Markus 16
16
At Yesus ebe elaluk aga wene
(Matius 28:1-8; Lukas 24:1-12; Yohanes 20:1-10)
1Asogo hegesarik, agauwa sabit pam Allah paget weat welegesarik e, is hwe Maria owi Magdala a’ge ano o, hwe Maria Yakobus ia ano o, hwe Salome o, a’bosu e’ben op a’ge Yesus werak ano pam egeli louwogoluk o’go ’bali legesa. 2O’go ’balogo poluk e, nogoluk loruk o’gwe hari Minggu hubet siaksogo mo pou wagokhwe, owikmu ano wegesa. 3-4Wagalat e, helep modok lok a’ge dopnosogo pegesarikmu no oluk e, is-is en nak ogulat e, disogo egesa,
“Werak helep dopnosogo pegesa ano, sa en erlebilogo ’goduk hutnontouwa e,” oluk il-il wegesa. Asogo ’gonutakma en il wagalat e, enil likhegesa ’gal e, helep ano erlebilogo hwikhai legesema ’goduk hwerik oruakma hegesa. 5Hegesarik, enebe horoksogo wegesarik ’gwigisa ’gal e, ap souwe a’ge mesik osum ’gut yat a’ge ’buksogo ene’gik ’bekhit akhit hweriogo oruakma enil holuk e, yuk egesa. 6Yuk egesema, at ap souwe a’ge ano en e, disogo mo’gulentesi,
“Yuk ogup o. Yesus owi Nazaret a’ge e pam edikpoluk werigisa a’ge ano heratil wegep a’ge re, ebe yema erlak. Allah en elalugaptegeimu oruak o. Werak pegesema ebano ebale nak yu henil ’gwelakhemit o. 7#Mat. 26:32; Mrk. 14:28’Gwelakholuk e, his en at osi iak wogu legesa a’ge Petrus lak ebano mo’gulentai lu o. At Yesus en e,
An o Galilea legeiktik honlogotma weleik o, oluk mo’gulhentesi hegitsogoat ligema ani o. His ligoroguptik e, at ebe henil hagup ani o, oluk mo’gulentai lu o,” oluk mo’gulentesi. 8Asogo mo’gulentesimu enede nalagama re, onuak erlik-erlik hweiye ’bogoligisarik onogorlok en wene aphwami pema mo’gulonto erlakma en ’bekhit legesa.
At Yesus en, “Naduk naduk hwe Maria owi Magdala a’ge en il niouwak o,”
oluk ologotma inlau waga wene
(Matius 28:9-10; Yohanes 20:11-18)
[ 9At Yesus ebe hari Minggu pam inaga ai erlige hubet siaksogo re, inagarik, at hwe Maria owi o Magdala a’ge mu’gat enebabut wiak a’ge enebe sabit a’ge ogola ’goluk oruakma pageat henokho lebikpesi a’ge ano naduk,
“Naduk naduk il niouwak o,” oluk ologotma inaga. 10Ologotma inagama il holuk e, yo’go is aphwami at Yesus emin welegesa a’ge pong worugulat nge tugumu ene’bek laga. 11Lagarik e, disogo mo’gulentesi,
“At Yesus e, elaluk agarik oruak o. Ebe arat nil hegi o,” oluk mo’gulentesimu, enesa’go hweligisa a’geat de, demat oluk epegesa erlak.
At Yesus en e, “Is ap nosi enebe ’biren en enil niouwak o,” oluk onlogotma inaga wene
(Lukas 24:13-35)
12Asogo epegesarik oruakhwe, pobuk e, ap enebe ’biren o seli weimu mesik womogoluk wagaimu at Yesus orogole muat agarik e,
“An nebe enil niouwak,” oluk ene’berlik waga. 13Ene’berlik wagama re, enil holuk togolik enarilak pema ebano mo’gulentai legesa a’geat de, is onogola en demat opo erlak.
At Yesus en, “An nebe nosi enil niouwak,” oluk ene’bek ’gwegeitik e, onologotma inaga wene
(Matius 28:16-20; Lukas 24:36-49; Yohanes 20:19-23; Peragenebesi 1:6-8)
14Asogo til waga lagarik e, ebe pobuk ologun ’goboksogo re, is at Yesus osi enebe 11 ebano hweriogo welat so’boru no’gumu,
“Enil niouwak,” oluk ene’bek ’gwegeitik onlogotma inagarik disogo mo’gulentesi,
“His yema henede en e, demat oluk opo erlakma en henede ’buk yema re! Allah en an nebe arat nelalugapnebegeimu oruakma, is pema en enil niegesarik mo’gulhentai wegesa a’geat de, henede en demat oluk opogwi erlak yema re!” oluk wene yagentesi. 15#Per. 1:8Asogo wene yagentesirik, wene mesik disogo mo’gulentesi,
“His e, aphwami ena’gul onuk lo’bok o di owi yu owi eba ’berlegat wene op wene yu mo’gulentil laga lomup o. 16Mo’gulentil lagaimu re, is aphwami pema en wene ai demat oluk opouwa a’ge ebano ik olomu ’belabonobogup a’ge, Allah en delonobua a’geat de, is pema wene ai demat oluk wouwa erlak a’ge holuk e, Allah en wene enebam poluk wiagabonobua ani o. 17Ye, is aphwami pema wene ai demat opou wagoluk, is wene demat oluk wouwa a’ge en e, disogo togu lema o. Mu’gat enebabut wiak a’ge is pema onogola ’goluk oruakma an nonuk ’balholuk henokho lebigonobogulat, eniak is mu a’ge eniak eneperlak a’ge elalinat ogulat, togu lema o. 18Asogo tugulat, herlegetie aphwami warenebiso a’ge ene’gigem wogulat, is enebe waremagoluk aphwami waragai a’ge ik e’be pam na’gogo wogontogwiam no’gulat, tua a’geat de, ai en wiagabenebise lema erlak o. Ye, aphwami pema ou wogumu, is en ene’gik tenontogwiam, op aga lemayat o,” oluk mo’gulentesi.
At Allah en Yesus ’bogorl pam woluk ligaga wene
(Lukas 24:50-53; Peragenebesi 1:9-11)
19 #
Per. 1:9-11
Wene asogo arat mo’gulentesimu re, at Allah en Yesus ebe ’bogorl pam woluk ligaga. Asogo woluk ligagama eragam e’gik ’bekhit akhit ’gainat hweriogo oruak. 20Asogo woluk ligagama re, at Yesus osi ebano o di owi yu owi ’berlegat wene mo’gulentil legesa. Wene mo’gulentil lagaihwe re, aphwami en e,
“Is wene mo’gulnentil wegesa ai re, demat o,” oluk wene pobi tuagoluk, nonue ’gain Onuk Logo a’ge emin modok welat, is en elalin a’ge togwiam, at en wene ai anniap pesi.]
Currently Selected:
Markus 16: Wul
Highlight
Copy
Compare
Share
Want to have your highlights saved across all your devices? Sign up or sign in
