Mikha 4
4
Nenaik ’gain Onuk Logo a’ge en aphwami ’gwiangma welagai a’ge opsogo tenentarok welema wene
1Aphwami logon mia ’gela’ge oruakhwe, mesik ’gain welemagoluk edikpogwi ai ’gela’ge, dom logon mia ’gela’ge oruakhwe, dom Nenaik ’gain Onuk Logo a’ge owi werikmu eba nak e, modok logap pouwa o. Asogo logap poma, dom lok a’ge wei a’ge ukpoluk modok edik yat-’bat a’ge inagoam e, aphwami ena’gul onuk lo’bok o eba nak waga lema ani o.
2Asogo wotluk, disogo ogu lema,
“Nis e, is aphwami Israel a’ge enaik ’gain Onuk Logo a’ge Allah owi odom pam werikmu eba ligomok o. At Allah ’gain Onuk Logo a’ge ebe Sion pam kota Yerusalem welat, iak aphwami mo’gulentasulat, enesa’go weriselat, taga lema ai en e, nis en at iak hologo togulom a’ge mo’gulnentasuam e, hologo hegitsogo togu lomogoluk e, ligomok o,” oluk ogu lema. 3#Yes. 2:4; Yoe. 3:10At en e, asogo mo’gulentasulat, aphwami ena’gul onuk lo’bok wene enebam pasulat, no’gorliselat, tiselat, ena’gul onuk logon enanni oruak a’ge, o walekma a’ge, horokho a’ge, ogo wene enebam oruak a’ge ’beli’gogo daktaga lema o. Asogo daktagoam ’garok weim obogwi a’ge yabuk worogwi a’ge hele’gugulat, wa’gun ’besieme’gen a’ge ’bisok e’gat ’gwanitak a’ge di a’ge yu a’ge emining ’balogwi a’ge hele’gugulat togu lema o. Asogo togulat, aphwami ena’gul onuk lo’bok weim ’gagalil loluk obogulat, obuogoluk segen wa’gun degelogo pogulat, togu lema modok erlak o. 4#Zak. 3:10Aphwami enebe lo’bok enebe enegerle anggur edipmu emin, enagan ara edipmu emin, op lielak welema o. Asogo oruakma, aphwami logon en onogorlok emagoluk tagonobogu lema modok erlak, oluk Nenaik ’gain Onuk Logo a’ge di a’ge yu a’ge tu nak a’ge ano en wene watnenebegei ai o.
5Aphwami ena’gul onuk lo’bok o ’gwiangma yema welagai a’ge onodogwi asua a’ge lo’bok ebam he’berik welat, onuk ’balogwi a’geat de, nis nak e, nenaik Allah ’gain Onuk Logo a’ge ebam he’berik welat, onuk ’balogwi modok wolomul ani o.
Aphwami Israel a’ge o ene’gik herle wusogo wogonoboluk legesema ebano en togolik wema wene
6Nenaik ’gain Onuk Logo a’ge en e, disogo egei,
“Aphwami an en wene enebam pegimu, ene’gik herle wusogo wogonoboluk legesema eba di obotut yu obotut hogulat, enawe wiak a’ge wolom ’gela’ge wiak welat, togwi a’ge ai, pobuk an en odoksogo honobou weikmu oruagat o. 7Is enawe wiak a’ge wolom ’gela’ge wiagapsogo onoboluk onowi pam ukpoluk o walegat louwagoluk peragenebegi a’geat de, is ado logon enelaluk oruak a’ge ai, an en ena’gul onuk ’get a’ge tagenebaikmu, ena’gul onuk lok agalat, enanni a’bik agalat, ema o. Asogo tagonoboluk, an is enaik ’gain Nonuk Logo a’geat welat, dom Sion pam eba tenentarok modok weleik ani o,” oluk egei.
8His aphwami Yerusalem a’ge yu. Wam domba oluk esan tenak welagai ai ’gela’ge, Allah en eiyagai o yema tenhentarok welagoma yema, o kota yema naduk onuk lok welaga ai ’gela’ge takhenebaik ani o. 9His heniak loksogo modok nge togu legep ai nopaget! Hwami enemalik dagonobogulat nonouk togwi ai ’gela’ge, di obotut yu obotut hogu legep ai nopaget? His honue onuk logo a’ge erlak en, ap henesa’go worogwi a’ge enebe waregesema en asogo togu legep no? 10His henebe honowi kota ukpoluk, o leimu laguptik wolorogup ai en e, hwami malik dagonobogulat nonouk togulat, enabel pema pei lagalat, pema pou wagalat, modok wiaksogo ’gwano togwi ai ’gela’ge togulomup o. His e, henebe o Babel lagupmu, Nenaik ’gain Onuk Logo a’ge en heneselei a’ge ene’gik pam en hebilogo delhonobua ani o. 11His aphwami Yerusalem a’ge yu. Ap ena’gul onuk lo’bok en his Yerusalem a’ge wathonobuogoluk enebe logolhegesarik oruak. Asogo logolhegesarik weim obok disogo egesa,
“Aphwami Yerusalem a’ge modok erlagap onobuok o. O kota ai moluk-melaksogo ’bo poluk nonogola nenagai opogulat nenil yetharok wolomok,” oluk egesa. 12Asogo a’geat de, at Nenaik ’gain Onuk Logo a’ge en is tagonobouwa a’ge wene arat deksogo egeitik enebe gandum e’gen hweleluogoluk herle hethegeik hwelelogumu eba odoksogo pei lagai ai ’gela’ge, wene enebam paigoluk odoksogo enebesi a’geat de, pobi togwi erlak welat asogo egesa ai o.
13Nenaik ’gain Onuk Logo a’ge en disogo egei,
“His aphwami Yerusalem welegep a’ge yu. Heneselei a’ge honoyuk en, al ’besilogo enebagup en e, lit o. An en e, his henebe wam sapi iak ’besieme’gen a’ge daintak, ye, oyuk ogop tembaga a’ge daintak a’ge ’gela’ge takhenebaikmu, His en e, aphwami ena’gul onuk lo’bok logon a’bigat enebe erlagapsogo waronobogulat, ena’ge di a’ge yu a’ge o’go a’bik a’ge o hogul ’gogulat hwerlegesa a’ge ai, his horloluk an henaik ’gain Nonuk Logo a’ge di a’ge yu a’ge tu nak a’ge ano nebaget pou wagalat togup ani o,” oluk egei.
14Asogo egeimu, an en e,
“Aphwami o Yerusalem welegep a’ge yu! Nenaik ’gain Onuk Logo a’ge Allah en letnontouwagoluk heniak henerlagaiksogo yo’go pomup o. Neneselei a’ge en, nis aphwami Israel a’ge en nonuelak ene’gerli wusogo onorogole sogupsogo waronobu ’gela’ge, o arat latnenebigisa ai o,” oluk egi.
Currently Selected:
Mikha 4: Wul
Highlight
Copy
Compare
Share
Want to have your highlights saved across all your devices? Sign up or sign in
