Imamat 11
11
Di a’ge yu a’ge mesik yogunat no’gwi, a’ge ai no onogorlok wene
1Asogo toluk, at Allah en Musa Harun emin mo’gulentasulat e,
2“Is aphwami Israel a’ge wene mo’gulonto ano re, yuat o, di a’ge yu a’ge il ’bolok a’ge emin, erlak a’ge ’gwiang o’gwe no’gwi a’ge eba emin no’gulom ano re, 3Is ’gwiang pam welago a’ge onoyuk segerlet dungtak a’ge en emde noluk en pobuk lukho poluk nasu a’ge emin, holuk e puk a’ge de op a’ge nasu a’ge holugat no op o. 4Onoyuk segerlet dungtak a’geat de, e’gela sagalogo ’bilholuk en sogolik lukho sagalogwi erlak holuk a, ye e’gela sagalogo ’bilholuk pobuk lukho sagalogwi a’geat de, onoyuk dungtak erlak holuk a, ai re, no’gulom mia o. Ye, unta ai e’gela sagalogo ’bilholuk en, luk holuk sagalogwi a’geat de, onoyuk segerlet dungtak erlak holuk, no mia o oluk wene ’belakma re, no’gulom mia o. 5Ye, ’baik pelanduk ai e’gela sagalogo ’bilholuk en, pobuk lukho sagalogwi a’geat de, onoyuk segerlet dungtak erlak holuk, no mia oluk wene ’belakma re, no’gulom mia o, 6ye, ’baik kelinci ai re, e’gela sagalogo ’bilholuk lukho sagalogwi a’geat de, onoyuk segerlet dungtak erlak holuk, no mia o, oluk, wene ’belakma re, no mia o. 7Ye wam e, onoyuk segerlet dungtak a’geat de, e’gela sagalogo ’bil hogulomtik en lukho sagalogwi erlak holuk, no mia o, oluk, wene ’belakma re, no’gulom e mia nagat o. 8Di a’ge yu a’ge no a’ge asua ago ai re einnyo no’gulat, ap werak a’ge entail lagalat, tu mia o.
9Ik olomu a’ge is we yogunat no’gulom ano re, di hiane yu hiane agap erik a’ge o’borl pam lo’boktak a’ge po’gulogo hwikhogwi a’ge ano emin, o’borluak esa’go pam ik hialil lasu ano a’ge emin, no’gulom ai obat a’geat de, 10Di hiane yu hiane emin, di a’ge yu a’ge ik ogola ’gwe yogobet til no’gwi a’ge emin, agap erik a’ge o’borl pam lo’boktak erlak a’ge en ’beiktak a’ge de a, o’borl ngai tak a’ge pam en ik hialil lasu erlak a’ge holuk a, nonogorlok o, oluk en pobuk no’gulom mia o, 11nonogorlok o, oluk, no’gulom miama re, einnyo no erlakma en ukpogulat enebe werak a’ge holuk nonogorlok o oluk ukpogulat, togu lemak o. 12Di a’ge yu a’ge ik olomu welagai a’ge enagap en ik a’ge o’borl pam lo’boktak welago a’ge po’gulogo hwikhogwi erlak ’beiktak a’ge ano emin, o’borl ngai tak a’ge pam ik hialil no’gwi erlak a’ge ebano emin, ’berlegat nonogorlok o, oluk, no erlakma en ukpogu lemak o.
13Di tue yu tue onogorlokma re, is en nonogorlok o, oluk, no’gulom a’ge asua ano re, yuat o, sue dungeni emin, pen emin, motluk emin, 14pen sing-sing a’ge a’gul onuk ai a’ge emin, 15tue pedi-pedi a’gul onuk emin, 16tue hemania emin, kuka emin pebin erlelen emin, tue muk nasu a’ge a’gul onuk ai a’ge ’berlegat emin, 17suk babi emin, gin emin, e hobu ’baliso a’ge emin, 18tue hemania albabut emin, sumuromu emin, ’berlu 19emin dawe emin soluak emin ai ebeletak a’ge ’berlegat emin, ’gwedik ai a’ge emin, ai a’ge ’berlegat, ai re asua o, oluk no’gumu no yo.
20Di a’ge yu a’ge enagapsaburl oruak a’geat de, onoyuk pam no’gwi a’ge ’berlegat is en e, onogorlok hogu lemak o. 21Ye di a’ge yu a’ge enagapsaburl oruak a’geat de, onoyuk da pil no’gwi a’ge is en no’gulom op a’ge re yuat o. Onoyuk si hogwi a’ge oruakma re onoyuk da pil no’gwi ani o.
22Asogo takma re, ha’bukhak emin, senarl emin, ha’buktak ebeletak a’ge holuk ’berlegat emin, ai nage we no’gulom op o, 23di a’ge yu a’ge enagapsaburl oruagat a’geat de, onoyuk oruak holuk e asua at o.
24Ye, di a’ge yu a’ge no mia ai a’ge werak a’ge holuk is mesik en ten houwarik holuk e, enebam e’ben lo’bok ua ma enebe wiak nak oruakhwe, o mo obuk i louwak o. 25Is mesik en di a’ge yu a’ge no mia ai a’ge werak woluk waga lemarik holuk, e’ben onosum pam lobok ua a’ge ano erlak agokhwe yetharokma en, o mo arat obuk i louwak o.
26Di a’ge yu a’ge il maro a’ge erlak a’ge ’gwiang o’gwe no’gwi a’ge onoyuk dungtak erlak a’ge holuk, e’gela onoyuk en obuksogo ’bi lasu a’ge orlu ago erlak a’ge holuk ’berlegat ai, onogorlok en no’gwi erlak asuatma re, ai a’ge werak tenhogwi holuk, ai a’ge e’ben enebam e’gerligat welemak o. 27Di a’ge yu a’ge onoyuk 4 oruak a’geat de, onoyuk demak pil lagai a’ge ’berlegat ai, asua a’ge no miayatma re, ai a’ge werak mesik tenhogwi holuk, e’ben enebam e’girl ema a’ge oruakhwe, o mo arat obuk i louwak o. 28Al mesik en werak ai a’ge woluk wago holuk. Osum ik pam emesogo pagathorloluk e’ben ebam e’girl ema a’ge oruakhwe o mo arat obuk i louwak o. Ai a’ge ai asuatma re is en no’gumu no yo.
29Di a’ge yu a’ge onogum pam no’gwi a’ge, asua o, oluk, no’gulom mia a’ge re yuat. Wesigam emin, il hepnik emin, ’gosu ebano a’ge emin, 30hiane a’ge emin, esele emin, yobuk emin, maria ai a’ge emin, agap akhen-akhen ago a’ge emin, 31di a’ge yu a’ge onogum ’gwiang o’gwe lis hogulat no’gwi a’ge ai a’bigat no mia oluk oruakma re, ai a’ge werak is mesik en tenhogwi holuk, e’ben enebam e’girl emarik oruakhwe o mo arat obuk i louwak o. 32Ai a’ge mesik waremarik, sum pam de a, domba agap pam de a, karung pam a, e pam a, ebam otluk, e’ben e’girl ago holuk, erlak agokhwe o mo obuk i louwak oluk, di a’ge yu a’ge togwi a’ge op a, wiak a, takhweat de wokho ik olomu sebelak pei laga lemak o,
33-34sogoluak ’gwiang a’ge hele’gikmu re, di a’ge yu a’ge yagarak oruakhwe, no mia ai a’ge weraksogoluak ogola ’biso holuk e, yagarak a’ge ano ’berlegat e’ben e’girl ago alat, ye, so’boru op noma sogoluak ai pam ik na’gogo ebam herlelik pogulat, a’bosu opsogo no a’ge sogoluak ai pam na’gogulat, togwi holuk e, e’ben ’berlegat e’girl emama re, sogoluak ai sapsogo ’bo pogu lemak o. 35Di a’ge yu a’ge no mia werak a’ge so’boru werarogumu de a, sorogwi a’ge pam sogoluakma ya di a’ge yu a’ge togwi a’ge ai pam ’berlegat ’biso holuk e, ’berlegat e’ben e’girl emama re, yu ’berlegat wiak aga o, oluk, so’boru werarogumu ule’gen koluk-kelaksogo lebikpogulat, sogoluak sap-’bapsogo pogulat, togu lemak o. 36Ik elaruk lebagoma de a, ik no’gumu ’gwiang pelakma de a, ’biso holuk e, obat welema a’geat de, is logon en no mia a’ge ano a’ge werak ’biso a’ge ano ten nogwi holuk nak e, e’ben enebam e’gerligat welemak o. 37Ye, di a’ge yu a’ge owi pam ’bisoam en owi yorogwi holuk e, e’gen ano obat en bal horlogulomat a’geat de,
38owi ebano ik olomu ’bulogo pogwiam e werak ano ebam ’biso holuk nak e, e’gen ano wiagat emama re, yorogulom mia o.
39Is onuam mesik wusogo no a’ge polik a’ge ano waragoam at mesik en tenhasu holuk, e’ben at ebam e’gerlik oruakhwe o mo obuk i louwak o. 40Ye, onuam warema a’ge ano at mesik en nasu holuk e, e’ben ebam e’girl ema a’ge ano erlak emak oluk osum ik emesogo poluk, yetharokma en, o mo obuk i louwak o. Ye, onuam warema a’ge ano at mesik en woluk lasu holuk e, e’ben ebam ema a’ge ano erlak emak oluk, osum ik emesogo poluk yetharok oruakhwe, o mo obuk i louwak o.
41Di a’ge yu a’ge onogum pam ’gwiang o’gwe lis hogulat no’gwi ano re, asua atma re, is en no’gulom mia o. 42Di a’ge yu a’ge onogum pam no’gwi a’ge de a, onoyuk ugan a’ge de a, onoyuk a’bik oruak a’ge a, onogum ’gwiang o’gwe lis ogulat no’gwi a’ge ’berlegat ai asua a’ge nagatma re, 43Eben enebam agoma no oluk, tenho mia o. Enagap no’gorlogulat, e’ben enebam agalat tisoma no oluk, pobi togu lemak o, 44#Ima. 19:2; 1Pet. 1:16an enaik Allah anatma re, is en di a’ge yu a’ge onogum ’gwiang o’gwe lis hogulat no’gwi a’ge ebano e’ben enebam e’girl agoma no oluk, an nedemu ago erlakma en modok op welegi ’gela’ge, is asogoat enedemu om erlakma en modok op nagat an nebaget pulogo poluk welemak. 45An enaik Allah at weleik oluk, is o Mesir en wogonoboluk liplau wegi a’ge enaik an Allah atma re, an nedemu ago erlakma en modok op welegi ai ’gela’ge is asogoat welemak o.
46-47Di a’ge yu a’ge il maro a’ge emin, erlak a’ge emin, di tue yu tue emin, di a’ge yu a’ge ik ede’burl o’gwe lek sebel no’gwi a’ge emin, di a’ge yu a’ge onogum ’gwiang o’gwe lis hogulat no’gwi a’ge emin, onorogole pobitak poluk, yu opma re yogunat no yo. Yu wiak a’geatma re, no mia o oluk, togulom a’ge wene legelogo mo’gulentasu ano re aiat egei oluk mo’gulontomup o,” oluk mo’gulentesi o.
Currently Selected:
Imamat 11: Wul
Highlight
Copy
Compare
Share
Want to have your highlights saved across all your devices? Sign up or sign in
