Ratapan 2
2
Allah olot het o Sion ebam pesi wene
1O hena en dom e’girlogo pil lasu ai ’gela’ge, Naik ’gain Onuk Logo a’ge olot het o Sion agalogo ebam e’gerlik pesi ano re, modok nogorlogat o! Israel onuk lekho ’bogorl pam ligaga a’ge ano ’gwiangma hwik ha’bu agalat, At olot het enebam po erlige At oyuk pou wagoma eba, ukpo erlakma en olot het enebam pasulat, tegei o.
2Edeap onobu erlakma en naik ’gain Onuk Logo a’ge Allah en is Yakub pam a’ge welagaimu ’berlegat erlagapsogo enebasulat, at olot het en o Yehuda dogo emelmel a’ge ebano agalogo ’berlegat lologunsogo ’bo pil lasulat, at eragam enebasumu ebano emin, at ’gwelakharok welagai a’ge ’gain ’gain emin, ononuk wiagapsogo pasulat, tegei o.
3Olot het ano odouk magale ’gela’ge lobukhasulat, is Israel enanni welagai a’ge ebano enanni erlagapsogo enebasulat, is eneselei a’ge en waronobuogoluk horok lau wagai en e, at e’gik ’bekhit akhit lisogo uak wasulat tegei o. Di a’ge yu a’ge odouk magale en perlengsogo nasu ai ’gela’ge, is Yakub a’ge ene’gerlakma olot het odouk magale ’gela’ge en enebe erlagap enebil lasulat, tegei o.
4Ap eneselei a’ge ’gela’ge otluk, ogodok esegen e’gale pam poluk pebisogo wago ai ’gela’ge til wagalat, enemin il ’belak a’ge en waronobogwi ai ’gela’ge, warenebigoluk, e’gik ’bekhit akhit en segen e’gale pam dok peberik pasulat, ede eberiso a’ge ano hegitsogo warenebil lasulat, o Sion agalogo owi sabo werik a’ge pam olot het odouk magale ’gela’ge olot het ebam herlelik pasulat, tegei o.
5Naik ’gain Onuk Logo a’ge Allah ai re, ap enemin weim hwerlirak a’ge ’gela’ge oruakma re, is Israel a’ge ebano Allah emdema yagarak enebasulat, Ap ’gain-’gain onowi lok opsogo werik a’ge ebano moluk-melaksogo pil lasulat, at eleget pak werik a’ge ano moluk-melaksogo pasulat, ye, o Yehuda agalogo ano mesik eminat ede wathwerlasulat, lo’gu mariselat, taga lemagoluk takpasulat, tegei o.
6Orabo yabukmu werik a’ge moluksogo pogwi ’gela’ge at ’gain Onuk Logo a’ge Allah en at owi werik a’ge ano moluktak pil lasulat, At erliktuogoluk odoktu agaimu ano ogo moluktak pasulat, o Sion onogola enagai en seni sorogulom oluk wene werak a’ge emin, nogo 6 takpoluk tono ’gela’ge pam set hwalogo wolom a’ge wene werak ano emin, memerak pouwagoluk takpasulat, ye, ap ’gain a’ge emin, is ap at ebe eiye a’ge emin, olot het odouk ’gela’ge enebam poluk ugenebasulat, tegei o.
7Enaik ’gain Onuk Logo a’ge Allah en at ebaget wusogo odouk narlogumu ebale ano ukpasulat, At owi werik omu degelak a’ge ano uk, poluk lasulat, o Sion uelak ’gain-’gain onowi o lok opsogo werik a’ge ano moluk-melaksogo pou wagoluk, eselei a’ge ene’gikmu pasulat, tegeimu re, Israel onogola enagaisogo seni sorogulom oluk wene le’gelak oruak a’ge ano hegitsogo sorogulat, amitmit sup ogwi ’gela’ge. Eselei a’ge en at ’gain Onuk Logo a’ge owi werikmu ’gwilotluk welat, amitmit sup ogulat, ngai wai ogu legesa.
8’Gain Onuk Logo a’ge en o Sion agalogo eleget pak wogo a’ge ai, modogat moluk-melaksogo po yo, oluk pulogo pesimu oruak o. At en e’gik pam edikpoluk tenak wolom erlakma en moluk-melaksogo pou wagoluk, leget pak wogo a’ge ai ’berlegat herle walhegeik, elira’ge meter pam walhesimu, modogat, Moluk-melaksogo pou wama hege o, helep pakleget wogo a’ge o’borl olukhwe a’ge emin enat, lo’gu marogulat, omuat moluk-moluk ’begei o.
9O Sion ’goduk ’gwi lagai a’ge ano ’bulogo wiagarak poluk ’gwiang ogola ’baksogo ’bisoam ’gwiang en ebis pesimu, enil ho a’ge mia aga o. Asogo tagoam e, ’goduk uak tenak a’ge ogo ’goluk ’gelaksogo wiagap pesi o. At ue ’gain Onuk Logo a’ge emin, uelak ’gain-’gain emin, di aphwami yu aphwami ene’gerlakma hwik entai lagama welat, ’gain Onuk Logo a’ge en disogo tu oluk mo’gulonto erlagat welat, ye, Allah en mo’gulentasukhwe, mo’gulentigisa a’ge holuk ogo re, ’gain Onuk Logo a’ge en enabi pam mo’gulentasu ano wogwi erlagat welat, togwi o.
10O Sion agalogo uelak en ap ebano is enebe ’gwiangma hweriogo welat eniak erlak welegesa, ul ena’gul pam pogulat, onosum wiak a’ge ’buk horlogulat, ye, o kota Yerusalem ogolani hwelani ebano ’gwiang pam onorogole sogup welat, togwi o.
11An na’gul a’ge ena’guluak erlak agalat, eneiyagai logomalik hwelani emin, malik ’get dogo a’ge emin, o kota ebela ’gwe ebano ’beling-’belang ogulat, togwi ai pam nge tagalat, nil perik pasulat, nede obotut modok taknebasulat, nede modok erlak agalat, tak o yo.
12Malik eba en ap werak a’ge ’gela’ge, o kota ebela ’gwe ebano enil porluksogo ’beling-belang ogulat, enialak ene’gikmu en onowi pam en, waretil lagalat, asogo togulat, “Hwenik nia o, so’boru woknemin o, ik woknemin o,” oluk, mo’gulontogulat, togwi o.
13O Yerusalem agalogo hat yu o. Hat takhebesimu welegen a’ge ai, enak a’ge hagun ene no pam walhegeik mo’gulheik no? O Sion agalogo ap emin nogou erlak a’ge hat yu o! Hede ago werak hebasulat, tu a’ge ano pam walhegeik mo’gulheselat, tik o. Ik laut duelak welago ai ’gela’ge, hat hebam aga ano pam hede obotut takhebasu ai, modok elalin a’ge takhebasumu re, sa en obapsogo hobo no? erlagat o.
14Disogo ema o, oluk, mo’gulhogwi a’ge en, mo’gulhogu legesa ano re, eniak eseiat mo’gulhogulat, mesik en ogo takhobo erlakhweat de, mo’gulhogulat, herle werak hoboluk hebeilo ’gela’ge, Wiak disogo taga legen o, oluk, selakma at mo’gulhoum erlakma en hat taga legen a’ge ano takpogulat, Allah en egeimu at mo’gulhogu lege o, oluk, mo’gulhogu legesa ano re, we eniageseiat mo’gulhogulat, ebela ’bekhitsogo oruakhweat de, ’gwi’gwani mu’gwe wokhoboluk ’gotnoktak hobogulat, tugu legesa o.
15Is aphwami en, “O kota modok ebelak modogat op o,” oluk, ogulat, “is aphwami o ’gwiang pam welagai a’ge ’berlegat enede aganhan a’bigat hogulat, asogo togwi o. O Yerusalem agalogo ano re, yu aga yuat logwe?” oluk, hat oruakhwe lagalat, “A, ha?” Oluk eidarak hobogulat, mi-miarak hobogulat, ena’gul morlil hogulat, togwi ai o.
16Henemin weim hwerlitak a’ge ’berlegat en enemdema yagat hobuogoluk enemde lasogo welat, “At tagobo a’ge nenede hwedik welat, ’ge erlige en de, wiagapsogo pul, oluk, yetharok welat, tugu lege a’ge ano pageat arat lau wagama re, nenemdema pageat arat yagarige o,” oluk, mi-miarak pogulat, eniak ’gerlit marogulat, togwi o.
17At ’gain Onuk Logo a’ge Allah en tu a’ge pulogo pesi a’ge ano arat tagalat, “Disogo tik o,” oluk, o nadugat wene pesirik mo’gulentesi a’ge ano dagan u erlakma en e, hegitsogo nak tagalat, edeaphobo erlakma enat, wik-wiaksogo takhebasulat, hemin il ’belak a’ge en enanni otluk “obat takpege o!” Oluk enede en opogulat, onogola enagai emagoluk takpasulat, hemin il ’belak a’ge en hat sebelogo hoboluk enanni emagoluk takpasulat, tegei o.
18Is aphwami ai, eniak loksogoat enaik ’gain Onuk Logo a’ge Allah mo’gulogumu re, o Sion agalogo hat hiak loksogo ’gonu mo’gulemin o. Set hwal hwerlasulat, nge tu pukmu en we welat, tago erlakma en ik lasu ai ’gela’ge, erlige hup nge sago nak wolomup o.
19At Yeremia en e, Israel a’ge Nenaik ’gain Onuk Logo a’ge e’bek wemagoluk disogo mo’gulentesi, His aphwami Israel a’ge henebe ’berlegat henelaluk welegep a’ge yu lougwe! Is ap huba’go ’godukmu ’gagalak welagai ai ’gela’ge, nogou erlakma en henelaluk modok welat, his inotluk heniak loksogo ogulat, ik herlelik pogwi ai ’gela’ge, henede opou legep a’ge ebano haik ’gain Honuk Logo a’ge Allah il pam herlelik pogulat, henemalik so’boru nele en enil porluksogo ebela ’gwe ’boutak welagai a’ge ebano enelaluk otluk inetil louwagoluk enebaget hene’gik at akhit lagabak poluk, mo’gulogulat, togu lomup o.
20“Hat naik ’gain Onuk Logo a’ge Allah o. An taknebasu yu ’gela’ge, mesik sa takpegimu en taknebasu legen? Erlagatma re, An yu hil yetniasulat, pobirak nebasulat tin o. Is hwami enemalik onogola en modok dogo a’ge enedeap onobogulat, degelonobogwi a’ge ebano wusogo no’gulat, ye, is ap hebe eiye a’ge emin, mo’gulentasukhwe, mo’gulentegisa a’ge emin, naik ’gain Onuk Logo a’ge Allah howi werik omu degelakma ebano en wusogo onobogulat, togwi ai re, obat epegen?
21Is ap enarlue a’ge emin, souwe a’ge emin, ebela ’gwe ul e’gerlakma gelil etil lagalat, nogolani hwelani dogum emin, malik logomalik souwe a’ge emin, wa’gun pam werak onobogwiam waretil lagalat, asogo tak oruakma entegis o. Holot het en tagonobo a’ge horok lau wagoam, werak enebasulat, hedeap onobo erlakma en, wusogo enebasulat, tigen o.
22Onogola enagaisogo welat soru a’ge paget yo’go onobogwi ai ’gela’ge, Hat en e, an neselei a’ge nogorlok ho a’ge en nebe wale’gik nobou magoluk, yo’go enebegen o. ’Gain Honuk Logo a’ge holot het nenebam pegen ai erlige, ap mesik hweiye lebagalat agap delhwerlasulat, tu erlagat o. Is an en yo’gul enebiselat, enebe logwap enebiselat, tigisa a’ge ebano neselei a’ge en erlagapsogo enebesi o,” oluk mo’gulesi.
Currently Selected:
Ratapan 2: Wul
Highlight
Copy
Compare
Share
Want to have your highlights saved across all your devices? Sign up or sign in
