Yosua 2
2
Yosua en o Yerikho enil ’gogolil louwagoluk peragenebesi wene
1 #
Ibr. 11:31; Yak. 2:25 Asogo mo’gulegisema, at Yosua ap Nun omlogo ano ap Sitim a’ge enebe ’biren ling-long peragenebasulat e, disogo mo’gulentesi,
“His o eba henil ’gogolil lit o. O lok logo re, o kota Yerikho aiat o,” oluk mo’gulentesi. Asogo peragenebesimu is ebano legesarik, hwe danian denago a’ge onuk Rahab oruakma ’gwigisarik welegesa. 2Asogo at owi pam oruakhwe, is aphwami eba a’ge en e, ap ’gain o Yerikho onuk logo a’ge disogo mo’guligisa,
“Yethemin. Is ap Israel a’ge logon o yema enil ’gogolil womogoluk huba’go wegesa o,” oluk mo’guligisa. 3Asogo mo’gulegisema at ’gain Onuk Logo a’ge ano hwe Rahab ebam wene disogo wusogo perakpesi,
“Is ap o yema ’berlek ’gogoluogoluk hat he’bek wegesarik howi pam ’gwigisa ebano lebigenebemin o,” oluk mo’gulesimu, at hwe Rahab mo’gulesi legesa.
4-6Asogo mo’gulesi legesema, at hwe Rahab en disogo mo’gulentesi,
“Demat, ap eria ne’bek wegesa a’ge re, is ’geba en wegesa re, an neperlak o. O mo obuk i lasukhwe, o kota yu pakleget ’goduk laruogoluk togumu, ap enebe libegesa. Libegesa ai re, ’gebane libegesa ’gela’geat neperlakma re. His en e, is ene’berlik perlenesogo mugentai lu o. Mugenta laguptik e, is owan lagaimu elit tenonobogup epasu legi o,” oluk mo’gulentesi. (Asogo mo’gulentesi a’geat de, at ap ’biren eriano o dum pam lagabak onoboluk herle rami ’gelogo ere’gik pesi a’ge pam naduk sebelogo hisak enebegei.)
7Asogo mo’gulentesimu, is ap, at ’gain o Yerikho a’ge en yo’go onoboluk peragenebesi a’ge ebano, o kota Yerikho ukpoluk libegesa. Asogo libegesarik leget o’borlma oruakhwe, leget pakleget ’goduk emde ’belak a’ge ano ’goduk larigisa. Is ap ebano en ap ’biren enil ’gogoluogoluk wegesa a’ge eriano heraenebil-enebil, hwerli ik Yordan ’balogo libagaimu ebano lai legesa.
8Asogo lai legesema, is ap ’biren Israel a’ge o enil ’gogoluogoluk wegesa a’ge eriano owan nogo uogoluk togukhwe, at hwe Rahab ano o dum pam ligaga. 9Asogo ligagarik disogo mo’gulentesi,
“Henaik ’gain Onuk Logo a’ge en o kota yema arat hene’gikmu wokhentesi ano an naluk o. Asogo wokhentesimu, his henebaget nis aphwami yema a’ge nonogorlok a’bik hogulat, nenede erlak aga o. 10#Kel. 14:21; Bil. 21:21-35His o Mesir en libagaihwe at henaik ’gain Onuk Logo a’ge en ik Laut Merah modok dengap tegei ano pam, is ap ononuk Sihon Og e’birek ap ’gain ononuk logo Amori a’ge ’biren, ik Yordan mo yegelogo orlu ago akhit his en modok warenebigep a’ge emin, nenesa’go arat hwelige o. 11Nis wene ai a’ge nenesa’go hweligerik e, nenede modok erlak agarik nonogorlok a’bigat aga o. Ye, aphwami nis a’ge onogorlok erlak a’ge logon ’berlegat his henemin weim obu re, modok mia aga o. His henaik ’gain Onuk Logo a’ge ai demat di a’ge yu a’ge ’gwiangma a’ge ’bogorl pam a’ge elit tu nak o. 12-13Holuk e, norokhwilak o. An en hisak henebegis a’ge yu paget, his en henaik ’gain Onuk Logo a’ge onuk pam ho’buk ’baloguptik pobuk nia naik enemin narilak norokhwi enemin obap onobogu lomup o. His en e, anni a naik nebablak nosilak enemin, is enebe ’berlek mesigat a’ge, nenebe uknonoboluk watnonobu erlakma en uknenebagup a’ge paget e an demat naluk emagoluk en mesik woknemin da,” oluk ’gonu egei. 14Asogo ’gonu egeimu is ap ’biren ebano en e, disogo mo’guligisa,
“Hat aphwami logon nis togu lege a’ge yu paget mo’gulentagun erlak holuk e, pobuk Nenaik ’gain Onuk Logo a’ge en e, ’gwiang o yema woknontouwema nis demat obap hobuat o. Nis obok mo’gulheige a’ge hegitsogo tul erlak holuk e, nenaik Allah en watnonobua o,” oluk mo’guligisa.
15Asogo mo’gulegisema, at hwe Rahab ano owi o kota helep leget esa’go akhit werik oruakma at jendela ’belakma en enebe ’go’bi erlilogo ’belabenebegei. 16Asogo ’belabenebiselat disogo mo’gulentesi,
“His o dom pam eba lit o. Eba lagupmu is mukhontogwi a’ge en tenhonobua modok erlak ani o. Dom pam eba welat agauwa henagan pam henebe hisakho oruakhwe, is en ukhonoboluk onowi pam togolik wagaiam en de, ebela ’gwe toluk ’gwi lu o,” oluk mo’gulentesi.
17Asogo mo’gulentesimu, is ap enilen wogu legesa a’ge ebano en, hwe Rahab disogo mo’guligisa,
“Obat o. Hat en ’gonu e’gen a’ge ano nis obok mo’gulheige a’ge hegitsogo tulat o. 18Asogo tul a’geat de, hat mesik yu nak tip o. Pobuk nis o yema ’gu agaihwe, herle momi a’ge yu o jendela ’gwe hat en ’belapnonobogun o’gwe ai erlilogo urloktak pomup o. Ye, hia haik emin, huelak emin, ap hat en a’ge holuk ’berlegat o werikmu yema nak odoksogo onobomup o. Hat asogo togunmu re, nis obok mo’gulheige a’ge hegitsogoat takhobul ani o. 19Ap hat a’ge de mesik, owan ’gwilo erlak oruakma en worogwi holuk e, emep at u’gwarek e’gik pam nak ema o. Nis e, erlak o. A’ge re, is hat howi ogola nak welema a’ge de, waronobogwi holuk e, enemep nis nene’gik pam welema o. 20Asogo a’geat de, nis togu lege a’ge ano hat aphwami logon ’baksogo mo’gulentagun holuk e, nis en obok mo’gulheige a’ge ano ukhobulat o,” oluk mo’guligisa. 21Asogo mo’gulegisema, at hwe Rahab ano en e,
“His egep a’ge hegitsogoat emak o,” oluk peragenebesimu is ebe ukpoluk lebegesa. Lebegesema, at herle momi a’ge jendela pam en erlilogo urloktak pesi.
22Asogo tegeimu, is ap enebe ’biren eriano lebegesarik dom pam ebano agauwa henagan hisogo welat mo egesema, is ap ’gain onuk logo a’ge en yo’go poluk peragenebesi a’ge en mugonoboluk legesarik enebe heraentigisa ’gal e, erlak en ugonoboluk togolik onowi pam Yerikho wegesa. 23Asogo wegesema is ap ’biren Israel a’ge o enil ’gogolil legesa a’ge ebano onowi pam togolik louwogoluk legesa. Asogo legesarik, is dom pam en ’bu egesarik, ik Yordan ’bil-’bal at Yosua Nun omlogo e’bek legesarik wene ebano ’beli’gogo mo’gulogulat e, disogo mo’guligisa,
24“Nenaik ’gain Onuk Logo a’ge ano demat o ai arat woknentesi. Is aphwami eba ’berlek nis nenebaget onogorlok en enede erlak aga,” oluk mo’guligisa.
Currently Selected:
Yosua 2: Wul
Highlight
Share
Compare
Copy
Want to have your highlights saved across all your devices? Sign up or sign in
