Markus 15
15
At Yesus e’gik herle wusogo Pilatus e’bek
woluk legesa wene
(Matius 27:1-2,11-14; Lukas 23:1-5; Yohanes 18:28-38)
1Asogo togu legesarik e, o dakha egeimu re, ap wene Allah paget edip ’belo’gogwi a’ge enebe ’berlegat, is ap Allah eiye a’ge onuelak ’gain ebano emin, enarluedek ebano emin, Allah iak pelal wogo eiye a’ge ebano emin, ado pema eneminat,
“Disogo tuok o,” oluk egesarik e, Yesus e’gik herle wusogo Pilatus wogosu egesa. 2Wogosu egesema, at en e, hin Yesus ebam wasulat e, disogo mo’gulesi,
“Aphwami Yahudi a’ge onue ’gain onuk logo a’ge ano, harat a?” oluk mo’gulesimu, at en e,
“Hat e’gen aiat o,” oluk mo’gulesi. 3Asogo mo’gulesimu re, is ap Allah eiye a’ge onuelak ’gaindek ebano en e, di wene yu wene ebam pegesa. 4Wene asogo ebam pegesema, at Pilatus en Yesus ebam pobuk hin wasulat e, disogo mo’gulesi,
“Di wene yu wene a’bik hebam pogwi yema re, hat en wene o’go mo’gulentagun erlak a?” oluk mo’gulesi. 5Asogo mo’gulesimu re, at Yesus iak o’go u erlagat mo egeimu re, at Pilatus en e,
“Nogorlok o,” oluk erliktegei.
Yesus ebe modok woruagoluk wene
ebam pegesa wene
(Matius 27:15-26; Lukas 23:13-25; Yohanes 18:39–19:16)
6Is aphwami Yahudi a’ge seni Paskah logat sogo no’gulat e, is en e,
“Is aphwami ene’gik herle werak a’ge ebano, mesigat at ai ’gela’ge hebilogo woknentemen o,” oluk ’gonu egesema, at Pilatus en mesik nak anoat hebilogo wogentasu laga. 7Asogo wogentasumu no oluk e, ai erlige ap mesik onuk Barabas, ap logon emin en,
“Nonuelak ’gain pemerintah a’ge, nenebit o,” oluk ena’gul pebisogo waronobuogoluk, enemin obogulat, ap pema warenebegisema re, ene’gik herle warenebegisema, 8oruakma, is aphwami esan ebano Pilatus e’bek wegesarik e, disogo mo’gulegisa,
“Pilatus nue. Hat en aphwami ene’gik herle werak a’ge herle hebilogo woknentasu legen ano ’gela’ge, yogodak mesik hebilogo woknentagun en wege o,” oluk ’gonu mo’gulegisa. 9-10Mo’gulegisema, at Pilatus ogola en e,
“Is ap Allah eiye a’ge onuelak ’gaindek yu Yesus ebam ’bousogo ebe woknosu wegesa epegi,” oluk pobi tegeitigat de, disogo mo’gulentesi,
“His Yahudi a’ge honue ’gain onuk logo a’ge yu e’gik herle hebilogo wokhontouwagoluk wegep a?” oluk mo’gulentesi. 11Asogo mo’gulentesi a’geat de, is ap Allah eiye a’ge onuelak ’gaindek ebano en e, aphwami esan ebano enede ’gagalugulat,
“Barabas aiat e’gik herle hebilogo woknentagun ani o. Yesus ai erlak o, oluk mo’gulomup,” oluk enede ’gagaligisa. 12Asogo enede ’gagaligisema, is en asogoat mo’gulegisema, at Pilatus en e, disogo mo’gulentesi,
“Holuk e, his aphwami Yahudi a’ge en e,
Nonue ’gain onuk logo a’ge, oluk ogu legep a’ge yu, no’gosogo tik,” oluk mo’gulentesimu, 13is en e, disogo mo’gulegisa,
“E pam edikpoluk werip o!” oluk eniak ningsogoat mo’gulegisa. 14Asogo mo’gulegisa a’geat de, at Pilatus en e, disogo mo’gulentesi,
“At no wiak tegeimu en,” oluk mo’gulentasuam is en e,
“E pam edikpoluk werip o!” oluk pobuk eniak ebenagaikmu ning-nangsogoat mo’gulegisa. 15Asogo mo’gulegisema, at Pilatus ede en e, disogo epesi,
“Holuk e, aphwami esan yema enede opsogo disogo tik,” oluk epesirik e, Barabas ano e’gik herle hebilogo wogentasulat e, at osi tentara a’ge ebano en Yesus
lagal’bisok ’go’bu wusogo e pam edikpoluk woruagoluk wogentesi.
Is ap tentara a’ge en Yesus eniak esegen
yagegisa wene
(Matius 27:27-31; Yohanes 19:2-3)
16At Pilatus en asogo wogentesimu re, is ap tentara a’ge ebano en Yesus woluk ap ’gain gubernur owi selimu ’gwigisarik e, is enarilak enemin esan mesigat pologu legesa a’ge ’berlegat worlentigisa. 17Worlentigisema wegesarik e, Yesus sum orogole wibe’gen werak ’gela’ge ap ’gaindek a’ge ’buktogwi a’ge ’gela’ge ’buktak pogulat, ap ’gain a’ge ene’gare-’gare ’buktak onobogwi ai ’gela’ge, orlok wiak a’ge hwanesogo a’gul pam ’buktak pogulat, tigisa. 18Asogo ’buktak poluk e, disogo mo’gulegisa,
“O huk! Aphwami Yahudi a’ge onue ’gain onuk logo a’ge ano harat hegi o, eige!” oluk hau worogu lege oluk eniak heret hogulat mo’gulegisa. 19Asogo mo’gulegisarik e, ’bon ’go’bu pam a’gul ’baksogo worugulat, was ebam topuk hogulat, eniak lalogo hau woruogoluk ondogorlu pam eragam hutla ’gugulat, tigisa. 20Asogo arat tigisarik, sum yat orogole wibe’gen werak a’ge ’gela’ge ano no’gorlogo poluk e, u’gwarek osum a’ge ano togolik ’buktak pegesarik e, e pam edikpoluk woruogoluk leget o’borl akhit woluk liplau wegesa.
At Yesus e pam edikpoluk werigisa wene
(Matius 27:32-44; Lukas 23:26-43; Yohanes 19:17-27)
21 #
Rom. 16:13
Asogo woluk ebela pam wagaimu re, ap mesik onuk e, Simon, owi o Kirene a’ge, ap Aleksander o, Rufus o, enaik ai, o eba esa’goma en o kota ma ’gwigoluk lasumu emin sarlok tigisa. Emin sarlok tigisarik e, disogo mo’gulegisa,
“Yesus ebe e pam edikpoluk worul a’ge e yu, hat en wemen o!” oluk eniak ningsogo mo’gulegisema wesi. 22Wesimu re, Yesus ebe woluk e, dom a’gul onuk nis neniak pam, Ena’guluak ’Belak duk pam u ’gela’ge re, is eniak pam e, Golgota duk pam woluk orlu egesa. 23Orlu egesarik e, anggur e’gen a’bosu emin, hwedali al ’gela’ge esik wiak a’ge emin, emin ne’gerlak-he’gerlak takpoluk wogegisa a’ge re, ukpesi. 24#Mzm. 22:18Yesus ebe arat e pam edikpegesarik e, osum no’gorlak ebano enebe lo’bok,
Sa ’gela’ge horlouwa, oluk, helebe’gen ’gela’ge hwikhai lagalat, hwikhau wagalat, tigisarik, helep enebam laga a’ge nak so’busogo hwerlegesa. 25Yesus ebe werigisa ai re, hubet jam 9 e pam edikpegesa. 26Asogo edikpegesarik,
“Ap yu wene edip yu pam pegerik en werige o,” oluk u ’gela’ge,
“APHWAMI YAHUDI A’GE ONUE ’GAIN ONUK LOGO A’GE,” oluk pelal wokho pegesa.
27 #
Yes. 53:12
At Yesus ebe ’burlmu e pam edikpegesarik e, is ap enebe ’biren aphwami ena’ge yogorlia wogu legesa a’ge, mesik e’gik ’bekhit akhit, mesik e’gik hware akhit, emin edigonoboluk warenebegisayat. [ 28Asogo tigisa ai re, pageat Allah iak pelal wokho pasulat e, disogo egesa,
“Aphwami en e, at ai ebe re, aphwami enebabut wiak togwi a’ge ’gela’ge enemin mesikmu wenagonobua ani o,”
oluk egesa a’ge ano, at Yesus is ap ai enemin asogoat edigenebegesa ai pam demat aga ai o,] 29-30#Mzm. 22:7; 109:25; Mrk. 14:58; Yoh. 2:19Asogo edigonoboluk oruakma, aphwami ebela’gwe ai lak-wak togulat e, Yesus disogo mo’gulentil laga legesa,
“Ihi! Hat en e, disogo e’gen ebano re,
Allah owi werik a’ge yu moluksogo poluk e, agauwa ’birenam nak werise leiktik e, henaganak a’ge en e, arat daksogo werik o, oluk e’gen ebano re, hu’gwarek hebe e ai pam en hagap delogo ’bi suk da!” oluk ena’gul ’gwani hogulat eniak esegen yagogu legesa. 31Asogo tugukhwe re, is ap Allah eiye a’ge onuelak ’gaindek ebano emin, Allah iak pelal wogo eiye a’ge ebano emin, enemin is-is eniak esegen yagogulat e,
“At en e, is aphwami mu a’ge elirat delenebise laga ano a’geat de, u’gwarek en nak e, delhorlo mia epegi. 32Kristus nis aphwami Yahudi a’ge nonue ’gain onuk logo a’ge yu re, nis demat opul en e, nenilem e ai pam en ’bumak da,” oluk eniak esegen yagogu legesa. Ye, is ap pema e pam Yesus emin edigenebegesa a’ge eriano en, Yesus eniak esegen asogoat yagegisayat.
At Yesus ebe waraga wene
(Matius 27:45-56; Lukas 23:44-49; Yohanes 19:28-30)
33O erlige ede ’burl jam 12 pam o hup agarik e, o ebano ’berlegat hwerli jam 3 pam hiktak modok welaga. 34#Mzm. 22:1Hiktak oruakhwe jam 3 arat lai lagama re, at Yesus en Allah disogo mo’gulesi. Nis neniak pam e,
“Naik Allah! Naik Allah!
An nopaget uknebegen a?”
oluk u ’gela’ge, is eniak pam,
“Eloi! Eloi! Lama sabakhtani!” oluk iak ’beraksogoat mo’gulesi. 35Asogo mo’gulosokhwe re, is aphwami pema akhit ebano welegesa a’ge enesa’go hweligisarik e,
“Elia worlhasu hegi,” oluk egesema, 36#Mzm. 69:21ap mesik pungtak lagarik e, hwali sabus ’gela’ge anggur e’gen a’bosu esik wiak a’ge udalogo nouwagoluk e paiyo pam dongsogo wogeselat e, is pema en e, disogo mo’gulegisa,
“A! Elia en e, at yu delogo ’belakpouma hwi a? Erlak hwi a. Nenil wolomok,” oluk mo’gulentesi. 37Asogo mo’gulentesimu, at Yesus iak mesik erlige loksogo egeitik e, arat lebeksogoat waraga. 38#Kel. 26:31-33Waragoam e, Allah owi werikmu sum kain a’ge o ogorlirak dit akhit ’gwe ’belak welaga a’ge ano erabu en ’burl heisogoat ’baktil ’bu aga. 39Yesus asogo waragoam e, is ap tentara a’ge onue ’gain a’ge Yesus orogolema hegitsogo welat, asogo waragokhwe il hesirik e, disogo mo’gulentesi,
“Ap yu demat Allah omlogo hegi o,” oluk mo’gulentesi. 40#Luk. 8:2,3Asogo tugukhwe, is hwami pema re, hwe Maria owi Magdala a’ge, mesik e, hwe Maria at ap Yakobus ebe souwe a’ge o, Yoses o, enia, mesik e, hwe Salome, hwami logon eneminat enebe walek en enil yerentarok welegesa. 41Is hwami eria naduk e, Yesus e’berlik o Galilea do’go denagalat e, lethogu legesa a’ge. Ye, hwami ado a’bigat Yesus emin o Yerusalem ’bi legesarik emin eba welat enilat welegesa.
At Yesus ebe werak a’ge owikmu pegesa wene
(Matius 27:57-61; Lukas 23:50-56; Yohanes 19:38-42)
42-43At Yesus waraga ai re, is aphwami Yahudi a’ge loruk o’gwe agauwa sabit pam Allah paget weat wolomogoluk, di a’ge yu a’ge degelogo pogukhwe waraga. Waragoam e, o arat hup agama re, ap mesik Yahudi onue ’gain wene ’bele’guogoluk emin odoktugu legesa a’ge onuk Yusuf. Owi o Arimatea a’ge. Ebabut op en, aphwami en e,
“At op o,” oluk obok ogu legesa. Yusuf asogo tagalat, ogola en e,
“Allah en eragam nonobouwa ai re, metnerlige nonobouwa,” oluk yetharok welaga a’ge ano, Pilatus ogorlok erlagat lagarik e, Yesus werak ano ’gonu ’gwegei. 44Werak ’gonu ’gwegeimu, at Pilatus en e,
“’Ga pam ’gela’ge waraga hweat, yu nogorlok e,” oluk erliktegeitik e, ap tentara a’ge onue ’gain ano wemagoluk yo’go perakpou wagoam lagama re, disogo mo’gulesi,
“Ebe pageat waraga ya? Yogodagat waraga ya,” oluk hin wokhesi. 45Hin wokhesimu, at en e,
“Pageat waraga o,” oluk mo’gulesimu, at Pilatus en e, Yusuf disogo mo’gulesi,
“Holuk e, ebe werak a’ge ai wai lak o,” oluk mo’gulesi. 46Asogo mo’gulesimu wagarik e, sum kain lenan op a’ge o’go ’balogo Yesus werak a’ge ano e pam en ’belakpobu agarik e, sum ano pam e’girlogo re, o wik aphwami werak onobouwogoluk aphwami en ebale hele’gigisema ebano pegesa. Poluk e, helep lok a’ge erlebilogo woluk wegesarik e, dopnosogo lerak pesi. 47Dopnorak pasuam e, is hwe Maria owi o Magdala a’ge ano o, hwe Maria Yoses ia ano o, wegesarik e,
“Eria pesi,” oluk enil dokhumsogo hegesa.
Currently Selected:
Markus 15: Wul
Highlight
Copy
Compare
Share
Want to have your highlights saved across all your devices? Sign up or sign in
