Mikha 7
7
Israel a’ge enebabut wiak agama mo’gulentesi wene
1“An ai nede o! Anggur e’gen ede’bimu agoam ’balogwi ai ’gela’ge, an e’gen naik oluk heranoso a’geat de, eragol a’ge nak egesik oruakma hasulat, Anggur a’bosu op ningtak a’ge nele logwe, oluk epasu legi a’ge re, ebe erlak hasulat tagoma re, 2is ap Allah motluk lagai a’ge ebano o yema ene’berli yerentasu legi erlagat o. Ap enede op a’ge mesik nak ogo mesik erlagat hasulat, taga legi o. Is enebe ’berlegat aphwami waronobuogoluk ’gela’ge welat, tue seniso a’ge sum egeik a’ge woluk no’gwi ai ’gela’ge, is logon en enarilak ado pema waronobuogoluk mugonoboluk no’gulat, togwi o. 3Wiak tu a’ge modok enaluksogoat welarat de, til lagai o. ’Gwelagentarok a’ge onuelak en o’go pemit o, oluk mo’gulontogulat, wene enebam pogulat, no’gorlogulat togwi a’ge en onowene opsogo ’baluagoluk o’go wogulat, Is ap onogorlok a’ge en is en tu opogwi a’ge ebano nak wene mo’gulontogulat, tugulom a’ge wene werak ano op a’ge oruakhweat de, ing-dingtak pogulat, togwi o. 4Is ap ai enebe ’berlegat enebabut wiak modok welagai a’geat de, ene’gerlakma mesik nak mesik ebabut weisogo mesik op ’gela’ge oruak ano re, orlok ’gela’geat welat, ye, is ’berlegat enede seram ’gela’ge oruak a’geat de, is ene’gerlakma mesigat nak mesik enede weisogo op a’ge welagai ano re, ’gowe orlok daintak a’ge, ’gela’ge welat, asogo nagat welagai o. Is ’gogolhenebil no’gwi a’ge wema oluk ogulat mo’gulhontogwi a’ge ano o pageat horok lau wagarik oruak o. At Allah en il ’gogolhentau wom a’ge o agauwa ano arat horok lau wagarik oruakma re, o yogodak lal-’bal tagonobo a’ge arat horok lau waga o. 5-6#Mat. 10:35,36; Luk. 12:53Ap omlogo logomalik en aik mi-miarak pasulat, agalogo hwele mesik en inagalat ia e’birek yeik ’buk ogulat imalhwe en imalhwe e’birek yeik ’buk ogulat, Ap mesik emin weim ’balema ai re, ue orat welat, tuama re, henemin welegep a’ge henede enebam eberak pogulat, nenareat o, oluk, is enebam he’berik welat, tugulom mia o. Ye, hwe mesik honowi pam ’boutak welat, esa’go hwelisoma no oluk, honu’gwarek heniak ogu legep a’ge ano pobirak pogu lemis o.
7Asogoat a’geat de, an ano, an en at Allah mo’guloso a’ge ano esa’go holuama re, At Allah en letniau wagalom hwia, oluk nil welat, nede eberak nagap deliso a’ge nenaik Allah ano ’gwelakniau wago hwia,” oluk, yetharok welat, taga legi o.
Allah en enagap delu wene
8“Nenemin il ’belak a’ge his yu logwe, nis ’bule ’bigerik welege a’geat de, inagalat, nis o hiktakma welege a’geat de, nenaik At Allah en o dakharak nenebasulat, tuama re, nis taknenebesi ano pam obat takpegi ai,” oluk nonogola nenagaisogo eida taknonobo mia o. 9“Nis Allah demat wiagap pege, ma re, at Allah en nonowene ’baliselat, tegisa a’ge ano o’go disogo tagonobo yo,” oluk, hegitsogo diptak nenebasulat, tu erlakhwe, At olot het nenebam pasu a’ge ano, “Obat o,” oluk, wogu lomul o. Nis o hiktakma en woknonoboluk o dakharakma nonobou wagalat, pobitak poluk hegitsogo taknenebasulat, tagokhwe nenil hul o. 10“His henaik Allah ano ’ge o?” oluk, mo’gulnentigisema nis ano nene mi nil ’belak a’ge ebano en nis taknenebasu a’ge ebano enil nontogu lemarik ene’gerli en onorogole edenogo welat, laga lema ani o. Is asogo sebelak onoboluk sep-sip ’goduk onoyuk sobuthogwimu ’gela’ge, tagenebasumu hagup ani o.
11Hat o Yerusalem yu o. Hegelep pak ebale’gwe wokho Pasulat, ho’gwiang hwerli oruak a’ge ano ’gwiang esa’go ebagap pasulat, tu a’ge horok lauma o. 12O agauwa ai erlige aphwami o Asyur en ’bekhit, o Mesir kota-kota hwerli emin, o Mesir en ’bekhit ik Efrat hwerli emin, ik lok ye’gelak laut agaikhenma en ’bekhit agaikhenma hwerli emin, Dom agaikhenma en ’bekhit dom agaikhenma hwerli emin, ’berlegat hat Yerusalem at ’gwelap hiau waga lema o. 13Aphwami o yema welagai a’ge ebano en wiak til laga legesa pam o yu o wogowiat ema o.
Israel edeap enebegei wene
14“Naik Allah o. Hat hemining a’ge ’gela’ge heiyagai hede hwedik a’ge dombaodoktak a’ge ’gela’ge welat, e’gelama sasuk modok moli a’ge nil lagaimu welagai a’ge ebano ’go’bu pam sil onoboluk noso lomup o. O naduk ogo re, e e’gela ’balogo nil-lagaimu o Basan en, o Gilead eba nil no’gulemagoluk, ugonobomup o.
15O page enat hat o Mesir en wogonoboluk liplau wagalat, tigen ano ’gela’ge, tu puk a’ge mesik tisoma hiouwak oluk mesik tin o. 16Asogo togun ano pam e, di aphwami, yu aphwami, enil hogulemarik nis nenanni pam tu mia hege o,” oluk, ene’gerli en eniak mesik u erlakma en, enesa’go lerak a’ge ’gela’ge takpoluk welema ani o. 17’Gosu ’gwiang o’gwe emage molok-molok ogum pam ebela lasu ai ’gela’ge, di ’gosu yu ’gosu onogum pam ebela lasu ai ’gela’ge, is asogoat onowi pam en onogorlok en hil-hil libotluk, onogorlok pam hat Allah heragam wagalat, hat hebek onogorlok pam wagalat, tua o.
“Heiyagai Israel a’ge pobuk hedeap nonobogun o,” oluk Allah mo’gulesi wene
18Naik Allah ’gain Honuk Logo a’ge, naik. Heiyagai poligenebegen a’ge enebe ado logon enelaluk oruak a’ge wiak togwi a’ge sagalogo ukpasu legen a’ge Allah harat o, mesik mu a’ge erlak o. Hat wene ’balisolomtik, hebam harosogo modok welago erlak o. We, hat hagai e, hedeap nenebiso modok wolom aiyat o. 19Naik, nis nenebe pobuk hedeap nonobogun ai o. Hedeap nonoboluk e, nis en wiak togu lege a’ge sagalogo ukpoluk, hoyuk en al ’besilogo ukpoluk ik laut ye’gelak ogola orogobu hwikhagun ani o, naik. 20Heiyagai Abraham, Yakub e’birek en dogo’gwe a’ge ai, nene’balak page welegesa eria pam wene hu’gwarek honuk ho’buk ’balogo warentigen ai ’gela’ge, hat hebe is enemin hwedik welat hedeap enebiso modok wolorogun ai o, naik.
Currently Selected:
Mikha 7: Wul
Highlight
Copy
Compare
Share
Want to have your highlights saved across all your devices? Sign up or sign in
