Matius 23
23
“Is ap Allah iak pelal wogo eiye a’ge emin, ap Farisi a’ge emin, enebabut wokho togu lorogup o,” oluk mo’gulentesi wene
(Markus 12:38-40; Lukas 11:37-54; 20:45-47)
1At Yesus en asogo mo’gulentesirik e, pobuk aphwami a’bik odoktak welegesa a’ge ebano emin, at iak wogu legesa a’ge emin, enemin disogo mo’gulentesi,
2“Is ap Allah iak pelal wogo eiye a’ge emin, is ap Farisi a’ge emin, enemin en e, at Musa en wene Allah en nenesa’go weregei wene ano mo’gulentasu laga ai ’gela’ge, ebalema re, is en mo’gulhontogwi ai en e, 3is en di a’ge yu a’ge tuagoluk mo’gulhontogwi holuk e, aiat tenak welat togu lemis o. A’geat de, is togwi erlak welat, is en e,
His nak tit o, oluk mo’gulhontogwi ai re, is togwi ai ’gela’ge enebabut wokho togu lorogup o. 4Sum a’ge e’gin a’ge herle hetsogo onu’gwarek ene’gik tenho erlak welat aphwami agaikhen enemarlo pam wouwagoluk mo’gulontogwi ai ’gela’ge, is ai en onu’gwarek tenhogwi erlak welat en de, is nin pema nak tuagoluk wene e’gin a’ge enebam pogwi ai o. 5#Bil. 15:38; Ula. 6:8; Mat. 6:1Is en di bele yu bele togwi ai ’berlegat e,
Aphwami en yetnentarok welemak, oluk, onogola opogulat togwi o. Is en e,
Se’ban eselegi, oluk, Allah iak suesi’ga pam pelal wokho ene’berli pam lo’bok togwi a’ge ano, is en loksogo lo’bok tugulat, sum o’borlma a’ge mu a’geat ’buktak a’ge ano, is en sum ogorluk yatsogo ikho ’buktugulat, 6ye, aphwami seni lok sakho no’gumu, is ap ’gain huragaimu eba ’golokho huragalat, o aphwami Yahudi a’ge se’ban ogumu eba ’burlmu ’golokho hutla ’gugulat, 7aphwami en,
Guru naik, oluk hau waronobogulat, pasar o’go wogumu eba aphwami en eniak sakhosogo mo’gulontogulat, togu lemagoluk eba lagalat, asogo tugukhwe wolom enagai en welagai o. 8A’geat de, his henaik e, guru wene mo’gulhentasu a’ge mesigat nak oruak ai en, henarilak honorokhwi henemin hegit holuk, is pema en,
Guru nue, oluk mo’gulhontogwi modok erlak o. 9Ye, henaik ’gain ’bogorl pam a’ge mesigat welago ai en e, ap ’gwiangma a’ge mesik mo’guleselat e,
Naik, oluk mo’gulom modok mia o. 10Ye, honue wene henesa’go weriso re, an Kristus nomuat holuk e, is aphwami pema en,
’Gain nue, oluk, his mo’gulhonto modok mia o. 11#Mat. 20:26,27; Mrk. 9:35; 10:43,44; Luk. 22:26Holuk e, his ya sa en mesik ’gain oruak holuk, at ai re, heneragam a’geat emak o. 12#Luk. 14:11; 18:14Ap sa u’gwarek en,
An ’gain o, oluk inema holuk e, Allah en ebe sebelogo eneragam pouwa o. Ye, at ap sa u’gwarek en is pema eneragam ’gela’ge welema holuk e, Allah en ebe logo pouwa o,” oluk mo’gulentesi.
13Asogo mo’gulentesirik e, is Allah iak pelal wogo eiye a’ge emin, is ap Farisi a’ge emin, enemin disogo mo’gulentesi,
“His ap Allah iak pelal wogo eiye a’ge yu emin, his Farisi a’ge yu emin, henagap pam nak op ’gela’ge welat henede ’biren a’ge yema re! His ai aphwami Allah eragam ’guano oluk e, his enat ’goduk larogu legep yema re! His honu’gwarek ’gogwi erlak welat e, is pema ’guogoluk tugumu, his en e,
’Gogup no yo, oluk wene ’balugu legep yema re! [ 14His ap Allah iak pelal wogo eiye a’ge emin, his ap Farisi a’ge emin, henagap pam en nak op ’gela’ge henede ’biren yu re! Allah en wiagaphonobua o. His e, hwami sugwe a’ge onowi werik emin, ena’ge emin, sebelhorlogularat de, aphwami en, enesa’go holugulat,
Is ai op, oluk opou wagoluk se’ban yat wiak litil laga legep ai asogo togwi erlak wellepma re, Allah en wene weiyat henebam poluk wellep. A’ge re, asogo togu legep ai en, wene e’gin a’ge henebam poluk wiagaphonobua o.] 15His ap Allah iak pelal wogo eiye a’ge yu emin, his ap Farisi a’ge yu emin, henagap pam nak e, op ’gela’ge welat henede ’biren yema re! His heniak wogu lemagoluk aphwami heraenebil, ik laut lok ye’gelak etle akhit libagalat, o di owi yu owi lagalat, no’gu legep a’ge ai, Allah en wene his henebam poluk odouk orloukmu eba honobouwa ai ’gela’ge, is his heniak hologwi a’ge ai Allah en wene asogoat ’birenamsogo enebam pou wagoluk togu legep ai en, wiagaphonobua o. 16Aphwami enil hopnik a’ge en is pema mo’gulontogulat,
Ebela ’go yu louwok! oluk u ’gela’ge, his en e,
Allah owi werik onuk ho’buk ’balogup holuk, ai re, se ’gela’ge o. A’geat de, emas Allah owi werikmu oruak a’ge ai nak e, onuk ho’buk ’balumu re, demat sogwi aga lema erlak o, oluk mo’gulontogu legep ai dagansogo togu legep ai en, wiagaphonobua o! 17Henede modok erlak welat henil hopnik yema re! ’Ge a’ge logo epegep. Emas ai a’ge logo epegep a? Allah owi werik ai en, emas ai a’ge Allah ebaget pegesa a’ge, oluk, owi werik ai logo epegep a. 18His en e, wene mesik yu ogu legep,
Allah owi werikmu di a’ge yu a’ge e delak pam Allah akhit pogumu eba, ebale onuk ho’buk ’balogwi holuk e, se ’gela’ge o. A’ge re, Allah ebe akhit pogwi ai a’ge onuk ho’buk ’balogwi holuk nak e, sogwi aga lema erlak o, oluk mo’gulontogu legep ai dagansogoat ogu legep o! 19Ye, henil modok hopnik yema re! Di a’ge yu a’ge Allah akhit pogwi ai logo epegep a? Ye, at e, di a’ge yu a’ge e delak ai pam pogwi ai en, Allah en a’geat o, oluk, ogwi ai en, e ai logo ’gela’ge epegep a? 20At ap sa en, e delak pam di a’ge yu a’ge Allah akhit pugumu eba onuk ho’buk ’baliso holuk e, e delak ebe ai emin, di a’ge yu a’ge ebam pogwi a’ge ai emin, la’buksogo onuk ho’buk ’baliso yo. 21Ye, at ap sa en Allah owi werik ai onuk ho’buk ’baliso holuk e, o werik ai emin, Allah ebe o werik eiye welago a’ge ai emin, eneminat onuk ho’buk ’baliso yo. 22#Yes. 66:1; Mat. 5:34Ye, at ap sa en ’bogorl onuk ho’buk ’baliso holuk e, Allah ’gain welagoma ebale ai emin, at ebe emin, eneminat onuk ho’buk ’baliso yo. His dagansogo togu legep ai en Allah en wiagaphonobua o.
23 #
Ima. 27:30
Ye, his ap Allah iak pelal wogo eiye a’ge emin, his ap Farisi a’ge emin, henagap pam nak op ’gela’ge welat henede ’biren yema re! Allah paget tugulom a’ge logo ’gela’ge re, aphwami akhen enebaget hegitsogo togwi ai emin, aphwami pema enede hwedik welagai ai emin, enebabut orlonutak welagai ai emin, oruakhweat de, asogo on e, togwi erlak welat en de, his en ’be’ga ’gela’ge emin, hedit ’gela’ge emin, serei e’gela ’gela’ge emin, wenakho 10 pam lau wago holuk, mesik ’gegilogo Allah akhit pogu legep ai po a’geat oruakhweat de, wene ebe abel pam a’ge ai op togu legep a’geat de, wene logo a’ge togwi erlak ukpogu legep ai nak e, dagansogo togu legep o! 24Aphwami enil hopnik a’ge en e, is nin pema mo’gulontogulat e,
Ebela ’go yu louwok, oluk u ’gela’ge, his en e, elaluk a’ge wei a’ge ik na’gogo pogumu eba ogola ’goluk oruakma enagat holuk lebikpogu legep a’geat de, wam unta lok a’ge heniak opsogo sagalogwi erlak ebesik ’bil hogu legep ai paget, Allah en wiagaphonobua o.
25His ap Allah iak pelal wogo eiye a’ge yu emin, his ap Farisi a’ge emin, henagap pam nak op ’gela’ge welat henede ’biren on yema re! Henegeik e’be emin, hene piring emin, o’borl o’gwe nak e, opsogo emerogu legep a’geat de, ogola’gwe re, aphwami ena’ge yogorlia horlogu legep a’ge ai emin,
An nak woknetlip e, oluk opogu legep ai emin, modok ’betesogo oruak ai nak e, dagansogo togu legep o! 26His ap Farisi a’ge henil modok hopnik a’ge yema re! Henegeik e’be eba ogola’gwe naduk opsogo horit o. Asogo togup holuk e, o’borl o’gwe elirat hosogo louwa o. His dagansogo togu legep ai re, Allah en wiagaphonobua o.
27 #
Per. 23:3
His ap Allah iak pelal wogo eiye a’ge emin, his ap Farisi a’ge emin, henagap pam nak op ’gela’ge henede ’biren a’ge yema re! His e, henebe yu ’gela’ge. Aphwami waragai a’ge ’gwiang ogola salonobogumu eba o’borl o’gwe nak e, modok op a’bosu ’gut a’ge werakhweat de, ogola en, aphwami onuak e’ben sing-sangsogo welago ai ’gela’ge welegep o. 28Ai ’gela’ge, aphwami en his henagap o’borl o’gwe nak e, yethontogwiam obat opogwi a’geat de, henede ’biren welat, honogola re, di wiak yu wiak togu legep a’ge ai a’ge modok ’beterak welegep ai paget Allah en wiagaphonobua o!
At Yesus en, “Is ap Allah iak pelal wogo eiye a’ge emin, ap Farisi a’ge emin, wene enebam pouwa o,” oluk mo’gulentesi wene
29His ap Allah iak pelal wogo eiye a’ge emin, his ap Farisi a’ge emin, henagap pam nak op ’gela’ge henede ’biren a’ge yema re! His en e, ap naduk Allah iak mo’gulontogu legesa a’ge enebe werak salenebigisema o’borl pam o wusogo pogulat, is ap naduk enebabut hegitsogo togu legesa a’ge werak selagonoboluk aphwami pema onogola eberak welemagoluk hele’ga wogu legesema pobuk ebano wogulat, his en e,
30Nis nenebe yu re, is nena’bu nene’balak naduk welegesa eria nenemin wolloma re, nis nenemin en e, is ap Allah iak mo’gulontogu legesa a’ge ai waronobolu erlak o, oluk, 31honu’gwarek en ogu legep ai,
Nis nenebe re, is ap pageat Allah iak mo’gulontogu legesa a’ge nis nena’bu nene’balak en warenebegisa ai en dogo’gwe a’ge welege o, oluk u ’gela’geat ogu legep o. 32Holuk e, hena’bu hene’balak edipmu en togu legesa ai ’gela’ge, his ologunmu a’ge ogo asogoat togu lorogupmu re! 33#Mat. 3:7; 12:34; Luk. 3:7His ’gosu en dogo’gwe a’ge henebe ’gosuat welegep yema re! Aphwami Allah en wene enebam poluk odouk orloukmu peragonoboma, his hweiye liborogup no? Mia o. 34Holuk e, henesa’go opsogo hwelit o. An en ap Allah iak mo’gulontogwi a’ge emin, onogola ’gagalak a’ge emin, Allah iak pelal wogo eiye a’ge emin, peragonobou weik a’ge ai, his en pema akhit e pam edigonoboluk waronobogulat, pema akhit o his se’ban ogu legep o’gwe ’goluk ’go’bu wik-wiaksogo waronobogulat, nin pema akhit mukho-makho o kota mesik en o kota agaikhen peragonobogulat, tagenebagup ani o. 35#Kej. 4:8; 2Taw. 24:20-21Ye, ai holuk e, is ap enebabut hegitsogo togu legesa a’ge, mebapsogo warenebil wegesa ai, hwerli edip Habel ebabut hegitsogo taga laga a’ge ue en weregei ai pam en ’bekhit, hwerli ologun pam, at Berekia omlogo Zakharia ai Allah owi werik ho’gorlakma, Allah uam wusogo odouk narlogu legesema ho’gorlakma, ’burlmu werigep ai hwerli, is ’berlegat enemep his henebam lo’bok hene’gik pam oruak o. 36Ye, his yogodak welegep a’ge yu re, wene yu ’berlegat hisat henebam e’gin welema o, oluk, demat mo’gulhentegis o,” oluk mo’gulentesi.
At Yesus en aphwami o Yerusalem a’ge edeabenebegei wene
(Lukas 13:34-35)
37At Yesus en asogo mo’gulentesirik e, mesik disogo mo’gulentesi,
“Eige! His aphwami o Yerusalem a’ge yu nede o! His enat ap Allah iak mo’gulontogwi a’ge enebe waronobogulat, ap Allah en yo’go onoboluk peragonobou wago a’ge helep en damuk-demaksogo waronobogulat, togu legep ai nede o! Sue ayam olu agapsaburl lekho odoksogo enebasu ai ’gela’ge, an en nin hwedik nan hwedik his o yema welegep a’ge ’berlegat asogo odoksogo henebaigoluk epasu legi a’geat de, his en,
Nenebit, ogu legep ai, nede o. 38#Yer. 22:5Ai en e, Allah en his henebe ukhonobouema, honowi werik a’ge ai polugat welema o. 39#Mzm. 118:26Ye, hwerli yogodak ya hwerli en e, an nebe henil nio erlak woloroguptik e, pobuk his en e,
Nenaik ’gain Onuk Logo a’ge Allah en perakhobou wagama wegenma re, at en obaphobuak o,
oluk pobuk mo’gulnorogup ano hwerli henil niagup ani o,” oluk mo’gulentesi.
Currently Selected:
Matius 23: Wul
Highlight
Copy
Compare
Share
Want to have your highlights saved across all your devices? Sign up or sign in
