Imamat 25
25
Tahun 6 arat takpoluk mesik lau wagoam togulom wene
1 #
Kel. 23:10,11 At Allah ano dom Sinai pam en Musa mo’guleselat, 2Aphwami Israel wene mo’gulonto a’ge ano yuat o. Is en, o wogentaikmu ebano ’gwi louwarik welat, yabuk wokho no ’gukhwe tahun 6 arat ago holuk e, tahun mesik lai lasuam An Allah erliknobogulat, ’gwiang ai la’bulise lemagoluk, are ukpoma re, 3Tahun mesik en ’bekhit 6 hwerli pam en di a’ge yu a’ge yetil lagalat, e’gen op uak oluk, ede’bi ’balogo hwikhogulat e’gen ’balogo po ’gogulat, til lo op at a’geat de 4tahun 6 takpoluk, mesik lai lasu holuk, tahun ai pam yabuk wokho di a’ge yu a’ge owi yorogulat, e anggur ede’bi ’balogo pogulat, tu mia o. A’geat de, nonuk logo a’ge Allah erliknobogulat, no’gwiang ai omu en ik ago welemagoluk, ukpogu lemak o. 5’Gwiang ano omu en ik emak oluk ukpoluk oruakhwe tahun mesik tumu re, di a’ge yu a’ge yorogumu ulema omu enat lebagalat, e anggur ede’bi ’balogo po erlakhwe e’gen egesiselat, tago holuk e, ’balogo onowi pam po’gwilo mia o. 6Tahun 7 ai, pam di a’ge yu a’ge omu enat li’gagalotluk, e’gen egesiso a’ge ano is emin eneragam a’ge hwami ap enemin yabuk tagonobogwi holuk e, o’go wogontogwi a’ge emin, ap ’bok a’ge enemin, welagai a’ge emin, ’berlegat en la’bulogo no’gulemagoluk ugonobo yo. 7A’geat de, onuam olema a’ge emin, parema a’ge wam Maro a’ge emin, is ogo re, onomu en ligago a’ge ai re, no’gulemagoluk, ugonobo egei, oluk, mo’gulontomup o, oluk, mo’gulesi. Tahun 50 pam ’gwiang o’go ’balogwi a’ge ano ono’gwiang eiye a’ge wogontogulom wene
8Mo’gulesirik, tahun 6 arat takpoluk mesik lau wago holuk e, ’gwiang en ik emagoluk, ukpogwi ano re, tahun 7 nak 7 hwerli tago holuk e, la’buksogo 49 tahun atma re, ene’gik wonogo poluk, tahun 49 arat tegei hegi, opoluk, 9Dugwi 7 pelelak tanggal 10 yu pam Allah emin hwedik uak o, oluk, onogola enagai hogwi ai erlige is wolomma di owi yu owi ’berlegat enesa’go holuak oluk, iak lok oso a’ge trompet ano pu hwedik-hwedik togwi holuk e, 10disogo ogu lema tahun 50 arat agama re, Allah en tahun yu pam nono’gwiang hwalogo nenebasulat, neneragam a’ge lologo enebasulat, tu a’ge paget hwalogo a’ge ano nis nenebe ’berlegat tugu lomok o, oluk, tahun 49 til lasukhwe di a’ge yu a’ge o’go ’balil lagai a’ge ebano tahun 50 pam ena’ge eiye a’ge wogontogulom a’ge iak lok oso a’ge trompet ano iak pu hogwi eria hegit atma re, ono’gwiang o’go ’bal horlogwi a’ge ebano ono’gwiang eiye a’ge hwerlai lagalat, eneragam a’ge holuk e, onowi lo’gwe lo’bok louwagoluk, peragonobogulat, tugu lemak o. 11Tahun 50 ai pam e, ono’gwiang eiye a’ge wogontogulat, eneragam a’ge en onowi pam lagalat, tugulomma re, di a’ge yu a’ge owi yetil lagalat, omu enat libago holuk ’balogulat, e anggur ede’bi ’belak erlakhwe e’gen egesiso holuk e, ’balogo is onowi pam pagathwerla’gogulat, tugu lema o. 12Tahun yu re, ono’gwiang eiye a’ge wogontogulat, eneragam a’ge en onowi pam lagalat, tu a’ge paget polikmu re, yabuk ulema omu enat, lebago a’ge ano nagat ’balogo no’gulemak o.
13Tahun yu pam e, ono’gwiang o’go ’bal horlogwi a’ge ebano ono’gwiang eiye a’ge ano ono’gwiang eiye a’ge lo’bok hwerlil laga lemak o.
14Ap mesik en are mesik o’gwiang hwerlil lasu a, at are en at o’gwiang hwerlau wago a, asogo tugulat, at mesik en at mesik mi-miarak enebil lagalom mia o. 15At mesik en are o’gwiang o’go ’balhwerlil lasu holuk e, tahun 50 agoam ono’gwiang eiye a’ge wogontogulomma re, tahun meren takpoluk, o’gwiang eiye a horlouwa, oluk, e’gik e’gerlik poluk tahun tu a’ge hegitsogoat o’go wogeselat, ye, at are en ap ano o’gwiang o’go ’balhwerlil wago holuk e, tahun 50 ago eria hegit ono’gwiang eiye a’ge wogontogu lemama re, o’gwiang eiye en horlo a’ge erlakhwe agauwa ’ga pam en, e’gen hurle ago holuk e, ’balogo owi pam pagathwerla’gwilo yo, oluk, e’gik wonogo poluk, o’go hegit-hegit wogeselat, taga lemak o. 16Asogo tugulom ano re, ’gwiang aiat o’go ’bal horlo a’ge oluk tugwi erlak o. A’geat de, agauwa meren pam e’gen hurle agoam ’balu a’ge paget wonogo poluk o’go hwalogo tugumu re, tahun a’bigat tu holuk e, o’go logat wogontogulat, ye, tahun ’biren ’gela’ge tu holuk e, o’go weiyat wogontogulat, tugu lemak o. 17An enaik Allah erliknobogulat, at mesik en at mesik mi-miarak pasulat tugulom mia o ’gain Nonuk logo a’ge enaik Allah an enat egi o, oluk, egei ai o, oluk, mo’gulom op o, oluk, mo’gulesi.
Tahun 7 pam enede pirik holuk tugulom wene
18Mo’gulesirik, ’gwiang an en wogentaikmu ebano welat, nede pirik erlak lialogo op, modok welemagoluk an en wene le’gelogo mo’gulentasu a’ge ano motluk lagalat, tugulom wene werak a’ge ano opsogo wogo poluk til lagalat, togu lemak o. 19Opsogo til lagai holuk e, ono’gwiang ai pam di a’ge yu a’ge yogo poluk e’gen onogumsogo no’gulat, enede we op at yamuksogo welat, tugu lemak o. 20A’geat de, wene yu mo’gulentasukhweat de, is en opogulat e, tahun 7 ai pam di a’ge yu a’ge yorogulat, e’gen ’balogo pagathorlogulat, tu erlakhweat de mo’gulnentasu a’ge yu re, nis noat no’gulom a’ge paget en mo’gulnentasu, oluk, enede eberumu re, is mo’gulentanogoluk e, an mesik mo’gulheik o.
21Tahun 5 arat takpoluk, mesik tak a’ge ai pam nak nogola nagai mubelesogo enebam pasulat, di a’ge yu a’ge yorogwi a’ge tahun 3 takpoluk no elirat e’gen hurleapsogo wogentaikmu re, 22tahun 7 a’ge pam no’gulat, pobuk nin tahun 7 arat takpoluk, mesik pam is di a’ge yu a’ge yorogwiam e’gen hurle agokhwe memet hogulat no’gulat, tu ai re, e’gen naduk ’belak a’ge ai pam en at nil-nil tahun 9 pamat lai louwak egei ini o,” oluk, mo’gulesi.
’Gwiang o’go ’belak a’ge ano o’gwiang eiye a’ge wogoum wene
23Mo’gulesirik, ’gwiang ai re, an Allah no’gwiangat o. “A’geat de, is ai re we, loduat eiye welemagoluk, wogentegismu re, is en ’gwiang o’go pogumu no yo. 24’Gwiang eiye welemagoluk, wogentigis a’ge ano ap mesik en e, mesik ebam o’go wasu holuk e, no’gwiang o’go ’bal hwerlaik epasu a’ge ano en e, pobuk o’gwiang eiye a’ge en o’go ’bal hwelasulat, pobuk an no uang ebalema owi yaknemak opoluk uang wogemak o. 25A’geat de, enare mesik e’gin-pe’ginsogo e’gin ebam agoam e, o’gwiang o’go ’bal hwerlasu holuk e, are mesik emin dogo a’ge waga lomtik ’gwiang o’go ’belak a’ge ano owi yagat hwerlasu lemak o. 26Ye, ap ano owi yakhwerlau wom a’ge are mesik erlagat holuk nak e, ap ano welat, uang telakma ago a’ge ebano pam ’gwiang o’go ’bal hwerlasu a’ge ano o uang ebalema owi yerige op atma re, 27owi yorogulat, o’go ’belakpoluk tahun meren welaga a’ge ano e’gik wenakho poluk e, welaga ’gela’geat owi yogo poluk, o’gwiang eiye a’geat horlouwak o. 28Asogo tugulom op at a’geat de, owi yerige a’ge o uang enama ago erlak holuk nak e, ap o’go ’bal hwerlasu a’ge ano eiye oruakhwe tahun 50 ago ano pam ono’gwiang eiye en horlogwi ano erlige en nage ap o’gwiang eiye a’ge anoat wogemak egei, ip o, oluk, mo’gulesi.
O o’go ’belak holuk e, owi eiye om wene
29Mo’gulesirik ap mesik en e, o seli lok mesik pak modok werikmu o werik mesik o’go ’bal hwerlasu holuk e, o’go ’bal hwerlasu hwerli en tahun mesik lai lasu erlak owanhwe owi yoru re op at a’geat de, 30tahun arat lai lasu holuk nak e, owi yerige a’ge ano miama re, at ap o’go ’baliso a’ge eiyagai enemin modok eiyeat agama re, tahun 50 ago ano pam ena’ge-a’ge eiye agai a’ge ano erlige ap owi eiye a’ge ano wogoum erlak o. A’geat de, at o’go ’baliso a’ge emin eiyagai e’balak dagetil waga lema a’ge emin, modok modogat eiyetak pagathorlouwak o. 31Ye, o seli mesik pakleget wogo erlak a’ge, o nak (nadugat) werikmu o’go ’bal hwerlasu holuk e, ai re, ’gwiang yabuk tugumu ado at o, oluk, onogola opoluk, ’gwiang owi yorogwi ’gela’ge yakhwerlau wagalat, ye, yakhwerlau wom mia holuk e, Tahun 50 ago ano pam ono’gwiang eiye horlogwi a’ge ano erlige ap eiye a’ge ano hwerlasulat, tugu lemak o. 32Ai re, asogo tugulom op at a’geat de, is ap Lewi a’ge onowi seli o werik a’ge mesik ap mesik en o’go ’bal hwerlasu holuk e, o werik a’ge o’go ’baliso a’ge ano is ap Lewi a’ge en ebalema di tahun yu tahun pam yogunat owi yakhorlogulom a’ge op atma re, 33aphwami Israel a’ge ene’gerlakma is Lewi a’ge onowi wali’gogo oruak ano re, is ap Lewi a’ge onowi onomuatma re, ap mesik en onowi werik mesik o’go ’baliso a’ge ano owi yoru a’ge oluk, wom erlakhwe tahun 50 ago eriano pam ena’ge-a’ge eiyerak pagathorlogwi a’ge ano erlige lau wago erlak holuk e, at owi eiye a’ge Lewi a’ge ebano enat horlouwak o. 34A’geat de, ’gwiang is ap Lewi a’ge onowi wali’gogo o’borl olukhwe, e’gela domba en nasumu ebano re, Lewi a’ge ono’gwiangatma re, o’go ’balu mia egei o, oluk, mo’gulontomup o,” oluk, mo’gulesi.
Ap ene’gik erlak a’ge holuk lerontogulom wene
35 #
Ula. 15:7,8 Mo’gulesirik, “Ap Israel a’ge mesik e’gin ebam agoam a’ge a’ge erlagapsogo pasumu re, mesik tak pagathorlo a’ge erlak ago holuk e, is Israel ene’gerlakma welat, op at welemagoluk, ap ’bok a ap we lodu emin welemagoluk wago holuk de a, tagobogwi ano ’gela’geat tagobogu lemak o. 36Ap ano ene’gerlakma welat, op welemagoluk, lethogulat, uang wogogwi a’ge ano ebalema wogentau wago holuk e, is en enaik Allah onogorlogap nobogulat, ebam louksogo mesik emin woknonto a’ge oluk, mo’guloum mia o. 37#Kel. 22:25; Ula. 23:19,20Uang wogwi ebalema re, wogentau wago holuk e, ebam louksogo mesik emin, woknemin oluk mo’gulogulat, ye, so’boru o’go ’baluagoluk e, mesik emin lo’boksogo woknoum o, oluk, mo’gulogulat, tu mia o. 38O Kanaan wogentasulik tik enaik Allah anat weleigoluk o Mesir en wogonoboluk wegi a’ge ano re, enaik Allah anat o, oluk, egei ai o, oluk mo’gulontomup o,” oluk, mo’gulesi.
Eneragam a’ge o’go ’belak a’ge ebano we lologo ugonobo wene
39 #
Kel. 21:2-6; Ula. 15:12-18 Mo’gulesirik, wene mesik mo’gulontouwak oluk, mo’guleselat, ap Israel mesik e’gin ebam ago ano pam a’ge di a’ge yu a’ge erlagapsogo Pasumu re, an heneragam a’ge welik en e, o’go ’balnebit o, oluk osoam e, arilak eneragam a’ge takpoluk wolom mia o. 40A’geat de, at yabuk tak obogwi a’ge a, ap we lodu ’gela’ge welemagoluk, ene ’bek wagai holuk a, togwi holuk. Takpogwi ’gela’ge, at ogo asogo takpogukhwe, ap ano enebaget tagokhwe tahun 50 ago ano pam aphwami eneragam a’ge lologo telakma tagonobogwi ano erlige anoat lai louwak o. 41Tahun ai a’ge lau wagoam e, at eiyagai enemin lologo telakmasogoat onoboma re, telakmasogo lologo onobogwi holuk e, at e’balak ’gwiangma salenebegisema ue, ari, welagai hegit ebayat louwak o. 42Is aphwami Israel ano re, an neragam a’geat o, oluk. O Mesir en wogonoboluk liplau wegimu re, aphwami eneragam a’geat welemagoluk, o’go ’balonobogwi ’gela’ge is Israel a’ge eneragam a’geat welemagoluk, o’go ’balonobogulom mia o. 43An enaik Allah onogorlogap nobogulat, enebaget yabuk tagonobogukhwe eniak anni pam mo’gulontogulom mia o.
44A’geat de Israel eneragam a’ge welemagoluk, o’go ’balonobu ano re, di aphwami yu aphwami ena’gul onuk mu a’ge eneragam o’gwe welagai a’ge hwami a, ap a, o’go ’balonobu op at o. 45Is aphwami lodu enemin welemagoluk, welagai a’ge a, is a’ge enemin welat dogo a’ge a, ai ogo re, o’go ’balonobogulom op atma re, o’go ’balonobogwi holuk, is Israel enemining a’ge ’gela’geat welemak o. 46I neiyagai enemining a’ge wogontogulat, eneragam a’ge ai eneminat wogontogulat, eneragam a’geat modok-modok welemagoluk, tagonobogulat, tugulom op at a’geat de, is enarilak Israel a’ge holuk nak e, yabuk tagonobogukhweat de, eniak anni pam mo’gulontogulom mia o.
47Ap Israel a’ge mesik e’gin ebam agoam a’ge di a’ge yu a’ge erlagapsogo pasu lomtik, ap ’bok a’ge a, ap mesik we loduat emin welago a’ge de a, e’gikmu oruagap poluk oruakma re, An nebe o’go ’balnebin o, oluk mo’gulosuago a’ge ap ’bok a’ge ene’gerlakma oruak a’ge ano en de a, at a’gul a’ge en de a o’go ’baliso holuk e, 48-49ap Israel ebe o’go ’bal hwerlasu a’ge ano ue ari mesik en a, aik en de a, are en a, ue ari at emin dogo a’ge en a, ap ’bok a’ge en o’go ’baliso a’ge ano, ouang ebalema owi yagosuom op at o. Ye, ap ’bok a’ge ano ebaget yabuk tugulat, uang wasu lomtik owi yerige a’ge op at ago holuk e, at enat o’go ’balogulat pogwi a’ge ano owi yakhorlo op atma re, 50ap o’go ’baliso a’ge ano e’birek en nebe o’go ’balnebin o, oluk, mo’guloso a’ge ano hwerli en tahun 50 ago ano pam aphwami eneragam telakmasogo pogwi a’ge ano erlige horok lailo holuk e, tahun meren om o, oluk, wonogo poluk ap yabuk togwi holuk e o’go wogontogwi ai ’gela’ge uang wogoum a’ge ano tahun ai ’gela’geat ago holuk e, at o’go ’baliso a’ge owi yakhwerlasu holuk e, libom op at o.
51-52Telakmasogoat nese lemagoluk, tahun opsogo wenakho poluk, o’go wogoumatma re, tahun 50 ago ano pam aphwami eneragam a’ge telakmasogo onobo ’gwi a’ge ano hegit lailo a’ge ano ene’gik wenarogulat, tahun a’bigat tu a’ge lai lasu holuk uang a’bigat owi yeriselat, ye, ’birenakho tu a’ge lai lasu holuk e, weisogoat owi yeriselat, taga lemak o. 53Ap mesik di tahun yu tahun pam yabuk takpasu holuk e, o’go wogogwi ai ’gela’ge Ap ’bok a’ge ano en ap Israel a’ge ano asogoat takpasulat, iak anni pam disogo tip, asogo tip, oluk mo’guloum mia o. 54-55Is aphwami Israel a’ge ano re, an neragam a’geatma re, ap Israel a’ge ano owi disogo yerige o, oluk mia ago holuk e, emin oruakhwe tahun 50 ago ano pam aphwami eneragam a’ge lologo onobogwi a’ge ano hegit lai lasu holuk at aphwami enemin telakmasogoat nese lemagoluk e, ukpo yo. Aphwami Israel ai re, an neragam a’ge ’gela’ge o Mesir en wogonoboluk re, asogo tagonobogu lemak o, oluk, egei ai o, oluk, mo’gulontomup o.
Currently Selected:
Imamat 25: Wul
Highlight
Copy
Compare
Share
Want to have your highlights saved across all your devices? Sign up or sign in
