Matius 2
2
Is ap hwesagal enil woluk wegesa wene
1At Yesus ano, o propinsi Yudea o Betlehem dagaga. Dagaga eria hegit e, o eba ’gain onuk logo a’ge, ap onuk Herodes ai welaga. Oruakma re, is ap enede ’gagalak welat hwesagal pobi togu legesa a’ge ebano mo edip wago eba hegit en o Yerusalem wegesa. 2Wegesarik is en e, disogo egesa,
“Ap Yahudi a’ge onue ’gain onuk logo a’ge dagagarik oruak ano, o ’geba dagagarik oruak o? Nis o mo edip wago eba hegit en eba oruakma, ap ’gain ano dagaga oluk, hwesagal mesik hebarligen agama re, ap ebe erliktuogoluk hwesagal ai nenil en woluk hin wau wege o,” oluk egesa.
3Egesema re, at ’gain Herodes ano esa’go hwelegeitik e, at emin, aphwami o Yerusalem a’ge ebano emin, enede erlak aga. 4Enede erlak agarik e, at ’gain Herodes ano en e, is ap Allah eiye onuelak ’gain ’gain ebano emin, Allah iak pelal wogo eiye a’ge emin, mesikmu odoksogo enebesirik e,
“At Kristus ai, o ’geba dagema oluk opogu legep?” oluk hin wesi. 5Hin wesimu, is en e,
“O Betlehem propinsi Yudea ebayat o. Eba dagema, oluk, is ap Allah wene mo’gulontogu legesa a’ge ebano en ogulat e,
6 #
Mik. 5:2
His ap Yudea o Betlehem welegep a’ge yu logwe! o seli pema yema onuk oruakhweat de, o Betlehem yu nak e, onuk erlak, abel pam ’gela’ge, oluk u re, erlak o. An neiyagai Israel a’ge ap ’gain a’ge eragam welema a’ge ano, o seli his oruakma yema hene’gerlakma en dagema o.
oluk pelal wokho pegesema oruak o,” oluk egesa. 7Oluk egesema re, at Herodes ano en, is ap hwesagal pobirak poluk enil en woluk wegesa a’ge ebano worlentesirik hisakho mo’gulentasulat e,
“Metnerlige hwesagal ai hebarligen aga? Dokhumsogoat mo’gulnemis o,” oluk pobuk hin enebam wesi. 8Wesimu is en,
“Disogo yo,” oluk mo’gulegisema re, at en e,
“Holuk e, yogodak ya his en o Betlehem eba lit o. Laguptik e, malik dagagarik oruak ai opsogo heratip o. Arat hwiaroguptik e, ebe an erliktik en mo’gulnosu manup o,” oluk mo’gulentesi. 9Mo’gulentesimu enesa’go hweligisarik e, mo edip wago eba hegit en hwesagal hebarligen agama enil hegesa a’ge ano naduk lagaihwe re, e’berlik enil en woluk legesa. Enil en woluk legesa-legesa, hwesagal ano malik dagagarik welaga hegitsogo lagarik e, eriano duk egei. 10Asogo duk egeimu is ebano hwesagal ano enil holuk, onogola enagai a’bik hegesa. 11Onogola enagai a’bik hegesarik e, olema ’gwi legesa. ’Gwi legesarik malik ano ia Maria ogo pam oruakma enil holuk, ondogorlu pam hweriogo welat erliktigisa. Erliktugulat e, di a’ge yu a’ge op a’ge emas emin, kemenyan ’gami e’ben a’ge ’gela’ge ano emin, e mur a’bosu emin, hebilogo wogegisa. 12Wogegisarik nogogumu at Allah en e,
“His pobuk wegep o’gwe Herodes e’bek lagup o,” oluk hwese’bi ’gela’ge enabi pam mo’gulentesimu, ebela mu’gwe toluk onowi pam legesa.
Yesus dogo woluk hweiye o Mesir legesa wene
13Is ap hwesagal enil woluk wegesa a’ge ebano arat legesema re, huba’go nogogumu malaikat Allah en a’ge ’bogorl pam en wagarik e, Yusuf abi pam mo’guleselat e,
“Yusuf. Hat e, malik dogo ai ia e’birek wogonoboluk, o Mesir eba hweiye lak o. Laguntik e, ebayat wolomup o. Oruakma, an en worlhentasu holuk en de, manup o. At ’gain Herodes ano en malik dogo ai werigoluk oso ai o,” oluk mo’gulosoma abi hesi. 14Abi holuk elaluk agarik e, huba’go emalik ’get dogo ano ia e’birek wogonoboluk o Mesir laga. 15#Hos. 11:1Lagarik ebayat modok oruakma ’gain Herodes ano ebe waragama en de, togolik waga. Ai tegei ai re, is ap Allah iak mo’gulontogu legesa a’ge mesik en e,
“An nomlogo o Mesir eba en wemagoluk worlhegi o,”
oluk Allah en egeimu pelal wokho pesi ano hegitsogoat emagoluk tegei ai o.
O Betlehem malik ’get dogo a’ge warenebegisa wene
16At ’gain Herodes ano en, is ap ebano enemin wene ’baligisa a’ge ano,
“Wema ya? Erlak a,” oluk, yerentarok welaga-welaga re, enebe erlak en e, at en,
“Lalnebegisema hegi o,” oluk olot het a’bik aga. Olot het a’bik agarik e,
“Malik ’get dogo a’ge o Betlehem eba a’ge emin, o eragam o’gwe a’ge emin, hwerli ap hwesagal enil en woluk wegesa a’ge,
Ai hwerli pam hege o, oluk dokhumsogo mo’gulnegisa hwerli en, umur 2 tahun a’ge emin, pobuk dagegesa a’ge emin, ap holuk ’berlegat warenebip o,” oluk, osi peragenebesi.
17Asogo tigisa ai re, at Yeremia Allah iak mo’gulentasu laga a’ge ano en eselat e,
18 #
Yer. 31:15
“O Rama en lo’gu marugumu nenesa’go holugulat, eniak ngai-wai a’bik ogumu nenesa’go holugulat, tige o.
Hwe Rahel ano emalik enebe erlak en enebaget nge a’bik tagalat,
Nede sebelu puk ai nebit e. Nge tago modok weleik o,”
oluk egeimu pelal wokho pesi a’ge ai hegitsogoat emagoluk tigisa ai o.
Yesus dogo woluk o Nazaret waga wene
19At ’gain Herodes ano arat waragama re, malaikat Allah en a’ge ’bogorl pam en perakpou wagama wagarik e, Yusuf o Mesir eba welat nogosoma huba’go abi pam, disogo mo’gulesi,
20“Yusuf. Helaluk emen o. Inoroguntik e, malik dogo ai ia e’birek wogonoboluk o ap Israel a’ge oruakma lak o. Malik dogo ai woruogoluk ogu legesa a’ge ano re, ebe arat waraga o,” oluk mo’gulesi. 21Mo’gulesimu re, Yusuf en malik dogo ano ia e’birek wogonoboluk ap Israel a’ge oruakma togolik waga. 22Wagama re, is aphwami en e,
“O propinsi Yudea ebano pobuk ’gain e, ap onuk Arkhelaus ai aik Herodes ebalema ’gain onuk logo a’ge edikpegesema oruak o,” oluk egesema, Yusuf esa’go hwelegeitik e, o eba lo ogorlok agarik oruakma, at Allah en,
“O Yudea eba lagun o,” oluk, abi pam hwese’bi mo’gulesimu, o Galilea ebayat waga. 23#Mrk. 1:24; Luk. 2:39; Yoh. 1:45Wagarik e, o seli onuk Nazaret ai ’gu egesarik e, ebayat mo egesa. Asogo tegei ai re, is ap Allah iak mo’gulontogu legesa a’ge en ogulat e,
“At ap ano owi Nazaret a’ge ua o,”
oluk egesa hegitsogoat aga ai o.
Currently Selected:
Matius 2: Wul
Highlight
Share
Copy
Want to have your highlights saved across all your devices? Sign up or sign in