Imamat 8
8
Harun eiyagai enemin Allah eiye welemagoluk ena’gul sebelogo edik enebesi wene
1At Allah en Musa mo’guleselat,
2“Hat en ap an nebe eiye a’ge onosum ’buktogwi a’ge wik-wok edikpasulat, a’bosu herlelik panogoluk wasulat, onowiak erlagapsogo onobouwagoluk, nebaget wusogo woknoum a’ge ierak a’ge mesik wasulat, domba ierak a’ge ’birenakho wasulat, oroti ragi periso erlak a’ge pam worogo a’ge mul sum pam yagarak oruak a’ge ano wasulat, takpoluk, ap Harun eiyagai enemin wogonoboluk, 3Is aphwami Israel a’ge ’berlegat enemin la hwedik togumu ebano nowi sabo sum a’ge werik yel ’berla pam eria odoktumak oluk, mo’gulontomup o.
4Mo’gulesimu, at Musa en Allah mo’gulesi ano hegitsogoat at Allah eiyagai Israel a’ge ’berlegat Allah emin hwedik togumu owi sabo sum a’ge werik yel’berla pam erianoat odoktagenebesi. 5Odoktagenebesirik, disogo mo’gulentesi, An yogodak taga legi yu re, At Allah en at asogoat tip o, oluk mo’gulnesimuat taga legi ai o, oluk,
6Mo’gulentesirik, Harun eiyagai enemin wemagoluk worlentasuam eragam wagaiam e, ik pam emesogo horak enebesirik, 7sum o’borl o’gwe a’ge baju yat a’ge ano Harun ’buktak ebasulat, ’bagaluk ebagase pam wantak ebasulat, sum o’borlma yat a’ge ’buktak ebasulat, Sum ebagase herle ’bagaluk ’buktu a’ge onuk efod ano ’buktak poluk, Kain il op a’ge pam egesik efod ano ebagase pam ’bagaluk wantak pasulat, tegei. 8Asogo tegeitik, sum emeik sebelogo egesik a’ge ’gela’ge emik pam ’buktagalat, Allah ede epasu a’ge enaluk om a’ge onuk e, Urim Tumim e’birek emin lo’boksogo pesi. 9Lo’boksogo poluk, sum Harun a’ge a’gul pam ’buktak pasu lagarik, Allah ebaget degelak onogorloksogo yethogu lemagoluk, besi emas pam Melei ’gela’ge hele’gik a’ge ano a’gul pam erla’gulik pesi. Asogo tegei ano re, Allah en Musa mo’gulesi ano ’gela’geat tegei.
10Asogo takpesirik, Musa en ap edigonobogulat, a’bosu herlelik onobogwi a’ge ne’gak a’ge ano wesirik, Allah ebaget odoksogo welemagoluk owi sabo werik a’ge pam emin, owi sabo werik a’ge ogola di a’ge yu a’ge oruak a’ge ebano pam emin, ’berlegat a’bosu herlilogo pil laga. 11Herlilogo pil lagarik, Allah ebaget wusogo odouk narlogumu emin, odouk narlogulat di a’ge yu a’ge tugumu emin, ene’gik emerogwi a’ge sogoluak ebe pam emin, edip-edip hweriogo pogumu emin ’berlegat ebaget polik welemagoluk, agauwa 7 pam a’bosu herlilogo pesi. 12Helilogo pesirik, Harun ano Allah paget polik welemagoluk, a’bosu ne’gak a’ge ano ado wokho Harun a’gul pam herlelik pesi. 13Herlelik pesirik, Harun eiyagai ano eragam onobou wagarik, at Allah en Musa mo’gulesi ano ’gela’geat onosum o’borlma a’ge baju ’buk tago a’ge yat a’ge ano ’buktak pasulat, ’bagaluk enebagase pam wantak enebasulat, ebam a’ge ena’gul pam ’buk tagenebasulat, tegei.
14Asogo takpesirik, onowiak erlagapsogo onobouwagoluk, sapi ierak woru a’ge ano woluk wemagoluk, mo’gulentesimu woluk wagaiam e, Harun eiyagai enemin en sapi ano a’gul pam ene’gik sebelak poluk, oruakhwe, 15at Musa en sapi ano wusogo poluk, odouk narlogumu ebano Allah paget modok, poligat welemagoluk emep ado e’gik pam wokho Allah ebaget wusogo odouk narlogumu e uak daintak a’ge ologun-ologun ogwe egelik pil lagarik, emep ano ’berlegat Allah ebaget wusogo odouk narlogumu eragam herlilogo pesi. Asogo tegei ano re, Allah paget wusogo odouk narlogumu ebano Allah en aphwami onowiak erlagapsogo pasu lemagoluk ebagerat takpesi. 16Asogo takpesirik, sapi werak a’ge ano olot pam a’ge orogolin emin, ede pam a’ge omorli emin, amua’ge emin a’ge esei emin, ’berlegat wesirik, odouk narlogumu ebano odouk narlik pesi a’geat de, 17sapi ierak ebe emin, agap emin, olot emin, ano re, woluk at Allah en Musa mo’gulesi a’ge ano ’gela’geat pakleget wogoma o’borlma eba odouk narlik pei laga.
18Asogo takpoluk, domba ierak a’ge Allah paget wusogo odouk narlu a’ge ano mesik woluk wagarik, Harun eiyagai enemin en domba a’gul ene’gik tenak poluk oruakhwe, 19Musa en werak pesirik emep wokho Allah ebaget wusogo odouk narlogumu ologun pema-pema emde le’gik ’belak e lo’boktak a’ge pam ’berlegat egelik pil laga. 20Egelik pil lagarik, domba ano ’balogo a’gul emin, ebe ’belakpoluk a’gul emin, ebe ebelak emin, esei emin odouk narlogumu pil lagarik, 21olot emin, owi ’belak a’ge emin, ik pam horak poluk, ebe ’belak a’ge ano emin, ’berlegat Allah paget wusogo odouk narlogwi a’ge ano a’geatma re, oluk odouk narlegei. Ai tegei ai re, Allah en Musa mo’gulesi a’ge ano hegitsogoat, at Allah ebaget wusogo odouk narlogumu e’ben op hogulat, onogola enagai houwagoluk, togwi a’ge ano re, aiat tegei o.
22Asogo takpoluk, at Musa en ap Allah eiye a’ge edigonobogulat, domba ierak a’ge worogumu re, woruogoluk, pou waga a’ge are ano wik-wok Musa wogosu egesema, ap Harun eiyagai enemin en domba ano a’gul ene’gik tenak poluk, oruakhwe, 23At Musa en domba ierak a’ge ano wusogo poluk, emep pema wesirik, ap Harun ano esa’go ologun ’bekhit o’gwe egelik pasulat, e’gik huap ’bekhit o’gwe en egilogo pasulat, oyuk huap ’bekhit akhit egilogo pasulat, tegei.
24Asogo takpoluk, ap Harun eiyagai ebano eragam onobou wagarik, domba emep pema wokho enesa’go ede’bi ’bekhit akhit o’gwe egelik pasulat, ado ene’gik huap ’bekhit o’gwe egelik pasulat, onoyuk huap ’bekhit akhit o’gwe egelik pasulat, takpoluk, domba emep ano ’berlegat Allah ebaget wusogo odouk narlogumu ologun-ologun ’berlogo wali ’go-go ’belak emde likho opma ’belak e lo’boktak a’ge ebano petne ’berlegat wetil laga. 25Wetil lagarik, domba esei wasulat, agewak pam a’ge esei wasulat, olot pam a’ge esei wasulat, ede’gen pam lo’boktak a’ge amua’go wasulat, amua’go emin esei emin wasulat oyuk ’bekhit akhit o’gwe wasulat, takpoluk e, 26at Allah ebaget pogwi a’ge roti ragi emin, po erlakma en kue worogo a’ge emin, roti ebelogo worogo a’ge a’bosu emin worogo a’ge ano emin, roti ebak a’ge worogo emin, Sum Mul a’ge pam yagarak oruak a’ge ano mesik nak wokho domba esei emin, oyuk sarak emin, ano pam lo’boktak pesi.
27Asogo takpesirik, ’berlegat wokho ap Harun eiyagai enemin ene’gik pam pesi. Asogo pasuam e, Allah eiye a’ge pulogo edigonobogulat, ’belak ado, yu re, hat hebaget o, oluk, at Allah hwiak ogwi a’ge ano hegitsogo is ano en e, yu re, ’gain honuk logo a’ge hebagerat o, oluk, Allah wogegisema, 28Musa en ene’gikmu oruak a’ge ebano wesirik, domba werak ’belak a’ge odouk narlogumu oruak a’ge ano ebam edikpoluk, emin odouk narlegei. Asogo tegei ano re, ap Allah eiye a’ge edigonobogulat, Allah ebaget wusogo wogogumu e’ben op hasulat, Allah ebaget wusogo odouk narlogwi a’ge anoat tegei. 29Ye, at Allah en ap an nebe eiye a’ge pulogo edigonobogulat, ’belak a’ge ado an Allah nebaget hene’gik ’bilogo woknogu lemak o, oluk, Musa mo’gulesi a’ge ano sogoat tagalat, domba amua’go odogun uak ’belak a’ge ano e’gikmu wesirik, yu re, Allah hebagerat o, oluk, odoksogo pesi. Asogo pesi ano re, Ap Allah eiye a’ge pulogo edik enebasulat, domba ’belak a’ge ano is edikpogwi a’ge eiyerak pagathorlogumu re, at Musa ebaget ’belak a’ge at wesirik, en tegei.
30Ano taga lagarik, ap edigonobogulat, herlelik pogwi a’ge a’bosu mesik wasulat, emep odouk narlogumu oruak a’ge ano mesik wasulat, takpoluk, woluk lagarik ap Harun eiyagai enemin ologun ’goboksogo enebam pasulat, onosum ’buktak a’ge pam pasulat, tegei. Asogo tegei ano re, ap Harun eiyagai enebe emin, onosum emin, Allah ebaget degelagat welemagoluk, tegei.
31Asogo takpoluk, at Musa en ap Harun eiyagai enemin, mo’gulentasulat, Allah en e, ap Harun eiyagai enemin nak no’gulemak o, oluk, mo’gulnesimu re, Allah ebaget ’belak a’ge yu, wik-wok Allah emin hwedik togumu owi Sabo sum owi werikmu yel ’berla pam eria enat sorogu loroguptik, ap Allah eiye a’ge pulogo edigonobogulat, no’gulat tuagoluk, roti mul egeik a’ge ogola yagarak oruak a’ge ano eminat no’gu lomup o. 32Asogo no’gu loroguptik, domba ’belak a’ge emin, so’boru roti emin ado dedil ago holuk e, odougat narlogu lomup o. 33Ye, Allah eiye welemagoluk, edik honobogukhwe o agauwa 7 pamat lalouwama re, ai om erlakhwe, Allah emin hwedik tu agaimu owi werik a’ge ’godukmu eba en liplailo erlakhwe agauwa 7 pamat emak o. 34Nis o yogodak taknonobogwi yu honowiak erlagapsogo poluk, Allah henemin hwedik welat, ebaget tugu lorogup en e, at Allah en asogo tagenebemin o, egei holuk, tagenebasu legi o. 35At Allah en eselat Harun eiyagai enemin warom no oluk, an nemin hwedik togumu nowi werikmu o ’godukmu erlige emin, huba’go emin, eba nak welat, disogo tip o, asogo tip o, oluk, mo’gulentasu a’ge ano opsogo tugukhwe agauwa 7 at emak o, oluk, mo’gulnesimuat mo’gulhentigis o,” oluk, mo’gulentesi. 36Mo’gulentesimu, ap Harun eiyagai enemin en e, Allah en Musa mo’gulesi a’ge ano hegitsogo, ’berlegat tigisa.
Currently Selected:
Imamat 8: Wul
Highlight
Copy
Compare
Share
Want to have your highlights saved across all your devices? Sign up or sign in
