegirikmu oluk u ’gela’ge, Ibrani eniak pam, korban oluk mo’gulontogu lemagoluk mo’gulontogu legep ai re, 12pobuk enialak enaiklak wogonto a’ge wogentagup no oluk wene ’balu ’gela’geat ogu legep o. 13Asogo ogu legep ai pam, hena’bu hene’balak togu legesa wene wegeptik e, Allah iak sagalogo ukpogu legep ai o. Ai ’gela’ge re, wene agaikhen a’bigat togu legep a’ge oruagat o,” oluk mo’gulentesi.
“Aphwami wene onogola en ’gagalogo orlu agoam ogwi ai nak e, wiagabenebiso ebe aiat o,”
oluk mo’gulentesi wene
(Matius 15:10-20)
14At Yesus en, wene asogo mo’gulentesirik e, pobuk aphwami esan ebano worlentesimu wegesema re, mesik disogo mo’gulentesi,
“An wene ik yu, his ’berlegat pobi togup en e, henesa’go opsogo hwelit o. 15Aphwami re, di a’ge yu a’ge enemdema en onogola ’belabogwi a’ge ai en, wiagabenebiso erlak o. Wiagabenebiso ai re, wene onogola en ’gagalogo orlu agoam ogwi ai nak e, wiagabenebiso yo. 16Henesa’go oruak holuk e, opsogo hologu lemis o,” oluk mo’gulentesirik e, 17aphwami logolak ebano odipmu onoboluk, at Yesus olema ’gwi lagama re, at osi iak wogu legesa a’ge ebano en e, disogo egesa,
“Wene ebam elitsogo mo’gulnentigen ai, ebe no paget mo’gulnentigen,” oluk ebam hin wegesa. 18Hin wegesema re, at en e, disogo mo’gulentesi,
“His ogo re, is enemin hegirat wene ai pobitu erlak welegep a? Di a’ge yu a’ge enemde lo’gwe ’gwelabugulat onogola ’belakpoma wiagabenebasu erlak o, oluk pobitu erlagat welegep hegi. 19No’gwi a’ge ai re, enedemu ’gwi lasu erlak o. We, ’bekhit onogum ogola ’bi lasulat e, enemie ’bekhit wesi lagai aiat o,” oluk egei ai,
“Di a’ge yu a’ge yogunat no’gulom o. Asua erlak o,” oluk egei ai. 20-22Wene asogo mo’gulentasulat e, mesik disogo mo’gulentesi,
“Wene onogola en ’gagalogo orlu agoam lebikpogwi ai enat enebe wiagabenebiso yo. Asogo onogola en wiak a’ge eberugulat togwi re, ebe yuat o; hwelani ’babi tenontugulat, yogorlia wogulat, aphwami waronobogulat, ap onugwami a’ge ’babi tenontugulat, onogola en,
Aphwami pema ena’ge an na’ge nak wellep e, oluk opogulat, di wiak yu wiak tugulat, lalonobugulat, ene’gerli erlak ’gela’ge tugulat, ’bou tugulat, onobok wik-wiaksogo ’balugulat, onu’gwarek en logo pogulat, enede erlak ’gela’ge tugulat, togwi ai. 23Di wiak yu wiak ai, ’berlegat onogola en ’gagalogo orlu agoam e, libago ai enat enebe wiagabenebiso yo,” oluk mo’gulentesi.
Hwe Siria-Fenisia a’ge ede Yesus ebam
he’berik pesi wene
(Matius 15:21-28)
24At Yesus en wene asogo mo’gulontoluk o eba en e, o Tirus orlu agarik olema ’gwi lagarik e, aphwami disogo mo’gulentesi,
“Is logon eneperlak welemak en e,
At wagarik, ebe o eba oruak, oluk mo’gulentagup o. An nebit,” oluk wene ’balegei a’geat de, ebe no’gosogo hisogo wolom ’gela’geat aga. 25-26Asogo agarik oruakma re, at hwe mesik agalogo mu’gat ebabut wiak a’ge ogola ’gwi lagarik oruakma, Yesus obok erianoat esa’go holholuk e, e’bek waga. Hwe ai ebe re, Yahudi a’ge puk, we owi edip Siria-Fenisia eba a’ge, Yesus eragam odogorlu pam hutlau wagarik e, disogo iak erlagaik ’gusogo mo’gulesi,
“An nagalogo mu’gat ebabut wiak a’ge ogola ’gwegeitik oruak a’ge re, hat en henokho lebikpanogoluk yo’go hebil wegi o,” oluk mo’gulesi. 27Yo’go pesimu at Yesus en e, disogo mo’gulesi,
“So’boru re, malik wei a’ge naduk onogumsogo no yo. Malik wei a’ge onso’boru a’ge wik-wok e, mene nouwagoluk emdema hwikhai lo mia o,” oluk mo’gulesi. 28Asogo mo’gulesimu, at hwe ano en e, disogo mo’gulesi,
“I nue. Demat egen. A’ge re, malik wei a’ge en so’boru e delak pam nasulat e’gen ’belabisoam e, mene en e delak lekho welat nasuat o,” oluk egeimu re, 29at Yesus en, disogo mo’gulesi,
“Hiak hegitsogo e’gen ai pam en, mu’gat ebabut wiak a’ge hagalogo ogola en e, arat henokho libagama oruak o. Holuk e, howi pam lak o,” oluk mo’gulesi. 30Asogo mo’gulesimu, at hwe ano owi pam lagarik ’gwegei ’gal e, mu’gat ebabut wiak a’ge agalogo ogola en henokho libagama re, nogosoma ebano opsogo ’bourak oruakma hai laga.
Yesus en ap mesik esa’go lerak a’ge
obaptegei wene
31Asogo toluk, e’berlik e, at Yesus o Tirus eba en lagaksogo o Sidon akhit wagarik e, o eba en o onuk kota 10 werik a’ge ebano etle akhit yethai lasulat, yu akhit yethau wagalat, ’burl o’gwe toluk ik Galilea omugwema ’begei. 32’Begeimu re, is aphwami eba a’ge en e, ap mesik esa’go lerak iak o’gut mennak a’ge e’bek woluk wegesarik e, e’gik tenak pou wagoluk eniak erlagaik ’gusogo Yesus mo’gulegisa. 33Mo’gulegisema re, aphwami esan eriano onoboluk ap esa’go lerak a’ge ano ematekma woluk laga. Woluk lagarik e, at Yesus e’gik dum en ap ano esa’go elema dopnorak pesirik e, was e’gik pam egilogo pei lagarik, ap ano emage pam pesi. 34Asogo pesirik il ’bogorl pam likholuk e, iak set hoposogo egeitik e, nis neniak pam e,
“Hesa’go huremak,” oluk u ’gela’ge, is eniak pam e,
“Efata,” oluk mo’gulesi. 35Asogo mo’gulosokhwe erianoat, esa’go ano hut agalat, iak o’gut mennak a’ge ano hegit agalat, tegeirik e, iak opsogo egei. 36Iak opsogo egeimu re, at Yesus en aphwami ebano mo’gulentasulat e,
“His en aphwami logon modok mo’gulentagup o,” oluk enesa’go pobuk naduk werisokhweat de, is en pobuk eniak ebenagaikmu loksogo mo’gulontogu legesa. 37Asogo mo’gulontogukhwe re, is aphwami en erlik a’biksogo tugulat e, disogo ogu legesa,
“At en, di a’ge yu a’ge opsogo nak tagalat, aphwami obabenebisoam e, enesa’go lerak a’ge husogo lasulat enesa’go holugulat, eniak erlak a’ge ebano eniak op agalat, ogwi ai nonogorlok e!” oluk erlik a’bik tigisa.
Currently Selected:
Markus 7: Wul
Highlight
Copy
Compare
Share
Want to have your highlights saved across all your devices? Sign up or sign in
