Imamat 7
7
Allah ebaget pogwi a’ge lalogo togulom wene
1Mo’gulesirik, wene mesik at Harun eiyagai enemin mo’gulontouwagoluk, at Allah en Musa mo’guleselat,
“An Henaik ’Gain nonuk logo a’ge en a’ge ai, modok omu poligatma re, lalogo enede en ebet hegeik nak togwi holuk e, erlak emagoluk ebalema poluk, togullomu wene ano re, yuat o.
2Allah ebaget a’ge lalogo tua a’ge ano enede ennak ebet hegeik togwi holuk, erlak emagoluk, ebalema kambing domba woluk woknosu agai ano an nebaget wusogo e narlogumu ebano wusogo poluk, ap an nebe eiye a’ge en emep wokho e narlogumu ano abel-abel ’berlegat wali’gogo mep werak pil louwak o. 3Egilogo-egilogo pil lasukhwe at uam eiye a’ge en ebaget werak a’ge a’ge wak esei emin, al pam a’ge esei emin, 4amua’go e’gen emin esei emin, odogun pam lo’boktak a’ge esei emin, enekho pasuam e, 5ap an nebe eiye a’ge enesei enak a’ge ano e narlogumu ebano an Allah nebaget e narluak o. Asogo togulom ano re, an nebaget a’ge lelak noboluk eberak nak welagai a’ge ano erlak emagoluk, ebalema poluk, nebaget wusogo wokno’gulom ano re aiat o. 6Ye, ebalema poma wolom a’ge ebe ebano ogo re is an nebe eiye a’ge ap holuk nak en no’gulom a’geat de, modok miayatma re, o asua owi mesik polikmu ebano en-nagat no’gulemak o.
7An nebaget a’ge lalonobogwi a’ge eberak welagai a’ge ebano erlak emagoluk ebalema poluk, worogulat togulom a’ge emin, onowiak erlagapsogo pou wagoluk, worogulat, togulom a’ge emin e, ai eminat hegitmu re, onowiak erlagapsogo poluk, Allah emin hwedik tuagoluk, is ap an nebe eiye a’ge ebano enasua uam worogwi ’gela’ge togumu re, ebe werak ai re, is ap an nebe eiye a’ge ena’geat o. 8Ap mesik en an Allah nebaget wusogo odouk narliselat agap nogorlak ebano ap an nebe eiye a’ge ano en ogo horlo op nagat o.
9 Gandum e’gen wogo ule’genma werarogwi a’ge emin, kuali pam sorogwi a’ge emin, sogoluak ebale hele’gik a’ge pam werarogwi a’ge emin, ’berlegat is ap an nebe eiye a’ge en, yu Allah en a’ge o, oluk odoksogo pogumu, pema dedil ago a’ge ebano isat horlogu lemak o. 10Ye, Gandum e’gen wogo an nebaget pouwa a’ge ebano un a’ge emin, a’bosu op a’ge pam worogo a’ge emin, ai Harun eiyagai ena’geatma re, hegitsogoat horlogu lemak, egei uluk mo’gulontomup o,” oluk, mo’gulesi.
Allah emin hwedik wolom a’ge paget, at ebaget poluk togulom wene
11Mo’gulesirik, at Harun eiyagai enemin mo’gulontouwak oluk, at Allah en wene mesik emin Musa mo’guleselat,
“Is aphwami en, Allah emin, hwedik wolomok o, oluk, an Allah nebaget pou wagaiam e, togulom a’ge ano re yuat o. 12An nebaget pou wagai ai re, naik Allah wa oluk mo’gulnemagoluk, an nebaget pou wagaiam, roti ragi po erlakma en a’bosu a’ge pam nak ebel holuk werarogwi a’ge emin, roti ragi emin po erlakma en ebak a’ge worogo poluk, a’bosu ebam egilogo pogwi a’ge emin, gandum e’gen modok opsogo e’gen wogo a’ge a’bosu pam nak opsogo ebelogo kue worogo a’ge emin, an, wa, oluk mo’gulnemagoluk, worogo a’ge ano emin la’bulogo poluk nebaget pou waga lemak o. 13Allah wah, oluk mo’gulnogulat, an nemin hwedik wolomogoluk, an nebaget wusogo woknogulat, roti ragi emin poluk, worogo a’ge ano emin an nebaget pou waga lemak o. 14Roti an nebaget worogo a’ge ano mesigat nak wokho, yu at Allah en a’geat o, oluk, pogu lemarik, an nemin hwedik wolomogoluk nebaget werak a’ge emep ano ap an nebe eiye a’ge en emep wusogo pogumu re, no’gulemagoluk, wogontogu lemak o. 15Ye, Allah wah, oluk mo’gulnogulat, an nemin hwedik wolomogoluk an nebaget werak a’ge ebano ogo, pema pouwa a’ge ebano oruakhwe o dakha osoma no yo. At e, an nebaget pogwi erlige aiat no’gulemak o.
16Wene ho’buk ’balua a’ge ano hegit agoam e, wa oluk mo’gulnogulat, worua ya, enede en o’go erlak we wokneik epasulat holuk wusogo nebaget pouwa ya, ’gwerik ’belak holuk nak e, pogwi ai erligeat no’gulat, pema sono nul a’ge oluk po ai obat a’geat de, 17nebaget werak a’ge ’gwerik ebano oruakhwe, hup ’biren nogoso holuk no erlakma en ’berlegat odouk narlik pogu lemak o, 18’gwerik ’belak ebano, hup ’biren nogoluk, no’gwi holuk, wiagat agoma re, nebaget werak a’ge ano, an wasulat, ye, disogo taknobouwak o, oluk, nebaget pouwa a’ge ebano an en tagenebasulat, tik erlak o. Is onomu enat tak pagathorlouwama re, e’gin e, is aiat enebam welemak o.
19An nebaget werak a’ge ’gwerik ’belak ano hin wo miahweat de hin wogulat holuk e, no mia o. At e, ebesi’gat e narlik pogu lemak o. An nebaget werak a’ge ’gwerik ’belak ano re, di ap yu ap no mia a’ge holuk nak no’gulom op a’geat de,
20An nemin hwedik wolomogoluk, an Allah nebaget werak a’ge ’gorik ’belak ai asua a’ge erlak wiagap poluk en no’gwi holuk nak e, enarilak ene’gerlakma en a’guluak erlagapsogo o’borlma lebikpogu lomok o.
21Ap a, wam a, onogum pam no’gwi a’ge a, onogorlokma re hin wokho mia a’ge ebano ebam oruakhwe ap mesik en hin wokhasu lemarik en, pobuk, Allah emin hwedik weleik o, oluk, an Allah nebaget werak a’ge ’gwerik ’belak a’ge ebano nasu holuk, arilak enegerlakma en a’guluak erlagapsogo o’borlma lebikpogu lemak o egei, oluk mo’gulontomup o,” oluk mo’gulesi.
Esei emin, emep emin, no asua egei wene
22Mo’gulesirik, at Allah en Musa mo’guleselat,
23“Is aphwami Israel a’ge wene mo’gulonto ano re yuat. Lembu sapi emin, kambing domba emin, ’berlegat enesei no’gulom e miayat o. 24Onuam omu warago holuk de a, orlomene en weriso holuk a, eba a’ge esei pam mu a’ge mesik tul opogwi holuk e, obat a’geat de, no’gulom a’ge nage asua o. 25Ap mesik en uam wusogo poluk, esei enekho an Allah nebaget e narliselom a’ge oruakhweat de, nasu holuk, arilak enegerlakma en a’guluak erlagapsogo o’borlma lebikpogu lemak o. 26#Kej. 9:4; Ima. 17:10-14; 19:26; Ula. 12:16,23; 15:23Is di owi yu owi welat, di sue yu sue emin, di a’ge yu a’ge enemep oruak a’ge emin, ’berlegat emep oruak a’ge holuk, no’gulom mia o. 27Ap mesik en emep ano nasu holuk, ap ai arilak ene’gerlakma en o’borlma lebik onobogu lemak o, egei, oluk mo’gulontomup o,” oluk, mo’gulesi.
Allah ebaget werak a’ge pema ap Allah eiye a’ge en no’gulom wene
28Asogo mo’gulesirik, at Allah en Musa mo’guleselat,
29“Is aphwami Israel a’ge wene mo’gulonto ano re yuat o. Ap mesik en, Allah emin hwedik weleik o, oluk, an Allah nebaget wusogo pasulat, pema me’gisogo an Allah nomu nebaget hunsogo nebasu lemak o. 30Di a’ge yu a’ge e narluagoluk, at omu e’gik pam enat an Allah nebaget poumarik, an nebaget werak a’ge esei emin, amua’go odogun emin, e’gikmu wik-wok, yu hat Allah hebaget at o, oluk, ene’gik ’bilogo pogulat togwi a’ge ano a’geat pasu lemak o. 31Pasuam e, ap an nebe eiye a’ge enat esei ebano e narlogumu ebalema ebano e narliselat, amua’go odogun uak ano nak e, Harun eiyagai enemin enebaget pogu lemak o. 32-33Allah emin hwedik wolomok o, oluk, an nebaget wusogo woknogwi a’ge emep ebano werak pil lasulat, ye, emep ebano e narliselat, tago ano re, an nebe eiye a’ge Harun omlogo mesik enat tagoma re, owi pema ’bekhit akhit hwerlirak ano re, ap an nebe eiye a’ge onomu enebageratma re, owi ogorlitak ano Harun omlogo anoat wogogu lemak o. 34Nemin hwedik wolomogoluk, an nebaget wusogo woknogulat, amua’go odogun uak an Allah nil houwagoluk onuk niogwi a’ge emin, owi ’balogo woknogwi a’ge emin, eba re, is aphwami Israel a’ge en ap an nebe eiye a’ge Harun eiyagai enemin wogontogu lemagoluk nede we’gerlogo pegimu re, isat wogontogu lemak, egeimu re, mo’gulontomup o,” oluk, Musa mo’gulesi. 35Di a’ge yu a’ge at Allah ebaget a’ge ebano e narlogulat, pema me’gisogo Harun eiyagai enemin wogontogulom egei ai, at Allah eiye welemagoluk, edigonoboluk, wogontogu lemagoluk, egei o. 36At Allah en Israel a’ge en an nebaget po ano re, pema me’gisogo ap an nebe eiye a’ge wogontogu lemak o, oluk wene le’gelogo mo’gulentesi ai, aphwami Israel a’ge en ap Allah eiye a’ge Harun emin, eiyagai e’balak emin edik enebil wagalat, modok-modok wogontogu lemagoluk hwalogo aiat.
37Allah ebaget wusogo e narlogulat, Gandum agap e’gen wokho Allah ebaget pogulat, onowiak erlagapsogo pou wagoluk Allah ebaget wusogo wogogulat, Allah ebaget pogwi a’ge lelak po’gwi a’ge, eberak welago a’ge ano erlak emagoluk ebalema poluk wogogulat, Allah eiye welemagoluk edikpogulat Allah ebaget pogulat, Allah emin hwedik welemagoluk ebaget pogulat, togulat, togu lemagoluk, 38Is aphwami Israel dom Sinai edipmu o leimu eba oruakhwe, Allah ebaget pogu lemagoluk, at Allah dom Sinai pam en wene lekelogo Musa mo’gulesi ano re aiat o.
Currently Selected:
Imamat 7: Wul
Highlight
Copy
Compare
Share
Want to have your highlights saved across all your devices? Sign up or sign in
