Matius 9
9
Yesus en ap mesik e’gik oyuk soborak a’ge obaptegei wene
(Markus 2:1-12; Lukas 5:17-26)
1Asogo mo’gulegisema re, at Yesus ik so pam ’gwi lagarik, ik so wusogo re, ik etle akhit libagarik o kota at owi pam laga ’gal e, 2ap mesik e’gik oyuk modok soborak welaga a’ge e ’biagan pam ’bourak oruakhwe e yesogo woluk e’bek wegesema, at Yesus en e,
“Is ai enede an nebam he’berik pegesarik en woluk wegesa hegi,” oluk, il enagat entesirik e, ap e’gik oyuk soborak a’ge ano disogo mo’gulesi,
“Nomlogo yo. Hagai homup o. Hat wiak taga legen a’ge re, an en erlagapsogo ukpegi o,” oluk, mo’gulesi. 3Asogo mo’gulesimu re, is ap Allah iak pelal wogo eiye a’ge logon onogola en,
“Eige! Ap yu re, ogola en Allah mi-miarak pasulat onuk wiagap pasu e,” oluk opogu legesa. 4Asogo epegesema, at Yesus en is enebabut enagat ’balegeitik e, disogo egei,
“His honogola en wene wiak a’ge oborogu legep ai nopaget. 5An en ap yu wene mo’gulom e, wene se ’gela’ge re, ’ge epegep.
Hat wiak taga legen a’ge ano arat erlagapsogo ukpegi o, oluk mo’gulegis ai se a’ge ’gela’ge mo’gulegis epegep a? Ye, at e,
Hebe inoroguntik lak o, oluk mo’gulom nak e, se ’gela’ge epegep a. Erlak o. Hebe inoroguntik lak, oluk mo’gulomma re, e’ginat o. 6E’gin a’geat de, an abat daklau wegi ai, ’gwiangma yema welat aphwami di wiak yu wiak togwi a’ge an enat erlagapsogo ukpasu lemagoluk Allah en eiye taknebesi ai pobirak nebagup en,” oluk, ap e’gik oyuk soborak a’ge ano disogo mo’gulesi,
“Hebe inoroguntik, hegerlis demogo nogo ese legen a’ge yu horloluk howi pam lak o,” oluk perakpesi. 7Perakpesimu, ap ano inagarik owi pam laga. 8Asogo tegeimu re, is aphwami ebano enil hegesarik onogorlok a’bik agarik e,
“Allah en disogo togu lemagoluk aphwami a’ge edikpesimu ai nogorlok e,” oluk, Allah erliktigisa.
Yesus en Matius yo’go pesi wene
(Markus 2:13-17; Lukas 5:27-32)
9At Yesus o eba ukpoluk lasulat, ap mesik onuk Matius, kantor uang pemerintah a’ge paget ’gonu oluk wogumu ebano hweriogo oruakma, il holuk,
“Ne’berlik suk o,” oluk mo’gulesimu re, inagarik e, e’berlik laga. 10#Luk. 15:1,2Lagarik, at owi pam Yesus e’birek ’gwigisarik so’boru nouwogoluk hweriogo oruakma re, is ap uang pemerintah paget ’gonu oluk wogu legesa a’ge emin, is pema wiak til no’gu legesa a’ge emin, esanat ’gu egesarik, at Yesus ebe emin, osi iak wogu legesa a’ge ebano eminat mesikmu huregesarik so’boru no’gu legesa. 11Asogo no’gwi oruakma, is ap Farisi a’ge en enil ’gwelagontoluk e, is ap Yesus iak wogu legesa a’ge ebano disogo mo’gulentigisa,
“His honue wene mo’gulhentasu a’ge ai, is ap uang pemerintah paget ’gonu oluk wogwi a’ge emin, is pema wiak til no’gwi a’ge emin, so’boru mesikmu no’gwi yu re, nopaget,” oluk mo’gulentigisa. 12Asogo mo’gulentigisema, at Yesus esa’go hwelegeirik e, disogo mo’gulentesi,
“Is aphwami logon enebam op welat ou erlak a’ge, dokter lak en ou obabonobuagoluk yo’go onobo no? Erlak o. We, enebam ou oruak holugat dokter lak yo’go onobo yo. 13#Mat. 12:7; Hos. 6:6Allah iak mesik disogo egei,
An Allah nogola re, aphwami en onuam watnogwi ai re, nebit o. We, is aphwami logon enedeabonobogulom ai re, nagai o,
oluk egei wene ai pobirak pei lit o. An wegi ai re, aphwami enebabut op togwi a’ge yo’go enebaigoluk wegi erlak o. We, enebabut wiak togwi a’geat yo’go enebaigoluk wegi o,” oluk mo’gulentesi.
Se’ban uogoluk so’boru ’bonuk welagai wene
(Markus 2:18-22; Lukas 5:33-39)
14Asogo mo’gulentesirik e’berlik e, is Yohanes osi iak wogu legesa a’ge ebano Yesus e’bek wegesarik e, disogo mo’gulegisa,
“Nis emin, is ap Farisi a’ge emin, se’ban nin hwedik nan hwedik uogoluk, so’boru ’bonuk welege a’geat de, is ap hat hiak wogwi a’ge yema nak e, asogo togwi erlak ai nopaget,” oluk mo’gulegisa. 15Asogo mo’gulegisema re, at Yesus en e, disogo mo’gulentesi,
“Ap mesik ugwe wogogulat e, at arilak orokhwi eneminat welat e, is onogola wik-wiaksogo wolom no? Erlak o. Asogo a’geat de, arilak orokhwi onoboluk, ap ai woluk lo a’ge agauwa oruagat o. Asogo woluk loma nak e, is ai agauwa mesik so’boru no erlakma en ’bonuk welat se’ban ogwi modogat welema o,” oluk mo’gulentesi. 16Asogo mo’gulentesirik, mesik disogo mo’gulentesi,
“Aphwami en, sum naduk ’buktogwi a’ge derlep oso holuk, kain ’get a’ge pam serleben tumo, pobuk kain ’get a’ge ai dorlo’gok hai louwarik e, sum ai lokneat hi toluk louwa o. 17Ai ’gela’ge, aphwami en anggur e’gen ’berelogo a’bosu ’get a’ge ik e’be domba wam agap a’ge page heli’gogo pogwi a’ge ogola na’gogo pogwi erlak. Asogo na’gogo pogwi holuk e, ik e’be ai sup eselat e, anggur e’gen a’bosu ai ’gwesalogo alemat agalat, ik e’be ai harloksogo alemat agalat, tuano. Asogo tuano oluk e, anggur e’gen a’bosu ’get a’ge holuk e, ik e’be ’get hele’gik a’ge pam holugat ogola na’gu o. Asogo na’gumu re, ’biren akhoat op wolom o,” oluk, mo’gulentesi.
Yesus en Yairus agalogo emin, hwe mesik emin,
ou obabenebegei wene
(Markus 5:21-43; Lukas 8:40-56)
18Asogo mo’gulentasuam, ap mesik o ap Yahudi a’ge se’ban ogumu ebano eiye welat ’gain welaga a’ge ai Yesus e’bek wagarik, odogorlu pam welat disogo mo’gulesi,
“An nagalogo yogodak yayat waraga a’ge re, hat en he’gik tenhai lagunmu re, elaluk emarik se ema o, oluk yo’go hobou wegi o,” oluk mo’gulesi. 19Asogo mo’gulesimu re, at Yesus ebe emin, ap ano emin, is ap Yesus iak wogu legesa a’ge ebano emin, enemin ’berlegat legesa. 20-21Lagaimu re, hwe mesik emep lasu modok oruakhwe 12 tahun tegei a’ge, ene’berlik lasulat ogola en e,
“Yesus ai osum ne’gik tenhaikmu re, nemep ’garok ua o,” oluk, Yesus osum ologun nak e’gik tenhesi. 22E’gik tenhesimu re, at Yesus en orogole edenogo il o’borl akhit ’gwelakholuk e, disogo mo’gulesi,
“Nagalogo yo! Hogola hagai hemen o. Hede nebam he’berik pegen ai en op e’gen o,” oluk, osokhwe erianoat, hwe ano arat op aga. 23Asogo til-til e, at ap ’gain Yesus yo’go waga a’ge ano owi pam legesa ’gal e, aphwami lo’gu marogulat ’bi’gong worogwi a’ge worogulat, lo’gu ngai-wai a’bik ogulat, ogumu il yerentesirik e, 24disogo mo’gulentesi,
“Hwele ai warom erlak. We, nogoso yo. Holuk e, lebemis o,” oluk mo’gulentesimu re, is aphwami a’bik ebano en e, eidarak pegesa. 25Eidarak pegesema re, enebe lebigonoboluk e, hwele ano oruakma ebano ’gwi lagarik e’gik tenakho edikpesimu elaluk aga. 26Asogo tegeimu re,
“Yesus en tegei o,” oluk, o do’go ’berlek ebano obok modok saga egei.
Yesus en ap enebe ’biren enil hopnik a’ge
dektak enebesi wene
27At Yesus o eba en lasumu ap enebe ’biren enil hopnik a’ge e’berlik lagalat eniak loksogoat disogo mo’gulegisa,
“At Daud en dogo’gwe a’ge nue o! Hedeapnenebemen o,” oluk mo’gulegisa. 28Asogo mo’gulegisema re, at Yesus ebe olema ’goluk oruakma, is ap enebe ’biren enil hopnik a’ge erianoat e’bek wegesa. Wegesema re, at Yesus en e, disogo mo’gulentesi,
“His honogola en e,
At en elit obapnonobu o, oluk honogola opogu legep a?” oluk mo’gulentesimu re, is en e,
“I o. Nonue. Elirat obapnonobuat opogu lege o,” oluk mo’gulegisa. 29Asogo mo’gulegisema re, at Yesus en enil ano e’gik tenak enebasulat e, disogo mo’gulentesi,
“Henede nebam he’berik pegep hegitsogoat obaphenebaik o. Holuk e, op emit o,” oluk mo’gulentesi. 30Asogo mo’gulentasukhwe erianoat, enil ano deksogo op egesa. Op egesema re, at Yesus iak ningsogoat mo’gulentasulat e,
“An obaphenebegis a’ge yu, aphwami enaluk agoma no oluk e, aphwami mo’gulentagup no yo,” oluk mo’gulentesi. 31Asogo mo’gulentesi a’geat de, ap ’biren eriano en, o ebano at obok sagarak pegesa.
At Yesus en ap mesik iak oso erlak a’ge
iak hweregei wene
32O eba en libagaimu re, is aphwami logon en ap mesik mu’gat ebabut wiak a’ge ogola ’gwegeimu iak erlak modok welaga a’ge Yesus e’bek woluk wegesa. 33Woluk wegesema re, at Yesus en mu’gat ebabut wiak a’ge ap ano ogola ’gwegeirik oruakma henokho lebikpesimu, ap ano iak husogo lasulat e, weneane egei. Asogo tegeimu re, is aphwami a’bik welegesa a’ge ebano en Yesus erliktugulat e, disogo egesa,
“Nis aphwami Israel a’ge mesik en disogo togwiam nenil ontogu lege erlak a’ge nonogorlok o,” oluk erliktigisa. 34#Mat. 10:25; 12:24; Mrk. 3:22; Luk. 11:15Asogo erliktigisa a’geat de, is ap Farisi a’ge ebano en, disogo egesa,
“At Yesus en Iblis osi onue ’gain ano anni pamat, mu’gat ebabut wiak a’ge aphwami onogola ’gwigisarik oruakma henokho lebikpasu yuat de,” oluk egesa.
At Yesus en aphwami edeabenebasulat mo’gulentesi wene
35 #
Mat. 4:23; Mrk. 1:39; Luk. 4:44 At Yesus o seli wei o’gwe lok o’gwe, da ’gwil ya ’gwil, neselat, o se’ban ogwi’gwe ’gwegeirik e, op wene nenaik Allah en eragam enebasu wene ano mo’gulentasulat, di ou yu ou enebam oruak a’ge emin, enanni erlakmaben a’ge emin, obabenebiselat, til denaga laga. 36#Bil. 27:17; 1Raj. 22:17; 2Taw. 18:16; Yeh. 34:5; Mrk. 6:34Asogo tagenebil denagalat e, aphwami a’bik ebano il yerentesirik e,
“Wam domba wam o’gonogwi ’gela’ge, is yema o’gononobu a’ge erlak en yogunat al sagal-’bagalsogo set hoporak no’gwi yema nede e,” oluk edeabenebegei. 37#Luk. 10:2Edeabenebegeitik e, at osi iak wogu legesa a’ge ebano disogo mo’gulentesi,
“E’gen egeik a’bik oruak a’geat de, aphwami e’gen ebe ’balu a’ge enebe weiyat o. 38Ai en e, ap iabuk Eiye a’ge ano en aphwami e’gen ’balu a’ge logon peragonobouwagoluk, at yo’go pogu lomup o,” oluk mo’gulentesi.
Currently Selected:
Matius 9: Wul
Highlight
Copy
Compare
Share
Want to have your highlights saved across all your devices? Sign up or sign in
