Imamat 4
4
Onowiak erlagapsogo pouwagoluk, Allah ebaget wusogo wogogulom wene
1At Allah en Musa mo’guleselat,
2“An Allah en disogo tu mia, yusogo tu mia, oluk mo’gulentegis ano is Israel a’ge pema en eneperlagat welat, wiak togwi holuk, tugulom wene is aphwami Israel a’ge mo’gulonto ano re, yuat o.
3Is an nebe eiye a’ge onue a’bosu ebam herlelik pesi a’ge ano en wiak tiso ano pam aphwami Israel a’ge enebam agoam e, at wiak tiso a’ge ano o wiak erlagapsogo paik ene ’gain Nonuk logo a’ge nebaget sapiierak a’ge ot a’ge aik ’belak erlak a’ge op a’ge holuk nak woluk, 4an nemin hwedik togumu nowi sabo werikmu ’goduk ’gwi lagaimu eba nil pam eria pou waga lemarik nebaget po a’ge ebano a’gul pam e’gik tenak poluk, an Allah nil pam woruak o. 5Weriso holuk e, ap an nebe eiye a’ge ano en emep ano woluk an nemin hwedik togumu nowi sum owi werik a’ge ogola eba ’gwi lotluk, 6emep ano e’gik pam egelik poluk, o ’gwilo modok miama asuama ebale o’borl akhit hele’gik oruakhwe sum sepnik pare akhit o’gwe Nonuk logo a’ge an nil pamat eba agauwa 7 hwerli ene emep ano herlelik pil Louwak o. 7Asogo pil louwarik emep pema wokho an nemin hwedik togumu nowi sabo werikmu nil pamat e’ben opsogo, odouk narlogumu e oyuk edikpogwi a’ge ologun-ologun edip o’gwe egelik poluk emep ado ’berlegat ano wokho an nemin hwedik togumu nowi werik ’goduk ’gwi lagaimu o o’borl akhit nebaget wusogo odouk narlogumu eragam ebano herlelik pouwak o. 8Herlelik pasuam e, ap an nebe eiye a’ge en wiak tago a’ge ano en sapi ierak a’ge nebaget odouk narlu a’ge paget werak a’ge ano ogum pam lo’boktak a’ge omorli emin, olot pam a’ge orogolin emin, 9-10Amua’go emin, amua’go esei emin, hosuk emin, Allah emin hwedik tik o, oluk, sapi wusogo esei enekho an nebaget odouk narlogwi ai ’gela’ge asogoat esei ’berlegat enekho pasuam e, ap an nebe eiye a’ge en odouk narlogumu ebano odouk narlik pouwak o. 11Odouk narlik poluk Sapi ierak a’ge ano agap emin, ebe ’belak a’ge emin, a’gul emin, e’berli agap emin, olot emin, 12’Berlegat woluk leget wogo a’ge o’borl akhit libotluk ul hwikhai lagaimu asuama ebano ebe ’berlegat odouk nouwak oluk narluak o.
13Ye, an Allah en disogo tu mia, asogo tu mia, oluk mo’gulentegis a’ge ano is aphwami Israel welagai a’ge ’berlegat en e, eneperlak welat, togwi holuk e, wiagat togumu re, 14Nis wiagat tigema hege o,” oluk, enaluk aga lemarik, onowiak erlagapsogo enebaik, oluk, sapi ierak a’ge ot a’ge mesik woluk an nemin hwedik togumu onowi sabo werikmu ’goduk ’gwi lagaimu pou waga lemarik, 15is aphwami Israel onuelak ebano en e, an Allah nil pam sapi ierak a’ge ano a’gul ene’gik sebelogo poluk, nil pamat woruak o. 16Worogwi holuk e, is an nebe eiye onue a’bosu herlelik pasu a’ge ano en sapi emep pema woluk, nemin hwedik togumu nowi sabo werik a’ge ogola ’gwi lotluk, 17Emep ano e’gik pam egelik poluk, sum sepnik a’ge eragam o’borl akhit ene an Allah Nonuk logo a’ge agauwa 7 hwerli en e ’berlegat herlelik pil laga lemak o, 18pil louwarik, emep pema wokho an nemin hwedik togumu, nowi tabo werikmu en nil pam e’ben op a’ge odouk narlogumu e uak daintak a’ge edip o’gwe egelik poluk, emep pema ’berlegat e’bano woluk an nemin hwedik togumu ebano nowi sabo sum owi werik ’goduk ’gwi lagaimu eragam eba herlilogo pouwak o. 19Herlilogo pasuam e, ap uang eiye a’ge en e, sapi werak a’ge esei degelogo pasu a’ge ebano ap an nebe eiye a’ge en odouk narlogumu odouk narluak o. 20Odouk narlik poluk, sapi ierak a’ge ebe ano tu ai re, ap mesik en wiak tago holuk e, o wiak erlagapsogo pouwak, oluk, sapi ierak tu egesa ano ’gela’geat tuak o. Asogo tugulom ano re, an en onowiak erlagapsogo poluk, nemin hwedik weleik en e, ap an nebe eiye a’ge en onowiak erlagapsogo onuam watnogulom ano re aiat o. 21Ye, sapi ebe ano ebesigat wokho leget wogo o’borl akhit ebano pei lotluk, onowiak erlagapsogo pouwagoluk, naduk sapitegei ano ’gela’geat odouk nouwak oluk, narlik pouwak o. Asogo tugulom ano re, aphwami Israel a’ge welagai a’ge ’berlegat onowiak erlagapsogo onobou wak oluk, an nebaget wusogo pogulom ano re aiat o.
22Ye, ap onue wene hwaliso a’ge mesik en e, Nonuk logo a’ge aik an ano en disogo tu mia yusogo tu mia, oluk mo’gulentigis a’ge ano eperlak welat, tago holuk e, wiagatma re, 23ede en, ai wiagat tigis hegi, opoluk, pobuk alugat emarik e, o wiak erlagapsogo pouwagoluk, kambing ierak ebetne aik ’belak erlak a’ge ebam op a’ge holugat woluk, 24an nebaget wusogo odouk narlogumu pou wotluk, ’Gain Nonuk logo a’ge An nil pam erianoat kambingano a’gul pam e’gik Sebelogo poluk, woruak o. Asogo tugulom ano re, o wiak erlagapsogo pouwagoluk, nebaget wusogo pogulom ano re, aiat o. 25Asogo tago holuk o wiak erlagapsogo paik en e, ap an nebe eiye a’ge ano en kambingwerak a’ge emep ano e’gik pam pema woluk nebaget odouk narlogumu e oyuk yakho daintak a’ge edip o’gwe, edip o’gwe emep wusogo poluk, emep ado loksogo wokho nebaget werak a’ge odouk narlogumu e oyuk yakho daintak a’ge edip o’gwe, edip o’gwe emep wusogo poluk, emep ado loksogo wokho nebaget werak a’ge odouk narlogumu eragam eba herlilogo pouwak o. 26Asogo pasu lemarik, esei ano ’berlegat an nemin hwedik welemagoluk, nebaget wusogo woknogulat, esei holuk e, odouk narlu egi ano hegitsogo takpoluk, odouk narlogumu eba narluak o. Asogo tugulom ai re, ap ano o wiak an en erlagapsogo poluk, emin hwedik weleik en e, ap an nebe eiye a’ge enasua wam worogwi ’gela’ge togwi holuk emep ano wetil lagaiam e, o wiak erlagapsogo pouwagoluk tugulom ano re, aiyat o.
27 #
Bil. 15:27,28 Ye, An Allah en, disogo togup, yusogo togup mo’gulentegis a’ge ano ap mesik we a’ge eneperlak welat tago holuk e, wiagatma re, 28ogola en e, ai re, wiagat tigis hegi, oluk aluk agalomtik, o wiak tago a’ge ano erlagapsogo pouwagoluk, kambing holou ebetne aik ’belak erlak a’ge ebam op a’ge holuk nak wik-wok, 29an nebaget wusogo odouk narlogumu pou wotluk, wiak erlagapsogo pouwagoluk, kambing woru a’ge ano a’gul e’gik sebelogo poluk, woruak o. 30Arat wusogo pasuam e, ap an nebe eiye a’ge enkambing emep ano pema e’gik pam wasu lemarik, nebaget odouk narlogumu e oyuk daintak a’ge edip ugwan eriano petne werak poluk emep a’bik ebano wokho odouk narlogwi a’ge edipmu herlilogo pouwak o. 31Ye, esei ano ’berlegat an nemin hwedik welemagoluk nebaget wusogo woknogulat esei holuk e, ap uam eiye a’ge en enekho po yo, oluk, egesa ano hegitsogoat enekho pasu holuk, ap an nebe eiye a’ge en an Allah nebaget odouk narlogumu odouk narlogwiam e’ben op hasulat, nogola nagai houwak oluk e, odouk narluak o. Ai togulom ai re ap ano o wiak an en erlagapsogo poluk nemin hwedik welik en e, ap an nebe eiye a’ge en emep ano odouk narlogumu ebale ano ologun mu en ologun mu wali’gogo e e’bet lo’boktak a’ge ebano petne ’berlegat herlelik pil laga lema holuk e, o wiak erlagapsogo pouwagoluk taga lema re, aiat o. Uam worogwi ’gela’ge tago holuk e, o wiak erlagapsogo pouwagoluk, tugulom a’ge ano re, aiat o.
32Ye, ap mesik en nowiak erlagapsogo pouwak o, oluk, domba mesik an nebaget pou weik epasulat holuk e, domba holou aik ’belak erlak a’ge ebam op a’ge holuk wik-wok, 33an nebaget wusogo odouk narlogumu ebano poumarik, o wiak erlak emak oluk, domba woru a’ge ano a’gul e’gik sebelak welat, woruak o. 34Werisoam e, at ap ano o wiak erlak emak oluk werak a’ge emep ano ap an nebe eiye a’ge en e’gikmu wik-wok nebaget wusogo e narlogumu ebale ano oyuk yogo a’ge ebano ologun petne emep ano herlelik poluk, emep loksogo ebano wik-wok e narlogumu ebano edipmu ebano herlelik pouwak o. 35Herlelik pasu lemarik, esei ebano ’berlegat an nemin hwedik wolomok oluk, domba nebaget wusogo woknogulat, esei holuk ap uam eiye a’ge en enekho po egesa a’ge ano hegitsogo enekho pasu holuk e, ap an nebe eiye a’ge enesei enak a’ge ebano mu a’ge de nebaget e narluok oluk e narlogumu pou wagaiam welago a’ge ebano, eminat la’bulogo e narluak o. Asogo togulom ano re, ap ano o wiak an en erlagapsogo poluk, nemin hwedik weleik oluk, ap an nebe eiye a’ge en onowiak erlagapsogo asua wam worogwi ’gela’ge emep e ebet petne herle logwiam e, o wiak erlagapsogo pouwagoluk, togulom ano re aiat, egei oluk mo’gulontomup o, oluk mo’gulentesi.
Currently Selected:
Imamat 4: Wul
Highlight
Copy
Compare
Share
Want to have your highlights saved across all your devices? Sign up or sign in
