Imamat 10
10
Nadab Abihu emin warenebegei wene
1At Allah en mo’gulonto erlak oruakhwe, agauwa mesik pam ap Harun eiyagai Nadab Abihu e’birek en Allah ogodouk ano pam e puk enede o poluk en onomu-onomu en nagat odouk e’gen orlok togwi a’ge ano wokho odouk orlok togulat, odouk mu’gwalogulat togwiam e, e’ben op ago a’ge ano e o’borl pam narlik pogulat, takpoluk, woluk at Allah il pam ebaget odouk narlik obo’gogulat e, e’ben op a’ge ebano a’ge o’borl pam pogulat, takpoluk. Woluk at Allah il pam ebaget e narlik obogwiam e, 2At Allah en odouk enebam ’belakpou waga ano pam modok e narlik enebesimu, Allah il pam owi sabo werik a’ge ’godukmu erianoat waregesa. 3Waregesema, at Musa en Harun mo’guleselat, “At Allah en eselat,
Is aphwami ’berlegat an enemin hwedik weleik en e, an neragam wagalat holuk e, an modok mu om erlakma en nomu degelak modok welago a’ge enil niogulat, ye, is aphwami Israel a’ge ’berlegat an modok logo welegi a’ge enil niogulat nalik worogulat, tuagoluk, tagenebaik ani o,” oluk, egei ono re, disogo togumu no oluk en egei o. Oluk, egeimu, ap Harun ano iak mesik u erlakma enat mo egei o.
4Mo egeimu, at Musa en Harun aik Uziel eiyagai malik Misael, Elsafan emin worl-entesimu wegesema, “mo’gulentasulat, his henarilak waregesarik Allah owi sabo sum owi werikmu asuama ’goduk ’gogumu oruak a’ge yu, wogonoboluk leget o’borl akhit ebe enebei lit o,” 5oluk, mo’gulentesimu, at Musa en mo’gulentesi ano hegitsogoat ap ’biren waregesa a’ge eriano ono’bogoyum ogolayat a’ge ’buktak welegesa a’ge eriano nak ’buktakhwe, wogonoboluk leget o’borl akhit eba enebil legesa.
6Enebil legesema, at Musa en Harun emin, eiyagai Eleazar Itamar e’birek emin, mo’gulentasulat, “His asogoat waragalat, ye, Allah eiyagai odoktak a’ge Israel ebano at Allah en olot het enebam pasulat, tu no oluk, ap waregesa a’ge ai paget henede wathorlogulat, henalli a’ge henebam a’ge hwikhogulat, henasu hebilogo ukpogulat, tu mia o. At e, his henarilak aphwami Israel a’ge ai page, at Allah en odouk pam warenebegei ai pam enebaget lo’gu marogulom ai obat o. 7His nage at Allah pagerat polik welemagoluk a’bosu ena’gul pam pogwi ai ’gela’ge a’bosu henebam herlelik pegi a’ge oruakma re, his wathonobu ’gela’ge, Allah emin hwedik togumu owi sabo sum owi werik a’ge ’godukmu ya nagat welemis o,” oluk, mo’gulentesimu, is ebano Musa mo’gulesi ano ’gela’geat hegitsogoat tegisa.
Ap Allah eiye a’ge en a’bosu enede ’balagai a’ge no mia wene
8Asogo toluk, at Allah en ap Harun ano mo’guleselat,
9“Hat heiyagai enemin wathonobuano oluk, ik anggur a’bosu de a, a’bosu enede ’belak enebasu a’ge ano de a, noluk e, an nemin hwedik togumu nowi sabo werikmu eba ’gwilo modok mia o. Wene le’gelogo mo’gulhentasu legi yu re, heiyagai he’balak dagetil laga lorogup a’ge enemin enat modok togu lorogup a’ge weneat pegi ai o. 10His en ebabut pobi hogulat, mesik yu Allah ebaget togulat togulom a’ge polikhegi. Mesik yu we yogunat togulat togulom a’ge hegi, Mesik e tu mia a’geat hegi. Ye, mesik e op tu a’ge hegi, opoluk pobi togu lemis o. 11Is aphwami Israel a’ge enaluk emagoluk, “An Allah en wene le’gelogo Musa mo’gulegis a’ge ano ’berlegat heiyagai enemin en aphwami Israel a’ge mo’gulontogu lomup o,” oluk, mo’gulentesi.
Allah ebaget pogwi a’ge pema ap Allah eiye a’ge Imam wogontogulom wene
12 #
Ima. 6:14-18
Mo’gulesimu, at Musa en ap Harun emin, at eiyagai Allah en enelaluk ugenebesi a’ge Eleazar Itamar emin, mo’gulentasulat, “Di a’ge yu a’ge at Allah ebaget pogwi a’ge e narlogulat gandum e’gen wogo a’ge emin Allah ebaget pogwi a’ge ebano, pema dedil ago holuk, modogat asuama re, poruagoluk ragi emin, po erlak oruakhwe, werakho poluk ebaget odouk narlogumu eragam eriano en no’gu lomup o. 13Di a’ge yu a’ge at Allah ebaget pogwi a’ge e narlogulat, pema dedil ago holuk e, ap an nebe eiye a’ge wogontogu lemak o, oluk, Allah en mo’gulnentesi a’ge ano hegitsogo hat heiyagai enemin hena’geatma re, wik-wok o omu hunsogo werikmu ebano enat no’gulomup o.
14 #
Ima. 7:30-34
Asogo a’geat de, aphwami Israel a’ge en Allah emin hwedik welemagoluk ebaget wusogo wogogwi a’ge amua’go odogun uak emin, odua’gen sarak emin, yu hat Allah hebaget o, oluk, ene’gik ’bilogo poluk, pogwi ano re, hat heiyagai logomalik hwelani henemin no’gu lorogup a’ge, henebaget pulogo atma re o ai en nak no’gulat, togu lemagoluk, polikmu re, eba enat no’gu lomup o. 15Esei enak a’ge e narluogoluk woluk wagalat, awe sarak Allah ebaget po a’ge ano emin, amua’go odogun uak Allah il houwagoluk, e’gik ’beli’gogo wogoum a’ge ano emin, la’bulogo woluk waga lemarik, esei e narlik-poluk, awe sarak emin, amua’go odogun uak emin, yu hat Allah hebaget a’ge o, oluk, onuk niogu lemarik, ap’an nebe eiye a’ge wogontogu lemak o,” oluk, at Allah en egei a’ge ano hegitsogo awe emin, amua’go odogun uak emin, Allah hwiak otluk, no’gu lomup o.
16Asogo mo’gulentesirik, at Musa en onowiak erlagapsogo po a’ge paget, wusogo Allah ebaget wogoum a’ge kambing ierak a’ge ano palegei a’ge re, kambing ebano arat e narlil legesema re, Harun eiyagai Eleazar Itamar emin waronobu erlakma en ugenebesi a’ge ano wene yagentasulat, 17#Ima. 6:24-26“At ebaget a’ge ano, is aphwami Israel a’ge onowiak erlagapsogo poluk, at Allah emin hwedik welemagoluk, asua uam worogwi ’gela’ge wusogo at ebaget po a’ge modogat asuama re, oluk, wokhentesi a’ge oruakhwe, no paget his en onowiak erlagap po a’ge paget kambing ai, Allah owi sabo sum owi werik a’ge odipmu yema en no erlakma en, odouk narligep? 18Kambing emep e, Allah owi sabo werik asuama yema woluk ’gu agai erlakma re, an en mo’gulhentegis a’ge hegitsogo his en Allah owi sabo werik asuama yema en no a’ge tigep o.”
19Oluk, mo’gulesimu at Harun en Musa mo’guleselat, “Agauwa yu pam aphwami Israel a’ge onowiak erlagapsogo pou wagoluk at Allah ebaget wusogo wogogulat, ebaget wusogo e narlogulat, tegisa ano re, obat tegisemaat de, tu a’ge oruakhwe, an en muat tegis yu re, wene hwelak erlakhwe, at ebaget a’ge yu nele holuk e, at Allah en agai nebelep epegen?” 20Asogo mo’gulesimu, at Musa en wene ai hwelegeitik e, obat egei, opoluk mo egei.
Currently Selected:
Imamat 10: Wul
Highlight
Copy
Compare
Share
Want to have your highlights saved across all your devices? Sign up or sign in
